ᒨᓯᓯ ᓯᑕᒪᖏᑦ 24
24
ᐸᓛᒻ ᒎᑎᐅᒃ ᐅᖃᐅᓯᐅᖁᔭᖏᓐᓂᒃ ᐅᖃᕐᓂᖓᑕ ᐱᖓᔪᐊᑦ
1ᐸᓛᒻ ᖃᐅᔨᒐᒥ ᐊᑕᓂᖅ ᐃᓴᕆᐊᓕᒥᐅᓂᒃ ᓮᒻᒪᕐᑎᑦᓯᓂᕐᒥᒃ ᖁᕕᐊᒋᔭᖃᕐᒪᑦ, ᐃᓛᓐᓂᑦ ᐱᐅᓯᕆᕙᒃᑕᒥᑐᑦ ᐊᖓᒃᑰᓇᓱᐊᕐᓂᒃᑯᑦ ᐱᓇᓱᐊᓚᐅᓐᖏᓚᖅ, ᐃᓄᖃᖏᑦᑐᒧᓪᓕ ᓵᓐᖓᓚᐅᕐᐳᖅ. 2ᐸᓛᒻ ᐊᕙᒻᒧᑦ ᕿᕕᐊᕋᒥ, ᐃᓴᕆᐊᓕᒥᐅᑦ ᑕᖕᒫᕐᓯᒪᔪᑦ ᑕᑯᕔᑦ ᐊᕕᒃᑐᕐᓯᒪᓪᓗᑎᒃ ᑭᖑᕚᖑᖃᑎᒌᑦ ᑲᑎᓐᖓᔪᑦ, ᒎᑎᐅᓪᓗ ᐊᓂᕐᓂᖓᑕ ᑎᑭᑉᐹ.
3ᒎᑎᒧᑦ ᐅᖃᖁᔭᐅᓂᓂ ᐅᖃᐅᓯᕆᓕᕐᐹ ᐅᖃᕐᓗᓂ:
“ᐸᓛᒻ ᒎᑎᒥᑦ ᐅᖃᕐᑎᑕᐅᓂᖓ ᐱᐅᕆᐅᑉ ᐃᕐᓂᖓᑕ,
ᐊᖑᑎᐅᑉ ᐃᔨᖏᒃ ᐅᐃᑎᑕᐅᓯᒪᔫᑉ ᒎᑎᒧᑦ ᐅᖃᕐᑎᑕᐅᓂᖓ,
4ᒎᑎᒧᑦ ᐅᖃᕐᑎᑕᐅᓂᖓ, ᑐᓵᔫᑉ ᒎᑎᐅᑉ ᓂᐱᖓᓂᒃ,
ᑕᐅᑐᒃᑎᑕᐅᔫᓪᓗ ᐊᔪᒐᖃᖏᑦᑐᑉ ᑕᑯᑎᑦᓯᔪᑎᖏᓐᓂᒃ,
ᐹᒻᒪᖓᔫᓪᓗ, ᐃᔨᖏᒃ ᐅᐃᑕᓪᓗᑎᒃ:
5ᑐᐱᕐᑎᑦ ᐱᐅᔪᐊᓘᕗᑦ, ᔧᑰ!
ᐃᓴᕆᐊᓖ, ᐃᓂᒋᔭᑎᑦ ᐱᐅᔪᐊᓘᕗᑦ!
6ᓇᕐᓴᑎᑐᑦ ᐱᕕᑐᔪᐊᓗᒃᑎᑐᑦ,
ᐱᕈᕐᓰᕕᒃᑎᑐᑦ ᑰᑉ ᓯᓈᓃᑦᑐᑎᑐᑦ,
ᐱᕈᕐᓯᐊᑎᑐᑦ ᐋᓘᒥᒃ ᐊᑎᓕᒃᑎᑐᑦ ᐊᑕᓂᐅᑉ ᐃᓕᐅᕋᕐᓯᒪᔭᖏᑎᑐᑦ,
ᓇᐹᕐᑐᑎᑐᑦ ᓰᑕᕆᒥᒃ ᐊᑎᓕᒃᑎᑐᑦ ᐃᒪᐅᑉ ᓯᓈᓃᑦᑐᑎᑐᑦ,
7ᑖᓐᓇ ᐃᒥᕐᒥᒃ ᖃᑦᑕᖁᑎᒥᓃᑦᑐᓂᒃ ᑯᕕᓯᔪᒫᕐᐳᖅ,
ᐱᕈᕐᓯᐊᒃᓴᖁᑎᖏᑦ ᐃᒪᕐᓂ ᓇᓂᑐᐃᓐᓈᕈᒫᕐᐳᑦ,
ᐊᖓᔪᖅᑳᕐᔪᐊᖁᑎᖓ ᐋᒑᒡᒥᑦ ᖁᑦᓯᖕᓂᕐᓴᐅᔪᒫᕐᐳᖅ,
ᐊᖓᔪᖅᑳᕐᔪᐊᖑᕕᖓ ᖁᑦᓯᒃᑐᒦᑦᓱᒫᕐᐳᖅ.
8ᒎᑎᐅᑉ ᐊᓂᑎᑉᐹ ᐄᑦᔨᑉᑎᒥᑦ;
ᓴᓐᖏᓂᖃᕐᒪᑦ ᐃᒻᒧᒃᓯᐅᒐᕐᑐᑦ ᓄᔪᐊᕐᑐᑐᑦ;
ᐃᓅᖃᑎᒌᒡᔪᐊᑦ ᓄᖑᑦᓱᒫᕐᐰᑦ, ᐊᑭᕋᕐᑐᕐᑎᓂ;
ᓴᐅᓂᖏᑦ ᓯᖁᒥᑦᓱᒫᕐᐰᑦ ᖃᕐᔪᒥᓄᓪᓗ ᐳᑐᓗᒋᑦ.
9 #
ᒨᓯᓯ ᓯᕗᓪᓖᑦ 49:9;
ᒨᓯᓯ ᓯᕗᓪᓖᑦ 12:3. ᐅᑯᕗᖅ, ᐃᓂᓪᓚᒡᓗᓂᓗ ᓛᔭᑎᑐᑦ;
ᓛᔭᑎᑐᑦ, ᑭᐊ ᑐᐹᕈᒪᕚ?
ᓮᒻᒪᕐᑎᑕᐅᓕ ᐃᓕᖕᓂᒃ ᓮᒻᒪᕐᑎᑦᓯᔪᖅ,
ᐱᐅᖏᑦᑐᒧᑦ ᐱᔭᐅᓕ ᐃᓕᖕᓂᒃ ᐱᐅᖏᑦᑐᒧᑦ ᐱᔭᐅᖁᔨᔪᖅ.”
10ᐰᓚᒃᓗ ᓂᓐᖓᒃᐳᖅ ᐸᓛᒻᒧᑦ, ᐊᒡᒐᓂ ᑲᓱᕐᑎᓪᓗᒋᑦ; ᐸᓛᒻᒧᓪᓗ ᐅᖃᕐᓗᓂ, “ᐊᑭᕋᒃᑲ ᐱᐅᖏᑦᑐᒧᑦ ᐱᔭᐅᖁᓪᓗᒋᑦ ᐅᖃᖁᕙᒋᑦ, ᑕᑯᒋᑦ, ᐊᖏᔪᐊᓗᖕᒥᒃ ᓮᒻᒪᕐᑎᑕᑎᑦ ᐱᖓᓱᐊᕐᑎᕐᓗᒋᑦ! 11ᑍᒤᒻᒪᑦ ᒫᓐᓇ, ᐃᓂᖕᓄᑦ ᕿᒫᓕᕆᑦ. ᐅᖃᓚᐅᕐᐳᖓ ᐊᖏᔪᒥᒃ ᐅᐱᒋᓂᐊᕐᓂᕋᕐᓗᑎᑦ, ᑭᓯᐊᓂ, ᐊᑕᓂᐅᑉ ᐅᐱᒋᔭᒃᓴᐅᑎᓐᖏᓛᑎᑦ.”
12ᐸᓛᒻᓗ ᐅᖃᓕᕐᐳᖅ ᐰᓚᒃᒧᑦ, “ᐅᕙᓐᓄᑦ ᑎᓕᓚᐅᕐᑕᕐᓄᑦ ᐅᖃᓚᐅᓐᖏᓐᓂᕗᖔ? ᐅᖃᕐᓗᖓ, 13‘ᐰᓚᒃ ᐃᒡᓗᒥᓂᒃ ᓯᐅᓪᕕᕆᓂᒃ ᒎᓗᓂᒡᓗ ᑕᑕᑦᑐᒥᒃ ᕾᑦᓯᒐᓗᐊᕐᐸᑦ, ᐊᑕᓂᐅᑉ ᐅᖃᐅᓯᕆᖁᔭᖓᑕ ᐅᖓᑖᓂ ᐅᖃᕈᓐᓇᓐᖏᓚᖓ, ᐱᐅᔪᒥᒃ ᐱᐅᖏᑦᑐᒥᒡᓘᓐᓃᑦ ᐅᕙᖓ ᐃᓱᒪᒋᔭᓐᓄᑦ. ᐊᑕᓂᐅᑉ ᐅᖃᐅᓯᕆᖁᔭᖓᓂᒃ ᐅᖃᕆᐊᖃᓂᕋᓚᐅᓐᖏᓚᖔ’? 14ᒫᓐᓇᓕ, ᐃᓄᖁᑎᓐᓄᑦ ᐂᓂᐊᓕᕐᐳᖓ. ᕾᒋᑦ, ᐅᖃᐅᑎᓂᐊᕋᒃᑭᑦ, ᐃᓄᒋᐊᒃᑐᕐᔪᐊᑦ ᐅᑯᐊ ᐃᓄᖁᑎᖕᓄᑦ ᖃᓄᐃᓕᐅᕐᓂᐊᕐᒪᖔᑕ ᐅᓪᓗᓂ ᑭᖑᓪᓕᕐᓂ.”
ᐸᓛᒻ ᑭᖑᓪᓕᕐᐹᖓᓂᒃ ᒎᑎᐅᑉ ᐅᖃᐅᓯᐅᖁᔭᖓᓂᒃ ᐅᖃᕐᓂᖓ
15ᒎᑎᒥᑦ ᐅᖃᐅᓯᒃᓴᕐᑖᕆᔭᒥᓂᒃ ᐅᖃᓕᕐᐳᖅ, ᐅᖃᕐᓗᓂ:
ᐸᓛᒻ ᐱᐅᕆᐅᑉ ᐃᕐᓂᖓᑕ ᒎᑎᒥᑦ ᐅᖃᕐᑎᑕᐅᓂᖓ,
“ᐃᓅᑉ ᐃᔨᖏᒃ ᐅᐃᑎᑕᐅᓯᒪᔫᑉ, ᒎᑎᒥᑦ ᐅᖃᕐᑎᑕᐅᓂᖓ;
16ᒎᑎᐅᑉ ᐅᖃᐅᓯᖓᓂᒃ ᑐᓵᔫᑉ ᒎᑎᒥᑦ ᐅᖃᕐᑎᑕᐅᓂᖓ,
ᖁᑦᓯᖕᓂᕐᐹᑉ ᖃᐅᔨᒪᓂᖓᓂᒃ ᖃᐅᔨᒪᑎᑕᐅᔫᑉ,
ᑕᐅᑐᒃᑑᓪᓗ ᐊᔪᒐᖃᖏᑦᑑᑉ ᑕᑯᑎᑦᓯᑦᔪᑎᖏᓐᓂᒃ,
ᐹᒻᒪᖓᔫᓪᓗ, ᐃᔨᖏᒃ ᐅᐃᑕᓪᓗᑎᒃ:
17ᒫᓐᓇ ᑕᑯᕙᕋ, ᑭᓯᐊᓂ ᑕᕝᕙᑲᐅᑎᒋᐅᖏᑦᑐᖅ,
ᑕᑯᓐᓇᕐᐸᕋ, ᖃᓂᑦᑑᓇᓂ ᑭᓯᐊᓂ;
ᐅᓪᓗᕆᐊᖅ ᐊᓂᔪᒫᕐᐳᖅ ᔧᑯᒥᑦ;
ᐊᖓᔪᖅᑳᕐᔪᐊᑉ ᐊᔭᐅᑉᐱᐊᖓ ᒪᑭᑦᓱᒫᕐᐳᖅ ᐃᓴᕆᐊᓕᒥᑦ,
ᒧᐊᐱᒥᐅᓪᓗ ᖃᐅᖏᑦ ᓯᖁᒥᑦᓱᒫᕐᐰᑦ,
ᐊᓯᕈᕐᓗᒋᓪᓗ ᓰᑎᐅᑉ ᐃᕐᓂᖏᑦ.
18ᐄᑐᒥᒥᐅᑦ ᓵᓚᐅᔪᒫᕐᐳᑦ;
ᓰᐊᕆ ᓵᓚᐅᔪᒫᕆᕗᖅ, ᐊᑭᕋᖏᓪᓗᑦᑕᐅᖅ, ᐱᑖᕆᔭᐅᔪᒫᕆᕗᑦ
ᐃᓴᕆᐊᓕᓕ ᓴᓐᖏᔪᕐᔪᐊᖑᔪᒫᕐᐳᖅ.
19ᐊᖓᔪᖅᑳᕐᔪᐊᖅ ᓴᖅᑭᑦᓱᒫᕐᐳᖅ ᔧᑯᒥᑦ,
ᐃᒡᓗᒐᓴᒡᔪᐊᓂ ᐊᒥᐊᒃᑯᑦ ᓄᖑᑦᓱᒫᕐᐰᑦ.”
20ᐊᒪᓕᒃᒥᐅᑦ ᕿᕕᐊᕋᒥᒋᑦ, ᒎᑎᒥᑦ ᐅᖃᐅᓯᒃᓴᒥᓂᒃ ᐅᖃᓕᕐᐳᖅ, ᐅᖃᕐᓗᓂ:
“ᐊᒫᓚᒃ ᐃᓅᖃᑎᒋᒡᔪᐊᓂᑦ ᓯᕗᓪᓕᕐᐹᖑᓚᐅᕐᐳᖅ,
ᑭᖑᓪᓕᕐᐹᖑᓕᕈᒫᕐᐳᕐᓕ ᐊᓯᕈᕐᑕᐅᓂᓂ ᑎᑭᓪᓗᒍ.”
21ᑭᓁᑎᑦ ᕿᕕᐊᕋᒥᒋᑦ, ᒎᑎᒥᑦ ᐅᖃᐅᓯᒃᓴᒥᒃ ᐅᖃᓕᕐᐳᖅ, ᐅᖃᕐᓗᓂ:
“ᐃᓂᒋᔧᑦ ᐊᐅᓚᔪᓐᓇᕋᓂ ᑐᓐᖓᕕᖃᑦᓯᐊᕐᐳᖅ,
ᐃᕙᕝᕖᓪᓗ ᕾᕐᑐᒥ ᐃᓂᖃᕐᐳᖅ;
22ᑍᒤᒐᓗᐊᕐᑎᓪᓗᒍ ᑲᐃᓐ ᐃᑭᑕᐅᔪᒫᕐᐳᖅ.
ᖃᓄᖅ ᐊᑯᓂᐅᑎᒋᕙ ᓱᓕ ᐋᓱᕆᐅᑉ ᑎᒍᓗᑎᑦ ᐊᐅᓪᓚᕈᑎᔪᒫᕐᒪᑎᑦ?”
23ᒎᑎᒥᑦ ᐅᖃᐅᓯᒃᓴᕆᔭᒥᓂᒃ ᐅᖃᓕᕐᐳᖅ ᐅᖃᕐᓗᓂ:
“ᑲᑉᐱᐊᓐᓇᒦᒃ! ᑭᓇ ᐆᒪᔪᓐᓇᓛᕐᐹ ᒎᑎ ᑍᒤᓕᐅᓕᕐᐸᑦ?
24ᐅᒥᐊᕐᔪᐊᑦ ᑎᑭᑦᓱᒫᕐᐳᑦ ᑭᑎᒻᒥᐅᑉ ᓯᒡᔭᖓᓂᑦ;
ᑖᒃᑯᐊᓗ ᐋᓱᕆ ᐄᐸᕆᓗ ᓵᓚᒋᔪᒫᕐᐹᒃ,
ᐋᒪᓕᒃᑎᑐᑦᑕᐅᖅ, ᑍᒤᑕᐅᔪᒫᕐᐳᑦ ᐊᓯᕈᕐᑕᐅᕕᖕᒥᖕᓄᑦ.”
25ᑕᕝᕙ ᐸᓛᒻ ᒪᑭᑉᐳᖅ ᓇᔪᒐᕐᒥᓄᓪᓗ ᐅᑎᕐᓗᓂ ᐰᓚᒃᑕᐅᖅ ᐅᑎᓕᕆᕗᖅ.
Zvasarudzwa nguva ino
ᒨᓯᓯ ᓯᑕᒪᖏᑦ 24: EAIB
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Eastern Arctic Inuktitut Bible © Canadian Bible Society, 2012, 2021-2023.