Talamo 7
7
Ko te Atua te Akavā tala tika
E tangi nā Tāvita na yīmene ai kia Ieova nō Kuta o te yōlonga o Pēniāmina.
1E Ieova toku Atua, ko angatu au kia koe kē puipuingia;
wakaola ake au kē yawea mai te kau e alungia au nei,
2ko te wawao mai lātou pe nā lioná,
yaeyae ia aku kē ngālepelepe,
kāe oki tangata e wakaolangia au.
3E Ieova toku Atua, pē e tai aku takayala na lave,
ko vai lāi te kino i oku lima –
4pē oki au na tali i toku yoa ki te kino,
pēkole, na kaiā i toku veia ma te yalakole –
5eia, mea ake toku veia kē ālu vave mai ia aku kē pukea;
kē yoliyoli iāna ia aku ki lalo o nā kelekele,
tuku ai i toku tino kē moe i lalo o te kele wenua.
6E Ieova ē, matete ake ki lunga i tō lili;
tū mai koe tuluki ia aku mai te lili ita o oku veia nei.
Ala mai e toku Atua, wakauwea tau wakavānga tika!
7Kē ati takapini ia koe te wī tāngata na wakalulu mai nei,
ko wakayaele mai ai ia lātou mai tō potu tiketike i lunga.
8Ko Ieova lāi ka wakavāngia te wī wenua.
E Ieova ē, wakapono mai koe ko tika au kē kāleka ki toku tū tautonu,
kē kaleka oki ki toku tū talatalatika, e te Atua Tiketike Loa.
9Mea ake koe kē mutu te kino a te kau waitunga nei,
ma te puipui wakamakeke i te kau tū tautonú,
e Atua tū tautonu oki koe,
ko tilomata oki koe i te ngākau ma te manako o te tangata.#Āpōkālupo 2:23
10Ko te Atua Tiketike Loa toku puipui ālai,
ko ona ko wakaolangia te kau ngākau māyinayiná.
11E akavā talatalatika te Atua,
ko yē tukutuku oki tana tūā i te kau kikinó i te wī ayo.
12Mē yē wuwuli te tangata mai te kino,
ka wakakoi te Atua i tana koke;
ka kikī oki i tana wena kē wanana ma te tī i lunga.
13Na penapena iāna i ana penupenu patu tangata;
na wakatautonu oki i ana tī awi.
14Ko te kovi na lilo wai matua mō te kinó,
ka yapū iāna i te wakatupu kino,
eia, wānau mai ai ko te wī manatunga pikikā.
15Ko tana lua oki na keli nō te toe kaú,
ko ona lāi ka tō ki loto o tana lua ia.
16Ko tana kino nā waí ka niko mai lāi ki lunga ōna;
ko tona tū waiva kikino ki te toe kaú ka ili lāi ki lunga o tona ulu.
17Ka wakaatawai au ia Ieova nō tona tū tautonu,
ka yīmene talapaya au i te ingoa o Ieova Tiketike Loa.
Zvasarudzwa nguva ino
Talamo 7: PKP
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau