Luka 23
23
Na kāvea ia Iētū ki mua o Pilato
(Mātaiō 27:1-2, 11-14; Māleko 15:1-5; Ioane 18:28-38)
1Wetū loa ki lunga te lulu Kōnitala ia tākatoa, taki ai lātou ia Iētū ki mua o Pilato. 2Wakauyu loa e te tala i a lātou tāyīnga ia ana ia, “Ko te tangata nei na pukea e mātou, ko ona na kave yalangia nā manako o te wenua tangata. Ko ālai iāna, auyē mātou e tūtaki telo kia Kaitala. Na maka mai oki ana talatala wītoki, ko ona te Metia, te Aliki.”
3Iliili mai ai ia Pilato kia Iētū, “Ko koe lā te Aliki o te Ngāti Iūta?”
Pau atu ai ia Iētū, “Ēnā loa e au meangia mai nā.”
4Eia, mea loa ia Pilato ki nā tatakuvai wowolo ma te kaputinga tangata ia, “Kāe aku takayala loa lewu na kite kē tūā ai au i te tangata nei.”
5Yaulā, nā naumate lāi ki a lātou tāyīnga ia ana, i te meanga, “Na takavilivili iāna i nā manako o te kakai lā te wī konga tākatoa o Iūtea. Na taumua iāna mai loto o Kalilea, ēnei na oko mai ki kinei.”
Na kāvea ia Iētū kia Ēlota
6I te langonanga e Pilato te mea ia, uwi mai loa, “E tangata Kalilea lā te mea nei?” 7I te iloanga ēna ia Iētū nō te tuanga wenua e wakayaelea e Ēlotá, tutuli loa ēna ia Iētū ki ai, ko i Iēlūtalema oki ia Ēlota i te vāia ia.
8Kamuloa ia Ēlota mina i tana kakalonga kia Iētū, nō tēlā, na wano ē te vāia na ana langona ai ona tala, nā ngaki ai ke ana kitea iāna. Nā mānakinaki ai ke ana kitea e yanga wotu kē wai ia Iētū. 9Eia, e wolo te wī mea a Ēlota na iliili atu kia Iētū, yaulā e kiai loa iāna na ngangana mai. 10Teketeke loa ki mua nā tatakuvai wowolo ma nā akoako tule, wakawowo loa a lātou tāyīnga ma te pakī ia Iētū. 11Wai akanau mai loa ia Ēlota ma ona vāeau ia Iētū ma te wakavāvā ia ana. Wakakawu loa lātou ia ana ki te kākawu potipoti pe te kākawu alikí, tutuli wakawōu oki ia ana kia Pilato. 12I te ayo ia, pōleka loa ia Ēlota ma Pilato tākanga atu ai; nā nō veka oki lāua i te vāiá.
Na pae ia Iētū kē mate
(Mātaiō 27:15-26; Māleko 15:6-15; Ioane 18:39–19:16)
13Opo wakatai mai loa ia Pilato i nā tatakuvai wowolo, nā wakayaele ma te kakai, 14mea loa kia lātou, “Na aumai kōtou i te tangata nei kia aku pe te mea ko ona na wakauyua te kakai kē wakataukati. Na iliili au wakalelei kia ana i mua o kōtou, kāe ona takayala loa āku na kite i te wī mea nā tāyī ai kōtou ia ana ia. 15Kāe ona takayala oki na kitea e Ēlota, nō kiai na tutuli wakawōu mai ai ia ana kia tātou. Kāe yala loa a te tangata nei na wai e kaleka ai ia ana kē mate. 16Nō kiai, ka wakaunga au ia ana kē vayia, tuku atu ai kē wano.” 17[Na mea iāna peia, nō tēlā, i te wī Paata e tai tangata mouāuli ka tuku e te kāvana ki te Ngāti Iūta.]#23:17 Ko i loto o nā toe pōkai talatala nā muna ko taliweolo ki te Mātaiō 27:15; Māleko 15:6.
18Kakā mai loa te patanga ia tākatoa, “Patu te tangata nā! Tuku mai ia Pālapa kia mātou!” 19(Na kāvea oki ia Pālapa ki te waleāuli nō te yanga kaitamaki āna na wakatupu ki nā wakayaele o te ōile ia, peia te yanga patu tangata.)
20Ko Pilato lā, ko winangalo lāi iāna kē tuku ia Iētū kē wano, eia, wakavale wakawōu loa iāna kia lātou. 21Yaulā, nā nanau lāi lātou e te kakā, “Wakatātaulo atu ia ana! Wakatātaulo atu ia ana!”
22Tāwaki tolu loa te iliili a Pilato kia lātou ma te mea pēnei, “E wea lā tana takayala na wai? Kākole ona takayala lewu āku na kite e pae ai iāna nō te mate. Nō kiai, ka wakaunga au ia ana kē vayia, tuku atu ai ia ana kē wano.”
23Yaulā, nā tāwi lāi lātou e te kakā i o lātou ātanga kē wakatātauloina ia Iētū; eia, wakatikaina loa a lātou kakānga ia. 24Tuku ai loa ia Pilato i te tūā o Iētū nā naumate ai lātou ia. 25Tuku oki ēna ki vao tā lātou tangata nā winangalo ai, te kovi na makatia ki te waleāuli nō te wai taua ma te patu tangatá, maka atu ai ia Iētū ki a lātou manatunga.
Na wakatātaulongia ia Iētū
(Mātaiō 27:32-44; Māleko 15:21-32; Ioane 19:17-27)
26Ko taki nei nā vāeau ia Iētū ki vao, welāvei loa lātou i te tangata nō Kūlene ia, ko Timona te ingoa, na yau mai lotowenua ki te ōile. Liko ai lātou ia ana, tuku i te tātaulo ki lunga ōna, mea ai kē amo i te tātaulo lā muli o Iētū. 27Ko yolo mai te maliunga tangata tokawolo lā muli ōna, peia oki nā wāwine ko wakayapi ma te aukapa wua nō ona ia. 28Wuwuli mai loa ia Iētū kia lātou, mea peia, “E te tiniu o Iēlūtalema ē! Auyē wetangi mai nōoku, wetangi lā nō kōtou ma a kōtou tama. 29Ko i kiai te vāia e mea ai te kakai, ‘Valea loa nā wāwine yē-tō-tamá, e kiai oki nā manava na yaengia e te tama, e kiai oki na wū na mitia e te tamá!’ 30Ko te vāia teia e valovalo ai te tangata ki nā maungá, ‘Makulu mai ki lunga o mātou!’ peia ki nā tuāiví, ‘Ūwi mai ake mātou!’#Ōtea 10:8; Āpōkālupo 6:16 31Pē ko wai te tangata i nā mea ia i te vāia ko mata katia ai te lākau, ka wea atu ai kē pakapaka?”#23:31 Auwā te wakatakanga i kinei, “Kē tupu i nā mea nei kia aku, te tangata yalakole, ka wea atu ai ki te tangata yala?”
32E lua oki tāne yanga kikino na pae, ko takina ma Iētū kē patua. 33Kē ōko mai lātou ki te konga e lapangia ko Te Iviulu,#23:33 Te Iviulu: ko te ingoa Kalavalia, e wulinga mai te leo Lātino nō te “iviulu”. wakatātaulo atu ai lātou ia ana i kiai ma lua tāne tūtūkoa, ko i tona kaokao mātau te toe, ko i tona kaokao māyui te toe. 34Talatala loa ia Iētū peia, “E toku Matua ē, yua mai koe i a lātou yala, ko yē a lātou īloloa oki ni wea a lātou yanga e wai ia.”#Talamo 22:18
Tau kēlelo loa lātou i te tuanga i ona kākawu kia lātou.
35Ko wetū wua mai te kakai ma te pupula o lātou mata, peia te wī wakayaele o te Ngāti Iūta, ko wai akanau mai ia ana. Mea lā, “Na wakaola iāna i te toe kau; maka ake lā kē wakaola ia ana lāi, pē ko ona te Metia a te Atua na iki!”#Talamo 22:7
36Wai akanau mai oki nā vāeau ia ana, tuku atu loa ni uwaina vinika ki ai,#Talamo 69:21 37wai ai a lātou muna, “Pē ko koe te Aliki o te Ngāti Iūta, wakaola koe ia koe lāi!”
38Na tutingia nā talatala nei, tuku ai lā lunga o tona ulu: ko te aliki tēnei o te ngāti iūta.
39Ko te toe oki o lua tōpakava na wakatātauloina i ai, tau mai oki ana muna pakī ia ana, “Kāle ai lā ko koe te Metia? E wea koe e yē wakaola ai ia koe, peia oki ia māua?”
40Kaemata atu ai te toe tōpakava, mea loa ki ai, “Kāe ō mataku i te Atua? Ko weolo wua oki tō tāua utunga. 41Ko tautonu wua lāi tō tāua utunga nei, ko te tali oki tēnei o a tāua yanga nā waí. Ko te tangata nei lā, kāni loa ona mō takayala lewu.”
42Mea oki iāna kia Iētū, “E Iētū ē, manatu mai koe ia aku kē oko koe ki tō Pātileia.”
43Pau atu loa ia Iētū kia ana, “Ko tala atu au i te tika, i te ayo nei lāi e welāvei ai tāua i Pālataito.”
Te matenga o Iētū
(Mātaiō 27:45-56; Māleko 15:33-41; Ioane 19:28-30)
44Oko loa ki te tūtonunga o te lā, pōulinewu loa te wenua tākatoa, oko wua atu ki te ola tolu. 45I te wakapōulinga o te lā, ngāyae loa i lolotonu te ālai kākawu o te Waleyā.#Ēkoto 26:31-33 46Eia, vavalo ai te leo o Iētū ki lunga, mea loa, “E toku Matua, ko tuku atu au i toku vaelua ki loto o ō lima.” I te otinga o ana muna ia, tuku atu ai i tona ao openga.#Talamo 31:5
47I te kitenga a te langatila vāeaú i nā mea na tupu ia, talapaya loa iāna i te Atua, mea loa, “Na pono ngaleka, e tangata tū tautonu pē te mea nei!” 48Peia te kakai tākatoa nā wakalulu mai kiai, i te kitenga i te waiwainga o nā mea na tupu ia, nīniko loa lātou ki wale ma te patupatu nā uma i te wakayapi. 49Ko te kau lā e iloa tika ia Iētū, peia ki nā wāwine nā ālu mai ia ana mai Kalilea, nā wetū wua mai i te konga mamao, onoono ai i nā mea ia.#Luka 8:2-3
Te tanunga o Iētū
(Mātaiō 27:57-61; Māleko 15:42-47; Ioane 19:38-42)
50E tai tangata ko Iōtēpa te ingoa nō Ālīmātea, e lulu nō Iūtea. E tāne loa lelei tau-ki-mua, nā kali wua iāna i te oko mainga o te Pātileia o te Atua. Ko ona oki te toe mema o te Kōnitala, 51yaulā e kiai tona manako nā āwuwū ki a lātou tika ma a lātou yanga. 52Wano loa iāna ki mua o Pilato, talikai mai i te tino o Iētū. 53Eia, tīo loa iāna i te tino ki lalo, kowikowi ki te kākawu, tuku ai ki loto o te lua tanumate na kelia ki loto o te papa makeke, e kiai ake na wakayinua. 54E awiawi Walaile te vāia ia,#23:54 E awiawi Walaile te vāia ia: Ēleni, ko te ayo e penapena ai nō te Tāpati koa vave wua ki te Tāpati.
55Ko nā wāwine nā ālu mai ia Iētū mai Kalileá, wō loa ma Iōtēpa ke a lātou kitea te lua ma te wakaulunga i te tino o Iētū ki loto. 56Eia, wō ai lātou ki wale, penapena i nā lākau kakala ma nā manongi kē wakakakala ai tona tino.#Ēkoto 20:10; Teutelonomi 5:14 Wakaea loa lātou i te Tāpati kē tautonu ki nā meanga a te Tule.
Zvasarudzwa nguva ino
Luka 23: PKP
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau