Luka 22
22
Te wunanga kē mate ia Iētū
(Mātaiō 26:1-5; Māleko 14:1-2; Ioane 11:45-53)
1Koa talivave ki te vāia o te Wakamālienga o nā Walaoa Yē Wakaōpuēa, e kāmata taumua ki te Paata.#Ēkoto 12:1-27 2Wai ngalo wua loa nā tatakuvai wowolo ma nā akoako tule kē yī a lātou lāvenga kē maua ai e te patu ia Iētū, na mātataku oki lātou i te kakai.
Na pole ia Iūta kē vati ia Iētū
(Mātaiō 26:14-16; Māleko 14:10-11)
3Eia, ulu loa ia Tātani ki loto o Iūta e valovaloa kia Ikaliota, ko ona te toe o te tino angaulu mā lua pipí. 4Wano atu ai ia Iūta ki nā tatakuvai wowolo ma nā wakayaele taute o te Waleyā, laupono ma lātou ka tōngaongao pēwea iāna ia Iētū, kave kia lātou. 5Kamuloa lātou mina lelei, na āwuwū oki lātou kē tali ia ana ki te moni. 6Pole loa ia Iūta i te mea ia, tilomata wua ai iāna kē tai vā kaleka kē liko ai ēna ia Iētū tuku atu kia lātou ma te yē iloa e te kakai.
Te Wakamālienga o te Paata
(Mātaiō 26:17-25; Māleko 14:12-21; Ioane 13:21-30)
7Oko loa ki te ayo o te Wakamālienga o nā Walaoa Yē Wakaōpuēa, e patu ai oki nā punua māmoe o te Paata. 8Unga loa ia Iētū ia Pētelo ma Ioane, mea loa ki ai, “Wō kōlua penapena i te Paata kē taumamaya ai tātou.”
9Uwi loa lāua ki ai, “Ko i wea tau konga ko manatu ai kē penapena ai māua?”
10Pau atu loa iāna, “Wakalongo mai lā, kē ōko kōlua ki loto o te ōile, e tai tāne ko tāwi ma tana tiā yua ka welāvei mai kia kōlua. Ālu kōlua i muli ōna ki loto o te wale ka ulu ai iāna, 11mea atu kōlua ki te pū o te wale ia, ‘Na mea mai te Pūāpī pēnei: Ko i wea te pia wakaāwi kē taumaya ai au i te Paata ma aku pipi?’ 12Ka kave iāna ia kōlua ki te pia wolo i te taua i lunga, na oti e te penapenangia ma te popoti. Eia te konga, penapena kōlua i kiai.”
13Wō ai lāua, alawia ai e lāua na tautonu ngaleka te wī mea ki nā tala mainga a Iētū́. Eia, penapena ai lāua i te Paata i kiai.
Te Kaingākai a te Atu
(Mātaiō 26:26-30; Māleko 14:22-26; 1 Kōlīnētia 11:23-25)
14Kē oko ki te ola o te yanga ia, nōnō loa ia Iētū ma ana āpōtetolo ki lalo i te kaingākai. 15Mea loa iāna kia lātou, “Na kamuloa toku ngākau vavaka kē taumamaya wakatai tātou i te Paata nei i mua ake au ka kino ai au. 16Ka tala atu au, e yē kai wakawōu oki au oko wua atu ki te vāia e tonu ngaleka ai i te Pātileia o te Atua.”
17Eia, liko loa ia Iētū i te kapu, wakaatawai loa iāna i te Atua, mea ai peia, “Liko te kapu nei, tau atu kia kōtou. 18Ko tala atu au, e yē inu wakawōu loa au i nā yua o te wua vine, nā te oko mai loa te Pātileia o te Atua.”
19Liko mai loa iāna i nā walaoa, wakaatawai loa i te Atua, vayivayi loa, tuku atu ai kia lātou, mea atu ai peia, “Ko toku tino tēnei na avatungia mō kōtou, kai kōtou wai mayalanga ia aku.”
20Na peia oki iāna i te otinga o te kaikai, liko loa i te kapu, mea loa, “Ko te kapu uwaina tēnei o te wakapononga wōu na wakailoina ki toku toto ka wakamalingiina mō kōtou.#Ielemia 31:31-34 21Yaulā, onoono ake! Ko wakatai o māua lima i lunga o te kaingākai nei ma te kovi ka vatia au.#Talamo 41:9 22Ka wano lāi peia te Tama a te Tangata kē tautonu lāi ki nā muna na wakamamataina e te Atua nō ona. Yaulā, i te wakamataku te mate o te kovi ka vatia iāná.” 23Eia, kāmata loa lātou e te wakatau iliili ko ai wua ai ia lātou ka wai i te mea ia.
24Wakatautotoko oki lātou pē ko ai wua ai te tangata o lātou ko wolo atu.#Mātaiō 18:1; Māleko 9:34; Luka 9:46 25Mea loa ia Iētū kia lātou, “Ko nā aliki o te wī wenua ko tāki i o lātou mana lā lunga o o lātou tāngata, ko te kau wakayaele oki ko mina lātou kē tauvaloa ‘e kau kalu wowolo ma te lelei ki te kakai’.#Mātaiō 20:25-27; Māleko 10:42-44 26Ko kōtou lā, ko yē lelei kē mea peia. Ko te tangata wolo i loto o kōtou, kē lilo mai iāna ko ona te kovi lewu loa. Ko te tangata oki e wakayaeleá, kē lilo mai iāna wai tāvini.#Mātaiō 23:11; Māleko 9:35 27Ko ai ko wolo atu, ko te tangata e nō ki te kaingākaí, mē ko te kovi e ālikilikia iāná? E kiai lā ko ona e nō i te kaingākaí? Yaulā au e tāvini nō kōtou.#Ioane 13:12-15 28Ko kōtou oki te kau nā i tawa wua ōku i oku vāia nā takikinongia ai. 29Ka avatu oki au kia kōtou i te tika kē wakayaele, pē toku Matua na aumaia te tika kē wakayaele au. 30Ka taumamaya kōtou ma te wakatolo nā kōpū i taku kaingākai i loto o toku pātileia, ka nōnō oki kōtou ki lunga o nā potu wakavā i te laungaulu mā lua yōlonga o Ītalāelá.#Mātaiō 19:28
Na yivayiva ia Iētū i te nanānga a Pētelo ia ana
(Mātaiō 26:31-35; Māleko 14:27-31; Ioane 13:36-38)
31“Timona ē, e Timona, wakalongo mai! Na maua te tika o Tātani kē vavae ia kōtou, te kino mai te lelei, pe te tangata e lūlū kē vavae i nā kili mai nā wua tītona. 32Yaulā, na tataku au mō koe, e Timona, kē yē pangā au lotokononga. Kē tūwuli wakawōu mai oki koe kia aku, wakamakeke atu koe i ō tāīna.”
33Naumate lā ia Pētelo kia Iētū, “E te Atu, na papa au kē wō wakatai tāua ki te waleāuli, wua atu ka mamate āwuwū tāua.”
34Kākole lā te meanga a Iētū ki ai, “Pētelo ē, ko tala atu au kia koe, e yē oko ki te kakānga o te toa moa i te pō nei, na tāwaki tolu tau nanānga ia aku i te meanga pēnei, ko yē au iloa ko ai au.”
35Eia, iliili loa ia Iētū ki ana pipi, “I taku unganga ia kōtou ma te onge kili moni, pūtē, tāmaka, e tai koia mea na kayā ai kōtou?”#Mātaiō 10:9-10; Māleko 6:8-9; Luka 9:3; 10:4
Pau mai loa lātou, “Kākole.”
36Mea loa ia Iētū kia lātou, “I te vāia nei lā, pē e tai au kili moni ma e pūtē, takitaki koe; pē kāe au koke, oko tō peleue kē tai koke. 37Ko tala atu au kia kōtou, na oko ki te vāia e tautonu ai ki lunga ōku nā talatala na tutingiá, ‘Na wakataia iāna ki te kau yua pūlengá.’#Ītaia 53:12 Ēeke, ko nā mea na tutingia nō okú, koa oko ki te wakayawenga.”
38Mea loa nā pipi, “Onoono ake, e te Atu, ēnei lua koke.”
Pau atu loa iāna, “Lava wua i kinā.”
Na tataku ia Iētū i te maunga ko Oliveta
(Mātaiō 26:36-46; Māleko 14:32-42)
39Maka loa ia Iētū i te ōile ia, wano atu ai ki te Maunga ko Oliveta, e konga ko mou wano ai, wō atu oki ana pipi i tawa ōna. 40Kē oko iāna ki ai, mea loa iāna kia lātou, “Tataku kē yē wakatōkāngia mai kōtou.” 41Eia, wano loa iāna maia lātou wakatōmamao atu pe te kamungā-watú, tūtulivae loa, tataku ai iāna, 42“Toku Matua ē, pē ka pole ia koe, kē avatu ake te kapu o te mate nei maia aku. Yaulā, auyē i aku manatunga kē tupu, ko au manatunga lā kē tupu.” 43Wakaata mai loa te āngela ia mai te Langi, wakamāloyi ia ana. 44Nō tēlā na tatōngia iāna e te tīngā, laulapu loa tana tataku, eia, yeke wua ai ona tā ki lalo o nā kelekele pe nā tōpata totó.
45Tū mai loa iāna mai tana tatakunga ia, niko loa ki nā pipi, onoono atu ko momoe, na tupalo nā tino i te wakayapi. 46Mea loa iāna ki te kau ia, “E wea kōtou na momoe ai? Wetū ki lunga tataku, kē yē wakatōkāngia mai kōtou.”
Na likongia ia Iētū
(Mātaiō 26:47-56; Māleko 14:43-50; Ioane 18:3-11)
47Ko talatala lāi ia Iētū i ana muna, lōmamai loa te pupu tangata tokawolo, ko takina mai e Iūta, te toe o te tino angaulu mā lua pipí. Yaele mai loa iāna kē yongi ia Iētū, 48iliili loa ia Iētū ki ai, “Iūta ē, na wakataitoe koe i te Tama a te Tangata ki te yongi?”
49I te onoononga a nā pipi i tawa o Iētū e wea te mea ka tupu, uwi loa lātou, “E te Atu ē, ka wakaanga mō a mātou koke nei?” 50Vavalu loa te toe o lātou i te valoyeunga o te takuvai woló, motu te talinga mātau ki vao.
51Kākole lā te mea atunga a Iētū, “Lava i kinā!” Wakapaki loa iāna i te talinga o te tāne ia, yawea wakawōu ai.
52Eia, talatala loa ia Iētū ki nā tatakuvai wowolo ma nā wakayaele taute o te Waleyā, ma te kau mātutua na lōmamai kē liko ia ana i kiaí, “E tangata lā au wakatupu kino na lōmamai ai kōtou ma nā koke, peia nā lākau patu tangata? 53Ia aku nā kakai ma kōtou i loto o te Waleyā i te wī ayó, e kiai loa kōtou na mimili mai ia aku. Ēnei lā tō kōtou vāia, ko wakayaele ai te mana o te pōuli.”#Luka 19:47; 21:37
Te nanānga a Pētelo ia Iētū
(Mātaiō 26:57-58, 69-75; Māleko 14:53-54, 66-72; Ioane 18:12-18, 25-27)
54Pupulu loa lātou ia Iētū, taki ki loto o te wale o te takuvai wolo. Ko ālu mai ia Pētelo wakatōmamao lā muli. 55Tau loa nā tāngata leoleo i te awi i te puyo o te kolo ia, wāpiki atu ai ia Pētelo ki tawa o lātou e nōnō takapini i te awi ia. 56Makoyia loa e te toe tokotoko tamāwiné ia ana ko nō lā tawa o te awi, pupula tonu loa iāna ki ai, mea loa, “Ko te tāne nei nā tataka ma Iētū.”
57Yaulā, nanā loa ia Pētelo ma te mea peia, “E te wawine ia ē, ko yē aku iloa iāna!”
58I muli wua mai, kite mai oki te tāne ia ia Pētelo, mea loa iāna peia, “Ko koe oki tō lātou toe!”
Pau atu lā ia Pētelo, “E te tāne ia, e kiai ko oku!”
59Lāua e tayi ola i muli mai, naumate loa te toe tāne e te mea, “Na pono ngaleka ia aku, ko te kovi nei nā i tawa o Iētū, e tangata Kalilea oki iāna!”
60Kākole lā te meanga a Pētelo, “E te tāne ia, ko yē aku iloa ni wea au muna e talatala nā!” Ia ana e talatala ia, kakā loa te toa moa. 61Wuwuli mai loa te Atu, kakalo tonu mai kia Pētelo. Eia, mayala loa iāna i te muna a te Atu nā mea kia aná, “E yē oko ki te kakānga o te toa moa i te pō nei, na tāwaki tolu tau nanānga, ko yē au iloa ko ai au.” 62Eia, wano atu loa ia Pētelo ki vao, kamuloa tatōngia e te wakayapi.
Na wai akanaungia ia Iētū, na tukipalaina
(Mātaiō 26:67-68; Māleko 14:65)
63Kāmata loa nā taute e leoleoa ia Iētū e te wai akanau ma te kailomi ia ana. 64Ūwi loa lātou i ona mata ma te īli māmate ki ai, “Yivayiva mai koe! Ko ai teia na patua koe ia?” 65Wolo wua atu tā lātou muna wakakino na putu kia ana.
Na tū ia Iētū ki mua o te Kōnitala
(Mātaiō 26:59-66; Māleko 14:55-64; Ioane 18:19-24)
66I te vaveāo, wakalulu loa te kau mātutua, nā tatakuvai wowolo ma nā akoako tule, takina mai loa ia Iētū ki mua o te lulu Kōnitala ia. 67Mea loa lātou peia, “Tala mai koe kia mātou pē ko koe te Metia.”
Pau atu loa iāna peia, “Kē tala atu oki au e yē lotokono mai kōtou ia aku; 68kē iliili atu oki au, e yē vāvā mai kōtou. 69Yaulā, mai te vāia nei ki nā vāia lā mua nei, ka nō te Tama a te Tangata i te kaokao mātau o te Atua Awukelé.”
70Mea mai oki lātou tākatoa, “Eia, ko koe lā te Tama a te Atua?”
Pau atu loa iāna, “Ko oku tēnā e meangia e kōtou nā.”
71Eia, talatala ai lātou, “E wea tātou ka winangalo ai kē yī toe kite! Na wakalongo oki tātou i ana muna mai tona ngutu.”
Zvasarudzwa nguva ino
Luka 22: PKP
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau