Luka 21
21
Te matanga a te wawine takawua
(Māleko 12:41-44)
1Ko wakatatae ia Iētū i ona mata, kite atu iāna i te kau penupenua ko tuku i a lātou matanga ki loto o te pia moni. 2Kite atu oki iāna i te wawine takawua onge penupenu ia i te tukunga i lua moni kapa liliki loa#21:2 lua moni kapa liliki loa: Ēleni, lua “lepeta” ki loto. 3Mea loa iāna, “Ka tala atu au i te tika, na yika atu te moni a te wawine takawua veve nei na tuku ki loto o te pia moní i wī tāngata tākatoa. 4Na tuku oki a lātou matanga mai te toenga o a lātou wainga penupenu; yaulā iāna nei ko veve ongo, na wakapau lā i ana wī mea tākatoa, kāe mea loa ko takoto nō tona olānga.”
Nā wakamailonga o te vāia wakaweuwi
(Mātaiō 24:1-14; Māleko 13:1-13)
5Ko talatala nā toe pipi i te lākeinga o te Waleyā i ona watu mōtoilele, na wakamānea oki ki nā matanga na wakatapua ki te Atua. 6Kākole lā te meanga a Iētū ki ai, “Ko nā mea a kōtou e onoono nei, kāe watu lewu loa e takoto i lunga o te toe watu i kinei, ka pau āwuwū loa e te lepetia ki lalo.”
7Uwi mai loa lātou kia ana, “E te Pūāpī, e wea te vāia e tupu ai nā mea nei? E wea oki te wakailo e mailonga ai ē, koa vave e te tupu?”
8Pau atu loa iāna peia, “Onoono kōtou wakalelei, auyē loa e tangata e vati ia kōtou. E tokawolo oki te kau ka lōmamai i toku ingoa ma te mea ē, ‘Ko oku te Metia’, peia oki, ‘Koa tō pili wua te vāia ia.’ Auyē kōtou e ālu ia lātou. 9Ke a kōtou langona te longo tamaki ma nā wakatūkēnga wōu, auyē loa kōtou e mātataku. Ka taumua nā mea ia e te tupu, yaulā e yē oko vave mai te wakamutunga.”
10Mea oki iāna kia lātou, “Ka tū mai te toe wenua tamaki ki te toe wenua, peia te toe pātileia ki te toe pātileia. 11Ka tupu nā ngāluelue wenua pōkelekele, te papango, peia te maki kakai i nā toe konga, ka kitea oki nā wakailo wakawowotu ma nā ayiayi wakamataku i lunga o te langi.
12Yaulā i mua ake ka tupu ai nā mea ia, ka likongia kōtou, ka takikinongia oki. Ka kave lātou ia kōtou ki nā walepule ūwingāyala ai, kave atu ai ia kōtou ki te waleāuli. Nō toku ingoa oki ka tukua ai kōtou ki mua o nā aliki ma nā kāvana. 13Ko tō kōtou vā lāi teia e wakamamata ai i te Longo Lelei kia lātou. 14Wakapapa o kōtou manako kē yē ngalangala taumua ka pēwea tā kōtou puipuinga ia kōtou.#Luka 12:11-12 15Ko oku oki ka avatua nā muna wōwonutū ma te māwutu kē yē maua ai i o kōtou enemi e te wakatotoko ma te pātali mai ia kōtou. 16Ka vativatia kōtou e o kōtou mātutua, nā tāīna, nā tautangata ma o kōtou yoa, ka patua oki nā toe o kōtou kē mamate. 17Ka veliveli te wī tāngata ia kōtou nōoku nei. 18Yaulā, kāe lauulu loa e tayi i o kōtou ulu ka ngalo. 19Kē wetū lā kōtou wakamakeke, ka maua tō kōtou ola.
Te lepetianga o Iēlūtalema
(Mātaiō 24:15-21; Māleko 13:14-19)
20“Ke a kōtou kitea ia Iēlūtalema koa takapiningia e nā wainga vāeau, ka a kōtou iloa koa talivave wua tona lepetingianga. 21Eia, kē welele te kau e nōnō i Iūteá ki nā maunga, kē wō ki vao te kau e i loto o te ōilé, auyē oki te kau o nā konga i lotowenuá e wō ki loto o te ōile. 22Ko nā ayo oki tēnei o te tūā, kē tautonu ki te wī mea na tutia mai i te Puka Yā́.#Ōtea 9:7 23Ka tupu te yōyātia i nā ayo ia ki te kau wāwine e yapū, ma nā mātutua wawine e wāwū tamá. E vāia yōyātia ongo ka yau ki lunga o te wenua nei, ka pā oki te lili o te Atua ki lunga o te kau nei. 24Ka patua te toe kau ki te koke, ka kāvea te toe kau wai tuikā ki te wī wenua, ka yoliyolia oki ia Iēlūtalema e nā Ētene, pau wua atu tō lātou vāia.
Te kakao mainga o te Tama a te Tangata
(Mātaiō 24:29-31; Māleko 13:24-27)
25“Ka tupu te wakailo wotu ki te lā, ki te māina ma te wī mata. Ka tukitukimata nā wenua, ka mātataku oki i te ngungulu o te moana ma te au o nā ngalu wowolo.#Ītaia 13:10; Ētēkiela 32:7; Ioela 2:31; Āpōkālupo 6:12-13 26Ka taupopō wua te wī tāngata i te mataku, ka apiapi oki nā manako, i te manatunga ni wea nā mea ka pukea mai ai te ao nei, nō tēlā, ka lūlūa nā tino mana o te langi mai o lātou ala e wō ai. 27Eia lā, koa a lātou kitea ai te Tama a te Tangata ko yau i loto o te kāpuāo i tona mana awukele ma te yilatū mōtoilele.#Tāniela 7:13; Āpōkālupo 1:7 28Kē wakamata nā mea nei e te tupu, wetū ki lunga, wuwuli ki lunga o kōtou ulu, nō tēlā koa tō pili mai tō kōtou ola.”
Te āpī mai te lākau tuke
(Mātaiō 24:32-35; Māleko 13:28-31)
29Tala loa ia Iētū kia lātou i te palapole nei: “Onoono kōtou i te lākau tuke ma te wī lākau tākatoa. 30Kē wekao mai o lātou lau, ka a kōtou kitea, ka a kōtou iloa wua koa talivave mai te vāia māyana. 31Ka peia lāi oki, ke a kōtou kitea nā mea ia ko tupu, ka iloa wua e kōtou koa talivave mai te Pātileia o te Atua.
32Ko tala atu au i te tika, e yē pau te taitangata nei e te mamate kē tupu loa nā mea nei tākatoa. 33Ka ngangalo te langi ma te ao nei, ko aku muna lā e yē ngalo loa.
34Onoono wakalelei kāe kati wua o kōtou manako kē wālolona i te kai ma te kokona, kē wakavao oki ki nā mea o te olānga nei. Auyē valenga wua, ko te pukea mai kōtou pe te matapili i te ayo ia, 35nō tēlā, ka yau ki lunga o te wī tāngata e nōnō i te wī konga o te ao nei. 36Auyē matavalevale, nuti ki te tataku kē māloyi ai kōtou, kē ōla lā loto o te wī mea koa vave i te tupu ia, kē wetū makeke oki kōtou ki mua o te Tama a te Tangata.”
37I te wī ayo, akoako loa ia Iētū i loto o te Waleyā, kē oko ki nā awiawi, ko wano iāna ki lunga o te maunga ko Oliveta nō ai i te pō.#Luka 19:47 38I nā mōtāyao ko wō wua te wī tāngata ki te Waleyā kē wakalongo kia ana.
Zvasarudzwa nguva ino
Luka 21: PKP
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau