Luka 20
20
Te iliilinga a te kau wowolo i te mana o Iētū
(Mātaiō 21:23-27; Māleko 11:27-33)
1I te toe ayo ko i loto ia Iētū i te kolo o te Waleyā, ko akoako ma te āpī i te wī tāngata ki te Longo Lelei. Lōmamai loa kia ana nā tatakuvai wowolo ma nā akoako tule ia, peia te kau mātutuá kia ana, 2iliili loa lātou ki ai, mea loa, “Tala mai koe kia mātou, nō ai te mana e wai ai koe i nā yanga nei? Ko ai oki na avatua te mana ia kia koe?”
3Pau atu ai ia Iētū peia, “Ka iliili atu au taumua kia kōtou. Tala mai kōtou, 4ko te yanga pāpetītō a Ioané, na yau mai te Langi, mēkole mai te tangata?”
5Wakaponopono loa lātou kia lātou wua ma te mea pēnei, “Kē mea tātou, ‘Na yau mai te Langi,’ ka uwi mai iāna, ‘E wea ai kōtou na yē lotokono ai ia Ioane?’ 6Yaulā, kē mea tātou, ‘Na yau mai te tangata,’ ka newunewua tātou e te kakai ki te watu, nō tēlā ko āwuwū oki lātou e peloveta ia Ioane.”
7Eia, pau loa lātou peia kia Iētū, “Ko yē a mātou īloloa na yau mai wea.”
8Mea atu oki ia Iētū kia lātou, “E yē tala atu oki au nō ai te mana e wai ai au i nā yanga nei.”
Te palapole o te kau e yanga i te pā vine
(Mātaiō 21:33-46; Māleko 12:1-12)
9Ko tala nei lāi ia Iētū i te palapole nei ki te tangata: “E tayi tangata na toki i tana pā vine, tuku loa iāna ki nā tāngata tokikai, wano atu ai i tona tele ka loa.#Ītaia 5:1 10Kē oko ki te vāia e waki ai nā vine, wakaunga loa iāna i tona tāvini ki te kau tokikaí kē aumai i tana tuanga i te wakingā-vine ia. Yaulā, vayi loa lātou i te tāvini ia, tutuli atu ai ia ana kē niko ma te pūpū wua. 11Eia, wakaunga atu oki iāna i te toe tāvini ki ai, vayi loa e lātou ma te tāwīwī atu ia ana, tutuli atu ai kē niko ko nā lima wua. 12Eia, wakaunga atu oki iāna i te tolu o te tāvini, kailomi oki e lātou pakia tona tino, tili atu ai ia ana ki nā kongá.
13Mea loa te pū o te pā toki vine ia, ‘Ka mea au pēwea? Ka wakaunga au i taku tama wakaemaema nei, pēnei wua ake ka ete mai lātou ia ana.’
14Yaulā, i tā lātou kite mainga ia ana, wakaponopono loa lātou pēnei, ‘Ēnei lā, koa yau te ao o te pā vine nei. Patu tātou ia ana, kē lilo te konga nei mō tātou.’ 15Eia, tili loa lātou ia ana ki vao o te pā toki vine ia, patu atu ai ia ana kē mate.”
Uwi loa ia Iētū, “Ka wea atu ai te pū o te pā vine ia i te kau e tokikai ia? 16Ka yau iāna patu ia lātou kē mamate, tuku atu ai i te pā vine ia ki te toe kau.”
I te wakalongonga a te kau i te mea ia, kākole oki tā lātou meanga, “Auyē loa kē peia.”
17Onoono tonu loa ia Iētū ki te kau ma te uwi atu, “E wea ai te wakamaepanga o te talatala na tutingia nei?#Talamo 118:22; Yanga 4:11; 1 Pētelo 2:7
‘Ko te watu na makatia e te kau wowou walé,
na wuli mai wai watu wakamakeke.’
18Ko te tangata ka yinga ki lunga o te watu ia ka ngālepelepe iāna, ko te tangata lā ka tokia e te watu ia, ka tataongia iāna pupua wua.”
19Ulu loa nā akoako tule ma nā tatakuvai wowoló kē liko ia Iētū i te vāia ia, na a lātou īloloa oki nō lātou tana palapole nā talatala ia; yaulā nā mātataku lātou i te kakai.
Te tūtakinga telo kia Kaitala
(Mātaiō 22:15-22; Māleko 12:13-17)
20Eia, tōtimotimo ai lātou ia ana ma te peta atu ni tāne kē wakatūtū tangata talatalatika lātou, wakaunga atu ai kē wō iliili atu kia Iētū wai matapili ia ana i ana muna ka talatala mai, kē maua ai ia lātou e te tuku atu ia ana ki te lima mana o te kāvana Lōma. 21Nō kiai, mea loa te kau tōtangata ia kia Iētū, “E te Pūāpī, ko a mātou iloa ko tautonu au muna e talatala ma te āpī nā. Ko taka ia mātou ko yē wai mina koe, ko akoako lā koe i te winangalo o te Atua ma te tika. 22Tala mai ake, ko tautonu mō i tā tātou Tule kē tūtaki telo tātou kia Kaitala, mēkole?”
23Yaulā, na iloa wua e Iētū tā lātou tīonga ia, mea loa ki ai, 24“Wakaāli mai ake e moni tiliva kē onoono ake au. Nō ai te tūtū ma te ingoa na tutingia i lunga nei?”
25“Nō Kaitala,” tā lātou pau mainga.
Mea atu ai ia Iētū peia, “Kave lā kia Kaitala i nā mea lāi a Kaitala, kave oki ki te Atua i nā mea lāi a te Atua.”
26Kāe konga loa na maua ia lātou kē wakatakayala atu ai ia ana ma ana muna i mua o te kakai. Kamuloa lātou mīmīngutu wua i tana pau mainga ia, eia, yē ngangana loa lātou.
Te iliilinga nō te Tūwakawōunga
(Mātaiō 22:23-33; Māleko 12:18-27)
27Eia, lōmamai loa nā toe Tātukea kia Iētū, ko lātou te kau e mea kāe tūwakawōunga mai te mate, iliili loa kia ana,#Yanga 23:8 28“E te Pūāpī ē, na tuti ia Mōte i te tule nei mō tātou, pē na mate te tāne, maka loa i tana wawine ma te onge tama, ka wakaao lāi tona taina i te wawine taka ia kē maua mai ai ni tama mā te tāne na maté.#Teutelonomi 25:5 29Eia, e tokawitu tāīna i te wuānga ia. Wakaao loa te uluaki, mate loa ma te onge tama. 30Wakaao oki te lua o te taina i te wawine taka ia, mate oki iāna ma te onge tama. 31Na peia oki ki te tolu, peia wua ai ki nā toe tāīna, pau wua atu te tokawitu ia e te mamate ma te onge tama. 32I te pae openga, mate loa te wawine ia. 33Eia, kē oko lā ki te Ayo ka wetū wakawōu ai te kau na mamaté, nā ai wua ai te wawine ia i te tokawitu tāīna ia, nō tēlā na wakaao oki lātou tākatoa ia ana?”
34Pau atu loa ia Iētū peia, “Ko wakaao nā tāne i te ao nei, peia nā wāwine ko tukungia kē wakaaongia. 35Yaulā, te kau e meaina ko kaleka lātou kē wetū wakawōu mai te mate mō te toe ao, e yē wakaao lātou, e yē tukungia oki kē wakaaongia. 36E yē mamate oki lātou wakawōu, ka lāua oki lātou pe nā āngelá. Ni tama lātou nā te Atua, nō tēlā, na wetū mai lātou mai te mate ki te ola. 37Na wakaponoa mai oki e Mōte ka ōla wakawōu te kau na mamaté. Ko i loto o te yikunga āna na tuti o te lākau na mumulá, na lapa oki iāna i te Atu pēnei, ‘ko te Atua o Āpelaama, te Atua o Ītaaka ma te Atua o Iākōpa.’#Ēkoto 3:6 38E Atua iāna nō te kau e ōlá, e kiai nō te kau na mamaté; kia ana oki ko ōla te tangata tākatoa.”
39Ko i ai oki nā toe akoako tule, mea loa pēnei, “Na tautonu tau meanga nā, e te Pūāpī!” 40Mai kiai mai, kāe loa tangata na luluta e te iliili muna wakawōu kia ana.
E tama nā ai te Metia?
(Mātaiō 22:41-46; Māleko 12:35-37)
41Eia, uwi atu loa ia Iētū kia lātou peia, “E wea lā na meaina ai te Metia#20:41 te Metia: Ēleni, te Kilito e tama iāna nā Tāvita? 42Ko Tāvita oki na wakamamata mai peia i loto o te puka Talamo:#Talamo 110:1
‘Na talatala mai te Atua ki toku Atu:
Nō koe ki toku lima mātau,
43ke aku tukungia ō veiá wai yolingā-vae mō koe.’
44Ko Tāvita oki na tauvalo i te Metia e Atu nō ona. Nō wea ai te Metia ka lilo mai ai wai tama nā ana?”
Te wakalapanga nō nā Akoako-Tule
(Mātaiō 23:1-36; Māleko 12:38-40)
45Ko wakalongo mai te wī tāngata kia ana, mea loa ia Iētū ki ana pipi, 46“Onoono kōtou wakalelei i te kau akoako tulé. Ko mina lātou e te yāele ma o lātou kākawu loloa, kē wakateniteningia e te tangata i nā konga māketé. Ko mina oki lātou kē nōnō wua i nā nōanga e vāea i loto o nā walepule ma nā konga lā mua o nā imukaí. 47Ko pau nei nā wale o nā wāwine takawuá i tā lātou yanga, ko wai alaala wua ai lā loto o a lātou tatakunga wano ē ia. Ko nā tāngata nei oki, e utunga loa ongo tō lātou mea.”
Zvasarudzwa nguva ino
Luka 20: PKP
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau