Ioane 3
3
Ko Iētū ma Nīkōtemo
1I te vāia ia, nā nō te tangata Pālitea ia ko Nīkōtemo tona ingoa, ko ona te toe o te Kōnitala wakayaele o te Ngāti Iūta. 2Yau loa iāna kia Iētū i te pō, mea loa ki ai, “E te Lapi#3:2 E te Lapi: ko te wakamaepanga, “E toku Pūāpī”. ē, ko a mātou īloloa e pūāpī koe na yau mai te Atua. Kāe tangata loa e maua e te wai i nā wakailo wakawotu a koe e wai nā, mē ko yē ia ana te Atua.”
3Eia, pau atu ai ia Iētū kia ana, “Ko tala atu au i te tika, kāe tangata loa e ana kitea te Pātileia o te Atua pē iāna e kiai na wānau wakawōu.”#3:3, 7 wānau wakawōu: mēkole, wānau mai lunga.
4“Ka wānau wakawōu pēwea te tangata na matua nei?” te uwi atunga a Nīkōtemo ki ai. “E yē maua loa kē niko wakawōu iāna ki loto o te manava o tona matua wawine kē wānau wakawōu mai ai!”
5Pau atu oki ia Iētū, “Ko tala atu au i te tika, kāe tangata e ō ki te Pātileia o te Atua mē iāna e kiai na wakawānaungia ki te yua ma te Vaelua. 6Ko wānau mai oki te tino, e tino tangata lāi; yaulā te Vaelua, ko wānau mai lāi iāna e vaelua. 7Auyē vili tō ate nō taku mea atunga ia, ‘Kē wānau wakawōu lāi kōtou.’ 8Ko te matangi ko pupuyi wua ki tana konga e wano ai. Ko au langona tona lāpui, yaulā, ko yē mailonga ia koe te konga ko yau ai ma te konga āna ka wano ai. Ko peia oki ki te wī tāngata e wakawānaungia e te Vaeluá.”
9“Ka maua ai pēwea?” te iliili mainga a Nīkōtemo.
10Talatala atu oki ia Iētū, “E pūāpī wolo koe nō Ītalāela, e wea ka yē au iloa ai nā mea nei? 11Ko tala atu au i te tika, ko talatala mātou i nā mea a mātou e iloá, ko wakamamata oki mātou i nā mea e a mātou kiteá, yaulā ko yē āliki kōtou i a mātou tala ia. 12Nā tala atu oki au kia kōtou i nā talatala o te ao nei, ko kōtou lā ko yē lotokono. Ka lotokono ai kōtou pēwea kē tala atu au i nā talatala o te Langí? 13Kāe tangata ake na oko ki lunga o te Langi, ko ona wua na yau mai te Langí, koia te Tama a te Tangata. 14Pē Mōte oki na tāki i te ōvī#3:14 te ōvī: na wowoungia te ōvī a Mōté ki te veo. ki lunga i te mētēpalá, kē tākingia lāi ki lunga peia te Tama a te Tangata;#Nūmelo 21:9 15ko te wī tāngata oki e nunumi kia aná, ka maua ia lātou te ola e yē ngata.
16Nō te wolo o te winangalo o te Atua i te ao nei, tuku mai loa i tana Tama e tayi, kē yē pānakia ai te tangata e nunumi kia aná, kē maua lā te ola e yē ngata. 17E kiai oki te Atua na tuku mai i tana Tama kē wakavā ēna te ao nei, kē yawea lā te ao nei i loto ōna. 18Ko te kau e nunumi kia aná e yē tūāngia lātou, ko te kau lā e yē nunumi kia aná, na tūāngia taumua lātou, nō tēlā ko yē nunumi lātou ki te ingoa o te Tama tokotayi wua a te Atua. 19Ēnei te mea wolo o te wakavānga ia: na yau te mālama ki te ao nei, ko te tangata lā ko mina lāi i te pōuli, ko veia i te mālama, nō tēlā ni yanga kikino a lātou mea. 20Ko te kau e wai i nā yanga kikinó, ko veliveli lātou i te mālama, e yē vavaka loa kē lōmamai ki te mālama kāe tūāteangia a lātou yanga kikino. 21Ko te tangata lā e wai i nā yanga tautonú, ka yau iāna ki te mālama kē kitea maepa wua ai, ko ana yanga nā wai ia, nā wai i loto o te Atua.”#3:21 Na oti te meanga a Iētū ia i te yīlava 15 i te manatunga a te toe kau wuli muna.
Te tala a Ioane Pāpetītō nō Iētū
22I muli mai, wō loa ia Iētū ma ana pipi ki lotowenua o Iūtea, nōnō ai lātou i kiai kē nī mō vāia, wai ai i te yanga pāpetītō. 23I te vāia ia, ko wai te yanga pāpetītō a Ioane i Aenona, e konga ko pili wua ki Tālima, nō tēlā e wolo te yua i te konga ia; ko wakayolo mai ai te wī tāngata ki ai kē pāpetītōngia. 24Ko wai nā yanga nei i te vāia i mua ake ka tilia ai ia Ioane ki loto o te waleāuli.#Mātaiō 14:3; Māleko 6:17; Luka 3:19-20 25Wakatautotoko loa nā toe pipi a Ioane ma te toe tangata Ngāti Iūta nō te yanga palupalu kē mā e mātau ai lātou. 26Lōmamai loa lātou kia Ioane, mea ai ki ai, “E te Pūāpī ē, ko te tangata nā i ō tawa i te toe kaokao o Iōlītāná, te kovi nā tala ai koé, ko pāpetītō iāna i te vāia nei, ko uepepe ai te wī tāngata ki ai.”
27Eia, pau atu loa ia Ioane pēnei, “Kāe yanga loa a te tangata e maua, pē e kiai na tukua mai kia ana mai te Langi. 28Ko kōtou oki nā kite ka wakamamatangia aku talatala nā tala atu kia kōtou, ‘E kiai ko oku te Metia, na ungaina mai lā au taumua kē yau i mua ōna.’#Ioane 1:20 29Ko te wawine ka wakaaó, nā te tāne lāi ka wakaaongia iāná. Ko te yoa lā o te tāne wakaao e tū wua lā tawá, ko wakalongolongo wua ona talinga ki ai, kamuloa iāna yulā i te vēvēia kē wakalongo atu i te leo o te tāne wakaao ia. Ko te vēvēia ia nōoku, na kamuloa oki yawe ngaleka. 30Kē yau iāna ki te matamatua, kē wano atu au ki te lewu.”#3:30 Na oti te meanga a Ioane Pāpetītō ia i te yīlava 36 i te manatunga a te toe kau wuli muna.
31Ia ana na yau mai lungá, ko wolo atu iāna i te wī tāngata; ko te kovi lā o te ao nei, nō te ao nei iāna, ko talatala iāna pe te kau lāi o te ao nei. Ia ana lā na yau mai te Langí, ko wolo atu iāna i te kakai tākatoa. 32Ko tala wakapono oki iāna i nā mea āna na kite ma ana mea na wakalongo, yaulā kāe tangata loa ko āwū i ana tala ia. 33Ko te tangata lā na āwū kia aná, ko ona na wakaponoa mai te tū talatalatika o te Atua. 34Ko te tangata oki na ungaina mai e te Atuá, ko yalu wua iāna i nā talatala a te Atua, nō tēlā, ko tuku mai te Atua i tona Vaelua kia ana ma te yē mawumawu. 35Ko mina te Matua i te Tama, na tuku pūpū oki ēna te wī mea tākatoa ki ona lima.#Mātaiō 11:27; Luka 10:22 36Ko te tangata oki e nunumi ki te Tama ia ka maua tona ola e yē ngata, ko te tangata lā e yē ana tuanakia te Tama ia, e yē ana kitea loa te ola, nō tēlā ko tāwi wua te lili o te Atua i lunga ōna.
Zvasarudzwa nguva ino
Ioane 3: PKP
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau