लुकस 11
11
येसुस गोहरारनन सिखाबअना
(मत्तिस ६:९-१३; ७:७-११)
1ओन्द उल्ला येसुस एकअम ओन्द अड्डा नू गोहरारआ लगियस। आस गोहरारनन मुन्जका ख़ोख़ा चेलर मधे ओर्तोस आसिन बाचस, “अना उर्बायो, युहन्नास तंग्हय चेलारिन सिखबाचका लेखा एमन हूँ गोहरारआ गे सिखाबआ।”
2आस अबड़रिन बाचस, “निम गोहरारओर होले एन्ने बअके,
‘अना बाबा,
निंग्हय नामे नेम्हा मना नेकआ,
निंग्हय राजी बरआ नेकआ।
3एम्हय उल्ला-उल्लान्ता ओन्ना-मोख़नन एमा गे गे हुरमी उल्ला चिआ।
4एम्हय पापन छेमा नना चिआ,
एन्देरगेका एम हूँ एम्हय बिड़दो नू पाप ननुरिन छेमा चिअदम।
अउर एमन परिक्छा नू अमा होआकाला।’”
5ख़ने फेर आस अबड़रिन बाचस, “मनआ होआ का, निम मदहे ती ओर्तोस तंग्हय संगेस गुसन अधहा माख़ा कादस की बअदस, ‘अना संगे, एंगा गे तिन ठो असमा पाइचा चिआ। 6एन्देरगेका एंग्हय ओरोत संगेस ढेर गेच्छा ती एंग्हय एड़पा नू बरचका रअदस, लेकिन आस गे ओना मोख़ा चिआ गे एंग्हय गुसन एन्दरा हूँ मल्ला।’ 7अउर आस भितरी ती बिड़दोओस की बओस, ‘एंगन कचकच अमा नना। अक्कू बली मुच्चरा किरकी र' ई, अउर एंग्हय ख़द्दर एंग्हय गने बिच्छना नू रअनर। एन चोआ की निंगा गे एन्दरा हूँ चिआ पोल्लोन।’ 8एन निमन बअदन, आस तंग्हय संगे ही नाता ती चोओस की आस गे मला चिओस होत्एन, लेकिन आस मला लजरकम नेएतेम रहचस, औंगे चोचस की आस गे एवंदा बग्गे चाड़ पड़ारकी रहचा, अवंदम चिओस। 9औंगे एन निमरिन बअदन, नेआ तो, निमा गे चितारओ, बेद्दा तो, निमा गे ख़क्खरओ, ठोकठोकम बआ तो, निम्हय खतरी बली तिसिगरो। 10एन्देरगेका ने नेएदस आस ख़क्खोस, ने बेद्दस आस गे ख़क्खरओ, अउर ने ठोकठोकमबअदस आस ही खतरी तिसिगरो। 11निम मधे नू एका एन्ने बबस रअदस, नेख़य तंग्दस असमा नेअदस होले आस गे पखना चिओस, का इन्जो नेओस होले इन्जो ही बदला नेर्र चोओस दरा? 12महले डिमा नेअदस होले आस गे बिछी चिओस दरा? 13निम मलदव मना की हूँ निम्हय ख़द्दख़र्रर गे दव चिज गुट्ठी चिआ अख़दर होले, निम्हय मेर्ख़ा ता बबस तंग्हय गुसन नेउरगे नेम्हा बोलतन एन्देर गे मला चिओस दरा?”
येसुस अउर बालजिबुल
(मत्तिस १२:२२-३०; मरकुस ३:२०-२७)
14ओन्द उल्ला येसुस ओरोत आलस ती नादन ओथरआ लगियस, ने बौका रहचस। नाद उरख़ा ख़ने आ बौका आलस कच्छनखरआ हेल्लरस। इदिन इरियर की आलर छक्केम मन्जर। 15लेकिन अबड़र मधे नेकउम-नेकउम बाचर, “नाद गुट्ठी ही उरुबस बालजिबुल#११:१५ बालजिबुल बालजिबुल सैतान ही दोसरा नामे हिके। ती इस नाद गुट्ठी ओथोरदस।”
16दोसरर तो येसुस ही परिक्छा नना आस गने मेर्ख़ा ती ओन्टा चिन्हा नेचर। 17लेकिन आर ही सोचनन अख़चस की आस अबड़रिन बाचस, “एका राजी ख़ुटरिई होले, आ राजी नास मनी। एका एड़पा ख़ुटरिई होले आ एड़पा ता आलर नास मन्नर। 18अन्नेम अगर सैतान ही तंग्हय गनेम खन्ड-खन्ड मनो होले, अदी ही राजी एकन्ने टिकआ ओंगो? एन्देरगेका निम बअदर, का एन बालजिबुल सवंग ती नाद गुट्ठी ओथोरदन। 19एन बालजिबुल सवंग ती नाद गुट्ठी ओथोरदन होले, निम्हय कुक्को ख़द्दर नेख़ाय सवंग ती नाद गुट्ठी ओथोरनर? औंगे अबड़र दुम निम्हय न्याय ननोर। 20लेकिन धर्मेस ही सवंग ती एन नाद गुट्ठी ओथोरदन होले, धर्मेस ही राजी निम्हय मझही नू अड़सिया किर्रकी र' ई।
21“अगर ओरोत बलवान आलस हतियार होअदस की तंग्हय एड़पन ख़ापदस होले, आस ही एड़पा ता हुरमी खुर्जी बछरकी रओ। 22लेकिन आस ती और बलवान आलस बरदस की आसिन जितदस होले, आस ही असरा नन्जका हुरमी हतियार गुट्ठी बच्चदस, अउर आस ही खुर्जी गुट्ठी बच्चदस की संगेर गने ख़टदस।
23“ने एंग्हय तरा मलदस, आस एंग्हय बिड़दो नू रअदस, अउर ने एंग्हय गने मला ख़ोड़दस, आस बिड़दस।
मलदव बोलता किर्ररबरना
(मत्तिस १२:४३-४५)
24“एकाबिरी मलदव बोलता आलस ती उरख़ी, ताब आद ख़इका अड्डा नू जिरारआ गे अड्डा बेद्दा कुद्दी। लेकिन एन्ने अड्डा एसन हूँ मला ख़क्खी, ख़ने बई, ‘एन एसले उरख़की रहचआन एंग्हय एड़पा नुम किर्रोन की कालोन।’ 25एकाबिरी आ बोलता किर्री काली, ताब आ बोलता आ एड़पन इर्रिका अउर इगका-ओथोरका चेमचेमना ख़क्खी। 26ताब आद काली अउर तंग्हय ती और बग्गे मलदव दोसरा सात ठो मलदव बोलता गुट्ठी सँगेम उन्दरई, अउर अबड़ा भितरी कुरई की असन र' ई, अउर आ आलस ही दसा ख़ोख़ा ता दसा ती हूँ बग्गे मलदव मनी।”
मानी रिझ
27एकाबिरी येसुस अबड़ा कत्था बआ लगियस, ख़ने गोहड़ा ता ओन्टा मुक्का चिच्चियारा की बाचा, “धैन र' ई आ आली ने निंगन जन्माचा, अउर दुधही ओन्ताचा।”
28लेकिन येसुस बाचस, “मुन्दा धैन अबड़र हिकनर ने धर्मेस ही कत्थन मेन्नर, अउर आ लेखम एकनर।”
योनास ही चिन्हा
(मत्तिस १२:३८-४२)
29गोहड़ा और बग्गे मन्नुम केरा ख़ने, येसुस बाचस, “ई पिढ़ी ता आलर मलदव रअनर। इबड़र चिन्हा बेद्दनर, लेकिन अगमजानी योनास ही चिन्हा अम्बा की दोसरा एन्दरुम चिन्हा इबड़र गे मला चिरओ। 30एकसे योनास निनवे ता आलर गे चिन्हा मन्जका रहचस, अन्नेम धर्मेस तय्यका एन आल तंगदन हूँ ई पिढ़िन्ता आलर गे चिन्हा मनोस।#योनास ३:४ 31रायबड़ी उल्ला नू दखिन राजी ता रानी चोओ की ई पिढ़ी ता आलरिन दोस लगबओ। एन्देरगेका आद ढेर गेच्छा राजी ती सोलोमन बेलस ही बुद्धी मेना गे बरचकी रहचा, लेकिन एःरा, इसन ओर्तोस रअदस, ने सोलोमनस ती हूँ कोहाँ रअदस।#१ बेलर १०:१-१०; २ इतिहास ९:१-१२ 32रायबड़ी उल्ला नू निनवे ता आलर इजओर की ई पिढ़ी ता आलरिन दुसओर, एन्देरगेका अबड़र योनास ही कत्थन मेन्जर की तंग्हय जियन किर्ताचका रहचर, अउर एःरा, इसन ओर्तोस रअदस, ने योनास ती हूँ कोहाँ रअदस।#योनास ३:५
देह ता बिल्ली
(मत्तिस ५:१५; ६:२२-२३)
33“नेकउम हूँ डिब्या दगनर की डाउड़ा ती मला कुल्लनर अउर नुड़नर की मला उइनर, लेकिन एड़पा भितरी कुरउर होरमर बिल्ली एःरा नेकआ बआ की मेच्छा अड्डा नू उइनर। 34निंग्हय देह ता बिल्ली निंग्हय ख़न्न हिके। निंग्हय ख़न्न ठिक र' ई होले, निंग्हय हुरमी देह बिल्ली मनो। लेकिन आद बेस्स मल्ला होले, निंग्हय हुरमी देहदुम उख़ा मनो। 35औंगे होसियार रआ, निंग्हय नू मन्जका बिल्ली उख़ा मला मना नेकआ। 36अगर निम्हय हुरमी देह बिल्ली ती निन्दरकी र' ई होले, या एकअम अंग उख़ा मल्ला होले, आद हुरमी बिल्ली मनो, एकसे बिल्ली ही बिलचना ती निम्हय मइयाँ बिलचो।”
यहुदी बअना फरिसिस अउर मोसास ही व्यवस्था सिखाबउरिन येसुस ही चेताब
(मत्तिस २३:१-३६)
37येसुस कचनखरनन मुन्जियस ख़ने ओरोत यहुदी बअना फरिसिस आसिन ओना गे नेवताचस। आस एड़पा भितरी कोरचस की ओना गे उक्कियस। 38लेकिन ओन्ना अगू आस ख़ेक्खन मला नोढ़रस, इदिन इरियस की आ फरिसिस छक्केम मन्जस। 39ख़ने उर्बास आसिन बाचस, “निम यहुदी बअना फरिसिर डुबहन अउर थरियन बहरी-बहरी तो मंजदर, लेकिन निम्हय भितरी तो बच्चना-ख़च्चना अउर मलदव ती निन्दकी मनी। 40लुर मलका आलरो, ने बाहरी न कमचस, आसुम भितरी हूँ मला कमचस दरा? 41लेकिन आ भितरी ता चिजन गरिबर गे चिआ, होले निम्हय खतरी हुरमी दुम सुध मनो।
42“ओहरे निम यहुदी बअना फरिसिर! एन्देरगेका निम पुदिना, जिरा अउर हुरमी जड़िबुटी ही दसमान्स चिइदर, लेकिन न्याय अउर धर्मेसिन चोन्हा नन्ना कत्थन तरकुटी नन्दर। लेकिन ई कत्था गुट्ठी हूँ नन्ना चाड़ रहचा, एकाबिरी दोसरा नलख नना लक्का मन्दर।#लेविर २७:३०
43“ओहरे निम यहुदी बअना फरिसिर! निम यहुदिर ही सभाएड़पा गुट्ठी नू मुध अड्ड़ा नू ओक्कना अउर बजार गुट्ठी नू मोंजरा ख़क्खनन बेद्ददर। 44ओहरे निम यहुदी बअना फरिसिर! एन्देरगेका निम तो नुख़ुरका आ मसड़ा#११:४४ मसड़ा आ बिरी यहुदिर मसड़ा मइयाँ ती आलर मला एका बआ की मसड़ा नू चिन्हा उइया लगियर एन्देरगेका एका आलर मसड़ा मइयाँ एकोर होले आ आलर असुध मना लगियर। गिन्ती १९:१६ गुट्ठी लेखा रअदर, एकदा मला इथरई, औंगे आलर बलनर की अदी ही मइयाँ एकनर।”
45ताब मोसास ही व्यवस्था सिखाबउर मधे ओर्तोस येसुसिन बाचस, “अना गुरु, ई कत्थन बअदय की निन तो एमन हूँ बेज्जत नन्दय।”
46येसुस बाचस, “ओहरे निम मोसास ही व्यवस्था सिखाबउर! एन्देरगेका कुम्मना पोलना ओत्थान आलर मइयाँ निम कुमतआदर, लेकिन निम निम्हय ओन्द अंगली लेके हूँ आ ओत्था गुट्ठी मला ओंसदर। 47ओहरे निमरिन! एन्देरगेका निम्हय पुरखर पिटका अगमजानिर ही मसड़ान निम कमदर। 48एन्नेकी निम निम्हय पुरखर एन्ने नलख नन्जका रअनर बअदर की गोवाह चिअदर, एन्देरगेका अबड़र अगमजानिरिन पिटियर, अउर निम तो आ अगमजानिर ही मसड़ा कमदर। 49औंगे धर्मेस ही लुर हूँ बाचा, ‘एन निम्हय गुसन अगमजानिर अउर मुध चेलरिन तइय्योन। अबड़र मधे नेकअनुम पिटोर अउर नेकअनुम साधओर।’ 50औंगे ख़ेख़ेल ही ओरे ती हुरमी अगमजानिर ही ख़ेस बाहतारका दन्डे ई परियन्ता आलर ख़क्खोर। 51हए, एन निमरिन बअदन, हाबिलस ही ख़ेस ती, बेदी अउर धर्मेस ही एड़पा ता नेम्हा अड्डा ही मझही नू पिटरका जकरियास ही ख़ेस गुटी ता दन्डे ई परियन्ता आलर दुम ख़क्खोर।#सिरजन ४:८; २ इतिहास २४:२०-२१
52“ओहरे निम मोसास ही व्यवस्था सिखाबउर! एन्देरगेका निम लुर ही कुन्जिन होआ गे तो होच्चकर, लेकिन निम अपनेम हूँ भितरी मला कोरचकर, अउर कोरआ बिद्दुरिन हूँ मला कोरआ चिअदर।”
53एकाबिरी येसुस आ अड्डा ती उरख़ियस, ताब मोसास ही व्यवस्था सिखाबउर अउर यहुदी बअना फरिसिर आस ही कोहड़े बिड़दो नन्तेम बग्गे कत्था गुट्ठी आसिन मेना हेल्लरर, 54अउर आस ही बई ती गल्ती कत्था उरख़ो का बआ की अबड़र आसिन धरआ गे मोका एरा हेल्लरर।
Zvasarudzwa nguva ino
लुकस 11: KRUX
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2024 (Active), Mother Tongue Translators Society and Wycliffe Bible Translators, Inc. All rights reserved.