लुकस 12
12
कपट ही बिड़दो नू चेताबअना
(मत्तिस १०:२६-३३)
1आ बिरी हजारो आलर ही गोहड़ा ख़ोड़रा, इय्या गुटी का ओन्टा दोसररिन तिरख़ा-नख़रआ हेल्लरर, येसुस पहिले तंग्हय चेलारिन बाचस, “यहुदी बअना फरिसिर ही खमिर ती बछरआ। आ खमिर अबड़र ही कपटी रुप हिके। 2एन्देरगेका कुल्लका कत्था ज्या बग्गे र' ई, आ हुरमी चलख़तारओ, अउर नुख़रका कत्था ज्या बग्गे र' ई, आ हुरमी आख़तारओ। 3औंगे निम उख़ा नू एकदन बाचका रअदर, आद बिल्ली नू मेन्तारओ, अउर निम एकदन एड़पा भितरी फुसुर-फुसुर नन्दर, आ कत्था एड़पा ही मेसगा ती तेंगतारओ।”
नेख़य गने एल्चना चाड़ र' ई
(मत्तिस १०:२८-३१)
4“अना एंग्हय संगेरो, एन निमन बअदन, आलर ती अमा एल्चा ने देहन पिटनर, लेकिन अदिही ख़ोख़ा एन्दरा हूँ नना पोलनर। 5लेकिन एन निमन बअदन का नेख़ाय ती मानिम एल्चा पड़ारओ, नेख़य गने देहन पिटका ख़ोख़ा नरक नू हेबड़ना चिअना सवंग र' ई। एन निमन बअदन, हए, आस तिम एल्चा!
6“एन्दरा पाँच ठो बग्ड़ो दुई ढिबा नू मला बिसरई दरा? अन्नू हूँ धर्मेस आ मधे ती ओन्टन हूँ मला मोधरदस। 7मानिम निम्हय कुक्क ता चुट्टी हूँ हुरमी गिन्ती मन्जकी र' ई। औंगे अमा एल्चा, निम बग्गे बग्ड़ो गुट्ठी ती बग्गे मुल्ली ही रअदर।”
छेमा मला मन्ना पाप
(मत्तिस १०:३२-३३; १२:३२; १०:१९-२०)
8“एन निमन बअदन, ने एंगन आलर ही अगू नू इन्झरदस, धर्मेस तय्यका एन आल तंग्दस हूँ आसिन धर्मेस ही मेर्ख़ादुतर ही अगू इन्झरओस। 9लेकिन ने एंगन आलर ही अगू इन्झरदस, आसिन हूँ धर्मेस ही मेर्ख़ादुतर ही अगू इन्झरतारओर।
10“अउर धर्मेस तय्यका एन आल तंग्दस ही बिड़दो नू कच्छनखरका होरमर ही पाप छेमा नन्नतारओ, लेकिन नेम्हा बोलतस ही बिड़दो नू मलदव कत्था कच्छनखरओर आर ही पाप तो इकला हूँ छेमा मला ननतारओ।
11“एकाबारी आलर निमन धरओर की यहुदिर ही सभाएड़पा गुट्ठी नू, राजी ख़ापुर अउर राजी ननुर गुसन ओन्दोरओर, ताब निम एकसे अउर एन्देर बओम, अउर एन्देर बअना मनो बआ की फिकिर अम्मके नना। 12एन्देरगेका आ बिरी एन्देर बअना मनो अदिन नेम्हा बोलतस निमन सिखबओस।”
मुरुख उरुब आलस ही खिरी
13ख़ने गोहड़ा ती ओर्तोस येसुसिन बाचस, “अना गुरु, एंग्हय ददसिन आना चिआ, अउर आस अंसबन्डा ननो चिओस नेकआ।”
14लेकिन येसुस आसिन बाचस, “अना आलयो, ने एंगन निम्हय मइयाँ न्याय नन्ना या निम्हय खुर्जी ख़ट्टू कमचकी र' ई?” 15अउर आस आरिन बाचस, “होसियार रआ, हुरमी खल्ल ही लोभलालच ती बछरआ, एन्देरगेका आलर ही मानी जिन्गी आस ही बग्गे धन-खुर्जी नू मला रओ।”
16ख़ने आस आरिन ओन्टा खिरी तिंगियस, “एकअम ओरोत उरुब आलस ही ख़ल्ल नू बग्गे अन्न उब्जारा। 17ख़ने आस जिया नुम सोचआ हेल्लरस, ‘एंग्हय गुसन अन्न उइया गे अड्डा मल्ला, अक्कू एन एन्देर ननोन?’ 18अउर आस बाचस, ‘एन एन्ने ननोन, एंग्हय कुट्ठी गुट्ठी धसओन की और कोहाँ-कोहाँ कमओन, अउर अइय्यम एंग्हय हुरमी अन्न अउर मालसामान गुट्ठी उइय्योन।’ 19अउर एन एंग्हय जियन बओन, ‘अनय जिया, बग्गे बछर गुटी अड़सना खुर्जी निंग्हय खतरी ख़ोड़रकी र' ई। खुसमारअय, ओनय, मोख़य, अउर रिरयारअय।’” 20“लेकिन धर्मेस आसिन बाचस, ‘अना मुरुख, इन्ना माख़ाम निंग्हय जियन निंग्हय गुस्ते होरओ कालो, अउर एका चिजन निन निंग्हय खतरी ख़ोड़चका रअदय आद नेख़य मनो?’”
21“तंग्हय खतरी खुर्जी गुट्ठी ख़ोड़ना, लेकिन धर्मेस ही एरना नू उरुब मला मनू आलस ही परिया एन्नेम मनी।”
चिन्ता मला नना
(मत्तिस ६:२५-३४)
22येसुस तंग्हय चेलारिन बाचस, “औंगे एन निमरिन बअदन, निम्हय जिया ही खतरी एन्दरा मोख़ोम अउर देह ही खतरी एन्दरा अत्तोम बआ की चिन्ता मला नना। 23एन्देरगेका जिया मन्डी ती कोहाँ अउर देह किचरी ती कोहाँ हिके। 24कौवा गुट्ठी न एःरा! अबड़ा न तो चांख़ई, न तो ख़ोई, अबड़र ही खतरी न तो गोदाम न कुट्ठी एड़पा दुम र' ई, लेकिन अन्नू हूँ धर्मेस अबड़न ओन्ताआदस। निम ओड़ाख़ाख़ा ती बग्गे मोल ही रअदर! 25निम्हय मझही नू ने फिकिर ननोस की तंग्हय उज्जना ही ओन्द बेड़ा गुटी हूँ बग्गे नना ओंगोस? 26अगर निम ई सन्नी नलखन हूँ नना पोलदर होले, दोसरा कत्था ही चिन्ता एन्देरगे नन्दर? 27जँगला ता लिली पुंपन एःरा, अबड़ा नलख हूँ मला ननी, अत्ता गे किचरी हूँ मला तेस्सी। लेकिन एन निमन बअदन, सोलोमन बेलस गने आ बग्गे धन-खुर्जी रहचा, अन्नू हूँ आस तो अबड़ा पुंप गुट्ठी मधे ओन्टा लेखा हूँ बेस्स कुना मला अत्तका-पुन्दरका रहचस।#१ बेलर १०:४-७; २ इतिहास ९:३-६ 28लेकिन इन्ना मन्ना अउर नेला चिच्च नू हेबड़ना खली ही घांसिन धर्मेस एन्ने चेमचेमना नन्दस होले, अना थोरे पत्तउर, आस निमरिन कय बग्गे अत्तओस पुन्दरतओस!
29“औंगे एन्दरा मोख़ोत का एन्दरा ओनोत बआ की निम मला बेद्दा कुद्दा, अउर चिन्ता हूँ मला नना। 30एन्देरगेका ख़ेख़ेल ता हुरमी आलर इबड़ा चिज गुट्ठी बेद्दनर। निम्बस अख़दस का निमा गे इबड़ा गुट्ठी ही चाड़ र' ई। 31पहिले धर्मेस ही राजिन बेद्दा, अउर इबड़ा हुरमी कत्था गुट्ठी हूँ निमा गे चितारओ।”
मेर्ख़ा नू ख़ोड़रना खुर्जी
(मत्तिस ६:१९-२१)
32“अना सन्नी जेर, अमा एल्चाय! एन्देरगेका निमा गे राजी चिआ गे निम्बस खुसी रअदस। 33निम्हय खुर्जिन बिसा की गरिबर गे चिआ। निम्हय खतरी एन्ने बटुवा कमआ एकदा मला एटरओ। इक्ला हूँ मला मुन्जरना खुर्जिन मेर्ख़ा नू जोगा बआ। असन तो ख़लबरर हूँ मला लग्गोर, अउर पोच्गो हूँ मला मुख़ी। 34एन्देरगेका एकसन निम्हय खुर्जी र' ई, असन निम्हय जिया हूँ मनो।”
एजरका रआ
35“निम्हय कड़मन हेआकी सपड़ार का रआ, अउर बिल्लिन दगचका रआ। 36अउर निम आ आलर लेखा मना, ने तम्हय उरुबस बेन्जा भोजे ती इकला किर्रोस बआ की आसिन असरा एरते मन्नर, आस बरओस की बलिन ठोकठोकम बओस होले आस ही खतरी चाँड़ेम बलिन तिसगओर। 37आ नोकरर धैन हिकनर, नेख़ाय उरुबस बरदस होले आरिन एजरका ख़क्खोस। मानिम एन निमरिन बअदन, आस तंग्हय कड़मन हेओस की आरिन मन्डी ओना गे ओक्तोओस, अउर बरओस की आर ही तेतर-सुसर ननोस। 38अगर आस अधहा माख़ा या अदिन्ती और गहड़ी बरओस की हूँ आरिन एजरकम ख़क्खदस होले, अबड़र धैन हिकनर! 39लेकिन इदिन अख़आ, का ख़लबस एकाबिरी बरओस बआ की एड़पा ता उरुबस अख़ना होले, आस एजरकम रओस, अउर ख़लबसिन एड़पन उम्पा गे बरआ मला चिओस। 40अन्नेम निम हूँ सपड़ार का रआ, एन्देरगेका धर्मेस तय्यका एन आल तंगदन निम मला सोच्चका बेड़ा नू बरओन।”
इमानदार अउर बैमान नोकरस ही खिरी
(मत्तिस २४:४५-५१)
41ताब पतरुसस मेन्जस, “अना उर्बायो, एन्दरा ई खिरी एम्हय खतरी लेका तिंकय, का दोसरा होरमर गे हूँ तिंगिकय?”
42ख़ने उर्बास बाचस, “आ पत्तअना अउर लुरगर नोकरस ने हिके? नेकन आस ही उरुबस तंग्हय दोसरा नोकररिन बेड़ा-बेड़ा नू अबड़र ही बखरा नू पड़ारना मन्डी चिआ गे खटताबओस। 43धैन आ नोकरस, ने तंग्हय उरुबस किर्रदस की बरदस होले अन्ने ननतेम ख़क्खदस। 44मानिम एन निमरिन बअदन, उरुबस आ नोकरसिन तंग्हय हुरमी खुर्जी मइयाँ अधिकार चिओस। 45लेकिन अगर आ नोकरस तंग्हय जिया नू ‘एंग्हय उरुबस दिरी ती बरओस’ बआ की नोकर-नोकरनिरिन लोआ हेल्लरओस, अउर ओना-मोख़ा अउर उंखा हेल्लरस होले, 46आस असरा मला नन्जका उल्ला अउर मला अख़चका बेड़ा नुम आस ही उरुबस बरओस की आस गे कोहाँ दन्डे चिओस, अउर आस ही दसा मला पत्तउर ही लेखा मनो।
47“ने तंग्हय उरुबस ही मनेन अख़ओस की हूँ आस सपड़ारका मला रओस अउर उरुबस ही मने लेखा मला ननोस होले आस बग्गे मार मोख़ोस। 48लेकिन ने तंग्हय उरुबस ही मनेन बल्लोस की मार मोख़ना जोगे नलख ननोस होले, आस थोरे मार मोख़ोस। नेका बग्गे चिरकी र' ई आस गुसते ती बग्गे नेरओ, अउर नेका बग्गे सोंपचकादस आस गुसते और बग्गे होरओ।”
सान्ती मला, छिन्डरना
(मत्तिस १०:३४-३६)
49“एन ख़ेख़ेल मइयाँ चिच्च तुन्दा गे बरचका रअदन, आद तो अगुतिम ख़ोस्सना काना होले मनो दने! 50ओन्टा दुक्खे ही बप्तिस्मा#१२:५० दुक्खे ही बप्तिस्मा इसन दुक्खे ही बप्तिस्मा ही मने अम्म ती सुध नन्ना चलन मला बुझबई महज ख्रिस्तस दुक्खे भोगआ पड़ारओ बअना संकेत ननी। र' ई, एकदा एंगा होअना र' ई। आद मला मन्ना गुटी एंग्हय जिया नू चैन दुम मला मनो। 51एन्दरा निम बुझुरदर का एन ख़ेख़ेल नू सान्ती चिआ गे बरचका रअदन? मला, एन निमरिन बअदन, मुन्दा एन तो भिने नना गे बरचका रअदन। 52एन्देरगेका अक्कू ती ओन्द परिवार नू पाँच गोड़े तम्हय-तम्हय नू छिन्डरओर, तिन गोड़े ही बिड़दो दुई गोड़े, अउर दुई गोड़े ही बिड़दो नू तिन गोड़े। 53तम्बस तंग्दस ही बिड़दो नू, अउर तंग्दस तम्बस ही बिड़दो नू, तंगियो तंगदा ही बिड़दो नू, अउर तंगदा तंगियो ही बिड़दो नू, सास तंग्सेड़ो ही बिड़दो नू, अउर सेड़ो तंगसास ही बिड़दो नू छिन्डरओर।”#मिकास ७:६
बेड़ा ही चिन्हा गुट्ठी
(मत्तिस १६:२-३; ५:२५-२६)
54आस गोंहड़न हूँ बाचस, “निम पच्छिम तरा बदालिन चोअना एरदर की चाँड़ेम बअदर, ‘चेंप पुंइयो’ अउर अन्नेम मनी। 55एकाबिरी दखिन ती ताका तागरना एरदर होले ताब निम बअदर, ‘बग्गे बिड़ओ’ अउर अन्नेम मनी। 56अना कपटी रो! निम मेर्ख़ा अउर ख़ेख़ेल ही चिन्हा गुट्ठी तेंगा ओंगदर, लेकिन अक्कुन ता बेड़न एन्देरगे छिन्डा पोलदर?”
बिड़दो ननुर गने मेल-जोल नना
(मत्तिस ५:२५-२६)
57“एन्देर कत्था मानी हिके बअना निम अपनेम एन्देरगे निरनय मला नन्दर? 58निम्हय मइयाँ मुद्दा चिच्चकस गने हाकिमस हेद्दे कादर होले, डहरेनुम आस गने मेसर-नखरआ, मला होले आस निंगन न्यायधिसस गुसन नतगोस की होओस, अउर न्यायधिसस निंगन सैनस गे चिओस, अउर सैनस निंगन जेहेल नू सजओस। 59एन निंगन बअदन, ओन्द-ओन्द ढिबा मला चिअना गुटी असले ती उरख़ा पोल्लोय।”
Zvasarudzwa nguva ino
लुकस 12: KRUX
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2024 (Active), Mother Tongue Translators Society and Wycliffe Bible Translators, Inc. All rights reserved.