लुकस 10
10
बहत्तर चेलर तइरका
1अदिही ख़ोख़ा उर्बा येसुस और बहत्तर गोड़ेरिन#१०:१ बहत्तर गोड़ेरिन गिरिक ही स्रोत भखा नू बहत्तर गोड़ेर मन्जका लेके अदी ही लेखा उइरका र' ई। चज्जियस, अउर आस अबड़रिन दुई-दुई गोड़े नन्जस की हुरमी सहर अउर पद्दा नू तंग्हय ती अगू तइय्यस, एसन तान काला बिद्दका रहचस। 2आस अबड़रिन बाचस, “उबजारका तो बग्गे र' ई, लेकिन जन्नर थोरहेम रअनर। औंगे उबजरना ही उर्बासिन गोहरारआ, आस तंग्हय उबजारका नू जन्नरिन तइय्या चिआ नेकआ। 3अक्कू कला, मेढ़होन हुड़ार ही मझही नू तय्यका लेखा एन निमरिन आलर ही मझही नू तइय्या लगदन। 4न तो ढिबा ही बटुवा, न झोला, न जुता चेड़आ, न डहरे नू नेकअनुम गोड़ लग्गा।
5“एका एड़पा नू कोरओर पहले बआ, ‘ई एड़पा गे सान्ती मना नेकआ।’ 6अउर असन सान्ती ख़क्खना आलस रअदस होले, निम्हय सान्ती आस गने रओ, लेकिन मल्लस होले आ सान्ती निम्हय गुसन किर्रो की बरओ। 7आ एड़पा नुम रअके, अबड़र एन्दरा चिओर अदिनुम ओनके मोख़के। एन्देरगेका जन्नर तम्हय बनी ख़क्खना जोगे रअनर। एड़पा-एड़पा अमके रअके।
8“एकाबिरी निम एकअम सहर नू कोरओर, ताब आलर निमरिन स्वागत ननोर, अउर निम्हय अगू नू चिच्चका मन्डिन ओना, 9असन मन्जका बेमरहारिन कोड़े नना, अउर आरिन बआ, ‘धर्मेस ही राजी निम्हय हेद्दे अड़सकी र' ई।’ 10लेकिन एकाबिरी निम एकअम सहर नू कोरओर, अउर आलर निमरिन स्वागत मला नन्नर होले, ताब उरख़के की आ सहर ता डहरे नू कला, अउर बआ, 11‘एम्हय ख़ेड्ड नू लक्का निम्हय सहर ता धुलिन हूँ एम निम्हय बिड़दो नू ख़ेत्तदम। अन्नू हूँ इदिन अख़आ का, धर्मेस ही राजी हेद्देम अड़सकी र' ई।’ 12एन निमरिन बअदन, रायबड़ी उल्ला नू सदोम#१०:१२ सदोम सदोम नगरे नू रहचका आलर बग्गे पाप नन्जकाचर ख़ने धर्मेस ई नगरे आबोन चिच्च ती नास नन्जस। नगरे ता आलर ही ख़क्खका दन्डे ती ई नगरे ता आलर ही ख़क्खना दन्डे बग्गे मलदव मनो।#सिरजन १९:२४-२८; मत्तिस ११:२४; १०:१५
मला पत्तऊ सहर गुट्ठी
(मत्तिस ११:२०-२४)
13“ओहरे खोराजिन अउर बेथसेदा ता आलरो! एन्देरगेका एका निम्हय मझही नू नन्जका चमत्कार ही नलख टुरोस अउर सिदोन#१०:१३ टुरोस अउर सिदोन टुरोस अउर सिदोन सहर नू कोहड़े मलदव पपहा नलख ननू आलर रहचर। नू नन्ना होले, अइय्या ता आलर अगुम सन्न बोरा ही झुलन अत्तोर की चिन्द नू ओक्कोर की जियन किर्ताचका रओर दने।#यसायाहस २३:१-१८; इजिकि'एलस २६:१—२८:२६; यो'एलस ३:४-८; आमोसस १:९-१०; जकरियास ९:२-४ 14लेकिन रायबड़ी उल्ला नू निम्हय ती टुरोस अउर सिदोन नगरे ही दन्डे ती निम्हय दन्डे बग्गे मलदव मनो। 15अउर निन, कफरनहुम! एन्दरा निन मेर्ख़ा नू उठबातारओय दरा? निन चिच्च गड्डी नू हेबेड़तारओय।
16“ने निम्हय कत्थन मेन्दस, आस एंग्हय कत्थन मेन्दस। ने निमरिन मला इन्झरदस, आस एंगन मला इन्झरदस। अउर ने एंगन मला इन्झरदस, आस एंगन तइयुसिन मला इन्झरदस।”
बहत्तर चेलर किर्रर बरनर
17आ बहत्तर चेलर रिझिरनुम किर्रियर बरचर की बाचर, “अना उर्बायो, निंग्हय नामे नू नाद गुट्ठी हूँ एम्हय बस नू बरई।”
18येसुस आरिन बाचस, “एन सैतानन बिजली लेखा मेर्ख़ा ती खतरनुम राचका इरकन। 19एःरा! एन निमा गे नेर्र गुट्ठी अउर बिछी गुट्ठी तिरख़ा गे अउर मुदैर ही हुरमी सवंग मइयाँ अधिकार चिच्चका रअदन, अउर एन्दरुम कत्था निमन हानी मला ननो। 20अन्नू हूँ मलदव बोलता गुट्ठी एम्हय बस नू र' ई बआ की अमा खुसमारआ, मुन्दा निम्हय नामे मेर्ख़ा नू लिखिरकी र' ई बआकिम खुसमारआ।”
येसुस रिझिरदस
(मत्तिस ११:२५-२७; १३:१६-१७)
21आ बिरिम येसुस नेम्हा बोलतस नू बग्गे रिझरस की बाचस, “अना बाबा होय, मेर्ख़ा अउर ख़ेख़ेल ता धर्मेउर्बायो, एन निंगन धन्यवाद चिइदन, एन्देरगेका निन इबड़ा कत्थन लुरगर अउर पढुवर ती नुड्डकाय की सन्नी ख़द्दर गे एदकय। अना बाबा, एन्देरगेका एन्नेम नन्ना निंग्हय मने रहचा।”
22“एम्बस हुरमी चिजन एंगा सोंपचकादस। तंग्दस ने हिकदस बअना बबस अम्बर ने हूँ बलनर। बबस ने हिकदस बअना तंग्दस अम्बर, अउर तंग्दस आसिन नेख़ाय गुसन चिन्हतअना मने नन्दस, आस अम्बर दोसरर ने हूँ बलनर।”
23ख़ने चेलर तरा किर्रियस की येसुस ओतख़े नू आरिन बाचस, “धैन र' ई आ ख़न्न, एकदन निम इरका इबड़ा कत्थन इरी। 24एन्देरगेका एन निमरिन बअदन, बग्गे अगमजानिर अउर बेलर एकदन निम एरदर, अदिन एःरा बिद्दका रहचर, लेकिन मला इरियर, अउर एकदन निम मेन्दर अदिन मेना बिद्दका रहचर, लेकिन मला मेन्जर।”
दव सामरिस ही खिरी
25ओन्द उल्ला मोसास ही व्यवस्था सिखाबउस चोचस की येसुसिन परिक्छा नना गे आसिन मेन्जस, “अना गुरु, मुन्जा मलका उज्जना ख़क्खा गे एंगा एन्देर नना पड़ारओ?”
26येसुस आसिन बाचस, “मोसास ही व्यवस्था नू एन्दरा लिखरकी र' ई? अन्नू निन एन्दरा पढ़चकय?”
27व्यवस्था सिखाबऊ गुरुस बाचस, “निन निंग्हय धर्मेउर्बसिन निंग्हय हुरमी जिया ती अउर निंग्हय हुरमी बोलता ती अउर निंग्हय हुरमी सवंग ती अउर निंग्हय हुरमी लुर ती चोन्हा नना, अउर निन निंगन एकसे चोन्हा नन्दय अन्नेम निंग्हय परोसियरिन चोन्हा नना।”#लेविर १९:१८; व्यवस्था ६:५
28येसुस आसिन बाचस, “निन मानिम बाचकय, एन्नेम नना, होले निन उज्जोय।”#लेविर १८:५
29लेकिन आस तंगन धर्मी एदआ गे येसुसिन मेन्जस, “होले एंग्हय परोसियर एका ओर्तोर हिकनर?”
30येसुस बिड़दाचस की बाचस, “एकअम ओरोत आलस यरुसलेम ती यरिहो तरा काला लगियस। डहरे नू डाकुर आसिन धरचर की थोथम नन्जर की लौचर, अउर अधमरा अम्बियर की केरर। 31सनजोगती ओरोत यहुदी नैगस आ डहरे मन्तेम काला लगियस, अउर आसिन इरियस की दोसरा तरा तरकुटी मन्जस की कट्टियस केरस। 32एन्नेकिम लेवी#१०:३२ लेवी यहुदी नैगसिन सँगे चिऊ धर्मी आलस गोतर ता ओरोत आलस हूँ आ अड्डा नू बरचस अउर आसिन इरियस की दोसरा तरा तरकुटी मन्जस की कट्टियस केरस। 33लेकिन ओरोत सामरिस डहरे इकनुम काला लगियस ख़ने आ अड्डा नू अड़सियस, अउर आसिन इरका ख़ोख़ा आस ही जिया सोग्गे ती निन्दिया केरा। 34अउर आसी गुसन केरस की आस ही खादी गुट्ठी नू इसुंग अउर अंगुर मध#१०:३४ इसुंग अउर अंगुर मध आ बेड़ा नू ई दोनोन मन्दर लेखा लगबआ लगियर। तुन्दियस की पट्टी हेचस, अउर आसिन तंग्हय गदहा नू लच्चस की ओन्टा रअना एड़पा नू होच्चस अउर आसिन सेवा-सुसार नन्जस। 35दोसरा उल्ला आस चँदी ही दुई ढिबा आ डेरा एड़पन्ता उरुबस गे चिच्चस की बाचस, ‘इसिन बेस्स कुना सेवा-सुसार नना चिआ, अउर इदी ती बग्गे निंग्हय खरचा लग्गो होले अदिन एन किर्रो बिरी निंगा गे चिओन।’”
36येसुस आनियस, “निंग्हय बिचार नू ई तिन गोड़े मधे ती डाकुर ही ख़ेक्खा नू पड़ारऊ आलस ही परोसिया ने मन्जस?”
37आस बाचस, “ने सोग्गे नन्जस, आसिम हिकदस।”
ख़ने येसुस आसिन बाचस, “कला निन हूँ अन्नेम नना।”
मारथा अउर मरियम गने येसुस ही ख़क्खना
38येसुस अउर आस ही चेलर काला लगियर ख़ने ओन्टा पद्दा नू कोरचर, अउर मारथा नामे मन्जका ओन्टा आली येसुसिन तंग्हय एड़पा नू स्वागत नन्जा। 39अदी ही मरियम नामे मन्जका ओरोत तंग्ड़ी रहचा। आद उर्बा येसुस ही ख़ेड्ड गुसन उक्किइया की आस ही सिखाबअनन मेना लग्गिया। 40लेकिन मारथा तेतर-सुसर ही बग्गे नलख नन्ना नू अझरारकी रहचा। आद येसुस गुसन बरचा की बाचा, “अना उर्बायो, इंग्ड़ी तेतर-सुसर ही नलख नू एंगन ओतख़ेम अम्बकी चिच्चकी र' ई, एन्दरा निन मला एरदय? अदिन आना चिआ का आद बरओ की एंगा सँगे चिआ नेकआ।”
41लेकिन उर्बा येसुस अदिन बिड़दाचस की बाचस, “मारथा, मारथा, निन बग्गे कत्था गुट्ठी ही चिन्ता, अउर फिकिर नन्दी। 42लेकिन चाड़ ओन्टम कत्था ही र' ई, आ दव कत्थन मरियम चज्जकी र' ई, अदिन अदी ही गुसते मला होतारओ।”
Zvasarudzwa nguva ino
लुकस 10: KRUX
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2024 (Active), Mother Tongue Translators Society and Wycliffe Bible Translators, Inc. All rights reserved.