युहन्ना 17
17
ताइको भाअ्सिङ इसुको पारथाना
1इदोइ काथा दोअ्लि दोकान्हुअ्सो इसु स्वरगभारि खाङतेङ दोअ्हि, “आबा, पहर थुकालिलोका हि, नाङको चानको पारताप तिङपापि रो चान नाङको पारताप तिङपाको। 2हाइपानु ना वासेहेङ गोताङ द्याङगेलाइर्हुता खाबारा पिका हिन्हा, कालाउ ना वासेहेङ पिका झाराङहेङ वा हेअ्लाउ मामुअ्का जिबन प्याको। 3एला हेअ्लाउ मामुअ्का जिबन इदोइ, एम्बालाइ ना एअ्मिखिनिङ सत्ते परमेस्वरहेङ नालाको रो नाङको दिङगिल्का इसु ख्रिस्टहेङ नालाको। 4जेदोङ काम ना कासेहेङ पिन्हा, इङको पोङघापातेङ नासेहेङ सुमिङता का पारतापि पाका हिघा। 5आबा, दुनियाको सिरजाइ जेङका लाम्फा नाङको लोकाता कासेहेङ पारतापि बान्हाइ।
चात्यागेलाइको भाअ्सिङ इसुको पारथाना
6 “दुनियासो जेदोङ द्याङगेलाइ ना कासेहेङ पिन्हा, का एम्बालाइहेङ नाङको मिङ तिङपापिका हिघा। एम्बालाइ नाङको हिघाखे, कालाउ ना एम्बालाइ कासेहेङ पिन्हा रो एम्बालाइ नाङको बचन साअ्का हि। 7एम्बालाइ एला गिहि, ना कासेहेङ पिका गोताङ काथा नासो लोका। 8हाइदोनु जेदोङ बचन ना कासेहेङ पिन्हा, का एम्बालाइहेङ पिका हिघा रो एम्बालाइ इङको र्हुका हि। का नासो लोका दोअ्तेङ एम्बालाइ जातिङको गिका हि। कालाउ ना कासेहेङ दिङगिल्का दोअ्तेङ एम्बालाइ खान्धुर पाका हि। 9का दुनियाको भाअ्सिङ पारथाना मापाखा, कालाउबुङ का एम्बालाइको भाअ्सिङ पारथाना पाखा, जाइहेङ ना कासेहेङ पिका हिन्हा। हाइदोनु एम्बालाइ नाङकोङ। 10काङको गोताङ जेदोङ हि नाङको रो नाङको जेदोङ हि काङको। काङको पारताप नेलाइता तिङका हि।
11 “का आरोङ दुनियाता माह्याङका, कालाउबुङ एबालाइ ते दुनियाता ह्यावा। हाइपानु काचाहिँ नाङकोता लोदोङखा। पुनित आबा, ना कासेहेङ पिका नाङको मिङता एम्बालाइहेङ सामर्हाइतेङ ताअ् रो केलाइभाइपाङ एम्बालाइ बुङ एअ् ज्याको। 12जेलाउथिकापा का एम्बालाइदोफा हिघाखा, ना कासेहेङ पिका नाङको मिङता एम्बालाइहेङ रेम्फा ताअ्घा। कालाउ मुअ्लि गोइकालाइहेङ खान्तेङ हासुहेङ बुङ मुअ्लि मापिहि। हाइपानु धरमकिताब पोङघालिङ गोइघाहि।#ले ४१:९; युहन्ना १३:१८
13 “एला का नाङकोता लोदोङखा। दुनियाता हिलाउ इदोइ काथा का धुइखा, एम्बालाइता काङको लेङ पोङघाको। 14का एम्बालाइहेङ नाङको बचन पिघा, कालाउबुङ दुनिया एम्बालाइहेङ खाङलि माकिअ्हि। हाइपानु एम्बालाइ दुनियाको माको, जेसापा का दुनियाको माको। 15ना एम्बालाइहेङ दुनियासो चुम्पु दोअ्तेङ का पारथाना मापाङका। कालाउबुङ एम्बालाइहेङ साइतानसो सामर्हाइतेङ ताअ्पि। 16जेसापा एम्बालाइ दुनियाको माको, का बुङ दुनियाको माको। 17एम्बालाइहेङ सत्तेता पुनित पापि, नाङको बचन सत्ते हि। 18जेसापा ना कासेहेङ दुनियाता दिङगिलन्हा, का बुङ एम्बालाइहेङ दुनियाता दिङगिल्का हिघा। 19एम्बालाइको भाअ्सिङ का ताइमिहेङ पुनित पाखा, कालाउ नेलाइ बुङ सत्तेता पुनित जेङसु।
खान्धुरिगेलाइको भाअ्सिङ इसुको पारथाना
20 “का एबालाइको भाअ्सिङ खिनिङ पारथाना मापाङका, कालाउबुङ एबालाइको बानालसो कासेहेङ खान्धुर पाकालाइको भाअ्सिङ बुङ पारथाना पाङका। 21हाइपानु एम्बालाइ झाराङ एलोङ ज्याको। आबा, जेसापा ना काङकोता हिन्हा रो का नाता हिघा, एन्साङपातेङ एम्बालाइ बुङ केलाइता ह्याको। कालाउ ना कासेहेङ दिङगिलन्हा दोअ्तेङ दुनिया खान्धुर पाको। 22जेदोङ पारताप ना कासेहेङ पिका हिन्हा, का एम्बालाइहेङ पिका हिघा रो केलाइ एलोङ जेङकाभाइपाङ एम्बालाइ बुङ एलोङ ज्याको। 23का एम्बालाइता, कालाउ ना काता हिकाभाइपाङ एम्बालाइ बुङ एलोङ ज्याको। ना कासेहेङ दिङगिल्का, कालाउ कासेहेङ माया पाकाभाइपा ना एम्बालाइहेङ बुङ माया पान्हा दोअ्तेङ दुनिया ग्याको।
24 “आबा, का इछा पाखा, ना कासेहेङ पिकालाइ का जेता हिघा एम्बालाइ कादोफाङ ह्याको रो काङको पारताप तिनाको। जेदोङ पारताप दुनियाको सिरजाइ जेङका लाम्फासो दोङ कासेहेङ माया पाका हिनाङ ना कासेहेङ पिका हिघान्हा।
25 “धरमाति आबा, दुनिया नासेहेङ मानाल्खे, कालाउबुङ का नासेहेङ नाल्खा। कालाउ ना कासेहेङ दिङगिल्का दोअ्तेङ चात्यागेलाइ गिखे। 26का एम्बालाइहेङ नाल्पाघा, कालाउ नाङको एबालाइता नाल्पातेङ ह्याङका, ओदोङभाअ्सिङ ना कासेहेङ माया पाकाभाइपाङ, एम्बालाइ बुङ एअ्मि भेनेङहेङ माया पाको।”
Zvasarudzwa nguva ino
युहन्ना 17: DHIM
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2025 by Nepal Bible Society and Wycliffe Bible Translators, Inc.