युहन्ना 18
18
इसुहेङ रिम्का
(मत्ति २६:४७-५६; मरकुस १४:४३-५०; लुका २२:४७-५३)
1इदोइ काथा दोअ्लिदोतेङ इसु ताइको चात्यागेलाइदोफा किद्रोन जोला ओदोइपार हानिहि। इन्ता एलोङ बागान हिघाहि। इसु ताइको चात्यागेलाइदोफा इन्ता दुल्हि। 2वासेहेङ रिम्पाका यहुदा बुङ इङको थामे नाल्का हिघाहि, हाइदोनु इसु ताइको चात्यागेलाइदोफा इन्ता हानिघाखे। 3इङको पहर गेसा, उका रो काति चुमका सिपाल्हाइको एअ् हुल रो मुल धामि कालाउ फरिसिगेलाइ दिङगिल्का थानको पालेगेलाइ चुम्तेङ यहुदा इन्ता लोहि।
4कालाउ ताइमिर्हुता लोलितोम्का गोताङ काथा गितेङ इसु आगाता हानिहि रो एम्बालाइहेङ दोअ्हि, “नेलाइ हासुहेङ भोदोङसुखेना?”
5एम्बालाइ वासेहेङ दोअ्हि, “नासरतको इसुहेङ।”
इसु एम्बालाइहेङ दोअ्हि, “का वाआङ।” कालाउ वासेहेङ रिम्पापिका यहुदा बुङ एम्बालाइदोफाङ जाअ्तेङ हिघाहि। 6जेलाउ इसु एम्बालाइहेङ “का वाआङ हिघा” दोअ्हि, कालाउ एम्बालाइ न्हुअ् पासाइतेङ भोनोता लोङहि। 7आरोङ इसु एम्बालाइहेङ हिअ्हि, “नेलाइ हासुहेङ भोदोङसुखेना?” एम्बालाइ दोअ्हि, “नासरतको इसुहेङ।” 8इसु दोअ्हि, “का नेलाइहेङ दोअ्होइका, का वाआङ। एदि नेलाइ कासेहेङ भोदोङसुखेना पानु इदोइ द्याङगेलाइहेङ चाहिँ हानिलि पिसु।”
9“ना कासेहेङ पिकालाइता एअ्मिहेङ बुङ का माराम्पाघा” दोअ्तेङ वाको दोअ्का बचन पोङघाको दोअ्तेङ इदोइ जेङहि।
10एन्सालाउ सिमोन पत्रुस ताइमिदोफा हिका काति ओल्हिपातेङ मुल धामिको कामत्याको दाम्पाहा न्हातोङ पुकापापिहि। जाइको मिङ माल्खस हिघाहि।
11इसु पत्रुसहेङ दोअ्हि, “काति दाबिता ह्वाअ्। हाइ आबा कासेहेङ पिका तु:को बाति माआम्लि?”#मत्ति २६:३९; मरकुस १४:३६; लुका २२:४२
इसु हन्नासकोता चुम्पुका
12इङकोन्हुअ्सो सिपाल्हाइको हुल, एम्बालाइको काप्तान रो यहुदि आगुवागेलाइको दिङगिल्का थानको पालेगेलाइ इसुहेङ रिम्हि रो वासेहेङ धेउहि। 13लाम्फा एम्बालाइ वासेहेङ हन्नासकोता चुम्पुहि, जाइ इङको बाअ्सारको मुल धामि काइयाफाको जुवा हिघाखे। 14इदोङ इङकोङ काइयाफा हिघाखे, जाइ राइतिको भाअ्सिङ एअ्मि द्याङ सिलिदोङ भालाइ हि दोअ्तेङ यहुदि आगुवागेलाइहेङ साल्हा पिका हिघाखे।#युहन्ना ११:४९-५०
इसुहेङ पत्रुस मानाल्खा दोअ्का
(मत्ति २६:६९-७०; मरकुस १४:६६-६८; लुका २२:५५-५७)
15सिमोन पत्रुस रो इसुको भेनेङ एअ्मि चात्या वासेहेङ पिताइहि। इङको भेनेङ चात्याचाहिँ मुल धामिको नाल्का हिघाखे रो इसुदोफाङ मुल धामिको सालेङता दुल्हि। 16कालाउबुङ पत्रुस बाहार द्वारता जाअ्धिहि। इङको भेनेङ चात्याचाहिँ जाइ मुल धामिको नाल्का हिघाखे, बाहार ओल्हितेङ द्वारता हिका बेजानहेङ दोअ्तेङ पत्रुसहेङ लिअ्ता चुमाहि। 17कालाउ द्वारता हिका इङको बेजान पत्रुसहेङ हिअ्हि, “हाइ ना बुङ इदोइ द्याङको चात्या माको?”
पत्रुस दोअ्हि, “का माको।”
18इन्ता कामत्या रो पालेगेलाइ चुङकाता जाअ्तेङ मे एम्तेङ हिघाखे। कालाउ पत्रुस बुङ एम्बालाइदोफाङ जाअ्तेङ मे एम्लि तेङहि।
मुल धामि इसुहेङ हिअ्का
(मत्ति २६:५९-६६; मरकुस १४:५५-६४; लुका २२:६६-७१)
19मुल धामि इसुहेङ वाको चात्यागेलाइ रो वाको बिद्याको बारेता हिअ्हि। 20इसु इङकोहेङ दोअ्हि, “का झाराङको आगाता दोअ्का हिघा। का दिनाङ कचहरिसाअ्ता रो थानता बिद्या पिका हिघा, जेता झाराङ यहुदिगेलाइ जोम्खे। का सिपापा हाइदोङ दोअ्नाङ मान्थुघा। 21कासेहेङ हाइपालि हिअ्खेना? का एम्बालाइहेङ हाइ दोअ्घा इङको हिङकालाइहेङ दोङ हिअ्। का दोअ्का काथागेलाइ एबालाइदोङ ग्यावा।”
22इसु इदोइ काथा दोअ्लाउ भेरपा जाअ्का पालेगेलाइता एअ्मि वासेहेङ चाउर्हितेङ एसा दोअ्हि, “हाइ मुल धामिदोफा एसापा नुइ लागिखेना?”
23इसु इङकोहेङ दोअ्हि, “का माजेङका दोअ्का हिघा पानु इङकोको दासि पि, कालाउबुङ एदि का ठिक दोअ्का हिनु कासेहेङ हाइपालि दान्हाइखेना?” 24कालाउ हन्नास इसुहेङ धेउन्हाकाङ हालतता मुल धामि काइयाफाकोता दिङगिल्हि।
पत्रुस आरोङ इसुहेङ मानाल्खा दोअ्का
(मत्ति २६:७१-७५; मरकुस १४:६९-७२; लुका २२:५८-६२)
25सिमोन पत्रुस जाअ्तेङ मे एम्दोङघाखे। एम्बालाइ इङकोहेङ दोअ्हि, “हाइ वाको चात्यागेलाइता एअ्मि ना बुङ माको?”
पत्रुस दोअ्हि, “का माको।”
26मुल धामिको कामत्यागेलाइता एअ्मि, जाइको ताइकोको न्हातोङ पत्रुस पुक्कापापिका हिघाखे, इङको हिअ्हि, “हाइ का नासेहेङ इङकोदोफा बागानता तिङका माको कुनु?” 27कालाउ आरोङ पत्रुस इन्कार पाहि रो ओदोङघरि धाङगाइ ओहि।
इसुहेङ पिलातसकोता चुम्पुका
(मत्ति २७:१-२,११-३१; मरकुस १५:१-२०; लुका २३:१-५,१३-२५)
28जुम्निदिना एअ् र्हिमाङ एम्बालाइ इसुहेङ काइयाफाको साअ्सो रोमि बाराहाकिम पिलातसको महलता चुम्पुहि। एम्बालाइ महलता मादुल्हि, हाइदोनु लाअ्पिका पारबाको भातेर चालिको भाअ्सिङ एम्बालाइ ताइमिहेङ पुनित ताअ्लि भोघाखे।#१८:२८ पिलातस यहुदि मान्थुघाहि, ओदोङभाअ्सिङ यहुदिगेलाइ वाको महललिअ्ता मादुल्हि एम्बालाइको रितिरिवाज दोअ्खे एदि एम्बालाइ बोजात्याको साअ्लिअ्ता दुल्हि पानु आपुनित जेङघाखे। 29इदोइभाअ्सिङ एम्बालाइकोता बाहार ओल्हितेङ पिलातस दोअ्हि, “नेलाइ हाइ दुस लागाइस्वाना?”
30एम्बालाइ वासेहेङ दोअ्हि, “इदोइ द्याङ पापि मान्थुनु केलाइ यासेहेङ नाङकोता हाइपालि चुमाधाङ कुनु?”
31पिलातस एम्बालाइहेङ दोअ्हि, “नेलाइ यासेहेङ चुमपुसु रो नेलाइको ताइकोङ न्याम आन्सार याको निया पासु।”
यहुदि आगुवागेलाइ इङकोहेङ दोअ्हि, “हिदिङ द्याङ सेअ्का खाबारा केलाइहेङ मान्थु।” 32इसुको सिका हिदोइ रितहोइ ज्याङ इङकोको टिप्नि पितेङ वाको दोअ्का बचन पोङघालि एसा जेङका हिघाहि।#युहन्ना ३:१४; १२:३२
33पिलातस आरोङ महललिअ्ता हानिहि रो वा इसुहेङ काइतेङ दोअ्हि, “हाइ ना यहुदिगेलाइको राजा हिन्हा?”
34इसु दोअ्हि, “ना ताइमिङ एसा दोअ्खेना बे काङको बारेता नासेहेङ बो हासुङ दोअ्हि?”
35पिलातस दोअ्हि, “हाइ का यहुदि कुनु? नाङकोङ जात्या रो मुल धामिगेलाइ नासेहेङ काङकोता चुमाहि। ना हाइ पान्हा?”
36इसु दोअ्हि, “काङको सारभि इदोइ दुनियाको माको। काङको सारभि इदोइ दुनियाको हिका हिनु काङको सेवापाकालाइ काङको भाअ्सिङ फेअ्सुधावा रो का यहुदि आगुवागेलाइको खुरता मापरेधाङका। कालाउबुङ काङको सारभि दुनियाको माको।”
37पिलातस इसुहेङ हिअ्हि, “एन्सा पानु, हाइ ना राजा दोङ हिना?”
इसु दोअ्हि, “का राजा हिघा दोअ्तेङ ना ताइमिङ दोअ्दोङखेना। याकोङ भाअ्सिङ का जोल्मिका रो याकोङ भाअ्सिङ सत्तेको दासि पिलि का इदोइ दुनियाता लोका। जाइ सत्ते मोन्दाताखे, एम्बालाइ झाराङ काङको दोअ्का साअ्खे।”
38पिलातस इसुहेङ हिअ्हि, “सत्ते हाइ?” इदोइ दोअ्तेङ वा बाहार यहुदिगेलाइकोता हानिहि रो एम्बालाइहेङ दोअ्हि, “का याकोता हाइदोङ दुस मानिङखा। 39लाअ्पिका पारबाता बाअ्सारकिअ्पाङ एअ्मि थुनुवाहेङ नेलाइको भाअ्सिङ लाअ्पिका नेलाइको चलन हि। हाइ नेलाइ भोसुखेना, इदोइखे यहुदिगेलाइको राजाहेङ लाअ्प्याङका?”
40कालाउबुङ एम्बालाइ र्हिकाइतेङ दोअ्हि, “यासेहेङ माको, बारब्बाहेङ लाअ्पि!” बारब्बाचाहिँ डाकु हिघाहि।
Zvasarudzwa nguva ino
युहन्ना 18: DHIM
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2025 by Nepal Bible Society and Wycliffe Bible Translators, Inc.