युहन्ना 16
16
1 “नेलाइको खान्धुर मालाअ्न्हाको दोअ्तेङ दोङ का इदोइ काथा नेलाइहेङ दोअ्का। 2एम्बालाइ नेलाइहेङ यहुदि कचहरिसाअ्गेलाइसो ओल्हिपागिलावा। जातिङको इस्का पहर लोदोङखे, नेलाइहेङ सेअ्का का परमेस्वरको सेवा पादोङखा दोअ्तेङ दोअ्तावा। 3एम्बालाइ इदोइ काम पावा, हाइदोनु एम्बालाइ आबाहेङ नाल्का मान्थु रो कासेहेङ बुङ मानाल्खे। 4कालाउबुङ इदोइ काथा का नेलाइहेङ दोअ्का हिघा। जेलाउ इङको पहर ल्वावा, कालाउ नेलाइहेङ हाइ दोअ्का हिघाखा दोअ्तेङ नेलाइहेङ फोम जेनावा। लाम्फादोङ का नेलाइहेङ इदोइ काथा मादोअ्घा, हाइपानु का नेलाइदोफा हिघाखा।
पुनित हाङसाको काम
5 “एला का कासेहेङ दिङगिल्काकोता हानिदोङखा। कालाउबुङ ‘ना हिसो हानिदोङखेना?’ दोअ्तेङ नेलाइ हासुङ कासेहेङ माहिअ्स्वाना। 6का नेलाइहेङ इदोइ काथा दोअ्नाङसिङ नेलाइको कोन्धाङ पिरहोइ पोङघाका हि। 7कालाउबुङ का नेलाइहेङ सत्ते काथा दोअ्खा, का हानिकाता दोङ नेलाइको भालाइ हि। हाइदोनु का मान्हेघा पानु, साल्हापिका नेलाइकोता मालावा। 8कालाउ जेलाउ वा ल्वावा, वा दुनियाहेङ पाप, धरमाति रो नियाको बारेता दुसि ठर्हायावा। 9पापको बारेता, हाइदोनु एम्बालाइ कार्हुता खान्धुर मापाखे। 10धरमाति काथाको बारेता, हाइदोनु का आबाकोता हानाङका रो नेलाइ कासेहेङ आरोङ मातिङस्वाना। 11नियाको बारेता, हाइदोनु इदोइ दुनियाको राजपाकाहेङ दार पिलि दोका हि।
12 “का नेलाइहेङ दोअ्का काथा आरोङ हेन्जाङ हि, कालाउबुङ एला नेलाइ इङको काथा सहेलि मादोस्वाना। 13जेलाउ वा पुनित हाङसा ल्वावा, कालाउ वा नेलाइहेङ गोताङ सत्तेता थोङगिलावा। वा ताइको पाहासो माधुयावा। वा जेदोङ हिनावा, इङकोङ धुयावा रो जेङलि लोका काथागेलाइ नेलाइहेङ हुकुम पाप्यावा। 14वा काङको पारताप पावा, हाइदोनु जेदोङ काङको, इङको कासो र्हुतेङ नेलाइहेङ इङको पाप्यावा। 15आबादोफा जेथे हि, इङको काङको। इदोङभाअ्सिङ का दोअ्घा, जेदोङ काङको इङको कासो र्हुतेङ पुनित हाङसा नेलाइहेङ हुकुम पाप्यावा।
चात्यागेलाइको सुरता रो लेङ
16 “आतुइसा पहरन्हुअ्सो नेलाइ कासेहेङ आरोङ मातिङस्वाना, कालाउ आतुइसा पहरन्हुअ्सो कासेहेङ आरोङ तिङस्वाना।” 17कालाउ वाको आधिमि चात्यागेलाइ ताताइमिता दोअ्हि, “वा केलाइहेङ इदोइ हाइ दोअ्का? ‘आतुइसा पहरन्हुअ्सो नेलाइ कासेहेङ मातिङस्वाना, कालाउ आरोङ आतुइसा पहरन्हुअ्सो नेलाइ कासेहेङ तिङस्वाना’ रो ‘हाइपानु का आबाकोता हानिदोङखा।’” 18एम्बालाइ दोअ्हि, “वा ‘आतुइसा पहरन्हुअ्सो’ दोअ्का हाइ? केलाइ माग्याङ, वा हाइ दोअ्दोङखे।”
19एम्बालाइ वासेहेङ हिअ्लि इछा पादोङखे दोअ्का गितेङ इसु दोअ्हि, “‘आतुइसा पहरन्हुअ्सो नेलाइ कासेहेङ मातिङस्वाना रो आतुइसा पहरन्हुअ्सो कासेहेङ तिङस्वाना’ दोअ्का काथाको माने हाइ दोअ्का बारेता हाइ नेलाइ ताताइमिता काथा पादोङसुखेना? 20जातिङको, का नेलाइहेङ दोअ्खा, नेलाइ खारस्वाना रो बिलाप पास्वाना, कालाउबुङ दुनिया लेङचावा। नेलाइ पिर पास्वाना, कालाउबुङ नेलाइको पिर लेङता फेरेन्हावा। 21जामाल जोलोम जेङका पहरता बेबाल तु: निङचाखे, हाइदोनु इङकोको पहर लोका हिखे। कालाउबुङ जेलाउ वा जामाल जोन्माइखे, कालाउ इङकोहेङ इङको पिरको फोम माजेङखे, हाइपानु दुनियाता एलोङ जामालको जोलोम जेङहि दोअ्का काथाता इङको लेङचाखे। 22एसापा दोङ एला नेलाइहेङ पिर जेङखे, कालाउबुङ का आरोङ नेलाइहेङ तिनाङका रो नेलाइको कोन्धाङ लेङचाका ज्यावा। कालाउ हासुङ नेलाइको लेङ नेलाइसो माघिङन्हावा। 23इङको दिना नेलाइ कासेहेङ हाइदोङ माहिअ्स्वाना। जातिङको का नेलाइहेङ दोअ्खा, नेलाइ काङको मिङता आबादोफा जेदोङ र्हेस्वाना, वा नेलाइहेङ प्यावा। 24एलाथिकापा नेलाइ काङको मिङता हाइदोङ र्हेका मान्थुसुन्हा। र्हेसु, कालाउ नेलाइ निङस्वाना। एसापा नेलाइको लेङ पोङघाको।
इसु दुनियाहेङ जितिका
25 “इदोइ काथा का नेलाइहेङ उदारनता दोअ्का हिघा। कालाउबुङ पहर लोदोङखे, जेलाउ का नेलाइदोफा आरोङ उदारनता माधुयाङका, कालाउबुङ आबाको बारेता नेलाइहेङ गिपाङ दोअ्ताङका। 26इङको दिना नेलाइ काङको मिङता र्हेस्वाना। का नेलाइको भाअ्सिङ आबादोफा पारथाना पाप्यायाङका दोअ्तेङ नेलाइहेङ मादोअ्ताङका। 27हाइदोनु आबा ताइमिङ नेलाइहेङ दायाखे, हाइपानु नेलाइ कासेहेङ माया पाका हिसुन्हा रो का परमेस्वर पाहासो लोघा दोअ्तेङ खान्धुर पाका हिसुन्हा। 28का आबासो लोघा, कालाउ दुनियाता लोका हिघा रो आरोङ का दुनियाहेङ लाअ्तेङ आबाकोता हानिदोङखा।”
29चात्यागेलाइ वासेहेङ दोअ्हि, “एला ना गिपाङ धुइदोङखेना, उदारनता माको। 30एला केलाइ गिन्हाहि, ना गोताङ काथा गिखेना, कालाउ नासेहेङ हासुङ हिअ्लि जरुरि मान्थु। इङकोभाअ्सिङ केलाइ खान्धुर पान्हाखे, ना परमेस्वरसो लोका।”
31इसु एम्बालाइहेङ दोअ्हि, “हाइ नेलाइ एला खान्धुर पासुखेना? 32खाङसु, पहर लोदोङखे, जातिङको लोका हि। जेलाउ नेलाइ राइन्हातेङ ताइकोङ थामेता हानिस्वाना रो कासेहेङ एकालाङ लाअ्स्वाना। कालाउबुङ का एकालाङ मान्थुघा, हाइदोनु आबा कादोफा हि। 33का नेलाइहेङ इदोइ काथा इदोइभाअ्सिङ दोअ्का हिघा, काता नेलाइहेङ सान्ति ज्याको। दुनियाता नेलाइहेङ जोखिम ज्यावा, कालाउबुङ हिमत पासु, का दुनियाहेङ जितिका हिघा।”
Zvasarudzwa nguva ino
युहन्ना 16: DHIM
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2025 by Nepal Bible Society and Wycliffe Bible Translators, Inc.