युहन्ना 14
14
इसु दामा, सत्ते रो जिबन
1इसु चात्यागेलाइहेङ दोअ्हि, “नेलाइको सुरता मापासु। नेलाइ परमेस्वरहेङ खान्धुर पासुखेना, कासेहेङ बुङ खान्धुर पासु। 2काङको आबाको साअ्ता हिका थामेगेलाइ हेन्जाङ हि। एन्सा माकुनु, नेलाइको भाअ्सिङ थामे त्यार पालि का हानिदोङखा दोअ्तेङ नेलाइहेङ दोअ्धाङका कुनु? 3कालाउ हानितेङ नेलाइको भाअ्सिङ थामे त्यार पाकान्हुअ्सो का आरोङ ल्वाङका रो नेलाइहेङ काङकोता चुमप्वाङका। कालाउ जेता का हिघा, इन्ता नेलाइ बुङ हिस्वाना। 4जेता का हानिदोङखा, नेलाइ इन्ता हानिका दामा नाल्सुखेना।”
5थोमा वासेहेङ दोअ्हि, “प्रभु, ना हिसो हानिदोङखेना, केलाइ मागिन्हाखे, कालाउ केलाइ दामा हेसापा नाल्लि?”
6इसु इङकोहेङ दोअ्हि, “दामा, सत्ते रो जिबन कादोङ हिघा। का बाहेक हासुसो बुङ आबाकोता हानिलि माद्वावा। 7नेलाइ कासेहेङ नाल्का हिनु, काङको आबाहेङ बुङ नाल्सुधाना। एलासो ओसो वासेहेङ नालस्वाना रो वासेहेङ तिङका हिसुन्हा।”
8फिलिप इसुहेङ दोअ्हि, “प्रभु, केलाइहेङ आबा तिम्पापि। इङको जेङनु केलाइहेङ थेमाङ।”
9इसु इङकोहेङ दोअ्हि, “फिलिप, इदोइ पहरथिकापा का नेलाइदोफा हिघा, कालाउबुङ ना कासेहेङ मानाल्खेना? जाइ कासेहेङ तिङका हि, इङको आबाहेङ तिङका हि। ना ‘केलाइहेङ आबा तिम्पापि’ दोअ्तेङ हेसापा दोअ्लि द्वाना? 10का आबाता हिघा रो आबा काता हि दोअ्तेङ हाइ ना खान्धुर मापाखेना? जेदोङ बचन का नेलाइहेङ दोअ्खा, इङको का काङको ताइकोङ खाबराता धुइका माको, कालाउबुङ काता बासा हिका आबा ताइको काम पाखे। 11कासेहेङ खान्धुर पा, का आबाता हिघा रो आबा काङकोता हि। माकुनु इदोइ कामगेलाइको भाअ्सिङ खान्धुर पा।
12 “जातिङको, का नेलाइहेङ दोअ्खा, जाइ कासेहेङ खान्धुर पाखे, इङको काङको पाका काम बुङ पावा। इङकोखान्तेङ बारका काम पावा, हाइदोनु का आबाकोता हानिदोङखा। 13नेलाइ काङको मिङता जेदोङ र्हेलाउ बुङ चानसो आबाको पारताप ज्याको दोअ्तेङ का इङको नेलाइहेङ प्याङका। 14नेलाइ काङको मिङता हिदिङ थोक र्हेसुन्हा पानु का पाप्याङका।
पुनित हाङसाको केरा
15 “नेलाइ कासेहेङ माया पासुन्हा पानु काङको हुकुमगेलाइ साअ्स्वाना। 16का आबादोफा पारथाना पाङका रो वा नेलाइहेङ भेनेङ साल्हापिका प्यावा रो वा नेलाइदोफाङ दिनाङ ह्यावा। 17या सत्तेको हाङसा हि, जाइहेङ दुनिया र्हुलि माद्वावा, हाइदोनु दुनिया वासेहेङ नाते तिङखे ना नाल्खे। नेलाइ वासेहेङ नाल्सुखेना, वा नेलाइदोफा बासा हिखे रो वा नेलाइता हितेङह्यावा। 18का नेलाइहेङ माउर्या भाइपा मालाअ्ताङका। का आरोङ नेलाइकोता ल्वाङका। 19एला आधे पहरन्हुअ्सो दुनिया कासेहेङ हेअ्लाउ मातिनावा, कालाउबुङ नेलाइ कासेहेङ तिङस्वाना। का सिन्हुका जेङका हिनाङ, नेलाइ बुङ सिन्हुतेङ हिस्वाना। 20इङको दिना नेलाइ गिस्वाना, का काङको आबाता हिघा, नेलाइ काता रो का नेलाइता हिघा। 21कासेहेङ माया पाका इङकोङ, जाइदोफा काङको हुकुम हि रो इङको साअ्खे। कालाउ कासेहेङ माया पाकाहेङ काङको आबा माया पाखे। का इङकोहेङ माया पाङका रो का ताइमिङहेङ इङकोता देखाल प्याङका।”
22यहुदा (इस्करियोतचाहिँ माको) इसुहेङ दोअ्हि, “प्रभु, ना हाइ दोअ्खेना, ना ताइमिङहेङ केलाइता तिङपाना रो दुनियाहेङ चाहिँ माको?”
23इसु इङकोहेङ दोअ्हि, “जाइ कासेहेङ माया पाखे, इङको काङको बचन साअ्तावा। काङको आबा इङकोहेङ माया पावा, केलाइ इङकोता ल्वाङ रो इङकोदोफा बासा ह्याङ। 24कासेहेङ माया मापाकालाइ काङको बचन मासाअ्खे। जेदोङ बचन नेलाइ हिङसुखेना, इङको काङको माको, कालाउबुङ कासेहेङ दिङगिल्का आबाको।
25 “इदोइ काथा नेलाइदोफा हिलाउ का नेलाइहेङ दोअ्का। 26कालाउबुङ साल्हापिका, माकुनु पुनित हाङसा, जाइहेङ आबा काङको मिङता दिङगिलावा। वा नेलाइहेङ गोताङ काथा धिरपावा। का नेलाइहेङ दोअ्का गोताङ काथा नेलाइहेङ फोम पापावा।
27 “सान्ति का नेलाइदोफा लाअ्ध्याङका। का ताइको सान्ति नेलाइहेङ प्याङका, कालाउबुङ दुनियाको पिकाभाइपा माको। नेलाइको कोन्धाङ दुखि माज्याको रो थिलिगोइका माज्याको।
28 “का नेलाइहेङ ‘का हानिदोङखा रो नेलाइकोता ल्वाङका’ दोअ्का नेलाइ हिङसुन्हा। नेलाइ कासेहेङ माया पाका हिनु का आबाकोता हानिदोङखा दोअ्का हिङतेङ नेलाइ लेन्चासुधाना, हाइपानु आबा काखान्तेङ बारका हि। 29एला इदोइ जेङका लाम्फादोङ का नेलाइहेङ दोअ्पिका हिघा। जेलाउ इदोइ जेङलि ल्वावा नेलाइ खान्धुर पालि दोसु। 30का नेलाइदोफा एला हेन्जा माधुयाङका, हाइदोनु इदोइ दुनियाको राज पाका#१४:३० राज पाका साइतानहेङ “दुनियाको राज पाका” बुङ दोअ्खे। लोदोङखे। इङको कार्हुता हाइदोङ सरबङ मान्थु। 31कालाउबुङ का आबाहेङ माया पाखा रो जेसापा आबा कासेहेङ हुकुम पाका हि इङकोङ आन्सार पाखा दोअ्तेङ दुनिया ग्याको। ल्होसु, केलाइ इतासो हानाइने।”
Zvasarudzwa nguva ino
युहन्ना 14: DHIM
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2025 by Nepal Bible Society and Wycliffe Bible Translators, Inc.