युहन्ना 13
13
इसु ताइको चात्यागेलाइको खोकोइ झाका
1लाअ्पिका पारबाको लाम्फा इदोइ दुनियासो बेदाङगि जेङतेङ आबाकोता हानिका वाको पहर लोहोइ दोअ्का इसु गिहि। कालाउ दुनियाता हिका ताइको द्याङहेङ माया पातेङ वा एम्बालाइहेङ आखिरिथिकापाङ माया पाहि।
2कालाउ दिलिमाको चाकाको पहर साइतान सिमोनको चान यहुदा इस्करियोतको मनता इसुहेङ रिम्पाका बिचार लाम्फासोङ ह्वाअ्पिका हिघाहि। 3आबा गोताङ थोक वाको खुरता पिका हि, वा परमेस्वर पाहासो लोका रो परमेस्वरकोता दोङ हानिदोङखे दोअ्का काथा इसु गिघाखे। 4कालाउ वा चाकासो ल्होहि रो गुअ्का धाबा एपाहा ताअ्तेङ एलोङ धाबा ताइको केङखेनेता तेअ्हि। 5कालाउ वा भान्दाता चि हुहि, चात्यागेलाइको खोकोइ झा:तेङ धाबाहोइ एम्बालाइको खोकोइ योअ्पिलि तेङहि।
6जेलाउ इसु सिमोन पत्रुसकोता लोहि, कालाउ पत्रुस वासेहेङ दोअ्हि, “प्रभु, हाइ ना काङको खोकोइ झाकाना?”
7इसु पत्रुसहेङ दोअ्हि, “का हाइ पादोङखा ना माग्याना, कालाउबुङ न्हुअ्सो ग्याना।”
8पत्रुस वासेहेङ दोअ्हि, “ना काङको खोकोइ हेअ्लाउ माझाकाना।”
इसु इङकोहेङ दोअ्हि, “का नाङको खोकोइ माझापिघा पानु कादोसा नाङको हाइदोङ भाग मान्थ्वावा।”
9सिमोन पत्रुस वासेहेङ दोअ्हि, “एन्सा पानु प्रभु, काङको खोकोइ खिनिङ माको, कालाउबुङ काङको खुर रो पुरिङसुदाङ झापि।”
10इसु इङकोहेङ दोअ्हि, “चिउलिदोका द्याङहेङ खोकोइ बाहेक बो हाइदोङ झालिमागोइखे, इङको पुनित जेङखे। कालाउ नेलाइ पुनित हिसुन्हा, कालाउबुङ झाराङ ते माको।” 11ताइमिहेङ रिम्पाकाहेङ इसु नाल्का हिघाहि। इदोङभाअ्सिङ वा दोअ्का हिघाहि, “नेलाइ झाराङ सुदो मान्थुसुन्हा।”
12चात्यागेलाइको खोकोइ झालिदोकान्हुअ्सो ताइको गुअ्का धाबा लागाइतेङ इसु आरोङ योम्हि। कालाउ वा एम्बालाइहेङ दोअ्हि, “हाइ नेलाइ गिसुखेना, का नेलाइको भाअ्सिङ हाइ पाघा?#लुका २२:२७ 13नेलाइ कासेहेङ मास्टर रो प्रभु दोअ्सुखेना, इङको नेलाइ ठिक दोअ्सुखेना, हाइदोनु का वाआङ। 14एदि नेलाइको प्रभु रो मास्टर जेङतेङ का नेलाइको खोकोइ झाका हिघा पानु नेलाइ बुङ एअ्मि भेनेङको खोकोइ झापिसु। 15हाइपानु का नेलाइहेङ एलोङ नामुना तिङपातेङ जेसापा का नेलाइको भाअ्सिङ पाघा, नेलाइ बुङ एन्साङ पासु। 16जातिङको का नेलाइहेङ दोअ्खा, कामत्या ताइको मालिकखान्तेङ बारका माजेङखे, कालाउ बानाल चुम्पुका बानाल पिगिल्काखान्तेङ बारका माजेङखे।#मत्ति १०:२४; लुका ६:४०; युहन्ना १५:२० 17नेलाइ इदोइ काथा गितेङ इङको भाइका काम पासुन्हा पानु नेलाइ लेङचास्वाना।
इसुहेङ रिम्पाका चात्या
(मत्ति २६:२०-२५; मरकुस १४:१७-२१; लुका २२:२१-२३)
18 “का नेलाइ झाराङको बारेता दोअ्का माको, का जाइहेङ साल्घा इङकोहेङ का नाल्खा। कालाउबुङ धरमकिताब पोङघाको दोअ्तेङ इदोइ जेङहि, ‘काङकोङ तोले चाका काङको दुस्मन जेङहि।’ #
ले ४१:९
19इदोइ जेङकाखान्तेङ लाम्फा एलादोङ का नेलाइहेङ दोअ्खा, जेलाउ इङको जेङलि ल्वावा, का वाआङ दोअ्तेङ नेलाइहेङ खान्धुर ज्याको। 20जातिङको का नेलाइहेङ दोअ्खा, जाइहेङ का दिङगिलाङका वासेहेङ र्हुका कासेहेङ र्हुकावा रो कासेहेङ र्हुका कासेहेङ दिङगिल्काहेङ र्हुकावा।”#मत्ति १०:४०; मरकुस ९:३७; लुका ९:४८; १०:१६
21इदोइ काथा दोअ्कान्हुअ्सो इसु दुखि जेङहि रो ताइको चात्यागेलाइहेङ दोअ्हि, “जातिङको का नेलाइहेङ दोअ्खा, नेलाइता एअ्मि कासेहेङ रिम्पावा।”
22इसु इदोइ काथा हासुको बारेता दोअ्का दोअ्तेङ चात्यागेलाइ एअ्मि भेनेङहेङ खाङहि। 23वाको चात्यागेलाइता इसु माया पाका चात्याचाहिँ वाको तुम्ताता बेझेम्तेङ हिघाखे। 24कालाउ सिमोन पत्रुस इङकोहेङ तिप्नि पातेङ हिअ्हि, “वा इदोइ हासुको बारेता दोअ्का।”
25इसुको तुम्ताता बेझेम्तेङ दोङ इङको वासेहेङ हिअ्हि, “प्रभु, इङको हासु?”
26इसु दोअ्हि, “जाइहेङ का तोले चोभेरलि प्याङका, काङको दोअ्का द्याङ इङकोङ।” कालाउ वा तोले चोभेरहि रो सिमोनको चान यहुदा इस्करियोतहेङ पिहि। 27तोले र्हुकान्हुअ्सो साइतान इङकोलिअ्ता दुल्हि।
कालाउ इसु इङकोहेङ दोअ्हि, “ना जेदोङ पालि हि, इङको मारफाङ पा।” 28कालाउबुङ वा हाइपालि इङकोहेङ एसा दोअ्हि दोअ्तेङ चालि योम्कालाइ हासुङ मागिहि। 29हाइदोनु आधिमि इदोइ फोमपाहि, यहुदा दोफा टाकाको जाबि हिनाङ इसु इङकोहेङ पारबाको भाअ्सिङ गोइका आनेमाने चोलाको रो गरिबगेलाइहेङ आधे प्याको दोअ्का। 30कालाउ तोले र्हुकान्हुअ्सो यहुदा इस्करियोत, ओदोङघरि बाहार ओल्हितेङ हानिहि। इङको पहर न्हिसिङ जेङलिदोका हिघाहि।
इसुको नावा हुकुम
31जेलाउ यहुदा बाहार हानिहि कालाउ इसु दोअ्हि, “एला का द्याङको चान पारतापि जेङका हिघा रो परमेस्वर काता पारतापि जेङका हि। 32एदि परमेस्वर का द्याङको चानता पारतापि जेङहि पानु परमेस्वर ताइमिङता का द्याङको चानहेङ पारतापि पावा, कालाउ वा इदोइ मारफाङ पावा।
33 “आतुइका जामालाइ, आधे पहरथिकापा का आरोङ आतुइसा पहरथिकापा नेलाइदोफा ह्याङका। नेलाइ कासेहेङ भोस्वाना रो जेसापा का यहुदि आगुवागेलाइहेङ दोअ्घा, एला नेलाइहेङ बुङ दोअ्ताङका, ‘जेता का हानिदोङखा, नेलाइ लोलि मादोस्वाना।’ #
युहन्ना ७:३४
34एलोङ नावा हुकुम का नेलाइहेङ प्याङकाः नेलाइ एअ्मि भेनेङहेङ माया पासु। नेलाइहेङ का जेसापा माया पाका हिघा, नेलाइ बुङ एअ्मि भेनेङहेङ एन्साङ माया पासु।#युहन्ना १५:१२,१७; १ युहन्ना ३:२३; २ युहन्ना १:५ 35एदि नेलाइ एअ्मि भेनेङहेङ माया पासुन्हा पानु, इदोइसोङ झाराङ ग्यावा, नेलाइ काङको चात्या।”
पत्रुसको इन्कार
(मत्ति २६:३१-३५; मरकुस १४:२७-३१; लुका २२:३१-३४)
36सिमोन पत्रुस इसुहेङ हिअ्हि, “प्रभु, ना हिसो हानिदोङखेना?”
इसु दोअ्हि, “का जेता हानिदोङखा, ना एला कासेहेङ पिताइलि माद्वाना, कालाउबुङ न्हुअ्सोते ना कासेहेङ पितायाना।”
37पत्रुस वासेहेङ दोअ्हि, “प्रभु, का हाइपालि एलादोङ नासेहेङ पिताइलि माद्वाङका? नाङको भाअ्सिङ का ताइको जिबन बुङ प्याङका।”
38इसु इङकोहेङ दोअ्हि, “हाइ ना ताइको पारान काङको भाअ्सिङ प्याना? जातिङको का नासेहेङ दोअ्खा, ना कासेहेङ सुमखे मानाल्खा दोअ्तेङ इन्कार मापापाधाउ धाङगाइ माओकावा।”
Zvasarudzwa nguva ino
युहन्ना 13: DHIM
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2025 by Nepal Bible Society and Wycliffe Bible Translators, Inc.