Mavaanga 28
28
Pahuli hu iliiŋa hya Malete
1Humbisa a hu laatoodi mbenze ve muhahusunu ve, ni huuna bisu laayaabi ti nduhi a iliiŋa mo hina aba Malete. 2Bisu iliiŋa mo hina baayaki bisu na litondo li laafulala. Bu mvula haba mu unoho, na bu hwaba na piyu yindahi, bo baaduuki mbaahu yinene. Baayaki bisu boosi ŋa mukoho a mbaahu mo. 3Pahuli atoli iko hi bapyapya ba baakanya mu ubwaha hutso a mbaahu. Ka mu tooni a ibabudu, pili apali hutso iko, akatiti na akahi nde mu kaka. 4Bu bisu iliiŋa baamoni taadi akatita mu kaka la Pahuli, bo baalelisini: «Bahala mo linili a huvele mudubi a baatu ve. Mu tooni ati, humbisa ufuuha mu mubu, nzambi wu akuha, a hali mu uva nde bunyanga mu uba moonyi ve.» 5Ka Pahuli akubili pili hutso a mbaahu, na a hamoni pasi tso hole ve. 6Baatu baakatsima ti nyutu a nde sa yiranda, buuve ti nde sa abwa na ukwa kabala. Ka bo barimbasa, a baamoni dyaambu la pasi li laabwili nde ve. Buuna, bo baasobi matsimi na uleele ti, Pahuli aba mumosi mu banzambi. 7Ŋa pedu a mbuha mo yiina, hwaba na ibuha hi mukuutu iliiŋa, nga nduhi a Pubiliyusi. Nde ni wu ayaki bisu mu litondo, na wu alaahi bisu mbuha yi ubwamina mu bilumbu bitatu. 8Taata a Pubiliyusi aba ŋa taangi, mu tooni a baahu na wongo. Pahuli ayamono nde, asambili Nzambi, asuusili nde myoho na abelusi nde. 9Humbisa, babeedu bakima baayidi, na nde abelusi kaka baana. 10Baamweesi bisu butsitu bu bulahi. Bu taangu yi ufutaha mu likuumbi yaatoodi, baaviidi bisu bi bisu laaba na byo nzala mu mudyenge a bisu.
Pahuli miimata iliiŋa hya Malete mu uyene hu musyenge a Looma
11Humbisa batsungi batatu, bisu laanami mu likuumbi la nduhi «banzambi baa mavasa#28.11 banzambi baa mavasa: huli baatu ba ibiingi mo hina, ni banzambi baa bubaakeelese badyengi.», li laakatalisa hu musyenge a Alekizandi. Likuumbi mo liina, laavyosi maangala hutso a ngulu makuumbi a iliiŋa mo hina. 12Bisu laayato hu musyenge a Sirakusi, hu bisu laavyosi bilumbu bitatu. 13Bu laamati ŋaana, bisu laalondi simu li mubu, mu uyato hu musyenge a Lezyo. Ilumbu hi hyaduuki, ifula hya Sude hyatelimi. Mu bilumbu byole, bisu laayato hu musyenge a Puzoole. 14Hutso musyenge mo wunuuwu, bisu laamoni baa mu buli la Kristo, ba baavondi bisu mu uvyoso tsambu li bilumbu na bo. Ni mu nzila mo yiina, bisu laatoodi hu musyenge a Looma. 15Baana baa ngu baa mu Kristo baa musyenge mowuna, baayuhi tsangu a bisu. Bo baayabwana bisu natee hu saandu la Apiyusi na hu «manzo matatu ma byenyi». Bu Pahuli hamoni bo, nde afutili matondo huli Nzambi na ahwadi. 16Bu bisu laayato hu Looma, bakuutu baaviidi muswa huli Pahuli mu utsahala mu nzo a siha, na lisadaadu li laakakeelese nde.
Pahuli miilongese Musamu wu Mubwe hu Looma
17Bilumbu bitatu bu byavyohi, Pahuli atsihi bakuutu ba Bayudaayo ba hu musyenge a Looma. Bo baayakuukama huli nde mu uyuhala nde. Pahuli aleeli bo: «Baana baa ngu, me a hatsa pasi dyaambu lilibi ŋa busu bwa buli la bisu a benu ve, tso unyanza bipfu bi bataata ba bisu a benu. Ka baakangi me hu Yeruselemi hwavele a tooni, na baayehuli me ŋa myoho mi bakuutu ba Looma. 18Bu bo baamani ufuula me byuhu, bo baatondi unyahula me. Bo a baabahi tooni tso mosi, yi yaafwana mu uduba me ve. 19Ka bu Bayudaayo baabisi, me apondi ti nga tsi Kayisaali atsundasa me. Ka mu maana moosi, me a handi na dyaambu tso limosi li ukese baatu ba tsi a me ve. 20Ni mu buuna, me miipondo mu umono benu, na mu umoho na benu. Nyaha me ndeele benu. Ni mu tooni a muutu mowuna, wu Isereli ubaasa hiitu, me ndi mu umbita mapanga mo maniima.»
21Bakuutu ba Bayudaayo baakaali nde: «Bisu a laayaka pasi muhanda, wu Bayudaayo ba hu tsi a Yuda baasonehe mu tooni a we ve. Na ŋa hati la bo, pasi muutu a hayabisa bisu dyaambu lilibi mu tooni a we ve. 22Ka bisu litondi ti, we mwakulu yabisa bisu matsimi ma we. Mu tooni ati bibiingi byosi, bisu liyaabi ti baatu bubaabisa kabu li we akangama mu lo.»
23Bo baabwesoolo ilumbu ikima, hi ubwepfuutana na Pahuli. Bu ilumbu mo hina hyatoodi, bo baayeni huli nde, mu litangu li lilahi li laafulala latsomi. Imoho hyabaandihi ŋa ngwali natee ŋa tsitsaha. Mu ndongisili a nde, Pahuli akalongese na ubindula mambu ma Ipfumu hya Nzambi. Nde akabindula bo mikele mya Moose, na mihanda mi mimbihuli mya Nzambi myasonihi, mana nde abita bo mu ukangama mu Yisu. 24Bamosi baasiidi hiitu mu ma nde hakaleele, ka bakima baabisi. 25Ka bo baafutihi hwavele uyuhasana. Pahuli aleeli bo: «Livupu la Ngidi laaba na mbiinga, ŋa lo laakaleele bakaaha ba benu mu munywa mumbihuli Esaya! 26Nde aleeli:
“Yene yaleele huli buli mo linili:
Benu tso laayuha mu matswi ma benu,
ka benu a luubaangula tso limosi ve.
Benu tso laamono mu miisu ma benu mwakulu,
benu a lu ukaanga pasi isiha ve.
27Mu tooni ati, mutima a buli li Isereli aka wu munono.
Bo baamiidibuha matswi ma bo,
baamiidibuha miisu ma bo.
Miisu ma bo a mamono,
matswi ma bo a mayuha,
mutima a bo a habaangula,
na bo a bakinguha huli me,
mana me mbeeloso bo#Esa 6.9-10.”»
28Titswene Pahuli abweleele: «Buuna, yaabaani li: yaabaani ti mu musamu wu liyobolo, Nzambi amiitsindaha nde huli ba bavele Bayudaayo. Ka bo bu uyaka mu mutima a bo, musamu liyobolo!»
[ 29#28.29 Itsudu mohi hyo ve mu mabuuku makima: Humbisa a maambu ma Pahuli haleeli, Bayudaayo baayeni na ubaasobosono minywa.]
30Pahuli atsahili bilima byole bi bitindala mutso a nzo yi nde hayakoto mu tsoombi. Nde akayaka boosi ba baakayamono nde. 31Nde akayabisa bo mu dyaambu li Ipfumu hya Nzambi. Na nde akalongese baatu na isuusi hyoosi, hwavele ikahu, mana bo babaha nzaabili mu Pfumu Yisu Kristo.
Zvasarudzwa nguva ino
Mavaanga 28: TSA
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© (Active), Wycliffe Bible Translators, Inc. All rights reserved.