Mavaanga 27
27
Pahuli bamiitsindaha hu musyenge a Looma
1Bu bisu laavoli kesili mu uyene hu Italiya mu likuumbi, batumi baayehuli Pahuli na mwa litangu li bikondaayi ŋa myoho mi mukuutu masadaadu Yuliyusi. Muutu mo wunuuwu akatuma kabu li balwani li baakateele «kabu la nga tsi». 2Bisu laakoti mutso likuumbi la Adalamite li laaba mudwe hu ngulu makuumbi yi itaanzi hya Asiya, na bisu laayeni. Arisitake, musi Masedonya, wu musyenge a Tesalonika, aba na bisu. 3Ilumbu hi hyaduuki, bisu laayato hu musyenge a Sidoni. Yuliyusi wu aba na bukuhu ŋa busu bwa Pahuli, aviidi nde muswa mu uyamono bambaahi ba nde mu ubaha bi nde haba na byo nzala. 4Bu laamati ŋaana, bisu laalondi simu li laasweme li iliiŋa hya Kipere, mu tooni ifula hi hyakayabwana bisu. 5Bisu laasabuhi mubu wu alondo itaanzi hya Silisiya na Papfiliya, na bisu laayato hu musyenge a Myra, hu itaanzi hya Lisi. 6Huuna, mukuutu masadaadu, amoni likuumbi li laapali mu musyenge a Alekizandi, mu uyene hu tsi a Italiya. Buuna, nde akotisi bisu mutso likuumbi mo. 7Humbisa bilumbu bi bilahi, bisu laakayene mu nzali buke-buke, na bisu laamoni pasi yindahi, mu uyato ŋa masungimini ma musyenge a Kinide. Ifula hyakapfubasa bisu mu usungama mu nzila yi laakatalisa. Buuna, bisu laavyohili hu tsyelo a Salomone, mu upalila hu tsoso iliiŋa hya Kerete, hi hyaswemene bifula. 8Bisu laalondi muvanga mubu na pasi yindahi. Laayato ŋa mbuha mosi nduhi Bonpore#27.8 Bonpore mbuha yi yayelemene mu usutaha mu likuumbi., ŋa pedu musyenge a Lazee. 9Bisu laavyosi taangu yindahi, na mubu aba aka tsisu. Bisu laamoni ti mubu ukala bisu mudyenge. Mudyenge mu likuumbi aba aka pasi mu ukuhasa, mu tooni ati ilumbu hi mukungi Bayudaayo wa ndiili ikaandi mu Nzambi, aba hyamiivyoho. Ni mu buuna, Pahuli hayibusi ba baakatuma likuumbi: 10«Bambaahi ba me, me ndi mu umono ti mudyenge mo wunuuwu sa aba mudyenge wa pasi lipfu. Likuumbi na makatu ma lo, sa bitsamuha mu biteesi bibinono. Na bisu mwakulu ka, utwala ukoto mu pasi lipfu.» 11Mukuutu masadaadu aba asuusa hiitu fula-fula mu mubiti likuumbi na mu nga likuumbi, ka a mu mandoongi ma Pahuli ve. 12Titswene, ngulu makuumbi a yaba yakuha mu uvyoso maangala huuna ve. Ni mu buuna, baatu ba baaba mutso likuumbi, fula-fula baatelimi mudwe. Bo baakasaha tso baakitwala uto hu Fenikisi, ngulu makuumbi ya Kerete. Ngulu makuumbi yi yaakatalisa hu tsyelo a Sude-Wesete na Noode-Wesete, huuna hwaba mbuha yimbwe mu uvyoso maangala.
Ifula hili mu unyingasa likuumbi la Pahuli
13Mwa ifula hi hyakamata hu Sude hyatelimi, na bo baamoni ti bo baakitwala utswihasa makani ma bo. Bo baamaasi manya li baaba baadyamisa mu nzali mu ukangimasa likuumbi. Bo baayeni, na baakalondo muvanga mubu, ŋa pedu iliiŋa hya Kerete. 14Ka masulubete, ifula hi mifudi hi baakatele «ifula hya Noode-Esete», hyayakulamana, umata hu yulu bisyelo bi iliiŋa mo. 15Ifula hyatsindihili likuumbi. Lo aba utwala ukunda ifula ve. Na bisu laakatwatwana. 16Bu bisu laaba mu uvyoho hu Sude a iliiŋa hi ikeehe, hya nduhi a Koda, bisu laayehili usweme ifula. Buuna, na pasi yindahi bisu laatwali ulwanila hyabu hya pfuuhili, hi bubaasalila mu taangu ya pasi. 17Basali ba hutso likuumbi baabwekumasa hyo. Baakuti hyo mikudu mu likuumbi, mu uhwadisa hyo. Bu bo baakabata uyabwa hu yulu musyeŋunyu a hu simu la tsi a Libi, bo baakulimisi mu mubu, isiha hi baaba bakutala mu likuumbi. Bo baasiidi buuna, mana likuumbi liveleyene mawasa. Na bo baakayene we bu ifula hyakabita bo. 18Ifula hyahwadi mu ubaapfikasa bisu na mifudi. Ilumbu hi hyaduuki ŋa ngwali, basali ba hutso likuumbi baabumi ibadi hi makatu mu mubu. 19Na mu ilumbu hi bitatu, bo baabumi bisalili bi likuumbi hutso mubu, mu makaka ma bo mwakulu. 20Matsuhu ma malahi maavyohi, hwavele bisu umono tso nyangu, tso bamvwelele. Na bu ifula hyakavelefwa, hiitu hya bisu hi ufuuha hyafwidi.
21Ba baaba mutso likuumbi, a baaba na isiha hyudya ve, umata taangu yinda. Buuna Pahuli, mu tele ŋa hati la bo, aleeli: «Bambaahi ba me, benu kini laayuhili me, na uvelemata iliiŋa hya Kerete. Tso benu laayuhili me, bisu a benu a likibwana mangoongo mo maniima na unyambasana biniibi byosi ve. 22Bunuubu, me ndi mu upondo benu mu uhwada. Mu tooni ati tso mumosi mu bisu a benu a hukwa ve. Ka ndulu likuumbi lu utsamuha. 23Pofi mumosi a Nzambi, wu abaha me na wu me umbaatsalila, ayamonehele na me butsuhu mo bunuubu. 24Na nde aleele me: “Pahuli a haba na boomo! Baafwana utsundasa we ŋa busu bwa Kayisaali, mukuutu batumi. Ka mu tooni litondo la Nzambi mu we, boosi ba bali mu mudyenge na we mutso likuumbi, sa bafuuha.” 25Ni mu buuna, hwadaani bambaahi ba me, me atsiingama mu Nzambi. Sa huba we bu nde haleeli me! 26Ka tswamina bisu mu utsikama, bisu a benu lafwana mu ubumana simu li iliiŋa imosi.»
Ifula himiitsindahala likuumbi hu muvanga mubu
27Butsuhu bwa kuumi na bina, ifula hyakadyengese bisu mu mubu wa Miditirani. Hu hahati a busi, basali ba mutso likuumbi baasi tsimi ti, sa linama mu toto. 28Bo baatsootsi idongi hi mubu, na bo baamoni ndoongi mubu aba mataka maku moole (20). Hu mwaana lala, bo baabwetsootso idongi, ndoongi aba ka mataka kuumi mataanu (15). 29Bo baaba na boomo ti, likuumbi a liyabumana mamanya ma mutso mubu. Ni mu buuna, humbisa likuumbi, bo baabwahi mamanya mana ma maaleme, mu ukangimasa lo. Na bo baakakeele ti busi bukya mawasa. 30Buuna, basali ba likuumbi, baasahi ubata mu tswehi mu ufuuha. Mu usaha ubata, bo baabaandihi upalisa hyabu hya pfuuhili, na ususa hyo ŋa yulu mubu. Na bo baapfuti uleele ti, bo baakayene hu ukulamasa mamanya, ma ukangimasa likuumbi hu busu. 31Pahuli aleeli huli mukuutu na huli masadaadu: «Tso babahala mobaniba bapali mutso likuumbi, benu a lu utwala ufuuha ve.» 32Buuna masadaadu maakesi mikudu mi myakakaanga hyabu hya pfuuhili, na hyo hyayeni mu mubu.
33Bu bo baakakeele ti busi bukya, Pahuli avondi boosi mu udya. Nde aleeli: «Loloyi ni ilumbu hya kuumi na bina (14), bi benu laamihwada mu ubakeele, hwavele udya pasi isiha. 34Me pondi benu mu udya. Mu tooni ati ŋa, byo bika na tsalu mu uhwadisa polo linyutu la benu. Tso mumosi mu benu, a hunyambasana linaanga li mutswe a nde ve.» 35Bu nde hamani maana uleele, Pahuli avoli lipa, afutili matondo huli Nzambi ŋa busu bwa baatu boosi. Titswene, nde akesi lipa na nde abaandihi udya. 36Na bana boosi kaka baadiidi. 37Bisu laaba makama moole maku tsambu na baatu basamunu (276), mutso likuumbi. 38Bu boosi baaywati, mu ulengese likuumbi, bo baabumi makatu ma mbutu yi baakasalila mu uvanga mapa, hutso mubu.
Likuumbi laadyami
39Ka bu busi bwakiidi, basali ba likuumbi a baakayaba mbuha yi bo baaba ve. Bo baatalili hu lala ngulu yi yaaba na musyeŋunyu. Bo baataasi mu uyatelemese likuumbi huuna. 40Ni mu buuna, basalili ba likuumbi baakesi mikudu na bikahu byosi bi byakakaanga likuumbi na baatimbi byo hutso mubu. Titswene bo baanyanguli mikudu mi manaangu ma maakasuungaha likuumbi mu nzila. Bo baatelimisi ngooto hu busu bu likuumbi, mana livupu litsindahala lo. Na bo baatalisi hu tsyelo a ngulu mubu. 41Ka bo baayabumana ibaha hi musyeŋunyu. Likuumbi laadyami hutso a hyo, na laakangimi. Busu bu likuumbi loosi, laakoti hutso musyeŋunyu, hwavele utwala ubwenyingama. Itini hya mbisa hyabohihi, mu tooni mifudi mi mapo ma mubu.
42Masadaadu maatondi uduuba bikondaayi byosi, mana tso mumosi a habata mu ubwila. 43Ka mukuutu wu akatondo ufuuhasa Pahuli, alihi bo mu usa buuna. Nde atumi boosi ba baaba baayaba ubwila, mu uba baatsomi mu ubwa mu mamba na uyene hu simu. 44Bana baakiiduukala bo mu yulu mabaya, buuve mu yulu bibulaha bi likuumbi. Na boosi baatoodi hu simu, mbenze ve, muhahusunu ve.
Zvasarudzwa nguva ino
Mavaanga 27: TSA
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© (Active), Wycliffe Bible Translators, Inc. All rights reserved.