Maak 6
6
1Yeezu yaa basi dula jigini ale cheŋ tɛŋ kaai ate wa liŋ jam boro la. Wa ŋaaŋviirɔma mɛ yaa va wa a cheŋ. 2Ba ale diem bo dula jigini la, Vuusum Danni yaa paari ate ba cheŋ ga jo ba tuka dɔkku po ate, wa yaa sak nuruma Wen wieŋa. Nuruba yegayega a jam bo dula jigini a wom Yeezu sinsaŋŋa ate ku yaa cha ba. Ba yaa bek chaab ayen, <<Nuruwa de a nye ka sɛ a seba nna? Ka boan jaab yam ale nna ate Wen a te wa? Wa nye ka sɛ a tom wakperikaliisaŋa nna? 3Daa wala ale danagrɔwa a bo dela la? Daa Mɛɛri nidoabinni ale la? Daa wa suata ale Jeemsi ale Josesi ale Judas ale Simon la? Wa toama mɛ an bo daa dela la?>> Dila nyiŋ ate Nazaret demma a jam zɛri wa.
4Yeezu yaa weeni ba ayen, <<Waai meena a te Wen biisiteerɔwa zula kama, alege ka wadek tɛŋka demma ale wa suataŋa ale wa yenni demma nyiini ale kaa te wa zula.>> 5Wa ale jam bo dula jigini la, wa an jam baga a nye wakperikaliiga, ka nisa ate wa pai ji yɔgnyieŋsa gela zuima a tebi ba. 6Ku jam cha wa ka nna yegayega ale nuruma ale jam kan ta siaka la. Ba yaa basi dula jigini ale cheŋ tɛŋ fiik sii ale jam bo dula la, a sak nuruba Wen wieŋa. 7Wa yaa wi wa ŋaaŋviirɔma pi ale bayewa ate ba jam a tigsi chaab wa jigi ayen wa tom ba baye baye. Wa yaa te ba pagrim ate ba baga a yiak chichirik baata nuruba po a basi.
8Wa yaa weeni ba ayen, <<Nama ale a cheŋ la, ni kan pai kɔlima yaase ŋandiinta, yaase fotta, yaase ligra mɛ. 9Ni kan pai gatta ti chaab a gum ga tii ate ni jo la po. Ni su nuensa abe ni pai tacheksa nyiini a nyo ni nisima po a ta cheŋ. 10Ni dan cheŋ ga paari tɛŋ kanyi ate ba te ni dɔk ayen ni goa, ni kasim a goa dɔk kula po a ta ga paari diipo ate ni ale basi tɛŋ kala la. 11Ni dan jam paari tɛŋ kaai ate kala demma a dan kan te ni tia yaase ba an wom dii ate ni ta ayen ni weeni a sak ba la, ni kpaanti ni naŋtaataŋa paasuku abe ni basi dula ate ku sak ayen ni a kaam ba kama ba ale zɛri Wen wieŋa la nyiŋ.>>
12Ba yaa cheŋ ayen ba ga sak nuruma Wen wieŋa, ate ba basi ba tuimbaataŋa abe ba ŋman va Wen wensie suiku. 13Ba jam yiak chichirik baata nuruba yegayega po a basi ale a pai kpaam a boori a nyo yuarɔba zuima zuk a tebi ba.
14Naab Ayerod a jam wom Yeezu wie kama, dii nyiŋla waai meena jam a biisi ka Yeezu wie. Ba gela a jam a weeni ayen wa ka Jɔɔn Sokateerɔwa, ale yiti kum po. Ka dila nyiŋ ale soa ate wa baga a tom wakperikaliisaŋa de.
15Ba gela a pai wa chim ka Wen biisiteerɔwa Elaja. Ba gela mɛ a jam a weeni ayen, <<Wa ka Wen biisiteerɔ waai ale a nye ase dipo Wen biisiteerɔma wanyi la.>>
16Naab Ayerod ale wom Yeezu wie la, wa yaa weeni wadek ayen, <<Jɔɔn wade, mi basi ate ba gebi wa zukku kama alege wa yiti kum po.>>
17Ayerod a jam yik wa a lik ka dɔk po dii nyiŋla, wa jam faari ka wa suoku Filip pok. Wa powa yuei a jam le Ayerodiasi. 18Jɔɔn a liŋ jam weeni Ayerod kama ayen, <<Fi ale nye dii ale fi suoku powa la, an va Moosis Sinsaŋŋa.>>#6:18 Kaabka 18:16 19A nyini da ŋala po a ta a cheŋ, Ayerodiasi a jam kisi Jɔɔn kama a yaali ayen wa ko wa, alege wa an jam nya suikwa dii nyiŋla. 20Ayerod a jam a chali Jɔɔn ka yɔgsum ale a te wa zula mɛ, dii nyiŋla wa seba ayen Jɔɔn ka nuru maŋ ale nuru weleŋ. Ka dila nyiŋ ale soa ate Ayerod an jam siak ayen ba ko wa. Jɔɔn sinsaŋŋa a jam a daani Ayerod ka nna yegayega alege wa diem a yaali ayen wa wom dii ate wa ta la.
21Ku ŋaaŋnyiŋ ate Ayerodiasi da soŋku a yaa jam. Ayerod biamu danni ale jam paari la, wa yaa wi wa kpagi kpiemaŋa ale wa tugurik tɔŋdɔma kpaŋŋa ale nuru kpientaŋa baai meena ale jam bo Galili tɛŋka po la ayen ba jam maa dɛ wa biamu danni ŋandiintaŋa. 22Ba ale jam tigsi chaab a boro a dɛ la, Ayerodiasi liewa yaa jo dɔk kuui ate ba kala a dɛ la po, yaa gɔg sak ba. Wa gɔgtaŋa a jam te Ayerod ale wa doama ka suipeentik nna yegayega, ate Ayerod yaa weeni wa ayen, <<Fi ale a yaali jabuui la, m le te fu.>> 23Wa yaa ŋman pɛ a weeni wa ayen, <<Jaabuui meena ate fi a yaali la, weeni mu, ate m te fu. Fi daa a yaali m tɛŋka naamu geli m le pai te fu.>>
24Nipokbinni yaa nyini cheŋ wa mawa jigi a bek wa ayen, <<Ka boa ate fi a yaali ayen m bek naawa jigiya?>> Wa mawa yaa weeni wa ayen bek wa ate wa gebi Jɔɔn zukku a te wa. 25Wa yaa ŋman pilim ga jo naawa jigi nna nwuli a weeni wa ayen, <<Mi a yaali ayen fi gebi ka Jɔɔn zukku yɔgyɔgla de a pai dueni taasi tanlaŋ po ate ba ta jam te mu.>> 26Wa ale weeni nna la, ku jam kaasi Ayerod popola ka nna yegayega, alege wa an jam baga a zɛri ya, dii nyiŋla wa jam pɛ kama wa doama nimbie po ayen wa le te wa jabuui meena ate wa a juisi wa jigi la. 27Wa yaa tom wa tugurik tɔŋdɔma po wanyi ayen wa gebi Jɔɔn zukku ta jam. Tugurik tɔŋdɔwa yaa cheŋ juijui ate ba lik Jɔɔn la a yaa gebi wa zukku 28a pai dueni taasi tanlaŋ po a ta ŋmani cheŋ ga te nipokbinni. Wa yaa tuesi ta ga te wa mawa. 29Jɔɔn ŋaaŋviirɔma ale jam wom dii ale nye la, ba yaa ga pai wa nyiŋka a ta ga gu piuŋ vɔrup po.
30Yeezu tuimtomdɔma baai ate wa jam tom ba la, yaa ŋman jam wa jigi a weeni wa dii meena ate ba tom ale dii meena ate ba sak nuruma la. 31Bala ale Yeezu an jam nya suik a kali dɛ ŋandiinta, dii nyiŋla nuruba yegayega a kasim a jam kama ale a kuli. Dila nyiŋla, wa yaa weeni ba ayen, <<Ni jam ate ti cheŋ jigi yoŋ tidek ti nyiini a ga vuusi maga.>>
32Ba yaa basi dula jigini ale cheŋ a ga jo ŋaaruŋ po ayen ba cheŋ juijui ate nuru karo la. 33Ba ale jam a cheŋ la, nuruba yegayega yaa nya ba a deri miŋ ba. Ba yaa nyini ba tɛŋsaŋa po a chali va kunkɔŋni a de ba niŋ a ga paari ŋaaruŋku ale a cheŋ juijui la. 34Yeezu ale nyini ŋaaruŋku po a siŋ la, wa yaa nya nuru boari ale ba za a limisi wa. Wa nya ba ase ba ka pa ŋaai ale kan ta naapeerik la. Wa jiirim a yaa jam bo ale ba ate wa sak ba wie nna yegayega dula jigini.
35Ba ale jam za dula jigini ate ku beni la, Yeezu ŋaaŋviirɔma yaa jam wa jigi a weeni wa ayen, <<Nya ti bo ka sagi po dela jigini ate wenni mɛ a siŋ ti. 36Basi ate nuruma a cheŋ tɛŋ sii ale moata la po a ga da ŋandiinta dɛ.>>
37Yeezu yaa weeni ba ayen, <<Nama dek a te ba ŋandiinta ate ba dɛ.>> Ba yaa weeni wa ayen, <<Ku le pai ka nuru chiisa naaniŋ tutuna! Ti le pai ka ligra a soa dila a da ŋandiinta ate ba dɛ?>>
38Yeezu ŋman bek ba ayen, <<Ka boan ŋandiinta ate ni tara? Ni cheŋ a ga gisi nya.>> Ba yaa cheŋ a ga nya ale ŋman pilim jam weeni wa ayen, <<Ti ta ka borobotta tinu ale juma ŋaye nyiini.>>
39Wa yaa weeni nuruma meena ate ba kali tɛŋ wuuku po, 40nuruba kook kook, ba gela mɛ pisinu pisinu a ga nueri. 41Yeezu yaa pai borobotta tinuwa ale juma ŋayewa a zak zuk nya wenŋmazuk a niak ale te Wen jiam. Wa yaa ŋmari borobottaŋa ale jumaŋa a te wa ŋaaŋviirɔma ayen ba pai chari nuruma. 42Waai meena a jam ŋɔbi chak kama. 43Yeezu ŋaaŋviirɔma yaa pai ŋandiin tii ale tali la a sueri busisa pi ale siye. 44Nidoa baai ale jam dɛ ŋandiintaŋa la a jam ka tusa ŋanu (5,000).
45Yeezu yaa deri basi ate wa ŋaaŋviirɔma a jo ŋaaruŋku a dɛ wa niŋ a lɔ nyakpiemu a jueli cheŋ Beteseida, abe wa banti nuru boanni. 46Wa le basi ba la, ŋaaŋnyiŋ, wa yaa cheŋ a ga jueli guuk zuk ayen wa puusi Wen.
47Junɔi ale jam paari la, Yeezu a jam za ka guuku zuk wadek wa nyiini. Wa ŋaaŋviirɔma yaa jam kala ŋaaruŋku po nyakpiemu suŋsuŋ. 48Wa yaa nya ale vioku a nak ba ŋaaruŋku ate ba an baga a paari kunkɔŋni. Ku ale jam paari ate vari kpadiaka a kum la, wa yaa nyini guuku zuk a siŋ cheŋ nyiamu zuk a ga ba jigi a yaali ayen wa gaam ba a taam. 49Ba meena ale nya wa ale wa a cheŋ nyiamu zuk la, ba yaa pai chim ayen, <<Wa ka kɔk.>> Ate ba kaari nna yegayega. 50Dii nyiŋ la ba meena a nya wa kama ate ba kpaziim a nak. Yeezu yaa deri biisi nwuli ayen, <<Ka mi. Ni kan chali yɔgsummoa, ni basi ate ni nyiŋsaŋa a pagra.>> 51Wa yaa jam jo ŋaaruŋku po a gum ba po. Vioku yaa deri zaani. Ku yaa cha ba nna yegayega. 52Ku jam cha ba, dii nyiŋla, ba an jam miŋ Yeezu ale nye dii a pai borobottaŋa a chari nuru boanni la kiriya. Ba popolaŋa a jam lik kama.
53Ba yaa ale gaam taam a ga paari kauk kunkula ŋaaŋnyiŋ, ba yaa jam paari Genesaret tɛŋka. Dula jigini ba yaa bobi ba ŋaaruŋku a zaani. 54Yeezu ale nyini ŋaaruŋku po a siŋ la, nuruba yaa deri miŋ wa, 55ate ba chali jo tɛŋka po meena ayen ba weeni a sak nuruba wa ale jam la. Juijui meena ate ba jam wom ayen wa boro la, ba pai ba yɔgnyieŋsa a dueni ŋanta zuk a ta ga wa jigi ayen wa tebi ba. 56Yeezu yaa nyiem gilim tɛŋ kpieŋsa ale tɛŋ fiisa ale tɛŋ kpaŋsa meena po. Nuruma ale ga wom ayen Yeezu cheena la, ba yaa chali kuli ba yeeŋa a ta ba yɔgnyieŋsa a cheŋ yabaŋa po a saalim wa ayen wa basi ate ba tiri wa garukku nɔnni ate ba nya nyiŋyɔgsa. Baai meena ale tiri wa garukku la, a nya nyiŋyɔgsa kama.
Zvasarudzwa nguva ino
Maak 6: BWU
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2023, Ghana Institute of Linguistics, Literacy and Bible Translation