Maak 5
5
1Yeezu ale wa ŋaaŋviirɔma yaa taam Galili nyakpiemu kauk kunkula ŋaaŋnyiŋ a ga paari Gerasa tɛŋka. 2Yeezu ale nyini ŋaaruŋku po a nyini la, nuru ate chichirik biok a bo wa po la a nyini nuruba guka jigi a deri tu wa. 3Nuruwa de jam bo ka nuruba guka jigi ate waai jam karo baga a bobi wa. Ba jam pai ka chɔrima a bobi wa, alege wa baga a gebi ŋa. 4Ba ŋman pai chɔrimaŋa ale kuta a bobi wa naŋsa ale wa nisima a ga jiak, alege wa ŋman gebi ŋa mɛ meena. Waai a jam karo a ta pagrim a baga a yik wa. 5Wa jam bo ka ba ale a gu nuruba juijui la ale guuta zuima a nyiem a cheŋ ale a kaari kama ale pai tintain laasa a gebi wa nyiŋka.
6Ase wa ale jam zaani niŋniŋ a nya Yeezu la, wa yaa chali cheŋ wa jigi a ga puusi wa. 7Ale kaari nna yegayega a weeni ayen, <<Fi Yeezu Wen Dii Ale Bo Wenŋmazuk La Nidoabinni a ta ka boan wari ale mi? M pai Wen a saalim fu ayen kan namsi mu.>> 8Dii nyiŋ la wa jam weeni wa kama ayen, <<Fi chichirik biok, nyini wa po a nyini.>> 9Yeezu yaa bek wa ayen, <<Fi yuei ale boa?>> Ku yaa tulisi wa ayen, <<Mi yuei ale Anuruboari, dii nyiŋla ti piisi kama.>> 10Nuruwa yaa saalim Yeezu nna yegayega ayen wa kan yiak chichirik baataŋa dula jigini a basi.
11Die ale jam piisi nna yegayega a za guuk kunyi zuk dula jigini a dɛ. 12Chichirik baataŋa yaa saalim Yeezu ayen wa basi ate ti ga jo dieŋa de po. 13Yeezu yaa te ti suik. Ti yaa basi nuruwa ale nyini ga jo dieŋa po ate ŋa meena yaa chali nna nwuli a siŋ ga lo nyakpiemu po a kpi. Ŋa jam paari ka tusa ŋaye (2,000).
14Nuru baai ale jam a nya dieŋa zuk la, yaa chali kuli ba yeeŋa a ga weeni ba yeeŋa demma ale baai meena ate ba a tu ba suiku niŋ la, dii ale nye la. Tɛŋka demma yaa nyini a cheŋ Yeezu jigi ayen ba nya dii ate baai ale a nya deeŋa la a weeni ba la. 15Ba yaa jam nya nuru waai ate chichirik biok boanni a jam bo wa po la ale wa jo gatta a kala ale Yeezu. Wa an ŋman a yesimu. Yɔgsum yaa deri yik ba. 16Nuru baai ale jam nya dii ale nye nuru wa jigi ale chichirik baataŋa ale dieŋa la, yaa weeni a sak nuruba meena ale jam bo dula jigini la. 17Tɛŋka demma ale wom dii ate ba weeni la, ba yaa jam a saalim Yeezu ayen wa nyini ba tɛŋka po nyini.
18Yeezu yaa ale cheŋ ayen wa jo ŋaaruŋku po la, nuru waai ale jam ta chichirik baataŋa la a jam saalim wa ayen wa basi ate wa maa va wa a cheŋ. 19Yeezu an jam siak ya, alege weeni wa ayen, <<Kuli ga weeni fi yenni demma Naawen ale ta jiirim ale fu a maari fu diila.>> 20Nuruwa yaa cheŋ ga weeni nuru baai ale jam bo Dekapolis po la dii ate Yeezu a nye te wa la. Ku yaa cha baai meena ale jam wom la.
21Yeezu yaa ga jo ŋaaruŋku po a gaam taam nyakpiemu kauk kunkula. Wa ale cheŋ a ga paari dula jigini la, nuru boari yegayega a yaa tigsi a gilim wa nyakpiemu nɔi. 22Juuma tuka dɔkku kpaŋŋa po wanyi ale jam maa bo nuru boanni po. Wa yuei a jam ale Jairus. Wa yaa le ga nya Yeezu la, wa yaa jam wa niŋ 23a saalim wa nalimnyiini ayen, <<M dek ko, m lie ale a yuak a moata kum, ate mi a saalim fu ayen fi jam a pai fi nisa a ji wa zuk ate wa nya nyiŋyɔgsa.>> 24Yeezu yaa va Jairus a cheŋ ate nuruba yegayega maa va wa a gilim wa.
25Nipok ale jam boro a lo chiak a paari bena pi ale ŋaye.#5:25 Kaabka 15:25-33 26Tiita nyam yegayega a jam tebi wa a kpeeri. Wa jam kaasi wa ligra meena, alege tuemu an jam basi wa ale diem a daani wa mɛ nna yegayega a gum du. 27Wa jam wom ka Yeezu wie yaa zaani wa ŋaaŋ nuru boanni suŋsuŋ a tiri wa garukku. 28Wa jam poli kama ayen, <<Ase m dan poom tiri wa garukku, m le nya nyiŋyɔgsa.>> 29Wa tuemu yaa deri basi wa, ate wa yaa miŋ ayen wa nya nyiŋyɔgsa kama dula jigini.
30Yeezu yaa deri miŋ ayen ku nye wa jigi kama ase nuru ale tiri wa a nya nyiŋyɔgsa la. Wa yaa cheemu ayen wa nya ase ka wana a yaa bek ayen, <<Ka wana ale tiri mi garukku?>>
31Wa ŋaaŋviirɔma yaa weeni ayen, <<Fi kan nya nuruma ale piisi a gilim fu diila, alege ate fi a bek ayen ka wana ale tiri fu?>>
32Yeezu yaa diem gisi nya gilim ayen wa nya waai ale tiri wa la. 33Nipowa kpaziim yaa nak ate wa nyiŋka a gɔk. Wa jam seba ayen Yeezu a tebi wa kama ate wa yaa kpi duna tɛŋ wa niŋ a weeni wa ale wensie meena tuemu wie. 34Yeezu yaa weeni wa ayen, <<M lie, fi siaka a basi ate fi nya nyiŋyɔgsa kama. Kuli yeri ale suinum masik, dii nyiŋla fi tuemu a nueri kama.>>
35Yeezu ale diem bo dula a biisi la, nuruba gela yaa nyini Jairus yenni a jam wa jigi a weeni wa ayen, <<Fi liewa a kpi kama. Kan ŋman a daani sagrɔwa ayen wa jamu.>>
36Yeezu ale wom dii ate ba weeni wa la, wa yaa weeni Jairus ayen, <<Kan te ku a daani fu, alege kasim ta siaka.>>
37Yeezu an jam a yaali ayen nuru waai a va ba a cheŋ, alege ka Piita ale Jeemsi ale wa suoku Jɔɔn nyiini. 38Ba ale ga paari nya ale ku nye ŋaglam Jairus yenni po ate nuruma a kum ale a kaari nna yegayega la, 39Yeezu yaa cheŋ ga jo yenni po a bek ba ayen, <<Ka boa ate nama a kum ale a kaari dila? Biika an kpiya. Wa a goa kama.>> 40Ba yaa deri a la wa wa nina po. Wa yaa yiak ate ba meena a nyini peelim, alege yik biika kowa ale wa mawa ale wa ŋaaŋviirɔma batawa yaa ta ba jo biika goom dɔkku po. 41Yeezu yaa yik biika nisa a weeni wa ayen, <<Nipokbiliga, yiti.>> Ba a weeni ale badek tɛŋka biika ayen ka Talita kumi.#5:41 Aramaik biika 42Nipokbinni yaa deri yiti zaani ŋmai a cheŋ. Biika jam ta ka bena pi ale ŋaye. Ku yaa cha baai meena ale jam bo dula jigini la nna yegayega. 43Yeezu yaa weeni ba ayen ba nye ŋandiinta a te wa ate wa dɛ, alege kaam ba mɛ ayen, <<Ni kan basi ate nuru a wom dii ate mi nye la.>>
Zvasarudzwa nguva ino
Maak 5: BWU
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2023, Ghana Institute of Linguistics, Literacy and Bible Translation