Maak 7
7
1Farisiima ale Sinsak sagrɔma gela yaa nyini Jerusalem tɛŋka a jam tigsi chaab a gilim Yeezu. 2Ba ale diem jam bo wa jigi la, ba yaa nya ale wa ŋaaŋviirɔma a kaasi ba kisitaŋa kunyi, dii nyiŋla ba an nari ba nisimaŋa ase Farisiima kisitaŋa ale a va diila. 3Farisiima ale Juuma meena a nyiem kasim a va ka ba kokpieŋsaŋa kisuk kuui ale a sak ba ayen ba nyiem nari ba nisimaŋa abe ba dɛ ŋandiinta la. 4Ba dan nyini yaba a kuli, ba a dɛ ka niŋ a sugri badek ale ge a dɛ ŋandiinta. Ba a va ka ba kokpieŋsaŋa kisitaŋa meena tii ale a sak ba ayen ba a nari ba samɔnsa tɔgatɔga ale ba beerisa tɔgatɔga ale ba taasa tɔgatɔga la.
5Farisiima ale Sinsak sagrɔma yaa bek Yeezu ayen, <<Ka boa ate fi ŋaaŋviirɔma a zɛri ti kokpieŋsaŋa nisima narika kisiku alege a dɛ ŋandiinta ale nidaŋtisa?>>
6Yeezu yaa weeni ba ayen, <<Nama ka sakpaŋ zula nyam. Wen biisiteerɔwa Azaya a ta wensie kama ale wa le ŋmarisi ayen, <Nuruma de a pai ka ba noa nyiini a zuli mi, alege ba suiniimaŋa a ka mi jigi ya. 7Ba pai ka nurubiik kisita a sak nuruba ale a weeni ayen ti ka Wen kisita. Ka dila nyiŋ ale soa ate ba puusaŋa chim kinla mi jigi.> (Azaya 29:13)
8<<Nama a basi ka Wen Sinsaŋŋa vaka ale a va ni kokpieŋsaŋa kisitaŋa.
9<<Nama pai ka nidek yam a zɛri Wen Sinsaŋŋa vaka ayen ni nya suik a va nidek kisitaŋa. 10Diila Moosis a jam weeni ayen, Ku a fɛ ate ni a zuli ni koba ale ni maba. (Nyinika 20:12) Wa ŋman ŋmarisi ayen, Waai ale a le wa ko a yaase wa ma la, ku a fɛ ate ba ko wa. (Nyinika 21:17) 11Alege nama a weeni kama ayen, ase nuru a dan weeni wa ko yaase wa ma ayen dii ate fi ale nya a nyini mi jigi la ka Korban. Kude kiri ale jabuui ate ba pai a te Wen la. 12Ate ku kan te suik ate wa baga a nye wari a te wa ma yaase wa ko. 13Ni kaasi Wen sinsaŋŋa kama ale ni kisuk wieŋa ate ni pai a sak nuruba la. Ni be kasim a nye ka wieŋa de chaab.>>
14Yeezu yaa ŋman wi nuru boanni ate ba jam wa jigi ate wa weeni ba ayen, <<Nama meena lak ni tueŋa a wom abe ni miŋ chak. 15Ŋan baai ale a jo ni puusa po la, a kan te ni daŋta, alege ka ŋan baai ale a nyini ni noaŋa po a nyini la ale a te ni daŋta. 16Nama baai ale ta tue a wom la, ni wom nalimnyiini.>>
17Yeezu yaa ale basi nuru boanni ale cheŋ ga jo dɔk la, wa ŋaaŋviirɔma yaa bek wa wa wamagsini kiri. 18Yeezu yaa tulisi ba ayen, <<Nama an baga miŋ ayen ŋan baai ale jo ni po la a kan te ni daŋta? Nama zɛ chak mi ale a weeni diila? 19Ba kan jo ni suiniimaŋa po, ba a jo ka ni puusaŋa po a ŋman pilim a nyini.>> Yeezu a weeni ba wieŋa de ayen ŋa sak ba ate ba kan ŋman a ta kisita ale ŋandiinta meena.
20Wa ŋman weeni ba ayen, <<Wie ŋaai ale a nyini nuru suinum po a nyini la ale a te wa daŋta. 21Popola ŋaai ale bo nuruba suiniima po la ale a basi ate ba a poli wabaata ale a basi ate ba a yaali nipooba ale nidoaba ale a zu ale a ko nuruba ale a nye kaboŋsa ale 22ta butuem ale a nye gaasa ale a paasi ale a tom tuim gbentisa ale a dɛ nyuri ale a lɛ nuruba ale ta kanjanta ale a tom betta. 23Wabaataŋa de meena ale a nyini ba suiniimaŋa po a nyini la ale a kaasi ba.>>
24Yeezu yaa basi dula jigini ale cheŋ Taaya ale Saidon tɛŋsaŋa po. Wa yaa cheŋ ga jo yeri po ayen wa suk wadek ate waai a kan seba ayen wa bo dula, alege wa an jam baga a nya sukka jigiya. 25Nipok wanyi ale jam boro ate chichirik biok a ta wa lie la yaa wom wa wie a cheŋ ga kpi duna wa niŋ. 26Nipowa a jam ka Girik denɔ. Ba biak wa ka Fonisia ate ka bo Siriya tɛŋka po la yaa cheŋ ga saalim wa ayen wa yeeri chichirik bioku ale bo wa liewa po la a basi.
27Yeezu yaa weeni wa ayen, <<Basi ate ba liŋ pai ŋandiinta a te bisa ate ba dɛ chak. Ku an magsi ayen ba pai bisaŋa ŋandiinta a te baasa.>>
28Nipowa yaa weeni wa ayen, <<Mm, m Nyɔnɔ Yeezu Kirisita, dii ate fi a weeni la ka wensie, alege baasaŋa a nyiem a dɛ ka ŋandiin tii ate bisaŋa a dɛ ale tali la.>>
29Yeezu yaa ŋman weeni wa ayen, <<Fi ale tulisi mu diila ale soa ate mi a weeni fu ayen kuli yeri ale chichirik bioku a poom basi fi liewa kama.>>
30Nipowa yaa le ga paari wa yenni la, wa yaa nya wa liewa ale wa dua wa goom tiaka po. Chichirik bioku a sum basi wa kama.
31Yeezu yaa basi Taaya tɛŋka ale ŋman pilim jam va Saidon tɛŋka po a taam ga va Dekapolis po a taam cheŋ Galili nyakpiemu. 32Wa ale ga paari dula la, nuruba yaa ta nuru ate wa tue a kpari ate wa an baga a biisi nalimnyiini mɛ. Ba yaa ta wa jam Yeezu jigi a saalim wa ayen wa pai wa nisaŋa a vi wa nyiŋka ate wa nya nyiŋyɔgsa. 33Yeezu yaa yik wa ta nyini nuru boanni po a taam nakpiak a pai wa nandubsa siye a su nuruwa tueŋa po, alege a chesi tintueta a pai tiri nuruwa giŋgeluŋku. 34Yeezu ale nye dila nueri la, wa yaa zak nya wenŋmazuk a ŋusi weeni nuruwa ayen, <<Effata!>>#7:34 Aramaik biika Ku kiri ale, <<Lagri!>> 35Wa tueŋa a deri a wom ate wa giŋgeluŋku mɛ a labri ate wa yaa baga a biisi nalimnyiini.
36Yeezu yaa weeni nuru baai ale ta wa jam la bunyi dekki ayen ba kan weeni a sak waai dii ale nye la, alege ba zɛri ale ŋmasi a jalisi wa a gum du ate nuruba yegayega a wom. 37Ku yaa cha waai meena ate ba weeni chaab ayen, <<Nuruwa de a nye wie meena ka nalimnyiini. Nya wa ale poom baga a nye dii a tebi nuru waai tueŋa ale ka a wom ate wa an baga a biisi nalimnyiini la.>>
Zvasarudzwa nguva ino
Maak 7: BWU
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2023, Ghana Institute of Linguistics, Literacy and Bible Translation