Galezɨya 2
2
Polɨjɨ Wɨdaasade pwarajɨ saraavɨnesɨ.
1Kwarame pɨjaakuna (14) kanyavɨlava' nɨmɨjɨ Baanavaazalyɨ sainaai Taaitazarɨ maarola Jeruzaalemɨna ayɨna yɨlaawo. 2Gotɨyai sara kanyɨbwarɨdaakwa' yɨlaawe. Yawɨ'na “Nɨmɨre wawɨnya yagesɨ wawɨnya kuna yɨvanɨgesɨ yaasɨwa'na nyɨma'nadɨka! Kɨraazɨtɨyare kusɨlaanyaraavɨ maremwaaidɨvɨtara daakajɨ gaveraayaba kave wɨdɨma! Sahwara ‘Polɨ wɨdade' kayaa'nanyasɨ,’ dɨpɨjɨ kwajɨ ajɨmya yuyangɨyara Kɨraazɨtɨyarɨ mu'nyɨ yɨpɨ'derera,” sara yawɨ'na yena a'mwe naanga gaveraavɨ wɨde “Maaveraayawɨ sana sana wɨdadɨnyainyɨ.” 3Sareinyɨjɨyai Taaitazai Gɨrikɨyai mwaalaka kɨrɨ' Juyara Kɨraazɨtɨyare naangera dɨragɨnna mujɨna “Nemɨre Kɨwɨnya' sara dɨnɨke'na gamɨre kɨlaakejɨ' davaana!” mujɨ nehye'. 4Mujɨ nehyeta kɨrɨ' pwara kwaasɨ neya'mwera nemɨnyawɨnna kɨma'nyɨkaanya kave bahe' dame maa'dɨvɨsarabɨsara. Kɨraazɨtɨyai Jizaazai Juyaraavɨreburɨdaa'nyɨ kanevadaihasamaara' tewaanya mwaaiho. Damerabɨsara yawɨ'na “Kumɨrebwi tɨnna wanganawaajɨ Juyainaavɨrebwi ayɨna pwɨyaana!” yawɨ'na yeva kave bahe'. 5Kave bahesaraavɨre yagaala kadɨka dɨragɨnna mu'nyo. Nemɨ yawɨ'na “Juyaraavɨre kɨwɨnya Maaveraavɨ nurihɨradɨka! Naangere yagaala nebulya warana sahwaraavɨna!” yawɨ'na yona dɨragɨnna mamɨdɨnyo.
6Yɨ, “A'mwe naangera Kɨraazɨtɨyarɨ wɨ'nadaanyainaavɨ maremwaaidɨvɨsara,” dadɨvɨsara nɨmɨre yagaala tewaanya' aane pɨrɨ' kɨrɨsɨ mye'mwagye'. Nabaai sahwaraavɨna nɨmɨ lɨka myage. Gotɨyai a'mwe yuyaraavɨre sɨnnyavɨna avaaina yade'na nɨmɨ yuyaraavɨna avaaina yawɨ'dɨnya'na lɨka myage. 7Sahwara yagaala mudɨka manyɨje'. Aawa. Kɨrɨ' dara wanganesasɨ. Gotɨyai Pitarɨ “Juyaraavɨ kɨlaaka daya'neraavɨ yagaala tewaanya' duthatheigɨnyɨ,” wɨdaasakabaaibɨ' Polɨ Maaveraavɨ kɨlaaka madaya'neraavɨ wɨja'nerɨ dahɨlakakelyɨra. 8Sare' dare'nesɨ. Gotɨyai Pitarɨ gannya dɨragɨnya' kujaava' Wɨdaasadei Apozelɨyare wawɨnya yada kɨlaaka dayaraavɨ wɨjɨwaakadevaaibɨ' sahwai gannya dɨragɨnya' kanyɨjaava' Apozelɨyainyɨre wawɨnya yadɨ ajɨmya yuyangɨyaraavɨ wɨjɨwaakadɨnyainyɨ. 9Jeruzaalemɨ mwaalyara Kɨraazɨtɨyarera yawɨ'na “Jemɨzai, Sipaazai (Pitai), Jonɨ nemɨre a'mwe naangere. Sɨmyarera.” Yawɨ'na kye' sahwara mwaaidɨvɨ' dara yawɨresasɨ. Ya, Gotɨyai Polɨmɨ Apozelɨyare wawɨnya' dahɨlakya'na yange'na wɨgaimwagakela! Sara deva “Nemɨ avaaiwawɨnya yadaanyainera,” deva Baanavaazalyɨ sainaarɨ ata bwa'nyɨna nehye'. Nabaai dɨnyɨna “Yo, Polɨjɨ Baanavaazalyɨ saraai ajɨmya yuyangɨyaraayawɨnna kuna wika! Nemɨ kɨlaaka dayaraayawɨ wawɨnya yaana!” Dɨnyɨna kyo naarɨmɨ “Tewaanyasɨ,” wɨdɨna yoi. 10Yagaala pɨrɨ' nehɨthe' “Nemɨjɨyara nɨgwɨmaayaraavɨna wɨgaimwange'na jawɨrila!” Nɨmɨ sara yadɨnyainyɨ wɨde “Sare'na yɨlaaya yɨwana.”
Anga Aadɨyokɨ Polɨ Pitarɨ maanga wɨdake'nesɨ.
11Pɨgaa' Anga Aadɨyokɨna Sipaazai (Pitai) bɨna yaka kayaa'nanya' yake'na a'mweraayaba sahwarɨ maanga wɨde. 12Sare' dare'nesɨ. Sɨnnawɨ Jemɨzaryabadaasɨ pwara mabyesagaa' sai Kɨraazɨtɨyarera ajɨmya yuyangɨyaraayaba wapaaya nyɨna. Wapaaya nyɨna yaka kɨrɨ' sahwara bɨna kye' sai Maaveraayaba wapaaya manyɨna. Sai yawɨ'na “Sahwara dɨragɨnna dadɨvɨsare ‘Maavera kunnya kɨlaakejɨkaavɨ mada'nyadɨvɨsaraayaba tɨka manaannera!’ ” yawɨ'na yaka lɨka yɨna yaka wapaaya manyɨna. 13Wapaaya manyɨ kya' Juyara Kɨraazɨtɨyarera pwara yawɨta kayaa'nanya yeva avaaina manyɨna. Avaaina manyɨ kye', nabaai, Baanavaazai tɨnna wanganna yaka dɨragɨnna mi yaka manyɨ yakelyɨ. 14Manyɨ kye' tɨnna dara wangane' “O, sahwara yagaala tewaanyavɨ nebulya' myadɨvɨ' nayaa yɨda'na myɨvanɨgasara daaka!” Sara dena a'mweraayaba Pitarɨ wɨde “Juyaigɨnyɨra. Juyaigɨ kɨrɨ' Maaveraavɨrebwina tewaanna mwaimwaana. Juyaraavɨrebwina mamwalyɨwaana. Sareigɨ dahaa' ayɨna Juyaraavɨrebwi yɨwaanya'na ‘Ajɨmya yuyangɨyaihi, Juyaraavɨrebwina dɨmwaalyɨla!’ sara dɨvanɨgɨ. Sara be'na yɨvanɨgɨ!” wɨde.
Jizaazai Kɨraazɨtɨyarɨ wɨ'nya'nera Juyarajɨ Maaverajɨ saraavɨ Gotɨyai avaaina padaihasamaa'de'nesɨ.
15Nenɨmaangera Juyara mwaaidapɨjɨ mudangegaa' Juyaina yɨma'no. Juyara dɨna “Ne Mozɨzare Kɨwɨnya myadɨvɨsara kayaa'nanyarera.” Sare' Juyaina mwaidaa ajɨmya yuyangɨyaina kayaa'nanyaina mamwaalyɨgoina 16kɨrɨ' dara yawɨ'mwosɨ. O, pwai Gotɨyare Kɨwɨnyabwi yada Gotɨyai mujɨna “Yɨda'maraangeigɨnyɨ,” mujɨna. Aawa. Pwai Jizaazai Kɨraazɨtɨyarɨ lɨmwaga'da Gotɨyai wɨdɨna “Yɨda'maraangeigɨnyɨ,” wɨdɨvanɨkelyɨra. Sare' nemɨ saina Kɨraazɨtɨyai Jizaazarɨ lɨmwamwo. “Kɨwɨnya dɨnɨkebwi mɨdɨdaa Gotɨyai ‘Yɨda'maraangeigɨ,’ manejadelyɨ. Kɨraazɨtɨyarɨ lɨmwadaa Gotɨyai ‘Yɨda'maraangeigɨ,’ nedana!” dona sara lɨmwamwo. Kɨlaa'naka aane pwai kwai Gotɨyare Kɨwɨnya mɨdɨda Gotɨyai “Yɨda'maraangeigɨ,” mujɨnɨke'na Kɨraazɨtɨyarɨ lɨmwamwo. 17Nemɨ Kɨraazɨtɨyarɨ wɨlamwaidaanya'na tewaanyaina nemwaaihɨvanɨkeinera. Sara yadaasɨ Juyara nenganeva nedɨvanɨga' “Juyaihi kɨwɨnya' navɨka yadɨvɨ' kayaa'nanyaihi Maaverabɨsaihi yɨma'nɨwaa'. Sare' sarɨmɨre Kɨraazɨtɨyai kayaa'nanyabwi wakadelyɨ.” Sara nedɨvanɨgasa' Gotɨyai yawɨ'na “Arɨkewɨnyɨra. (Kɨraazɨtɨyai nɨmɨrebwi yadelyɨ.)” 18Sare' dare'nesɨ. Kɨwɨnya'na Gotɨyai “Yɨda'maraangeigɨnyɨ,” mujɨ neyake'na Kɨwɨnyabwi wa'dɨ'nyɨ Kɨraazɨtɨyarɨ lɨmwadaa Gotɨyai “Yɨda'maraangesɨ,” nedadelyɨ. Nɨmɨ ayɨna Kɨwɨnyabwi yɨwɨjɨ kwajɨ kayaa'nanyabwi yadɨnyainyɨ kyɨma'nɨwɨdɨka! 19Sare' dare'nesɨ. Kɨwɨnya'na baimweinyɨ. “Yɨda'maraangeinyɨ yɨma'nɨma!” dena Kɨwɨnyabwi yaamɨjɨ yaamɨjɨ yena aawano. Tewaanyainyɨ myɨma'nyɨwe'na “Kɨwɨnyabwi aalo,” dena sabwina baimweinyɨ. “Gotɨyarɨna gaala mwaalɨma!” dena sabwina baimweinyɨ. 20Kɨraazɨtɨyarɨ wɨlamwaaiheinyɨna Kɨraazɨtɨyai yɨsavɨ balakegaa' nɨmɨ bainɨkeinyɨ. Sare' nɨmɨ sainyɨ mamwaalyɨge. Kɨraazɨtɨyai sahwai wɨlanyɨmwaalɨkeinyɨ. Dahaa' kɨlaa'nakeinyɨ mwaaiheinyɨ. Gotɨyare Gawaalɨkɨ lɨmwadɨ mwaaiheinyɨ. Sai nɨmɨnyɨna tewaanya wɨvu'nakelyɨ. Gamɨ sai nɨmɨnyɨneba marɨmwangɨnaka yarai balakelyɨ. 21Gotɨyai a'mweraavɨna yange'na wɨgaimwangebwi wanganakɨna myɨwɨnera! (Kɨraazɨtɨyarɨna yawɨ'dɨnyainyɨ.) Sare' dare'nesɨ. A'mwe pwai Kɨwɨnyabwina nayaa yada Gotɨyai “Yɨda'maraangelyɨ,” wɨdazɨ kwajɨ Kɨraazɨtɨyai yaasɨwa'na kabaladɨka! (Kɨwɨnyabwina Gotɨyai “Yɨda'maraangeigɨnyɨ,” mujɨ yanne'na Kɨraazɨtɨyai nemɨnyɨna bala'.)
Trenutno izbrano:
Galezɨya 2: byr
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
© 2013, Wycliffe Bible Translators, Inc. All rights reserved.