2 Koridɨ 13
13
1Dahaa' sarɨmɨnyawɨnna nɨmɨ bɨde dahasaai dahaakɨra. Mi'na bi'mava'mujɨ yavada'galya'na dɨnɨke'na dara yɨdeinyɨ. A'mwe pwaraai a'mwe kwaraai kwai avaaimaangi'na kajalɨkurakapɨjɨ yagaala daza' dɨragɨnya wa'da yagaainakeraavɨ yawɨbwarɨdeinyɨ. 2Sɨnnawɨ sagaa' yɨwetawakya yesaraavɨjɨ sarɨmɨnyɨ a'mwe yuya pwara kwara sara yɨwa'daasaraavɨjɨ yɨ pɨgasaalyagaa' sagaa' nɨmɨ sarɨmɨjɨ yɨhye'mwannamwaalena “Sarɨmɨre yɨwetawakyangɨne tɨvɨkɨsa'na mala nayaa jɨwannyɨla!” yɨhɨthevaaibɨ' yɨbwa'nɨweinyɨ ya'ne sabwina ayahi dara yɨhɨthɨvanɨge. Sarɨmɨnyawɨnna ayahi ba'muri yɨwetawakya yadɨvɨsaraavɨ yaasɨwa' wanganakɨna yɨdeinyɨ mɨ'. 3Sare' dathare'nanyɨ. Sarɨmɨ “Naanga nebulya'na yawɨranganaajɨ ‘Kɨraazɨtɨyai Polɨmɨre maangevɨ dathei dɨngakajɨ,’ ” jawɨranganyide. Kɨraazɨtɨyare dɨragɨnyavɨ yɨhyɨdeinyɨ. Sahwai sarɨmɨnyɨna wɨrɨsa'na yadei mɨ'. Aawa. Sahwai sarɨmɨnyɨna dɨragɨnaangelyɨ. 4Sare' darevɨnyɨ. Kɨgaa' sahwai wɨrɨta kɨnɨnnakerɨ pwara yɨsavɨri nilɨya wɨramesalyɨ. Kɨrɨ' nabaai Gotɨyarɨ dɨragɨnya kɨnɨnnakei gaalyai mwaalɨ'. Sare' datharevɨnyɨ. Nemɨ sahwarɨ wɨlamwaaihovɨ nemɨre kɨlaakejɨkaavɨ kwainajɨ dɨragɨnya maayaine. Aawa. Kɨrɨ' Gotɨyare dɨragɨnyavɨ nemɨ sahwalyɨ gaala gamɨreina ye'mwannamwalaadeine. Yɨ nabaai nemɨ sarɨmɨnyɨ yɨhyavada'galya'neina dɨragɨnya daza' marima'nabaatheine. 5Sarɨmɨ nayaa jawɨryide'na “Nemɨ Kɨraazɨtɨyarɨ lɨmwaga'manɨgoina daaka?” sarɨnnya sɨmunyangɨ yaamɨjɨ jɨla! Sarɨmɨ saihi sahwaihɨrɨ nayaa jawɨranganyɨla! “Nemɨnyɨ Jizaazai Kɨraazɨtɨyai sahwai wɨlanemwaalɨ',” myawɨrivanɨgasaihi daa! Nabaai aawana. Yɨ savɨna sarɨmɨ kwaasɨyaihɨrɨ jawɨrangannyideihi dɨngaka? 6Yɨ nɨmɨre yawɨta yɨvanɨge. Sarɨmɨ nemɨnyɨna dɨneyawɨranganyide yawɨbwata dazavɨ yɨnɨgeva. Kwaasɨyaina mɨ'. 7Yɨ nemɨ Gotɨyarɨ yɨdangadaanyɨ. Yɨ sarɨmɨ kayaa'nanya aane pɨbwi kɨbwi mi jideihɨlyɨ. “Nemɨ yavada'galya'neina yɨnɨga mi'nanyaina ku'maayaba nayaa yɨma'nabaana!” dona sara yɨdangadaanyaina mɨ'. Aawa. “Yɨ sarɨmɨ tewaanyabwi jɨla!” dona yɨdangadaanyɨ. Sare' nevu'nɨvanɨ'. Nemɨ yɨnɨga wi'nanyaina ku'maayaba yɨma'nabaadeinaavɨ myawɨranganya'ne'na wikɨra. Sarɨmɨnyawɨnna bawaajɨ Kɨraazɨtɨyare dɨragɨnyasɨ yɨhyavada'galaade' wikɨra. 8Sare' darevɨnyɨ. Nebulya' marulawakya'neina yɨnɨga wi'na yaanneina mɨ'. Aawa. Nebulya' gaimwagya'neina yɨnɨga wi'na yaanneinera. 9Nabaai sare' darevɨnyɨ. Nemɨ wɨrɨta kɨnɨnnakeibɨsaina mwalaaja gazagaasagaa' nabaai sarɨmɨ dɨragɨnya' kɨnɨnnakeihi mwaaibɨzagaa' nemɨ yɨlaaya yɨna yadaanyainera. Nabaai sarɨmɨ yavada'gainya'neihi tewaanya yɨda'maraanga nawɨ'nyaihi yɨma'nya'na yuyagaa' nemɨ Gotɨyarɨ wɨdadaanyɨ. 10Savɨdaa'nyɨ “Nɨmɨ yɨbwa'nɨweinyɨ sarɨmɨjɨ bihye'mwannamwaala'mujɨ Naangere dɨragɨnyasɨ yarai davanganasa'na mihɨzɨ yɨma!” dena pɨkarya datha' yɨda'mwa. Dɨragɨnya daza' Naangei nyɨjaavake', yɨ daza' dɨragɨnna lɨmwangeburɨ dɨragɨnya yɨwagya'nesɨ. Sa' yawɨsangɨ kayaaka wo'dalasɨ'nya'ne' mɨ'.
Yagaala pimagɨnya pɨnɨnnesɨ.
11Nya'mweihi, dahaa' yagaala aaya' dɨma! Tewaanya dɨmwaalyɨla! Tewaanya yɨda'maraanga nawɨ'nyaihi yɨma'nya'neihi yavada'gainyɨna jɨla! Nɨmɨre yagaalya' nayaa wɨ'namɨdɨnapɨjɨ sarɨnnya sɨmunyangɨ dɨragɨnya yɨvaimwannyɨna jɨla! Sɨmunya avaainanya' jawɨramaarila! Kwaamu'nanyaburɨ dɨmwaalyɨla! Sara yadɨvɨ' yɨ Gotɨyai tewaanya wɨvu'nyaburɨ aaya kaavɨlyai, kwaamu'nanyaburɨ aaya kaavɨlyai, yɨ sai sarɨmɨjɨ yɨhye'mwannamwaaladelyɨ. 12Sarɨmɨnyɨ gazaizai gya'mwe pwarɨ “Nya'mwei!” dada maangwɨdaayɨlaaya tewaanya' yana! 13Dava Gotɨyare tewaanya yuyara sarɨmɨnyɨ “Neya'mweihi!” yɨhɨthɨvanɨga'.
14Naanga Jizaazai Kɨraazɨtɨyai sarɨmɨ yuyaihɨrɨ yanga gaimwange' kuna yɨhwakana! Gotɨyarɨ sarɨmɨ yuyaihɨrɨna tewaanya kuna wɨvu'nana! Kurya Tewaanyai sarɨmɨ yuyaihɨlyɨ kuna yɨhye'mwannamwaalana!
Polɨ
Trenutno izbrano:
2 Koridɨ 13: byr
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
© 2013, Wycliffe Bible Translators, Inc. All rights reserved.