2 Koridɨ 12
12
1Tusarɨ' pɨrɨ' mɨ'. Nɨmɨ yune nɨmɨnne yaya' munyaba makimujainyɨ. “Nebulyasɨ, sasare dazabwi negaimwagathe' mɨ',” yawɨ'daanyɨ. Sarevɨ kɨrɨ' a'mabaaitɨnna pɨnɨnnajɨ lɨka yulyakya pɨnɨjɨ Naangei marima'naabadennajɨ dɨde'nanyɨ. 2Kɨraazɨtɨyarɨ wɨlamwaalɨka pwarɨ nɨmɨ mena yawɨrangadɨnyainyɨ. Yɨ sahwarɨ kwarame potinɨya (14) kɨgaa' Gotɨyai gamɨreba Sɨgunyavɨ menya ke'mwewɨnna yarai yɨpalamakɨlaawa'. Ai, sai kɨlaa'nakei dahamwaala'? Nɨmɨ myawɨriwa. Sai kɨlaakejɨ' yagalya'mata dahaya'? Nɨmɨ myawɨriwa. Gotɨyai yune gave sahwaina yawɨ'dei. 3Yɨ nɨmɨ a'mwe dazarɨna yawɨrangadɨnyainyɨ sahwarɨ Gotɨyai nawɨ'nyabanna Parathaazɨ wo'nɨkebanna makɨlaawakerɨna. Sai kɨlaa'nakei dahamwaala'? Sai kɨlaakejɨ' yagalya'mata dahaya'? Nɨmɨ myawɨriwa. Gotɨyai yawɨ'dei. 4Sɨgunyaba sai kadɨka wɨ'naka yagaala sangɨ a'mwei yɨnɨga wi'na dannei mɨ'. Yɨ Gotɨyai daza kɨrɨ'najɨ kɨmaakɨya dakɨna. 5Sasarerɨ yɨma'nakevɨna nɨmɨ gamɨnne yaya' munya ke'ba makɨlya'neinyɨ. Nɨmɨnyɨne'na nɨmɨnne yaya' munyaba mamakimuna! Kɨrɨ' nɨmɨnyɨna gave pɨrɨ'na dara dɨde'na “Nɨmɨ dɨragɨnya maayainyɨra,” nɨmɨnne yaya' yɨnɨga wi'na makɨlɨdeinyɨ. 6Sara yɨwɨneinyɨ. Sare' darevɨnyɨ. “Nɨmɨnne yaya' makɨlɨma!” dɨwɨja' a'mwe navɨ'navɨkeinyɨbɨ' yɨdeinyɨ mɨ'. Sare' darevɨnyɨ. Yɨ nɨmɨ yagaala nebulya'na dɨwɨneinyɨ. Kɨrɨ' yune nɨmɨnne yaya'na mamakɨlyɨvanɨge. A'mwe pwai nɨmɨnyɨna dara nyawɨradɨka! “Polɨ a'mwe wana nawɨ'nyaangelyɨra.” Nɨmɨ yɨvanɨge sabwi sahwai tɨnna wanganannejɨ nɨmɨ yagaala dɨvanɨgengɨ kadɨka wɨ'nannejɨ sasare sahɨnɨngɨ sɨmunya nayaa yɨda'na yawɨrade'na tewaanyasɨ. Nebulya' dɨngaka? Kwaasɨya' dɨngakajɨ? 7Yɨ yuya daza Gotɨyai nyɨbwarɨdaakwake wana naanga nebulya'nanyanna “Yɨ gamɨnne yaya' gamɨ saina naanna namakɨladɨka!” daka sarevɨdaa'nyɨ Gotɨyai lange'bɨsa' daange' nɨmɨre kɨlaakejɨkɨ nyɨmulya'ne' nyɨjaava'. Yɨ daza' “Saataanɨmɨre ejelɨyai Polɨmɨ mala wɨramana!” daka nyɨjaava'. Nɨmɨ yune nɨmɨnyɨne'na naanna namakimudɨ'de'na nɨmɨnyɨ marulawakya nya'nei daanga nyɨvɨdelyɨ. 8Dazavɨna “Naangei nɨmɨnyɨ marasɨ'nana!” dena yɨrɨka dahasaai dahaa' dɨragɨnna yɨdaangane'nanyɨ. “Tewaanya mwaalɨma!” dena yɨdaangane. 9Kɨrɨ' nabaai sahwai dara nyɨda' “Nɨmɨre yanga gaimwanga naangebwi gɨmɨnyɨ yɨnɨga wi'nannebulyɨ. Darevɨnyɨ. Nɨmɨre dɨragɨnya' a'mwe dɨragɨnya maayaraavɨ wawɨnya yuna nebwina wiadesɨ.” Sarevɨdaa'nyɨ “Taanga nanyadɨka!” madɨwɨna! Nɨmɨ dɨragɨnya maayainyɨre wɨrɨta savɨne yaya' munyaba makidɨnyainyɨ. “Kɨraazɨtɨyare dɨragɨnya' yune nɨmɨnyɨ nyarana!” dadɨ sara yɨde'nanyɨ. 10Sarevɨdaa'nyɨ Kɨraazɨtɨyarɨne'na wɨrɨsangɨjɨ bɨraiyagaalyangɨjɨ nyɨgainyangɨjɨ kayaaka nyɨgaidengɨjɨ taanga dala pɨnɨnna pɨnɨnnanyangɨjɨ nɨmɨ wikɨra. Sare' dare'nesɨ. Nɨmɨ dɨragɨnya maayainyɨ mwaala'mujɨyagaa' yɨ dazagaa' sagaa'na dɨragɨnya nebulya'nanya' kɨnɨnnakeinyɨ.
11Nɨmɨ navɨ'navɨkeinyɨ yɨma'nɨwa. Kɨrɨ' nabaai nɨmɨ yadɨnyabwi nayaa myawɨranganyɨwaasavɨ sarɨmɨ kyanyɨdɨka'mwa'daa' yɨ nɨmɨ sara yɨma'nena yagaala sa dɨwa. Sare' darevɨnyɨ. Sarɨmɨ nɨmɨnne yaya' munyaba makibɨza' sa' yɨda'nanyabulyɨ. Kɨrɨ' sarɨmɨ sasara yadɨvɨtaihi mɨ'. Sare' darevɨnyɨ. Nɨmɨ geinyɨra. Kɨrɨ' mudɨkera “Apozelɨya nawɨ'nyaanga wavɨla'nɨkeine,” dadɨvɨta dazaraavɨ dalaangewɨ nɨmɨ mula'narige. Aane pɨrɨ' kɨrɨ' manyɨmudaasadeinyɨ. 12Nɨmɨre sɨmunya' dɨragɨnya yuya yɨvaimwannadɨ sarɨmɨnyaba Gotɨyare wawɨnya' yadɨ apozelɨya kware wɨjɨwaainya nebulya nɨmɨ marima'naabe. Sa yɨ darengɨ. Yɨjɨwaainya dala pɨnɨnna pɨnɨnnanyajɨ atɨka maru'nasajɨ dɨragɨnya yajɨ sa yɨma'nɨkengɨ. 13Sare' dare'nesɨ. Nɨmɨ yɨhye'na “Kɨraazɨtɨyare kusɨlaanya pɨnɨngɨ naanga ya'. Nemɨnyɨ maalɨka ya'.” Sara yawɨ'manɨgasaihi daaka! Nɨmɨ yadɨnya'na sarɨmɨnyɨne pɨnɨnna yɨhɨmudaasade dɨngaka! Yɨ yɨhɨmudaasade' gave pɨrɨ'nanya' daresɨ. Nɨmɨ sainyɨ gaveinyɨ sarɨmɨnyɨ taanga yɨhɨzaaveinyɨ mɨ'. Sarɨmɨre gɨlyɨvɨsa yɨhɨmwagi'neinyɨ mɨ'. Nɨmɨre yɨwetawakya dazawaai sarɨmɨ nayaa dɨmarasɨ'nyideihɨle!
14Yɨthaanyi, dahaa' sarɨmɨnyawɨnna dahasaai darɨkɨ bɨde'na nɨmɨ yemwaala yɨwa. Yɨ nabaai taanga mihɨzaayadɨ sarɨmɨre gɨlyɨvɨsa yɨhɨmwagi'nɨdeinyɨ mɨ'. Sare' dare'nesɨ. Sarɨmɨre gɨlyɨvɨsa maarya'na nɨmɨ mabɨramaariwa. Aawa. Nɨmɨ sarɨmɨ sahwaihɨrɨ maarya'na nyɨvu'nɨvanɨ'. Sare' darevɨnyɨ. Kaimɨraayara sahwara kuvɨnɨmaangeyuraavɨ gaimwagya'neyuraavɨ gɨlyɨvɨsa mari'bwarakya'nera wawɨnya maayarera. Aawa. Yune kuvɨnɨmaangeyura kaimɨraayaraavɨ gaimwagya'neyura mari'bwarakya wawɨnya sa' kɨnɨnnakeyurera. Nɨmɨ sɨrɨnɨmaangeibɨsainyɨ sara yɨhɨthɨwa. 15Yɨ yɨhɨgaimwagya'neinyɨ nɨmɨre gɨlyɨvɨta yuya wasɨsa'na, nɨmɨre gaala kɨbulyɨ wasɨsa'na. Yɨ sarevɨna nɨmɨ “Wikɨra,” dadɨnyainyɨ. Nɨmɨ sarɨmɨnyɨna tewaanya naanga naanga nyɨvu'naja sarevɨdaa'nyɨ sahɨrɨvɨ tɨvɨkɨta ya'ne' nɨmɨnyɨna sarɨmɨre yɨhɨvu'nyabwi yune maalɨ'nanya' jɨvanɨka! 16Kɨrɨ' nabaai pwara sahwara nɨmɨnyɨna dara dɨvanɨga' “Nebulyasɨ. Sai sarɨmɨre gɨlyɨvɨsa ku'maayaba maarakei mɨ'. Aawa. Sai a'mwe nyɨlɨ'nyɨlɨka dadelyɨ. Yɨ kwaasɨyaburɨ sai sarɨmɨre sɨnnyɨkaavɨ lɨka yulya'mwagakya yada sarɨmɨnyɨ yɨhɨmwagi'namaara'.” 17Mena maryasaabera a'mwe pwara sarɨmɨnyawɨnna besaraavɨdaa'nyɨ kwaraavɨre asɨrɨ nɨmɨ kwaasɨ yena sarɨmɨre gɨlyɨvɨsa dahayɨhɨmwagi'ne! 18Nɨmɨ Taaitazarɨ kyadɨkaave yɨ sahwai sarɨmɨnyawnna bakei, yɨ nɨmɨ neya'mwe pwai dazai maryasaabei salyɨ ye'mwannɨgwawa'. Taaitazai sai kwaasɨ yaka sarɨmɨrenna mwagi'nakei daaka! Gamɨjɨ sainaai sɨmunya gave avaainanyavɨ kaanya yamaryolyainaai midaaka! Tuta yune gave pɨrɨvɨna yɨbwaramakwadasainaai midaaka!
Koridɨ mwaalyara yavada'gainya'neraavɨ “Mala nayaa jɨwannyɨla!” wɨdake'nesɨ.
19Yagaala yuya dazangɨ sarɨmɨ danganapɨjɨ yɨ nemɨnyɨna jawɨryideihi dɨngaka? “Nemɨre tɨnnyarɨ Polɨmɨvaavɨ marida'maya'ne' yɨda'mwakelyɨ.” Kɨrɨ' aawa. Gotɨyare tɨnnyarɨ nemɨ Kɨraazɨtɨyarɨ wɨlamwaaihoina yagaala daza dɨvanɨgo. Kɨrɨ', sarɨmɨnyɨna tewaanya nyɨvu'nadeihi, nemɨ yɨvanɨgo yuya sa, yɨ sarɨmɨnyɨnenna dɨragɨnya yɨvaimwanga yɨhyadennanyɨ. 20Sare' darevɨnyɨ. Yɨ nɨmɨ lɨka dara yɨvanɨge nayɨhwangamudɨka! Sarɨmɨnyawɨnna bi'mava'mujɨ “O, sahwaraavɨna sɨmunya nayaa yawɨrɨma!” dɨwɨja' kɨrɨ' sarɨmɨ nayaa mamwaalyɨ yadɨvɨ' sareihɨrɨ nayɨhwangamudɨka! Nabaai sarɨmɨ kwaihi “Polɨ nemɨnyɨna yɨlaaya yana!” yawɨpɨja' kɨrɨ' nɨmɨ sainyɨ maanga yɨhɨza'neinyɨ sareinyɨ nanyangabɨthɨka! Akai, sarɨmɨnyaba kayaa'nanya dala pɨnɨnna pɨnɨnnanya dare naradɨka! Maanga dɨnyɨna, tɨganaarya yawɨ'na, sɨnna tɨka davɨna, pimagɨnyavakaavɨ maiyagaala dɨna, kayaakyagaala dɨna, bulayagaala dɨna, pihadɨka yɨbwaakɨna, gavamarasɨ'nyɨyagaala dadɨvɨ' yɨna. Nɨmɨ dazanna yɨpɨja'na lɨka yɨvanɨge. 21Akai, sarɨmɨnyawɨnna ayahi kaba'mujɨ yɨ sarɨmɨnyɨna nɨmɨre Gotɨyai nɨmɨnyɨ nanyɨmarulawakadɨka! Yɨ a'mwe kwalaalyaraavɨ yavada'gaidɨ sahwaraavɨna kɨnna nadɨwɨdɨka! Sahwara sɨnnawɨ kayaa'nanyabwi yesara sɨmunya mudɨkebwi myawɨramaariwaa'. Yɨ sahwara kayaa'nanya gɨrɨkita'nanyabwi yɨna, ata lɨmwangebwi yɨna, dɨka widadaasɨ yɨna, yɨ sara yadɨvɨsaraavɨna kɨnna nadɨwɨdɨka!
Trenutno izbrano:
2 Koridɨ 12: byr
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
© 2013, Wycliffe Bible Translators, Inc. All rights reserved.