Oosana 27
27
Yakooboofa Eesauna afaaqooqa ummuaru ufafa.
1Isakeefa mariiufanoo doo asooqaqoofanoo afu mandaikinau. Mariiufanoo moo kari narí indaaruqaa faiqi Eesauna aaroofanoo Eesaufa maqi qinau.
2Foo qimasoofanoo Isakeefa Eesauna qimaminoo qinau. Doo qinee asooqa marida, qeeqa kuqira aukuana sia qafaida, minara ani qimamiqa. 3-4Aneenna duru feefa mareenana nandaki aandau aru maree qini didi marina mini suqa qiminaqa namseeqa ani afaaqooqa qimamaqaseeqa kuqua.
5-6Isakeefa Eesauna faqa ufa qiqiisoofanoo Reebeeka nammarifa iriseenoo qafoofanoo Eesaufa nandakinai uaqarara fufanoo quanda fufanoo Yakooboona qumee kai qimaminoo qinau. 7Doo maqee ani akoofa Eesauna maaqi qimasee qimaminoo, anee aandau arumaree mini suqa qiminaqa qinee namasee Karaambaiqa afusaa ani afaaqooqa amisee kuqua. 8Qini qimaaku doo anee qini ufa irisee qinee qianandee ia. 9Anee doo fua oonu mimmi aanaaqiuqa marianakinaana afaaqa faqaana qaaraqanda mini sainaqa qinee ani akoona aidi marina suqa saanana munu amia. 10Munu aminano namaseenoo narí afaaqooqa amiseenoo kuquani.
11Yakooboofa iriseenoo narí anoona qimaminoo qinau. Qini qifasaafa asausi faqaafa maridanoo asausi aadaiki marifa maridanoo. Qini qifaaqa qisausi sia maridanoo umooqu kammidanoo. 12Abee qini qikoofa qini qifaaqa duqama qafamaseenoo iriannoo. Qiniara qikaru qidanoo fee qiannoo. Miqiqa qinee rairaiqirana qeeqa qifaaqai qifaaqooqara foora mara quqaanaura.
13Mina anoofa mi ufana iriseenoo qinau. Ani aqira ufa fannoo qinisaa kai mariannoo, sia anee minara iria, sandeenana oonu mimmi aanaaqi kaqi maree mini qimia.
14Miqi qima soofanoo Yaakooboofa eedoo qimasee mara maree mini soofanoo mina anoofa maraseenoo narí afaaqi Isakeena aidira narana suqanau. 15Reebeeka nammarifa aandau suqaseenoo Eesauna amiqira qamunna narí maaqaki quqaqoona maraseenoo Yakooboona afisu amaqanau. 16Afisu amaqaseenoo mimmi aanaaqi apata qumareenoo Yakooboona afaarinni faqa asauku faqa asausi sia maruqoo afisu amaqanau. 17Miqi mandeenoo mi adiafaaira naranna feemu namu faqa suqaqoona amufanoo narí akoo funnai maree finau.
18Oonureenoo narí akoona maaqi qimasee qimaminau. Qipoo doo qinee anireeqa, qufanoo Isakeefa qinau. Qini faiqi namukiqari anee yafee maridanee qinau.
19Yakooboofa qinau. Qinee ani indaaruqaa faiqi Eesausa maridaqa. Doo anee aandaura qiannana arusee suqamaree anireeqa doo anee findi finana namasee qifaaqooqa qimia. 20Miqi qufanoo Isakeefa qinau. Oo qini qimaaku anee naqaa fee maseenanee kai kaqi paqurinanee qufanoo Yakoobofa qinau. Karaambaiqa ani Anutufa qini dadaaqi paqurimma qiminoo.
21Isakeefa minara iriseenoo Yakoobona aaramaseenoo qinau. Anee qini daaqa adeedi ani rainaqa qinee ani auqama qafaa. Kuqaa anee Eesau fee maridanee.
22Miqi qufanoo Yakooboofa narí akoona oorinni oonu kikiqamma fufanoo Isakeefa auqama qafamaseenoo qinau. Qinee irunanoo anee ufa qianafa ani Yakooboona aunda maridanoo ani asauku auqamasee qafaunanoo Eesauna asauku maridanoo. 23-24Yakooboofa mimmi asausi afisuqoofanoo Eesauna asaukuara foora asausi aanaaqi marufanoo Isakeefa sia irinau. Isakeefa narí afaaqooqa mina amirarammaseenoo kaifaa iramirinoo qinau. Anee kuqaa Eesau fee maridanee. Miqi qufanoo Yakooboofa qinau. Eeoo qinee Eesausa maridaqa.
25Miqi qufanoo Isakeefa qinau. Doo aneenna aandau mini qiminaqa namaseeqa afaaqooqa qimamaqaanaura. Yakooboofa irinoo aandau aina faqa uainna nammari faqa mini amufanoo nanau. 26Namaseenoo Yakooboona maaqi qimasee qimaminoo qinau. Qini qimaaku maaqoo adeedi ani reenana qini qimooqaa. 27Qufanoo Yakooboofa adeedi aaqa ani reenoo narí akoona amooqee marufanoo andanda unda afaaqaindari ufanoo udirama qafamaseenoo maaqi qimasee afaaqooqa qinau. Qini qimaaku afaaqai amiqira unda fannoo Karaambaiqa afaaqooqa qimamaqaqai maqana afundara foora idanoo.
28Anutufa innaarunaindaraa qifi faramu quqasainanoo ani maqa ainoo ainoo maseenoo moomoo narana amiani.
29Moo anaamuru marinausa ani ainainira faiqi kammambi faranoo.
Maaqanna maaqanna mariasa misa ani ani qafeeqa noorindari maqasaa kummaree faranoo.
Anee aneenna akaqaafasaauqa firaafai kina marinnaranoo.
Ani anoona faiqi namu ani ani qafeeqa noorindari maqasaa kummaree faranoo.
Moo fannoo ani aqinafa mi ufafa nariki kai mariannoo.
Moo fannoo ani amiqi amiqimma amaqainafa nariki faqa mariani.
Eesaufa narí akoona afaaqooqara qaiaaee qu ufafa.
30Miqi qimasee Isakeefa Yakooboona afaaqooqa qimamaqa soofanoo Yakooboofa narí akoona maaqakiqari raudamakufanoo dindanai fufanoo doo Eesaufa dindanai uaqanoo niniufa aniranau. 31Eesaufa anireenoo adiafaa ira aandau aina suqa mareenoo narí akoofuqoo oonu reenoo qinau. Qipoo doo findi finana namasee qifaaqooqa qimia.
32Mina akoofa qinau. Anee yafee. Miqi qufanoo mifa qinau. Qinee Eesausa indaaruqaa faiqi maridaqa.
33Isakeefa minara iriseenoo boo qimasee tautu maseenoo aindiri aindiri imarufanoo qinau. Yafee moo fannoo aandau arusee mini qimifaqa, namasaunana anee aniraananoo. Qinee namaseeqa doo qeeqa taikara afaaqooqa qimamaqa saunanoo naaru naaru minaindi mariannoo.
34Eesaufa mina iriseenoo firaaqoo aundurai sukaqoofanoo qinau. Oo qipoo qini faqa qifaaqooqa qimia. 35Qufanoo Isakeefa qinau. Ani akaqa fannoo qikaru qimaseenoo doo ani afaaqooqa maree fifinoo.
36Eesaufa minara irufanoo Yaakooboonara arana qoofanoo qinau. Oo mina auqu Yakooboofa maridanoo narí auqu mau kaimbinoo qini ainaina qaara kari qini qikaru qimasee mareenoo. Indaaru mifa qinee indaaruqaa faiqi uriqararausa maraani qiafanna ainaina maroofa maqee miqi kai inoo qini qifaaqooqa qirana doo maree finoo. Miqi qimaseeno Eesaufa narí akoona qimaminoo qinau. Anee afaaqooqa sia fee qini faqa qiseenanee.
37Miqi qufanoo Isakeefa qinau. Doo qinee ani uriqararafa marianifee afaaqooqa amiseeqa. Kaifa mina ainaina mina ainainira faiqi kiaqee afaaqooqa faqa amiqa. Qinee oosana oosana narana faqa nammari faqa amiqa. Qini qimaaku, maqee sia moo ainaina marinaqa ani amianauranoo.
38Eesaufa narí akoona kafaa kafaa iki raqaidanoo iranau. Moodaa afaaqooqa marinee aminanee sia fee moo qini faqa qiminnaree. 39Isakeefa minara irinoo maaqi qimasee Eesauna qimaminau.
Sia innaarunaindaraa qifi faramu anindi mariannoo.
Sia ainoo faqaa maqa anindi mariannoo.
40Anee duru saamu uqeerasaidana aneenna amiqira marirana paqurinnaranoo.
Miqidana anee aneenna akaqa ainainira faiqikina mariinana rakeemmaki aaduma finnaranoo.
Isakeefa Yakooboona Qaraana maqusai aqiqoo ufafa.
41Yakooboofa Eesauna afaaqooqa maree fifufanoo Eesaufa narí akaqara akoo qaidanoo fidiaqaammi marinau. Miqi marufanoo maaqi qimasee narí kai oonu mafi iriseenoo qinau. Kaqi kaaqoo maasa qikoofa kuqu finaqa soofaara taikaseeqa mikari qeeqa qikaqa kuqamma aruanaura.
42Reebeeka nammarifa mi ufana iriseenoo Yakooboona aaramaseenoo aaqu qimamaqeenoo qinau. Iria ani afasaafa Eesaufa afaaqooqara qimammareenoo ani aruannoo. 43Qini faiqi qinee qimamianandee ia. Anee quqasee sandeenana Qaraana maqusai qini qisookifa ani anaufa Rabannafa marinnai fua. 44Anee ooru miqoo marinanoo ani afasaana arana qarafa asooainana qumua. 45Anee mina mandaikamma amaqaannanara qaunusainaqa qinee akaqausa niiqaanaqa ani ooru afiqee qumuaqa. Qinee qikoo inneeqara moodaafa kuqiranara irunanoo qaifaqa doo quqasee fua.
Isakeefa Yakooboona aiqoofanoo Rabana funnai ooru finau.
46Miqanda ninoofa Reebeeka nammarifa oonu reenoo narí afaaqi Isakeena qimaminoo qinau. Qinee maa Qeeta maqannaa anaasee qandara Eesauna anaaqa qarara qikoo uqanna fidiaqaammidaqa. Yakooboofa Qeeta maqannaa anaasee maaqirana moo marainaqa qinee kuquanauranoo.
Currently Selected:
Oosana 27: bjr
Označeno
Share
Copy
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.