Simuluho 15
15
Bulikani bwa Mulimu ni Abrame
1Zeo ha li se li felile, Abrame a bona pono, mi a utwa Muñ'a Bupilo a bulela ni yena, a li,
“Abrame, u si ke wa saba.
Na, ni tebe ya hao ye ta ku sileleza.
Mupuzo wa hao u ta ba o mutuna luli.”
2Kono Abrame a li, “Muñ'a Bupilo, Mulimu wa ka, na, ha ni na bana. Cwalehe, u ta ni fa cwañi mupuzo? Shwana wa ka feela ki Eliezere wa mwa Damaseka. 3Ha u si ka ni fa bana, mi yo muñwi wa batanga ba ka ki yena ya ka ca lifa la ka.”
4Kih'a utwa Muñ'a Bupilo a bulela hape, a li, “Mutanga yo, h'a na ku ca lifa la hao. Mwan'a hao kasibili ki yena ya ta ba shwana wa hao.” 5#Baro 4.18; Maheb 11.12 Mun'a Bupilo a mu isa fande, mi a li, “Talima kwahalimu, mi u bale linaleli haiba u ka kona. Lusika lwa hao lu ta swana ni zona kwa buñata.”
6 #
1 Mak 2.52;
Baro 4.3; Magal 3.6; Jak 2.23 Abrame a lumela kuli s'a n'a bulezi Muñ'a Bupilo ki niti, mi Muñ'a Bupilo a mu nga kuli u lukile kabakala tumelo ya hae.
7Cwale Muñ'a Bupilo a li ku yena, “Ki na ya ku zwisize mwa Ure wa Kaladeya, ili kuli ni t'o ku fa naha ye, i be ya hao.”
8Kono Abrame a li, “Muñ'a Bupilo, Mulimu wa ka, ni ta ziba cwañi kuli i ta ba ya ka?”
9A mu alaba, a li, “U ni tiseze nkomwana ya sitole ya lilimo ze talu, ni puli ya lilimo ze talu, ni poho ya ngu ya lilimo ze talu, liiba ni nkwilimba.” 10Abrame a tisa limunanu zeo kaufela ku Mulimu, a li puma fahali, mi a beya likalulo zeo mwa mikoloko ye mibeli ka ku likanelela. Kono linyunywani h'a si ka li puma. 11Manoñu a taha fa nama, kono a a leleka.
12 #
Job 4.13,14 Lizazi ha li se li likela, Abrame a lobala, mi a tahelwa ki sabo ye tuna kwa buloko. 13#Mut 1.1-14; Lik 7.6 Muñ'a Bupilo a li ku yena, “U zibe kuli lusika lwa hao lu ta y'o ba baenyi mwa naha i sili, mi koo ba ka y'o luiwa ni ku nyandiswa lilimo ze mianda ye mine. 14#Mut 12.40-41; Lik 7.7 Kono sicaba se si ka ba eza cwalo ni ka si fa mulatu, mi bona ba ta nga tutu ye ñata ha ba ka zwa mwa naha yeo. 15Haili wena, u ta pila nako ye telele hahulu. U s'o supezi hahulu kihona u ta shwa ka kozo, ni ku bulukiwa. 16Ku ta fela masika a malalu, mi mwa lusika lwa bune baikulu ba hao ba ta kutela kwanu, kakuli ni ta leleka Maamori, feela bumaswe bwa bona ha bu se bu ekezehile, mi se ba lukela ku utwiswa butuku.”
17Lizazi ha li se li likezi, mi ku se ku na ni lififi, honafo kwa bonahala mulilo o ye tunya musi ni lumonyi lo lu tuka, ze fita mwahal'a libindi za lifolofolo zeo. 18#Lik 7.5 Ka lona lizazi leo Muñ'a Bupilo a iswala bulikani ni Abrame, a li, “Ni sepisa ku fa lusika lwa hao naha ye, ku kalela kwa nuka ye eza museto ni Egepita, mane ku y'o fita kwa nuka ye tuna ya Yuferati, 19ili linaha za Makeni, Makenizi ni Makadamoni, 20Mahiti, Maperizi, ni ya Marefaimi 21hamohocwalo ni naha ya Maamori, ya Makanana, ya Magiriashi ni ya Majebusi.”
Currently Selected:
Simuluho 15: Lozi09
Označeno
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.