Salmos 110
110
1Gaꜙjähꜘ Dio sɨɨyhꜙ DSAˉJØ̱Ø̱Hˈ kya̱a̱nꜙ:
“Naꜘ jwooˈ raˉllu̱u̱ꜗ kinꜙ laˉ, läꜙji̱i̱hˈ lloo˜ jmɨɨˊ lla̱a̱nꜚ taꜙ hwaꜗ hʉʉˊ tɨɨhˊ hi̱ˉ naˉhøøhˊ kyahˈ.”
2Dio lla̱a̱ꜗ hneˉ le̱e̱hꜘ dsaˉtaˊ jeeˊ jwɨɨˉ Sión
mahꜗ jmeehˈ hihꜙ läꜙka̱a̱ˉ jmɨˉgyʉʉꜙ.
Heˉja̱ˉ jmeeˊ hihꜙ kihꜗ läꜙjë̱ë̱ꜙ hi̱ˉ naˉhøøhˊ kyahˈ.
3Läꜙjë̱ë̱ꜙ dsaˉ kya̱a̱hꜗ ngëëyꜗ hñiiyꜘ jmeeyꜗ taˊheꜗ kyahꜗ
gaˊ maˉløøhˋ jmeehˈ hihꜙ.
Jmɨɨˊ ja̱ˉ läꜙjnäähꜘ naˊhñaahꜗ
kihꜗ heˉ la̱a̱hꜗ naˉjngëëhˈ goˉte˜.
Läꜙko̱o̱ˉ chaˉ jmɨˉhmooˊ läꜙjëꜙ høøˉ,
läꜙja̱ˉ läꜙchaˉ beꜘ kyahꜗ läꜙjëꜙ jmɨɨˊ.
4Gaꜙtä̱ä̱ˉ Dio hñiiꜘ,
hiꜙ niꜙ miihˉ saꜙ miˉsɨɨyꜗ hʉʉˊdsëˉ kiyhꜗ:
“Hneˉ la̱a̱hꜗ ja̱a̱ˉ jmiˉdsaˉ gaꜙläꜙjëꜙ johꜘ jmɨɨˊ chaˉ,
läꜙko̱o̱ˉ Melquisedec.”
5Dio chehꜗ jwooˈ raˉllu̱u̱ꜗ kyahꜗ.
Waˊraˉ jaꜗ yaꜙjë̱ë̱ꜗ dsëyꜗ,
lla̱a̱yꜗ taꜙ hwaꜗ läꜙjë̱ë̱ꜙ dsaˉtaˊ ka̱a̱hˊ.
6Jmɨɨˊ heˉ llayꜗ taˊ kihˈ läꜙjë̱ë̱ꜙ nääꜗ dsaˉ jmɨˉgyʉʉꜙ,
ja̱hꜘ dsaˉ saꜙ ju̱u̱ꜘ jmɨɨˊ ja̱ˉ.
Chiˊjøøyꜗ lleˊ dsaˉ hi̱ˉ tä̱ä̱hˊ läꜙka̱a̱ˉ jeeˊ jwɨɨˉ.
7Hɨ̱yhꜗ jmɨɨˉ heˉ hlaˉ chaˊjwëꜗ mahꜗ të̱ë̱yhꜗ beꜘ läꜙ hmëëꜘ.
Trenutno izbrano:
Salmos 110: chz
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
© 2003, Wycliffe Bible Translators, Inc. All rights reserved.