Ɓəkpəkpəyawu 9
9
Mwayi tnuuyi
1Maləka tnuuyi wa bye əwo mwayi, jesnu ma gye kpasi n kwo ɓəə la kaya n əshebmana shi n əknyi nyi. A ɓə la nyagwunya n kwo lo ɓwokwnu loloyi tna-aceshiba nya nyi ga kpasi ye. 2She wo ɓə gwú ɓwokwnu loloyi tna-aceshiba nya ya, awú ɓa kwnuɓe n kwo ngye awú n ɓa kwnu n əná okwu yaakwo aba. Nyipyei ɓədo n əshebmanai ɓa kwu gyi zhii n awúi n ɓa ɓə kwnuɓe n ɓwokwnu loloyi tna-aceshiba nyi. 3Àɓo ɓa kwnu n awú ɓa shnizhi ɓe əknyi, jesnu aa kalá ga ɓa ngye anapisi əknyi nya. 4A kwu gna ɓa nge ɓa to wnú agbegbe əknyi nya ya, kwo ənya byebyei kwo shnuwna m, ama aza nu ɓwasnu n ɓa to n atuzè Shekwoyi nyai kpəlo n əɓa anyikwnumi m. 5Shekwoyi to ɓə ye nge a wu ɓa m, ama ɓa ɓwa ɓa awyesnugbegye aɓo nu wu, apya ngwnu-atnu. Njesnu zhowozhowoi n ɓa ɓə wo nyi, kwo ɓə wo ngye shi napisi ce əza nu. 6Fyi n anyipyei yi aza ɓə zna əfyí shni, ama ɓa to ɓə ɓwa kwo m; ɓa ɓə zna əfyí znashni ama əfyí ɓə la bwu ɓa əsi.
7Àɓo ɓə wu ngye adokwo nu n a la ɓa yezhi ntu okwnu ɓo. Əɓa atukwo ɓə n anyahoi nu kwnu ngye zinali afnunyi nya, jesnu əɓa awyeba ɓə wu ngye zanyikwoci awyeba nu. 8Əɓa tukwoyi ɓə wu ngye anyikwoza tukwoyi nu, jesnu əɓa anyikna ɓə wu ngye gaba anyikna nu. 9Ɓa ɓə n agwupatai wu ngye agwupata snukna nya nu, jesnu əɓa abmyina kəsnu ɓə wo ngye adokwo bəgyé akigyí əɓwi nu, n asnuknadokwoi n ɓa lo ɓai bwusi lo okwnu.
10Ɓa ɓə n asesii gyi n azhnizhnii ngye anapisi, jesnu, əɓa akalá ɓə fyi n əɓa asesi nu ɓa kpe aza azhnìgye zhowozhowo apya ngwnu-atnu. 11Maləka ɓwokwnu loloyi tna-aceshiba nya nu ɓə zhni əɓa əsu ai yi əwo əye n Aibraniyi nyitalai nge Abadon, n kasnu n Girik əbyei nge Apwoliyon (okwo nu gyi Agbmazhniyi).
12Owii kpmisnui kwo la duya; a owii ngwnu-aba aje ye ɓeɓelo. 13Maləka tnaanyii wa bye əwo mwayi yaakwo, jesnu ma wo bəgye kwoi gbmiɓe n amwayi ngwnu-anyi bəgədi zinali nya n kwo gnyi n Shekwoyi abye nyi. 14Kwa gna maləka tnaanyii n wo ɓə n mwayii shi nyi, “Kwu amaləka ngwnu-anyi yi yaɓwa, ń a əɓai pafyi n Ifyiretus əlà yaakwo nyi.”
15Amaləka ngwnu-anyi yi n ɓa ɓə yafyi ntu əsa ye pya ɓo nyi, ntu n nyipyeii ɓo n əpyai n əyei nyi, aa ɓa loya nabai ɓa wu aza okwu gbmanyi nya n akwu ngwnu-ata. 16Akwnúyi bəgyé n ɓa ɓə n ɓahnii kwukwui, ɓa ɓə nyi myiliyo tagyi-aba (200,000,000) nu. Mi ɓə kwu wo shi ɓa ɓə nyi nsnu n bəgyé.
17Adokwo n əɓa gwnuyii n mi ɓə gyewye dna n əmi ɓəwyegye nyi, ɓa ɓə wu nlai nu: Əɓa agwupata ɓə wu n byeibyeii cuu, əsnìnuwna zhiizhiyi, jesnu n wu əlónuwna ngye solufo. Adokwo atukwo ɓə gbe agaba atukwo nu, jesnu əná kwoi kwnuɓe n əɓa agbe, awú ɓədo n solufoi. 18Okwu gbmanyi n akwu ngwnu-ata azanyikwoci nya, a kwu ɓa wu n agwnù ngwnu-atai əná nyai, awú n solufoi n ɓa ɓə kwnuya ɓe n əɓa agbe nyi. 19Adokwo yi akalá ɓə fyi n əɓa agbe nu, n əɓa asesii; ntuge əɓa asesi ɓə wu ngye awa nu n atukwoi gyi n ɓa ɓə zhni ɓai kpe aza aci ncei nyi. 20Azanyikwoci n ɓa ɓə ce nyi, n ɓa to ɓə fyí fyi n azhnìgye ye nyi m, dudulonu, ɓa to ɓə yeabwi əɓa aɓwa tnutnu nya m; ɓa to ɓə fa ase mwamwaga ɓo m, ń ashna zinali nya gbai m, n azulufai, snuknabyei, kwuta n shnuwnai, ashna n ɓa ta gyewyeba kwo ɓa wo ɓəda kwo ɓa znazna m. 21Kwo nge ɓa yeabwi ntu azawu ɓo, kwo əɓa zokwushe, əɓa asisiɓozhni kwo ń əɓa əvyiwyi m.
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.