1 Timwoti 2
2
Agbega ntu mwamwaga ɓo
1To, nlonu, mi tna fye aɓwa, əɓo kpmisnui n aɓo vnyanya, nge wyegyi, aduwazhni, ngbiaduwazhni jesnu n amisagagai; a zhni ɓa ntu aza vnyanya ɓo, 2ntu asu ɓo, ɓədo n aza yii vnyanya n ikwo fyi n əɓa akwnu nyi, nabai n yi ɓa gyianyì fyi n bwugbafu jesnu n gyigyii vnyanya fyi n shekwodnawo. 3Dəye nu zhni əɓo manai jesnu əkwo əɓo da Shekwoyi əyi Gnyiyi, 4n wo ncei pma aza vnyanya ɓa pwo, jesnu ɓa ɓwa yekpé gaiciyanunui nya. 5Ntuge Shekwoyi ɓwasnu lo gbmanyi nu, jesnu ɓəwnazhiyi n Shekwoyi atasni n zanyikwocii, əwo nu zhni Kirisiti Yeisu, 6əza n wo ɓə ga əwohni tukwo waa zè tagbanya ga aza vnyanya. Nsaiye, dəye la zhni ɓəgbmi dna n əkwo əsa. 7Njesnu ntu əɓo ye ɓo nu n a ɓə knyí mi gnyi n zhni wyidnayi n tnutnuloyii; mi da gaiciyanunui nu, mi ta ceakata nu m; jesnu nyawuyi hnihnii n ɓəgbenuyii ga Abyedo.
8Ntucenu mi ncei pma azanugbai n ɓwahoɓwahoi ɓa zhniaduwa, ɓai kwu aɓwa agyigyiyi wu n əshe n tna minagyi kwo aɓənakpeaje. 9Njesnu mi ncei pma anyikwoza ɓa shi aje n kwo dnalo n əgna, ceewo shi kwo kwnuce, jesnu n gwogwo n ɓai, ɓai zhni nyigwnu n kwo to dutu m, toge n tukwoknyi nakwoi, kwo Zinali kwo azulufa kwo aje anakwoi m 10ama n aɓəzhni amanai, n ɓa gwogwo n anyikwozai n ɓa gna ɓa ga Shekwoyi mwamwa.
11Nyikwoza wo tu əɓomwi n bwugbai wnashi, n əwohnii gagai vnyanya dna n tukwogba. 12Mi too ga nyikwoza əgbe nge wo wu zanugbai ənya kwo wo gyibe tu n wo m; ɓəshishi nu waa cepyi. 13Ntuge a ɓə zhni Adamwu nu n kpmisnu, ai kpe Hawawu zhni. 14Njesnu a to ɓə dna Adamwu nu kwoce m; nyikwoza nu n a ɓə dna wo kwoce jesnu waa zè leifyizhniyi. 15Ama anyikwoza ɓə kwu pwo ntu aɓyi ma ɓo; ndei n ɓa gwodu fyi n gaiciyaganunui, yeye, gyigyi n tukwownashii.
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.