Matayo 3
3
OYokaana oMubatiza akuteekaniza omuwanda
(Mak 1:1-8; Luk 3:1-18; Yok 1:19-28)
1Omu biro ebyo, oYokaana oMubatiza nʼaiza omwirungu rya Buyudaaya, nʼatandika okubuulira, 2nʼakoba abantu ati, “Mwenenye, kubba obukama obwa mwiguru bwigereire.” 3OYokaana niye oyo oIsaaya omulangi gweyabazireku ati,
“Aliwo akubazira omwirungu
nʼeiraka eryanguki ati,
‘Musaayiirye omuwanda gwa Mukama,
mugolole emiwanda gyamwe.’”#Isa 40:3
4OYokaana oni yazwalanga kizwalo ekyakoleibwe omu byoya bya nkaina, ni yeebwanga olukobba olwa kyanzo omu nkende. Yaalyanga nzige nʼojuuru wa nzoki za mu kisiko. 5Abantu baaliganga omu kibuga Yerusaalemu nʼomu Buyudaaya bwona, nʼomu kitundu ekyerereire oMwiga Yoludaani ni baabanga gyali. 6Ni baatula ebibbi byabwe, nʼababatiza omu mwiga Yoludaani.
7Niyaboine ngʼaBafarisaayo nʼaBasadukaayo baingi bakwiza gyali okubatizibwa, nʼakoba ati, “Nywe abanyabusuume nkʼabaana ba fulugundu, naani eyabalabwire okwiruka ekiniga kya Kanca ekikwaba okwiza? 8Mukole ebikolwa ebiranga nti mwenenyere ebibbi byanywe. 9Era mulekere awo okwewaisya nimukukoba nti, ‘Tulina aize waiswe oIbbulaimu.’ Kambakobere, oKanca ayinza okukoora oIbbulaimu abaana okuliga omu mabbaale gani. 10Mumanye nti muli nkʼemisaale; ati empasa etairwe oku kitina kya buli gumwei. Olwʼekyo ogwo oguteera byana bisai gukwiza kutemebwa, era gunagibwe omu muuro. 11Nje nkubabatiza na maizi okulanga nti mwenenyere, baitu ankunzwaku emabega, niye ansinga obuyinza, tinsemeire na kukwata mpuuju zaamwe.#3:11 Kukwata mpuuju Gwali mulumo ogwakolebwanga omwiru wa muntu. Oyo alibabatiza na Mwoyo Akwera amwei nʼomuuro. 12Akwaite olugali omu ngalo okusiiwuula eŋaano. Empuule azikumbaanirye omwibiikiro, baitu omusuusi agwoce nʼomuuro ogutalikira.”
Okubatizibwa kwa Yesu
(Mak 1:9-11; Luk 3:21-22)
13Awo oYesu nʼazwa omwitwale lya Galiraaya, nʼaika oku mwiga Yoludaani egiri oYokaana, amubatize. 14Baitu oYokaana nʼagezaku okumukangya nakukoba ati, “Ninje nteekerwe okubatizibwa we, baitute we lwaki okwiza egyendi?” 15OYesu nʼamwiramu ati: “Leka ati buni kibbe kityo, kubba omu ngeri eni tukwiza okwikiirya oKanca kyayendya.” Awo oYokaana nʼaikiriza okumubatiza. 16OYesu niyamaare okubatizibwa, amangu ago nʼazwa omu maizi, awo eiguru ni riswekuka, nʼabona oMwoyo wa Kanca nakusirimuka nkʼonkaiba, nakumwizaku. 17Era eiraka ni lizwa omwiguru, ni rikoba riti, “Oni niye Mwana wange gwenyendya era ogwensemereerwa.”
Trenutno izbrano:
Matayo 3: RUULI-NYALA
Označeno
Deli
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi