Genesỳ 27
27
Voasongona i Hesao
1Efa antitra i Itsehàka ary efa pahina ny masony ka tsy nahita tsara intsony. Dia niantso an’i Hesao zanany lahimatoa izy ka nanao taminy hoe:
–Ry Hesao a!
Ary hoy ny navaliny azy:
–Inty aho!
Dia hoy i Itsehàka hoe:
2Hitanao izao fa efa antitra aho, ka tsy fantatro izay andro hahafatesako. 3Izao ankehitriny izao, raiso ny fiadianao, dia ny tsipîkanao sy ny zana-tsipîkanao ka mandehana mihaza; ary ento ho ahy izay haza azonao, 4ka anamboaro hanim-py ho ahy araka ilay tiako, ary ento aty hohaniko. Avy eo dia hotsofiko rano ianao alohan’ny hahafatesako.
5Nohenoin’i Rebèka anefa ny resak’i Itsehàka sy i Hesao; koa rehefa lasa nandeha nihaza i Hesao, 6dia niantso an’i Jakôba zanany i Rebekà ka nanao hoe:
–Reko ny rainao nilaza tamin’i Hesao hoe: 7«Itondray haza aho ary anamboary hanim-py hohaniko izany; fa rehefa avy mihinana aho, dia hotsofiko rano eo anatrehan’ny TOMPO ianao alohan’ny hahafatesako.» 8Koa ankehitriny, anaka, henoy tsara aho ary ataovy izay andidiako anao. 9Mankanesa any amin’ny andian’ondry aman’osy, ka makà zanak’osy roa izay tsara, fa hanamboarako hanim-py araka ilay tian-drainao. 10Hoentinao any amin-drainao izany hohaniny ka hanomezany tsodrano anao alohan’ny hahafatesany.
11Fa hoy i Jakôba tamin’ny reniny:
–I Hesao rahalahiko dia voloina, fa izaho kosa malama hoditra. 12Koa raha mitsapa ahy ny raiko, dia ho fantany fa mamitaka azy aho; ka hahatonga ozona amiko fa tsy tsodrano izany.
13Namaly azy kosa ny reniny hoe:
–Aoka ho ahy ny ozona, anaka; fa araho ny teniko ka mandehana akao ireo zanak’osy ireo aho.
14Dia nandeha i Jakôba naka ireo zanak’osy ka nitondra azy tany amin-dreniny, dia nanamboaran-dreniny hanim-py araka ilay tian’i Itsehàka. 15Avy eo dia nalain’i Rebekà ny fitafian’ny lahimatoany izay tsara indrindra tao an-trano, ka natafiny an’i Jakôba. 16Nalainy koa ny hoditr’osy ka namonosany ny sandriny sy ny faritra malama teo amin’ny vozony; 17dia natolony azy ny hanim-py sy ny mofo efa namboariny. 18Dia lasa i Jakôba nankany amin’ny rainy ka niteny hoe:
–Dada ô!
Namaly kosa izy hoe:
–Inty aho, anaka, fa iza moa ianao?
19Dia hoy i Jakôba taminy:
–Izaho no Hesao, zanakao lahimatoa, efa nanao araka izay nolazainao aho; koa miarena ary mipetraha hihinana avy amin’ny hazako, mba hitsofanao rano ahy.
20Nanontany azy kosa i Itsehàka hoe:
–Ahoana no nahitanao haza faingana toy izao, anaka?
Fa namaly izy hoe:
–Ny TOMPO Andriamanitrao no nampahatonga azy teo anatrehako.
21Dia hoy i Itsehàka tamin’i Jakôba:
–Manatòna kely hoe, anaka, hitsapako anao mba hahafantarako raha i Hesao zanako tokoa ianao na tsia.
22Nanatona an’Itsehàka rainy i Jakôba ka notsapainy, ary nilazany hoe:
–Ny feony dia feon’i Jakôba, nefa ny tanany kosa dia tanan’i Hesao.
23Tsy fantatr’i Itsehàka i Jakôba, satria rakotra volo toy ny tanan’i Hesao rahalahiny ny sandriny. Kanefa talohan’ny hitsofany rano azy, 24dia nanontany azy indray izy hoe:
–Ianao tokoa ve no Hesao zanako?
Ka novalian’i Jakôba hoe:
–Eny, izaho no izy.
25Dia hoy indray i Itsehàka taminy:
–Arosoy àry hihinanako izato hazan-janako mba hitsofako rano anao.
Dia norosoany izy ka nihinana, ary nitondrany divay koa ka nisotro. 26Taorian’izany, dia hoy i Itsehàka rainy taminy:
–Manatòna kely hoe ny zanako ka manoroha ahy!
27Dia nanatona i Jakôba ka nanoroka an-drainy#27.27 Jereo Heb 11.20.. Ary nony ren’i Itsehàka ny fofon’ny fitafiany, dia nitsodrano azy izy nanao hoe:
Endrey izany fofon’ny zanako,
fa tahaka ny fofon’ny saha notahîn’ny TOMPO!
28Homen’Andriamanitra anao anie
ny andon’ny lanitra sy ny tsiron’ny tany
ary ny vary aman-divay betsaka!
29Hanompo anao anie ireo firenena
ary hiankohoka eo anatrehanao ny vahoaka maro!
Ho tompon’ny rahalahinao anie ianao
ka hiankohoka eo anoloanao ireo zanaky ny reninao!
Ho voaozona anie izay manozona anao
ary hohasoavina izay manisy soa anao#27.29 Ampit Gen 12.3.!
30Nivoaka ny efitrano i Jakôba, nony vitan’i Itsehàka ny fitsofan-drano azy. Nefa raha vao nidify teo anatrehan’ny rainy izy, dia tonga kosa i Hesao rahalahiny avy nihaza. 31Nanamboatra hanim-py koa izy dia nitondra izany tany amin’ny rainy sady niteny taminy hoe:
–Miarena, ry dada, mihinàna amin’ny haza namboariko, mba hitsofanao rano ahy.
32Fa hoy i Itsehàka taminy:
–Iza moa ianao?
Ka novaliany hoe:
–Izaho no Hesao, zanakao lahimatoa.
33Dia nangovitra fatratra i Itsehàka, ka nanontany hoe:
–Fa iza àry ilay nihaza, dia nitondra ny hazany teto amiko ka nihinanako talohan’ny nahatongavanao? Izy no efa notsofiko rano; eny, hotahîna tokoa izy.
34Rehefa nandre ny tenin-drainy i Hesao, dia nikiakiaka mafy noho ny alahelony ka nanao hoe:
–Dada ô, mba omeo tsodrano koa aho!
35Fa namaly i Itsehàka hoe:
–Tonga teto ny rahalahinao namitaka ahy, ka lasany ny tsodrano tokony ho anao.
36Dia hoy i Hesao tamin-drainy:
–Tsy mandia tokoa ve ny anarany hoe Jakôba, «Ilay mpisoloky?» Fa efa nisoloky ahy indroa izy izao; efa nalainy ny fizokiako#27.36 Amin’ny teny hebreo ny anarana hoe Jakôba dia mampahatsiaro ny voambolana izay nadika mpisoloky eto. Ampit Hôs 12.4. Jereo koa ny Gen 25.26 sy nta. – Nanary ny zony i Hesao: Gen 25.29-34., ary ankehitriny lasany koa ny tsodrano tokony ho ahy! Moa tsy mba misy tsodrano notahirizinao ho ahy ve?
37Namaly azy i Itsehàka hoe:
–Efa nataoko ho tomponao izy ary nomeko ho mpanompony ny rahalahiny rehetra. Nomeko azy koa ny vary aman-divay. Koa tsy misy azoko atao ho anao intsony, anaka!
38Fa mbola niteny indray i Hesao hoe:
–Moa tokana ihany ve ny tsodranonao, ry dada? Dada ô, izaho koa re mba tsofy rano e!
39Dia nitomany mafy i Hesao#27.39 Ny tomanin’i Hesao: jereo Heb 12.17.. Fa ny rainy kosa nanao taminy hoe:
«Indro ny fonenanao ho lavitry ny tany lonaka
sy ho lavitry ny ando midina avy any an-danitra.
40Fa ny sabatrao no hivelomanao,
ary ny rahalahinao no hotompoinao.
Nefa hiavo-tena ianao
ka hanapotika ny ziogany
hiala amin’ny vozonao#27.40 hiavo-tena ianao: ny hevitry ny voambolana hebreo eto dia iadian-kevitra. Misy kosa ireo mandika hoe hikomy aminy ianao na ho lasa mpanjenjena ianao. –Ny and 39-40: jereo Heb 11.20. –Momba ny fonenana sy ny tantaran’i Hesao: jereo Gen 36.8; 2 Mp 8.20..»
Nandositra tany amin’i Labàna i Jakôba
41Ary nankahalain’i Hesao i Jakôba, satria nahazo ny tsodranon-drainy; ka hoy i Hesao anakampo hoe: «Efa akaiky ny andro hisaonana an’i dada, ary amin’izay no hamonoako an’i Jakôba rahalahiko.» 42Rehefa nampandrenesina ny fikàsan’i Hesao lahimatoany i Rebekà, dia nampiantso an’i Jakôba faralahiny ka nanao taminy hoe:
–Tandremo fa te hamaly ny nataonao i Hesao rahalahinao ka hamono anao ho faty. 43Koa ankehitriny, anaka, henoy tsara aho! Mandehana mandositra any amin’ny anadahiko any Haràna. 44Mitoera any aminy aloha mandritra ny fotoana vitsivitsy, mandra-pitony ny rahalahinao. 45Rehefa afaka ny hatezeran’ny rahalahinao aminao ka hadinony izay nataonao taminy, dia haniraka haka anao any aho; fa nahoana moa aho no hamoy anareo roa lahy indray andro?
46Ary hoy i Rebèka tamin’i Itsehàka:
–Efa mankaleo ahy mihitsy ny fiainako noho ny afitsok’ireto vinantovavy hetita ireto. Raha hanambady zazavavy tompon-tany toy ireo i Jakôba, dia aleoko maty!
Currently Selected:
Genesỳ 27: DIEM
Označeno
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.