मत्ती 28
28
ईशु मौत कनु जीता हुला
(मरकुस 16:1–10; लूका 24:1–12; यूहन्ना 20:1–10)
1सब्त चे ङिओ चे बाद, हफ्ते चे पेहले ङिओ, पुरा फुटले ही मरियम मगदलीनी ते ङुजी मरियम कब्री नु ङेखु आलीया। 2ते ङेखा, हेक बङा भूकम्प हुला, कांकि प्रभु चा हेक स्वर्ग़दूत स्वर्ग़ा कनु उतरला ते गोढु आती कर ओणे पत्थरा नु रेहड़ती ङिले, ते ओचे उपर ब़ेसती रेहला। 3ओचा रुप बिजली आलीकर ते ओची चिट्टी ओढ़णी बर्फे आलीकर हुती। 4ओचे ङरा कनु पाहरेदार कांपती गेले, ते मुड़दा आलीकर हुती गेले।
5स्वर्ग़दूत ने असतरीया नु केहले, “ना ङरा, मैं जाणे कि तम्ही ईशु नु जको क्रूसा उपर चढ़ाला गेलता सोधा पलीया। 6ओ इठे कोनी, पर आपणे वचना चे अनुसार जीता हुती गेला। आवा, ङेखा, हाओ वा जग़हा छै जिठे ओनु मेहले हुते, 7ते जल्दी जावा ते ओचे चैला नु किहा कि ओ मरला आला महु जीता हुती गेला, ते ओ तम्चे कनु पेहले गलील मां जाये पला, तम्ही उठी ओनु ङेखा। मैं तम्हानु केहती ङिले।”
8वे भय ते बङी खुशी लारे कब्री कनु जल्दी पुठे आती कर ओचे चैला नु समाचार ङेणे चे वास्ते द्रोड़ती पलीया। 9ओ बेले ईशु वानु मिड़ला ते केहले, “तम्हानु शान्ति मिलो।” वाणे गोढु आती कर ते ओचे पग़्ग़ पड़ती कर ओनु ङण्डवत करले। 10ओ बेले ईशु ने वानु केहले, “ङरा ना। माये भावां नु जती कर किहा कि गलील नु चाह्ले जाओ, ओठे मनु ङेखे।”
पाहरेदारा ची खबर
11वे जई ही पलतीया कि पाहरेदारा महु कईयां ने शहरा मां आती कर पूरा हाल प्रधान याजका नु केहती सुणाला। 12बल्ति वाणे बङका चे लारे भेले हुती कर सलाह करली ते सिपाहीया नु घणी चान्दी चे रुपये ङिती कर केहले, 13“यूं केहजा, ‘जिसे बेले अम्ही नूहले पलते, तां ओचे चैला ने आती कर ओची लाशी नु चोरी करती चती गेले।’ 14ते अगर हा बात अधिकारीया चे काना तक पुज़ी, तां अम्ही ओनु समझाती गिहुं ते तम्हानु मुसीबती कनु बचाती गिहुं।”
15तां वाणे चान्दी चे रुपये गेहती कर जिंवे वानु सिखाले हुते, यूंही करले। हा बात आज़ तक यहूदी बन्दा मां फैड़ली आली छै।
ईशु ने चैला नु अधिकार ङिला
(मरकुस 16:14–18; लूका 24:36–49; यूहन्ना 20:19–23; प्रेरितां चे काम 1:6–8)
16 #
मत्ती 26:32; मरकु 14:28 गियारा चैले गलील मां ओ पहाड़ा उपर गेले, जको ईशु ने वानु बावड़ला हुता। 17वाणे ईशु चे दर्शन करती ओनु प्रणाम करला, पर कानु-कानु मना मां शक्क हुला। 18ईशु ने वांचे गोढु आती कर केहले, “स्वर्ग़ ते धरती चा सारा अधिकार मनु ङिला गेला। 19#प्रेरि 1:8ऐवास्ते तम्ही जावा, ते सब जातिया चे लौका नु चैले बणावा, ते वानु, ब़ा, ते पूत, ते पवित्र आत्मा चे नांवा लारे बपतिस्मा ङिया। 20ते वानु सारीया बाता जको मैं तम्हानु आज्ञा ङिली छै, मनणीया सिखावा। ते ङेखा, मैं दुनिया चे अन्त तक हमेशा तम्चे लारे छै।”
Trenutno izbrano:
मत्ती 28: ODR
Označeno
Deli
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi
CC BY-NC-ND 4.0