साल्तेङ दिङगिल्का 6
6
न्हिअ्मि सेवापाकालाइहेङ साल्का
1इङको पहरता जेलाउ चात्यागेलाइको साङख्या बार्हेतेङ हानिलाउ हिब्रुगेलाइको खिलापता ग्रिक यहुदिगेलाइ कचकच पालि तेङहि। हाइदोनु दिनाङ चाकाचिज बाखाराइलाउ एम्बालाइको रान्दिगेलाइहेङ घाइपाङ चाकाचिज मानिङघाखे। 2एन्साजेङलाउ तेन्हे साल्तेङ दिङगिल्कालाइ चात्यागेलाइ झाराङहेङ काइतेङ दोअ्हि, “परमेस्वरको बचन पारचार पालि लाअ्तेङ चाका आम्का काथाता आवाइलि केलाइहेङ ठिक माज्याङ। 3एन्साङ नेलाइको माझासो पुनित हाङसा, आकिलहोइ पोङघाका रो झाराङ मानिका न्हिअ्मि द्याङ साल्सु, जाइहेङ केलाइ इदोइ कामता सालाइने। 4कालाउबुङ केलाइचाहिँ पारथाना रो बचनको सेवाता गोताङ पहर प्याङ।”
5साल्तेङ दिङगिल्कालाइको इदोइ काथा झाराङ मोन्दाताहि, जोम्का झाराङहेङ रेम्का लागिहि, एम्बालाइ पुनित हाङसा रो खान्धुरहोइ पोङघाका स्तिफनस, फिलिप, प्रखरस, निकनोर, तिमोन, परमिनास रो एन्टिओखियाको यहुदि धरम मानिका निकोलाउसहेङ साल्हि। 6एम्बालाइ इदोइ द्याङगेलाइहेङ साल्तेङ दिङगिल्कालाइको आगाता चुमाहि। साल्तेङ दिङगिल्कालाइ पारथाना पाहि रो एबालाइर्हुता ताइको खुर ताअ्हि।
7परमेस्वरको बचन बार्हेतेङ हानिहि रो चात्यागेलाइको साङख्या यरुसलेमता हेन्जाङ बार्हेहि। धामिगेलाइता हेन्जाङ इदोइ खान्धुरहेङ र्हुहि।
स्तिफनसहेङ रिम्का
8स्तिफनस सहसाम्पा रो सरबङ निङतेङ द्याङगेलाइको माझाता बाबारका सरबङ हिका काम रो चिनोगेलाइ पाहि। 9कालाउबुङ हेथे द्याङगेलाइचाहिँ वाको बिरोध पालि तेङहि। एम्बालाइ कचहरिसाअ्को फुक्का हुलको द्याङगेलाइ कालाउ कुरेनि, आलेक्जेन्ड्रिया, किलिकिया रो एसियाको द्याङगेलाइ हिघाखे। एम्बालाइ झाराङ मिलितेङ स्तिफनसदोफा दोअ्सुलि तेङहि। 10कालाउबुङ पुनित हाङसा स्तिफनसहेङ इस्का आकिल पिहि, वा धुइलाउ हासु बुङ वाको काथा पोलि मादोहि। 11कालाउ एम्बालाइ सिपापा द्याङगेलाइहेङ तोल्हेतेङ एसा दोअ्लि लागाइहि, “मोसा रो परमेस्वरको खिलापता या बादानामि काथा धुइका केलाइ हिङन्हाहि।”
12एसापा एम्बालाइ राइति, बाराकचहरिता योम्का आगुवा रो धरम मास्टरगेलाइहेङ बुङ तोल्हेहि। एम्बालाइ स्तिफनसहेङ रिम्तेङ बाराकचहरिको आगाता चुमाहि। 13इङकोन्हुअ्सो एम्बालाइ एसा दोअ्का आसत्ते दासिगेलाइहेङ आगा सारेहि, “इदोइ द्याङ पुनित थामे रो न्यामको खिलापता काथागेलाइ पालि मालाअ्खे। 14हाइदोनु या एसा दोअ्का केलाइ हिङन्हाहि, ‘नासरतको इसु इदोइ थानहेङ मुअ्पावा रो मोसा केलाइहेङ पिका चालचलन बुङ फेरेन्हा पाप्यावा।’”
15इङको पहर बाराकचहरिता योम्तेङ हिकालाइ झाराङ स्तिफनसहेङ खाङहि। वाको र्हाइ स्वरगको काथा चुमाकाको र्हाइभाइपाङ चोहोचोहोका तिङहि।
© 2025 by Nepal Bible Society and Wycliffe Bible Translators, Inc.