फिलिप्पि 3
3
चाइबानऎ निवाँनॆन्
1लुक्पिॽमा ठाबाक्मार बुबुनानुसाचि, आन्नाबि पारभुमि हाङ्हाङ् लिर। काङॆ याॽलन लोसिॽमिम्पा खानावाँ हसहस लोमा काङा ऎस्सिङानि हाङ् ग खानावाँऎ आन्ना काम्नुऎन लॆकानि हाङ् टेराङ्गे निवाँयुङ्पि खॆॽमा पिट्टानिनि।
2हाङ् हुॽवाचिर खिखुबाचि नुङ् काइसाहा योम्पक् यिक्खुबाचिबाङ् हाङ् सालुङ्पि खाट्ना#३:२ खाट्ना लोमिम्पा चाइ याहुडि चालाना रक्न ठुक्पा चाचा जन्म लिमिम्पा बाङ्चि डिनाबि आक्क वाठाङ्पा चाचामि सिःठाम् ठालबि चुऎ एम्पम्पार खाङ्मुऎ साखक्मि हॆक्मॆ चालाना यो। लॆखुबाचिबाङ् मॆअङ् पेनानॆ। 3टर चाइबान खानावाँ चाइ माङ् भने, खोचि हॆॽनॆ, निवाँहाङ्ऎ कानि रे खाट्ना लिमिम्पा याॽमिचिर खाङुकि, मान्ठाभनॆ कानिऎ लावाबाङ् निवाँहाङ् चुङुक। हाङ् कानि खिरिस्ट येसुबि नाबुक् ठेरुकि। कानि चाइ याॽमिचिऎ लॆःॽमान लॆ कामानुङ् लोमिम्पा खाट्ना हाङ् होइढा यायेॽमा अठावा चालाना टिङिनि। 4याॽमिचिमि खाङ्मुहा खानावाँबि निवाँ टिमॆ खानावाँ चुक् हाङ्ग काङाम् चाइ होइढाचिम् बाङ्स ढ्या चुबिङा।
5मान्ठाभनॆ काङा ग जान्म लिमिम्पा बाङ्चि डिनाबि न खाट्ना लॆमिम्पा लॆटिङ्मि। जान्मा लिमिम्पा खानावाँन इमा हाङ्ग काङा बेन्नियामिन सामॆक्बिऎ इस्राएलिङा। काङा चाइबानऎ हिबुरुङा न। हाङ् यायॆॽमामि बारेबि खानावाँ इमॆन हाङ्ग काङा एक्क फारिसि लॆटिङ। 6एट्टान निवाँ टिसे काङॆ खिरिस्टमि मान्डालि डुखा पिट्टुङ। यायेॽमा रक्न पाइमार निवाँनेन् लिक्मि हाङ्ग काङा निवाँनेन् याॽमि लिखुबा लॆटिङ।
7टर ह चाइ काङा खिरिस्ट नुङ् टङ्चाडिङ् मसॆ काङॆ याॽलि एट्टान योम्पक् पिक्खुबा लॆ कामानुङ् मिन्मिम्पा खानावाँ ह काङॆ लेकुङ् इघा खानावाँऎ काम् लागि माङ्स योम्पक् यिगुनि। 8मरक्टे हॆॽनॆ, येसु खिरिस्ट चाइ काङाम पारभु न कामानुङ् एट्टान काम्नुऎ निवाँ टक्चाउङ्हाङ् होइढा चोब्न खानावाँ हुन्नहा मिकुङ। हाङ् खोमि निङ्पि काङॆ चोब्न खानावाँ याइडुङ् हाङ् काङॆ खो टक्चाङार कामानुङ् आक्खा चोब्न खानावाँ माङ्स हॆॽनॆ मिडुङ। 9मसॆ काङा खोमि याॽमिङा रेम। यायॆॽमा टिङ्मानुङ् निवाँहाङ्मि ङारिङ्पि काम्नुऎ खाङ्मुमॆ काङामि माङ्स निवाँनेन् खानावाँ माआ। टर काम् निवाँनेन् खानावाँ चाइ काङा खिरिस्टबि निवाँनेन् मुमिम्पासॆ खोसॆ काङा निवाँनेन् मुःॽङा। हाङ् ग निवाँनेन् खानावाँ चाइ निवाँयुङ् रक्न लि।
10हाङ् का चाइ खिरिस्ट काम्नुःर लेःमा, खोमि हिङ्पॽमिम्पामि चॆक्मावा लेट्टॽमा, आक्र टे हॆॽनॆ, टर खोसॆ रक्न डुखा आङ्मा हाङ् खो सिखॆॽमिम्पा खानावाँ ढारिन खो रक्न लिमा मिनुॽङा। 11लिहिॽहाङ्ग सिखॆमिम्पाबाङ् सङ्क हिङ्पहिङार।
टाङ्पामि योम्पक् यिक्मॆ
12काङा याॽलिन आक्खा चोब्न खानावाँऎ चेप्खॆडिङ् कामानुङ् काङानि। हाङ् काङाबि माङ्स काइसॆ माआ कामानुङ् सङ्क काहिङानि। टर खिरिस्टमि खानावाँ टक्चामामि लागि काङा पिम्मॆ पाइङा। गमि लागिॽन खोसॆ काङा मुसिङ। काङा खो रक्मान लिङार कामानुङ् हेःर पिनुॽङा मान्ठाभनॆ गमि लागिॽन खिरिस्टऎ काङा खोम् याॽमि मुसिङ। 13बुबुनानुसाचि, काङॆ इघा चोब्न टक्चाखॆडुङ् ग मिन्ङानि, टर एक्क योम्पक् चाइ मुःॽङा। आक्क चाइ माङ्भनॆ, याॽलहा खानावाँ मिइखॆस्से, डॆङ्पिहा खानावाँ टक्चामाम् लागि काङा पाइङा। टर काङा एक्क योम्पक् यिगुॽङा। काङा चाइ पिन्खुबा एक्क याॽमि रक्मा रेम। याॽलिहा खानावाँ मिखॆसे ह टाऎ खानावाँ टक्चामाम् लागि काङा पिनुॽङा। 14गरॽहाङ् पारुबिऎ इनाम् टक्चामा कामानुङ् आक्क लाम्फुबि हेःर पिन्मॆ पाइॽङा। हाङ् निवाँहाङ्ऎ गमि लागि खिरिस्ट येसुबाङ्कॆ पारुबि हानाम्स हिङ्चाढाङ्मिॽमामि लागि काङा सेःडिङ।
15कानि लावाबि पुडिहा चोब्न याॽमिचिऎ चाइ गरहाङ्न मिन्मा लॆ। हाङ् ऎॽवाचिबि चाइ होइकन निवाँ चुबिकुचि हाङ् निवाँहाङ्ऎन खोचि माङ् चाइ चाइबानऎ कामानुङ् वाब्मिकुचि। 16हाङ् निवाँहाङ्ऎ याॽलिन कानि माङ् चाइ चाइबानऎ कामानुङ् खाङ्मिटि मरहाङ्न हिङ्चामा लॆ। 17बुबुनानुसाचि, आन्नॆ सङ्क काङा रक्न योम्पक् मुसानॆ। काङ्का चाइ आन्नॆ टिङ्मा लॆऎ याॽमि लिःॽडिङ्का। हाङ् काङ्का टिङ्खुबा याॽमिचिन आन्नॆ टिङाम्चिनॆ। 18काङॆ आन्ना ऎॽवा खेपा लोइडानि, हाङ् हस डुखा मिन्से लोकानि, ऎॽवा याॽमिचि खिरिस्ट कुरुसाबि सिखॆॽमिम्पा बारेमि खानावाँ सिच्चाखुबाचि लिसे लुटिःक्मि। 19हाङ् खोचि डान्डा टक्चामॆ ठालबि लुक्खॆमि मान्ठाभनॆ उम्चि सालुङ्ऎ ङागुकुवॆ खानावाँ खोचिम् डेउटा लिडा। ङेसिमा लुऎ खानावाँबि खोचि नाबुक् ठेरुक्मि। हाङ् ग बाखाटेम्पिहा खानावाँबिरे उम्चि निवाँ टिकुचि।
20हाङ् कानि ग पारुबिऎ याॽमिचि रे। कानि फाक्खुबा पारभु येसु खिरिस्ट पारुबाङ् टामॆ पाइ कामानुङ् कानिऎ खोम् लाम् खाङ्मॆ पाइकि। 21हाङ् खोसॆ चोब्ठका टाङ्पाम हुक्पि टॆकु। हाङ् खोम् ग चॆक्मावाऎन कानिमि ग सिखॆखुबा सालुङ् खोम रक्मान आसिखॆखुबा हाङ् निङ्लावा नुङ्मा मुकु।
© 2023, Wycliffe Bible Translators, Inc. and Nepal Bible Society