Luk 20
20
Ukani ve Zezu ve yinga ni wi
1Vʉsa votu, Zezu edze ne ulakise batu se ndaku ye Nzambi, ne utandaka misisili mive mye Nzambi. bekuŋwu be bekabi be bisemi bye Nzambi, belakisi be bitsila ne bibutu baya. 2Ye bangu besuŋwule Zezu ati: «Tanda besu, we pika mamvu mamu ni ne singa ye nza? Wangu we me kaba we singa yayu ni nza?» 3Zezu akalule ne bangu ati: «Nami me kaba beyi undzitsi, tandayi me, 4we luma Zambatisi ne ukaba batu meteme ni nza? Nzambi na batu?» 5Ni bangu bedze ne wowe tima ye bangu mene ati: «Bebe ti bakalule ati: “Nzambi ni we luma Zan.” Wangu asuŋwulele ati: “Ni ye beyi beke mekidze me Zan etanda ni yi?” 6Ni bebe ti bakalule ati: “Yedzi ni batu beluma wangu.” Batu besi beyisidzele bebe memanya ne ubuuma bebe, ne bangu beyiba ati, Zambatisi edze ni Muutu we Nzambi.» 7Bangu ne Zezu ati: «Ne besu nde yiba we luma wangu ne ukaba meteme.» 8Zezu ne bangu ati: «Nami me nde tanda beyi nda mipika mamvu ma.»
Ngana ye bekuni be vinyi bidzi ne mamvu mebi
9Yumana, Zezu ate batu ngana ati: «Muutu motu akuna kuba ye vinyi, adzika yangu ne bedzanzi bedzi, yedzi etse undzunga, anyuŋwen se ilongo dzadzu.» 10Ndili ye kalwe, yedzi eluma undzanzi wedzi motu kwele ye batu bibata vinyi, yayu bekaba wangu dze dzi ikavu dze mbulu ye vinyi. Ni bebati be vinyi, babuuma undzanzi luba, bavutise wangu meboko sanzile. 11Wangu avele luma moko undzanzi, ni bangu bavele buuma ne wayu luba, batukene, bavutise wangu meboko sanzile. 12Kuŋwu we vinyi, avele luma undzanzi we unsatu, ne wayu bangu balumaka mepinzi, bayisa wangu ituna. 13Ye kuŋwu we kuba ye vinyi etanda ati: «Me pike vi? Me luma bangu ŋwana wami, witondo, toko bangu betse kuuna wangu.» 14Ni ndili ye batu bibata vinyi beyene ŋwana, bangu batanda tima ye bangu ati: «Yene witse dze kuŋwu we vinyi. Bebuuma wangu, yayu vinyi ayikwe we bebe.» 15Ye bangu beyisa wangu ituna, ye bangu bebuuma wangu. Zezu asuŋwule ati: «Ye kuŋwu we kʉba ye vinyi itse pika ni yi? 16Wangu atse ya, wangu atse buma bibata vinyi, wangu atse kaba vinyi ne batu boko.» Ye batu beyuka mamvu mamu, bangu batanda ati: «Uve mamvu mamu nde ya.» 17Ye Zezu ewaya bangu, atanda ne bangu ati: «Ni me sanguvu ye Umpende itanda ni me nza?»
«Imanyan dze betungi be mendaku belewe, dzayikwe imanyan dzi suka ndaku.»
18Batu besi binawen kule imanyan dzadzu betse nyunga bangu, ni imanyan dzadzu ti dza nanwen kule muutu, dze tse nyunga muutu wawu nda iwulu.
Lipo le biwuta Sezali
19Belakisi be bitsila ne bekuŋwu be bekabi be bisemi bye Nzambi, befumba kwata Zezu. Bangu beyiba nati, wangu ete ngana yayu ni utsina ne bangu, ni bangu bedze ne bongo ve batu. 20Ye bangu bedze ne ulumba Zezu. Ye bangu beluma batu kwele yedzi. Batu babu befumba laka ati, bangu bedzi ni batu betelee. Bangu befumba ni dendise Zezu unlamvu, ne undzutsi ŋwotu. Yayu bangu bekaba wangu se meboko me Sezali. 21Bangu bakaba wangu undzutsi ati: «Kuŋwu, besu beyiba ati mowe itanda ne mowe ilakise medzi ni telee. We nde pama ne meŋgalu me batu, ni we lakise ni mamvu me umbu amene me Nzambi etanda batu ne upika. 22Yayu tanda besu, se bitsila bye bebe bye luma bebe, ne uwuta lipo le Sezali? Besu bewuta na nde wuta?» 23Ni Zezu ayiba umpyeli ŋwen bangu, wangu ne bangu ati: 24«Lakayi me dolo. Se dolo wayu, yedzi ne busu ve muutu ne kumvu, wangu ni nza?» Bangu bakalʉle nedzi ati: «Ye Sezali.» 25Ye Zezu etanda ne bangu ati: «Ee uve, ni bye Sezali vutisayi ne Sezali bye Nzambi vutisayi ne Nzambi.» 26Belakisi bebitsila ne bekuŋwu be bekabi be bisemi bye Nzambi, beke tuka kwise wangu uŋkwaka, ne medzi edze ne utanda busu ve batu. Bangu bakima medzi edze ne utanda, ye bangu bedzuba midzumvu.
Bewaa betse nyuse
27Va batu be yimvu ye Sadusi baya kone ne Zezu. Bangu ni be nde yakwe ati, bewaa betse nyuse. Bangu basuŋwule ne Zezu ati: 28«Kuŋwu, yene me Moyizi etende besu ati: “Muutu ti awaa adzika ŋwadzi wedzi nde baana, ye ŋwadzi we unlumi ibala uŋkwili ne udziya uŋkulu wedzi wa waa baana.” 29Ni yedze ne baana bemama motu untsami be mebaka. We wika abalive, awaa eke dziya baana. 30We unyole abala uŋkwili, nedzi awaa nde dzika baana. 31Ne we unsatu si vavu. Untsami ŋwesi ŋwa waa nde dzika baana. 32Yumana ne ŋwadzi se awaa. 33Vusa ve batu bewaa bitse nyuse, wangu atse dze ni ŋwadzi we nza? Ni bangu besi untsami bedze ni belumi bedzi.» 34Zezu akalule ne bangu ati: «Mebaka ne baatu be ilongo dzi bebalive. 35Ni mebaka ne baatu be bepama telee, betse nyuse time ye bewaa, ne udze se ilongo dzitse ya, Bangu nde tse vele balive. 36Bangu nde tuka vele waa, bangu betse dze ni nda betuma be Nzambi. Bangu ni baana be Nzambi, Nzambi atse nyusile bangu se liku.» 37Moyizi alaka ati, bewaa betse nyuse. Ye Moyizi ewowe ne kaaka ye ŋwunyan, wangu abanga Kuŋwu ni Nzambi we Ablaami, we Isaaki, ne we Zaakobi. 38Zezu avele tanda ati: «Nzambi adzi kaka Nzambi we bewaa, ni Nzambi adzi ni we bemongo, batu besi bebika ni nedzi.» 39Va belakisi boko be bitsila bawowe ne Zezu ati: «Kuŋwu we me wowe uve.» 40Ni bangu nde tuka vele kaba wangu midzutsi myoko.
Klɨsti ne Davidi
41Zezu ne bangu ati: «Batu betanda ati, Klɨsti we Nzambi etobo, ni ŋwana we Davidi. Ni ye bangu bitanda vavu ni yi?» 42Ni Davidi atanda wangu mene se sanguvu ye Pisome ati:
«Kuŋwu Nzambi atanda ne Kuŋwu wami ati,
Yaka sunda untsitsi kwele ye boko yami ye sangwe,
43me tse dzika biwunda we sina mekulu mowe.»
44Ne Davidi abanga wangu ni Kuŋwu. Ni Klɨsti atuka dze ŋwana we Davidi ni vi?
Beyi nde pika nda belakisi be bitsila
45Ndili ye batu besi bedze ne yuka wangu, Zezu atanda ne bebingi bedzi ati: 46«Pikayi kebe, beyi nde pika nda belakisi be bitsila. Bangu betondo dzunga ne mengoyi meneni. Bangu betondo nati benyulise bangu se bibuma bye mikuka. Bangu betobo bibuma bye libusu se mendaku me umbondu, ne bibuma bye libusu se metsinda. 47Bangu bipinule mikwili bila byesi, ni umbondu ŋwen bangu ŋwen laawe ne ulaka ati, bangu batakwe boko uve. Utsina ne vavu, Nzambi atse pama bangu ubi amene.»
Trenutno izbrano:
Luk 20: WUM
Označeno
Deli
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES