Génesis 16
16
Ti Agare xchi'uc ti squerem ti ja' Ismael sbie
1Yu'un ti Saraie, ma'uc j'alajel ants yo' xu' ta xilbe sat xnich'nab yu'un ti Abram ti ja' smalale. Ja' xa no'ox yip yo'nton o xchi'uc ti oy jun me' egipcio ants Agar sbi ti ja' smosove. 2Ja' yu'un un, xi laj yalbe ti Abrame:
—Q'uel avil, ti Diose mu xac' alajcun. Ta jc'anbot vocol ta atojol, chi'ino ta vayel ti jmosov Agare. Xu' nan ta jta col yu'un ti antse.
Ti Abrame laj xch'un ti jech i'albat yu'un ti Saraie. 3Va'i un, ti Saraie laj yic' batel ti egipcioal ants Agar sbie, bat yac'be ti co'ol s'elan c'ot ta yajnil yu'un ti Abram c'alal slajunebal (10) xa jabil snaclejic ta Canaane. 4Ti Abrame laj xchi'in sbaic xchi'uc ti Agare. Va'i un, lic xchi'in yol. C'alal laj ya'i ti xchi'uc xa yole, mu xa lecuc ta xil ti sme' ajvale. 5Ja' yu'un un, ti Saraie xi laj yalbe ti Abrame:
—¡Vo'ot amul ti mu xa lecuc xiyil ti Agare! C'alal vu'un laj cac'bot avajniline, avi tana un, cajal xa xa'i sba ti oy xa yole. Ac'o yal stuc ti Diose buch'u ti smule, mi ja' ti vo'ote, mi ja' ti vu'une.
6Ti Abrame xi laj staq'ue:
—Ti amosove, oy ta avoc ta ac'ob ta spasbel ti c'usi lec ta xava'ie.
Ti Saraie lic sjol ta yilbajinel, jatav batel yu'un ti Agare. 7Ja' no'ox un, nupe ta be yu'un jun yaj'ánjel Dios ta sts'el sat vo' ti oy ta ti' be ta xc'ot ta Shure. 8Xi jac'bate:
—Agar ti smosovot Saraie, ¿bu lalic talel? ¿Bu ta xabat?
—Ta xijatav ta stojol ti jme' ajval Saraie —xi laj staq'ue.
9Va'i un, xi albat yu'un ti yaj'ánjel ti Diose:
—Sutan batel ta stojol ti ame' ajvale. Ch'uno scotol ti c'usi ta xayalbee.
10Ma'uc no'ox taje, yu'un xi to albat yu'un ti yaj'ánjel Diose:
“Mu'yuc spajeb ta jbolesbot batel ti anitilultaque,
ti mu'yuc buch'u sna' ti c'u yepal ta xbate.
11Achi'uc xa avol, ta xavilbe sat jun aquerem, Ismael ta xavac'be sbi,
yu'un ti Diose c'ot ta sni' ta xchiquin ti mu ech'baj avocole.
12Ti yuni talel ta xbate, co'ol s'elan te'tical potro ti mu stac' ca'ele,
yu'un ta scontrain scotol, ta xcontrainat yu'un scotol ec.
Ac'o mi mu x'ilbat lec sat yu'un ti svinquileltaque,
ti stuque ta ono'ox scap sba ta naclej.”
13Va'i un, xi laj snop ti Agare: “Ti Diose laj yilun laj sq'uelun, li' to cuxulun xtoque.” Ti Buch'u ilo'ilaj xchi'uque, laj yac'be sbiin “Ja' xa ti Dios yiloj sq'ueloj scotole”, xi. 14Jech o xal xtoc un, xi laj yac'be sbi ti joq'ue: “Sjoc' ti Buch'u cuxule xchi'uc ti yilojune.” Ti joc' taje, oy ta o'lol yu'unic ti Cadese xchi'uc ti Bérede.
15Ti Agare laj yilbe sat jun squerem yu'un ti Abrame.#Gá 4.22. Jech ti stuque, Ismael laj yac'be sbi. 16Ti Abrame yich'oj xa vaquib yo'vinic (86) jabil c'alal voc' ti Ismaele.
Currently Selected:
Génesis 16: TZC00
Označeno
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000