Ezekieli 7
7
Basaã gole
1Dɛnaa Lawa a boo dɔ ma li á pɛ:
2– Nsɛ minbuiin a nɛ, n too kɔ!
Masɛ Dɛnaa Lawa n kɛ pii
Izirayeli gána tumaa nɛ:
«Á nya kəni!
Kaa wɔ nya Izirayeli gána tumaa!
3Sisia kəni, kaa wɔ nya.
Man die die ka gialaa ka ma foo ne,
ma kiri kuru ka la a kɔnpɛ
ka kaa zɛnaa ǹ siin ni,
ma kaa sii bɔbɔnɛɛn kɛn tumaa a dɔlɔ da ka mìi ni.
4Ka makara a die ma kuĩ,
ma ka toa walan wa.
Ka sii mɛn zɛnaa,
man die bɛ lɛ a dɔlɔ diɛ ka mìi ni.
Kaa sii bɔbɔnɛɛn kɛn lɛn
dɔlɔ á re kuĩ ka dinin mìi ni.
Ka á re doɛ̃ ka bɛ lɛ-n kəni,
mà masɛ din nə Dɛnaa Lawa lɛa.»
5Masɛ Dɛnaa Lawa n kɛ pii:
Koe n ka kɛ nɛ die,
koe gole!
Min bin nə ǹ miã yɛ wa.
6Á ke, á nya kəni,
koe gole lɛ á die ka gialaa,
á dɔ á nya!
Á dɔ.
7Gána minin lɛn, kaa wɔ nya.
Biikoo dɔ,
lɛawaa lɛ diri.
Kelen la foo kɔɔ̃n lɛ-dɛ
banban doo wa,
sɛnɛ nyɛ́ɛ gole ne!
8Sisia kəni, golee ba a-n doo wa.
Man die die ka gialaa ka ma foo ne,
yǎa man foo nyɛɛ ka la.
Ma á re kiri kuri ka la
a kɔnpɛ ka kaa zɛnaa ǹ sii ni,
ma kaa sii bɔbɔnɛɛn kɛn
tumaa a dɔlɔ da ka mìi ni.
9Ka makara a die ma kuĩ
ma ka toa walan wa.
Ka sii mɛn zɛnaa,
man die bɛ lɛ a dɔlɔ diɛ ka mìi ni.
Sii bɔbɔnɛɛn kɛn lɛn dɔlɔ á re
kuĩ ka dinin mìi ni,
kaa á re doɛ̃ ka bɛ lɛ-n kəni,
mà masɛ Dɛnaa Lawa din nə
dɔlɔ boe.
10Kiri wɔ lɛawaa á ke die,
á ke á dɔ á nya. Á dɔ.
Màn nə miɛ̃ kakaarɛbaa li,
din gole kɔ n pàã yii.
11Kakaarɛbaa na á yoo á golee,
á gole kɔ sii baraa zɛnaa taman yii.
Ka kɔn ba re goɛ̃ wa,
kaa gugurubaa nɛ, ka gɔn mànan nɛ,
ǹ kɔn ba re goɛ̃ wa.
12A pinaa á die,
bɛa sàabiɛ wa.
Màn-piili baran n nyɛnyɛɛ wa,
a sãli dɔ baran n yɔrɔ kɔsɛ wa.
A giala, ma foo n yoo-n
gána lɛ a minin tumaa li.
13Ta pii-kɔli mɛn goã a yii n koo,
bɛa re woe a mànan goɛ doo wa.
Sii-nyaa ke, gána lɛa ziziɛ̃ paǹ li,
bɛa sàabiɛ wa.
Didie n die goɛ̃ pàãwɛɛnaa lɛa
a sii baraan taman yii.
14Bɛn tá re n pii, mà ka n yɔrɔ bɔ,
sɛnɛ, min kɔn ba a re yii
a wo zia la wa.
A giala,
ma foo n yoo-n gána lɛ a
minin tumaa li.
Bɔ Lawa a dɔlɔ nɛ n gɔn banban
15Zia n die goɛ̃ wɛɛ̃-n kanaa,
piɛ̃ busu laanka bòo ne,
bɛn nə́ wɛɛ̃-n kion.
Min mɛn bɛ́ don,
ǹ tá re bɛ dii zia la.
Min mɛnɛn bɛ́ kiwi gɔ́ɔ̃ nɛ,
bòo laanka piɛ̃ busu á re wɛɛ bɛn la.
16Min mɛnɛn bɛ́ re liɛ,
bɛn tá re baa sii ǹ wo kelen la.
Ǹ tá re puri ka kɔlɔn bɛ́ lɔn,
ǹ sii baraa taman yii.
17Ǹ nyàan tumaa á re gisĩ,
pàã ná a banban,
ǹ musin tumaa á re basɛ̃ ǹ giulun.
18Ǹ tá re gɛ̀ koa ǹ mɔnaan we,
ǹ nə ǹ tumaa mìi kɔɔ̃.
Gɔ̀nɔn bìn diɛ á re ǹ kuĩ,
sìi nə́ ǹ tumaa ganaa.
19Ǹ tá re ǹ wɔrɔ kɛ pɛsɛ̃ tán zii la,
ǹ sana kɛ á re màn kooro biɛ ǹ yii li.
Lawa a foo-yoo kɛa pinaa,
ǹ wɔrɔ laanka ǹ sana kɛ nɛ,
bɛn ba re boe la ǹ nə ǹ kirisibaa wa.
Ǹ nɔ̀ a re kiɛ̃ wa,
ǹ nàn ba re kiɛ̃ wa.
A giala,
maǹ nə́ n saa sana laanka wɔrɔ li,
ǹ nə́ sii baraa zɛnaa.
20Ǹ nə́ n saa ǹ nyaǹ màn
sonboren kɛn li,
ǹ nə́ n dinin gole kɔ.
Ǹ nə́ màn nyín bɔbɔnɛɛn
tìĩ-bɔlen zɛnaa ka bɛn lɛn nɛ.
Bɛ lɛ na á toa, ma á re biɛ
*gɔ̀ lɛa ǹ ganaa.
21Man die n koe tiin la,
ǹ nə ǹ saa ǹ wo ǹ ne.
Man die ǹ koe gána lɛ a
min baraan la,
ǹ bɔ zia la ǹ mànan lɛa.
Bɛn tá re gɔ̀ diɛ ǹ ganaa.
22Ma á re n bɔyɛɛ man bɔ ǹ li,
a giala, maa bǎã sonbore
lɛ á re ziziɛ̃.
Wurumunun tá re kiɛ a nɛ
ǹ gɔ̀ da a ganaa.
23Ka ǹ kũ ǹ fɔlɔ zɔrɔka zɛnaa,
a giala gɛ̀-dɛli la gána lɛ yii ni,
kakaarɛbaa dɔ́ kiwi lɛ pã.
24Tɔrɔ mɛnɛn bɛ́ babaraa,
man die die ka bɛn nɛ,
ǹ tá re minin kionən sii ǹ la.
Ma á re min kakan kɛn
din gole kɔ nyɛɛ,
ǹ wúlu bɔ ǹ bǎãn kɛn,
ǹ tá re gɔ̀ diɛ bɛn ganaa.
25Foo ziziɛ á die,
ǹ tá re giɛ là nyantoro li ǹ fɔ̃.
26Bɔ̀n woo bɔ̀n,
gɔ́ɔ̃ wɔ̃ ǹ boo woo gɔ́ɔ̃ wɔ̃ ǹ boo,
bɛn lɛn man die koɛ kɔn la.
Ǹ tá re sii-nyaa liɛ Lawa a boo gii-dali la,
Lawa a wúlu-bɔle ba re minin darɛɛ
dí-pɛn kɛn ganaa doo wa,
min golen ba re doree koe doo wa.
27Kii á re gɛ̀ koɛ,
a kiodɛnan tá re foo ziziɛ̃ ǹ
mɔnaan we,
gána lɛ a minin gɔ̀nɔn tá re bìn diɛ.
Man die ǹ kuĩ ǹ zɛnaa ǹ sii li,
ǹ doamaa bɛ́ ka dɔlɔ mɛn nɛ,
ma bɛ da ǹ mìi ni.
Bɛa biikoo li kəni,
ǹ tá re doɛ̃,
mà ma din nə Dɛnaa Lawa lɛa.
Trenutno izbrano:
Ezekieli 7: SCE2013
Označeno
Deli
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi
San Catholic Edition Bible © Bible Society of Burkina Faso, 2013.