Psom 65
65
Louanz ek remersiman
Pou sef koral. Enn Psom David. Enn sante.
1O Bondie, li nou devwar
sant to grander dan Sion
e pa bliye nou promes
2parski to ekzos nou lapriyer.
Dimoun sorti partou vinn ver twa.
3Nou bann fot pez lour lor nou,
me twa to pardonn tou.
4Bienere seki to finn swazir,
seki to finn akeyir dan to sanktyer.
Nou pou rasazie ar bon kiksoz dan to lakaz,
ki nou gagne dan to Tanp sakre.
5Par bann aksion manifik to reponn nou ar delivrans,
Bondie nou Sover,
tomem lespwar dimoun lor antie later,
ziska dimoun lot kote dilo.
6Ar to lafors to plas montagn kot bizin.
To deborde ar pwisans.
7To kalme laraz lamer,
to apez tapaz vag;
to tengn lakoler lepep.
8Bann dan bout later res bet
par to travay grandioz.
Tou dimoun lor later
kriye zot lazwa depi enn kwin ziska lot.
9To montre to lamour pou later e to aroz li.
To nouri later, to fer li vinn fertil.
Larivier Bondie ranpli ar dilo;
to fer later raport manze.
Ala kouma to fer sa:
10To aroz later laboure ar bon kantite dilo;
to aplati bann boul later,
to fer later respire
pou ki zenn pous kapav pouse.
11Tout long lane to bonte ranpli nou gardmanze;
kot to pase ena labondans.
12Patiraz ranpli ar zanimo;
flan kolinn ranpli ar lazwa;
13laplenn kouver ar mouton;
karo plin ar dible.
Partou lanatir sante ar lazwa dan leker.
Trenutno izbrano:
Psom 65: KMOTPOR
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
Kreol Morisien OT Portions © Bible Society of Mauritius, 2020.