RUMA 2
2
Mbulum a ge a seriye ka, ndaka vatwa ŋa
1Aɗaba taŋa, kurum ana a sàs a kurum mege medzibe gà dukw ata tsiye tekeɗe, sərum dər, ku weke ka, a be a i seriye Mbulum a ɓav tsa. Aɗaba na kurum ki mwim a à bakal a gà mìsle ŋgiɗ, dite kurum ŋa tekeɗe, kurum ihər ki gwim a gà dukw ana ŋgwala tsa, kamala biy gà mburma ata ta ge ya asa ana, meme? Na ki mwim a à bakal a gà mìsle ŋgiɗ kamala taŋa ya ka, kì gwim aba seriye nda ahər kurum ŋa. 2Kà sərakwa, i təv ana Mbulum a ta gis a gà medzibe gà mburma ata ta gewa dukw ana ŋgwala tsiye, i seriye ya ka, nda ndzer ŋa. 3Ama na kurum ki mwim a à bakal a gà mìsle ŋgiɗ, dite kurum ŋa tekeɗe, kurum ihər ki gwim a gà dukw ata nda ahər kurum ŋa asa dze ana, meme? Wànà kurum kà dzalum ana, ki beywim a i seriye Mbulum a ɓav a? 4Dze ana, ki fìrwim a aà Mbulum kamala za ya, agəra ŋgwal ŋgar ana batsah ŋa ya ivaɗ a? Kige tsa agəra ana aka gəs gəzləŋ hinne aɗaba bakal kwa ana ki gekwa ya ya. Kurum kà sərum, Mbulum a ge a kurum ŋgwal ŋa, dite na kàa sərum ahər kataya ka, ki mbiɗwim a à madzala gà gər kurum i təv ŋgar a ivaɗ ana, kà sərum ti tsiye? 5Ama kurum ka, segeme i gər kurum hinne, a sàs a kurum məmbə̀ɗà à madzala gà gər kurum a təv Mbulum tsa. Kamala taŋa ya, kurum ihər ki sìkèhwim a ka, à ndzəɗa a seriye Mbulum ana à gis a dər kurum a. A pat seriye ata ka, Mbulum a pèt a à matsəɓatsəɓ ŋgar ndərzayya aka miɗ mburma tserdze. Dite à ses a ter a ikaba seriye ya ka, ndaka vatwa ŋa kalkal lele. 6Ku weke a ŋget a dukw maya ba ŋgar kamala ana a ge ya. 7Kamala taŋa ya, gà asiŋ gà mburma ana ta gewa dukw ana ŋgwal ŋa ya, nda mayaha mezlibe ana Mbulum à zlibe a à tar, a sàs a tar a tsik aà ter a dukw ana ŋgwal ŋa ya,*fa* ta waya maŋgata mesife ana à ndìv a tsiye mbaŋa. Tar ka, Mbulum a vile a ter a mesife ata à ndìv a tsiye kaɗəŋ. 8Ama gà asiŋ gà biy ŋgiɗ ta gəsawa ahəm aà Mbulum tsidze. Ti niw a vatwa ndzer ŋana, dite ti zezem a ka, dukw ana ŋgwala tsiye ivaɗ. Tar ka, matsəɓatsəɓ Mbulum ika gər tar, à gis a tar i seriye ya. 9Gà na ta gewa dukw ana ŋgwala tsiye tserdze ka, ti ndze a nda magəɗa, Mbulum ibam, à ti sèwèr a ter a are hinne asa mbaŋa. A lèh a mesewere are ka, a gà Yahuda dzekwiŋ, dite i dəba ŋa ya, a gà asiŋ gà slàla ŋgiɗ ana pampam a mbaŋa. 10Ama gà na ta gewa dukw ana ŋgwal ŋa tserdze ya ka, Mbulum a vile a ter a mezlibe, a tsik aà ter a dukw ana ŋgwal ŋa ya, dite a vile a ter a matasla yam a gəzləŋ mbaŋa. A lèh mivile a ka, a gà Yahuda dzekwiŋ, dite i dəba ŋa ya, a vile a a gà asiŋ gà slàla ŋgiɗ ana pampam a mbaŋa asa. 11Aɗaba Mbulum ka, a wele a ikaba mburma ya tsa.
12Gà asiŋ gà slàla ŋgiɗ tə sər məpala ahəm Musa tsa. Na bəla tàa ge bakal ka, tar ti dzeye a ze məpala ahəm Musa mbaŋa. Ama gà Yahuda ka, tə sər məpala ahəm Musa. Na bəla tàa ge dər akaba bakal ka, Mbulum a ta ge a ter a seriye nda məpala ahəm ata mbaŋa. 13Aɗaba mburma a ne a ŋgwal ŋa ika miɗ Mbulum ka, nda matsaraka məpala ahəm nda zləm ɗekɗek tsa. Say nda magəsa ahəm aà dukw ana məpala ahəm ata a tsik a mbaŋa. 14Gà asiŋ gà mburma ana i slàla ŋgiɗ a ka, tə sər məpala ahəm Musa tsa. Ama gà mìsle ŋgiɗ ika magər tar a ka, ta ge a dukw ana məpala ahəm Musa ata a tsik, a gwa, gwim a. Ama na tàa ge kataya ka, taŋa ka, tàa sər mege dukw ana ŋgwal ŋa ya, ku mege tàa sər məpala ahəm Musa ata tsa tekeɗe ya. 15Kamala taŋa ya, dukw ana ta gewa kataya ya, na a ɗif a kwa dər ka, Mbulum aka wetse məpala ahəm ŋgar a gəzləŋ tar, na dite tə sər dər mege dukw ana ta ge ŋgwal ŋa ya ya. Madzala gà gər tar ibam, a riŋ a ɗif a ter a à taŋa mbaŋa. Aɗaba a gà təv ŋgiɗ ka, tə sərawa dər, na tàa ge dukw ana ŋgwal ŋa ya ya. Dite a gà təv ŋgiɗ ibam, tə sərawa dər na tàa ge bakal a asa mbaŋa. 16Ama a pat ana Mbulum a ta ge a seriye a gà mburma nda ahər Yesuw Kiristi ya ka, gà dukw ana i tsik i faha tserdze ya, à pèt a ka, parakkà lele. A ge a ter a seriye ka, aka gər gà dukw ana makàhà ŋa titstsè i gəzləŋ tar, nda gà madzala gà gər tar ana tə dzalawa ya. Na a ɗif a à dukw ata, a ta ge a ba kamala taŋa ya ka, ŋgwal bazlam aaha iye ihər i tsik a gà mburma ya.
Gà Yahuda tàa zazam məpala ahəm Musa tsa
17Dite kurum gà Yahuda dze ana, meme? A da a kurum a gər ka, hinne na ti zel a kurum a gà Yahuda ya. Kurum kà dzalum ka, duwa a ge a kurum a tsa, aɗaba ana kà sərum məpala ahəm Musa ya. Dite kurum ihər ki sìŋgìrwim a à gər kurum ka, hinne mbaŋa, aɗaba kù gwaɗawum ka, waytsà mər ka, gà mburma Mbulum. 18Kurum ka, kà sərum dukw ana a sàs a Mbulum ka, dite gà mburma ta ge ya. Aɗaba məpala ahəm ŋgar ata na a ɗif a kurum à masəra ikaba à gà dukw ana ŋgwal ŋa ya, ndəna ŋgwal ŋa tsiye ya. 19Kurum kà dzalum ka, kurum ihər ki ŋgetwim a a vatwa ndzihndzih lele, ki geswim a ahər a gà ɓəzla guluf. Dite kà dzalum asa ka, kà nwim təv dzaydzay ŋa, na ika miɗ gà mburma ana ti dzeye aɗaba luvuŋ, ti yehe a vatwa tàmtàm a. 20Kurum ihər ki ɗifwim a à duwa a gà na metsehe tar a riŋ tsiye. Dite ki dzeŋgwim a a gà ɓəza ana ika vatwa Mbulum, tə sər duwa tsiye mbaŋa. Dite kurum ihər ki gweɗwim a asa ka, mər ka, mì sər dukw ana ndzer ŋa ya tserdze, aɗaba ana kà sərum məpala ahəm Mbulum a. 21Aɗaba taŋa, kurum ihər ki ɗifwim a à metsehe a gà mìsle ŋgiɗ, ama a ba kurum ŋa ka, kà wayum meɗife a ba à metsehe tsəna, meme? Aɗaba kurum ihər ki gweɗwim a a mburma ka, ki gwim akəl tsa, dite i dəba ŋa ya, kurum ŋa nda gər kurum kuɗa ka, ki gwim a akəl dze ana, meme? 22Kurum ihər ki gweɗwim a ter a ka, ki gwim muva tsa. Ama kurum ŋa ka, kurum ihər ki gwim a muva ana, meme? Dite asa kurum ihər ki gweɗwim a a gà na tə sər Mbulum tsiye ka, mì waya gà fəla ana kà nwim dər kamala mbulum kurum a tsa. Ama kurum ŋa ka, ki ndzekwimere a gà duwa nda akəl i ga fəla ata ya asa dze ana, meme? 23Taŋa kurum ihər ki gwim aaba zlapa ka, hinne, agəra ana Mbulum a ɗif a kurum à məpala ahəm ŋgar a. Ama kurum ihər ki niswim a à məpala ahəm ŋgar ata, dite gà asiŋ gà mìsle ŋgiɗ ta wele a à ŋgat a ka, aɗaba kurum dze ana, meme? 24Ar ka, kamala ana mewetse ŋa a riŋ i wakita Mbulum a, ta gwa ka: «Aɗaba kurum gà Yahuda, na gà asiŋ gà slàla ŋgiɗ ti tsik a dukw ana ŋgwala tsiye aà Mbulum a.»*fb*
25Kurum gà Yahuda ka, kà sasayawum ba, dite aà meɗife dər a mburma ka, kurum ka, kàa nwim gà mburma Mbulum. Na mege kurum ihər ki zezemwim a məpala ahəm Musa lele ka, masàsàyà ba kurum ata ki seseywim a ba ya, a ge a kurum a ŋgulum. Ama na bəla ki zezemwim a kalkal tsəka, masàsàyà ba kurum ata a ge a kurum a ŋgulum tsa. Taŋa ka, kàa nwim kamala ana kurum ka, gà masàsàyà ŋa tsiye, na ika miɗ Mbulum a. 26Na bəla wura a riŋ i gwala ŋgiɗ ana tar gà masàsàyà ŋa tsiye, ama na aka zazam məpala ahəm Musa kalkal lele ana, Mbulum à fir a ahər a kamala ana ŋgat masàsà ŋa ya tsiye? 27Aɗaba taŋa, medzibe gà mburma ata ka, ta pìz a kurum nda seriye. Aɗaba kurum gà Yahuda ka, tàa vəl a kurum məpala ahəm a ahər, na dite kà sasayum ba ya kaɗəŋ. Ama i dəba ŋa ya, ku mege kataya tekeɗe, kàa nəsum à məpala ahəm ata. Ama tar ka, ti zezem a məpala ahəm ata kalkal lele, ku mege tar ka, gà gwala ŋgiɗ pam, gà masàsà ŋa tsa tekeɗe ya. 28Kamala taŋa ya, na a ne gà Yahuda ndzer ŋana dze ana, weke? Wànà wele ana ta gweɗe ahər a, ŋgat ka, kəla gà Yahuda ya ɗekɗek a? Awaŋ, aɗaba dukw ana ti sir a dər, wele ŋgiɗ aka ne mburma Mbulum a ka, nda masàsà ba ana ti ses a ba mburma, ta ŋgeter a nda are ɗekɗek a tsa. 29Gà Yahuda ndzer ŋana ka, say wele ana Mbulum aka mbəɗ à gəzləŋ ŋgar a ivaɗ. Dite na a ne masàsà ba ndzer ŋana asa ka, masàsà ba biy Mezite Mesife Mbulum ana a da a gəzləŋ mburma ya, tsəka, nda mazazama məpala ahəm ana ta wetse i wakita ya tsa. Mbulum na a vile a mezlibe a medzibe gà mburma ata ya, tsəka, mburma tsa.
© Wycliffe Bible Translators, Inc. All rights reserved.