DIHA 23
23
1Napanii i Mbiliamu lai Mbalàku, “Pahada-nggawa pihu mbua ngia pawotu maraku lai yiahu, dàngu payema-njawa yiahu pihu ngiu hapi mini dàngu pihu ngiu mbimbi bumbu,” wànanya.
2Pahàra-nanyaka hama tuna na papanii-nanya i Mbiliamu paraïna i Mbalàku. La pinu nimbihu-da da ngia pawotu maraku dawotu maraku nyuda heu hapi mini dàngu heu mbimbi bumbu. 3Tunaka nu napanii lai Mbalàku i Mbiliamu, “Ndolaku-wa yiahu la lihi kameti maraku patunu-mu. Ba talànga luanggu nu patàru-ya jàka na-mbuhangu-du papahàmburu dàngga i MIRI, jàka ndia. Napa kupanii-nggaunja mbuu ndàbada da papanii-nangga nyungga i MIRI,” wànanya. Hàla, laku meha-nanyaka i Mbiliamu la pinu hau tandula, 4tàka hi namai lai nu i Ala lai nyuna. Napanii i Mbiliamu lai Ala, “Mbàda pahadangu-ngguka pihu ngia pawotu maraku, hi kuwotu maraku, heu hapi mini dàngu heu mbimbi bumbu la nimbihu-da nuda da ngia pawotu maraku,” wàna.
5Tunaka nu i MIRI napanii-nya i Mbiliamu, jàka nggàraya bàdi na patiki-na napa, hàla, hi na-paràha-nya pabeli lai Mbalàku pa-patàka-nya na lii languna i MIRI lai nyuna. 6Ka beli-nanyaka hi natàka-nya Mbalàku ba ndolaku-mana-nyapa la lihina na kameti maraku patunu-na, anguda mbuu ndàbada da liku uru Muapu.
7Tàka i Mbiliamu hi natiki-ya na manyura yiana,
“Welingu la Aràmu, welingu la ma-palindingu lai nu la pahunga lodu,
napaau-ngga nyungga i Mbalàku na hanganji Muapu, napanii,
‘Maiwa, kareuku-ngga ndumanggu,
ràtu-nyawa na banjaru Ihirailu!’ wànangga.
8Jia pekunggu-kaka nu pa-ràtungu,
jàka nda na-ràtungu i Ala?
Jia pekunggu-kaka nu pa-wuangu hukungu
jàka nda na-wuangu hukungu i MIRI?
9Welingu la pinuda da palindi kuita-ha nyuda;
welingu la pinuda da tandula ku-tàngaru-ha nyuda.
Tàngaru-ha, hau banjaru mandora meha-maha,
nda datama-a la kaloka-da da banjaru hawiangu.
10Da ana umbuku-na i Yakupu hama tuna kumburu tanaha ba nda pataü-ha danguda;
na banjaru Ihirailu ma-kanjupu danguya.
Màla àruki la metinggu ka tau pa-tutungu-ka
màla àruki na hupu njàpu luringgu ka hama tuna na hupu njàpu lurida da tau nuda,” wana.
11Hàla, napanii i Mbalàku lai Mbiliamu, “Ka nggàra-yaka yiana na pawunda-mu hanggangu lai nyungga? Hi ku-karia-nggau yiahu jia kau ràtunja da muhunggu wànggu làti. Tàka pa-kanyuru pàku amuha,” wànanya.
12Nahema i Mbiliamu, “Jiaya na papanii ba wànangga i MIRI-a duku na papanii-nggu,” wàna.
Na manyura pa-panduangu wàna
13Hàla, hi napanii i Mbalàku lai Mbiliamu, “Màla, ta-kariangu la hau pangia; welingu lai nu peku ita-munya hawiangu-a na banjaru Ihirailu. Ràtu-njawa nyuda welingu lai nu,” wànanya. 14Ka karia-nanyaka i Mbiliamu paraïna i Mbalàku la maràda Hopimu la pinu Palindi Pinggàhu. Lai nu na-pahadangu-mbu pihu mbua ngia pawotu maraku dàngu hi nawotu heu hapi mini dàngu heu mbimbi bumbu la nimbihu-da nuda da ngia pawotu maraku.
15Napanii i Mbiliamu lai Mbalàku, “Ndàdikuwa yiahu, la lihi kameti maraku patunu-mu, ba talànga luanggu nu pa-hàmburu-ya i MIRI lai nu,” wànanya.
16I MIRI na-tàbuku-ya i Mbiliamu hi napanii-nya jàka nggàraya bàdi na patiki-na, hàla, hi na-paràha-nya pabeli lai Mbalàku pa-patàka-nya nu na lii languna i MIRI. 17Ka beli-nanyaka i Mbiliamu hi natàka-nya i Mbalàku ba ndolaku-mana-nyapa la lihina na kameti maraku patunu-na, anguda ba hapajia-ha da liku uru Muapu. I Mbalàku na-paàrangu nggàraya na papanii-na i MIRI, 18hàla tiki-nanyaka yiana na manyura i Mbiliamu,
“Ha Mbalàku, anana i Hipuru, mainguwa,
patingi-nyawa jàka nggàraya na papanii-nggu.
19I Ala nda hama tuna tau-aya
na mamuda la papeka halaera dàngu na ma-mbuhangu pa-kambàliku.
Jàka mbàda pa-njanjingu-naka i Ala,
jiangu-ma duna na pahàra-nya!
Jàka napanii Nyuna,
lupangu na-hàrangu-ma napa!
20Nduma pa-kanyurungu duku ba paràha-ngga;
tàka jàka na-pakanyurungu i Ala
nda peku yila beli-anggunya.
21Lai Yakupu nda paita-aya na akatu;
la Ihirailu nda paita-aya na handuka.
I MIRI, na Alada nyuda, naangu-nja nyuda.
Da-payaaungu ba dawara:
Hanganji-maya duna Nyuna! ba wàda.
22I Ala ma-karia-nja nyuda welingu lai Mehiru;
hama tuna hapi mbàtingu matàmba-ya ba na-pabera ndumada nyuda.
23Nda ningua boharu ma-duluku ba hangganya i Yakupu
nda ningua manyura ma-pawidi ba hangganya na Ihirailu.
Rukuna nuna na banjaru, napanii napa na tau,
‘Tàngaru-ya na pa-hangàtarungu na pawunda-na i Ala!’ ba wàda.
24Ba na-hadangu nuna na banjaru hama tuna bai hingaya,
dàngu ba nandola bànduku hama tuna hinga miniya.
Nda jia manyomba-ana jàka ndedi nanganya na payàpa-na
dàngu naunu-nya na riana na pa-njàkilu-na,” wàna.
25Hàla, panii-nanyaka i Mbalàku lai Mbiliamu, “Jiaka-wa jàka ndau bihu-madu nyumu paràtu-nya na banjaru Ihirailu; na nyuna àmbu jia pa-kanyuru-muhaka!” wànanya.
26Nahema i Mbiliamu, “Ka nda mbàda panii-anggunggau ba lupangu-ma duku ku-pahàra-nya na papanii-nangga i MIRI la hupu liina?” wàna.
Na manyura pa-pandailungu wàna
27Napanii i Mbalàku, “Màla-ndawa ka talua ningu la hau pangia. Raï ai duna hi na-mbuhangu bia i Ala pa-pahia-nggau nyumu lai nu, kau ràtu-ngganya na Ihirailu,” wàna. 28Ka karia-nanyaka i Mbiliamu la pinu Palindi Piuru na-mahanggangu la maràda telangu. 29Napanii i Mbiliamu lai Mbalàku, “Pahadangu-wa pihu mbua ngia pawotu maraku lai yiahu dàngu payema-njawa yiahu pihu ngiu hapi mini dàngu pihu ngiu mbimbi bumbu,” wàna. 30Pahàra-nanyaka hama tuna na papanii-na i Mbiliamu paraïna i Mbalàku. Nawotu kameti maraku heu hapi mini dàngu heu mbimbi bumbu la pinu nimbihu-da da ngia pawotu maraku.
@LAI 1995 Indonesian Bible Society (Lembaga Alkitab Indonesia)