YAHAYA 4
4
1La rehi nu da tau kawini mapihu napa daputa-ya na haàtu na tau mini hi dapanii dànya, “Puli-nggama ka mapeka, nyumu ba lei-manggau ka àmbu mamakia ba nda ma-mangoma. Pangama dàngu pa-pakima màta ka mahimbu wiki-maka duma,” wàdanya.
Ba pamàlaru-ya la Yeruhali
2Napa natàka na rehina i MIRI na-pawiti-nja hi lupa datumbu kamboka da pa-pamula dàngu da pingi ai lundu da-bokulu dàngu da manandangu la paraingu yiana. La lodu nuna napa na tau Ihirailu na mani-kinyapa da-hawola ruku ngalangu-da ihi tanada. 3Haàtu - haàtu na tau na mani-kinyapa la Yeruhali, da tau da papindi-na i Ala la pa-mànangu, napa tau matua wàda-njaka. 4Nawàngu kuaha-na i MIRI napa na-patanda-nya ngera dàngu na-payaha-nya na banjaru-na. Napa na-paili-ya la Yeruhali welingu la ria tau da pa-pameti la paraingu nuna. 5Hàla la pinu Tandula Hiungu dàngu la mbuu ndàbana na tau ma-pauhi lai nu i MIRI natuya na karumangu la lodu, hamanai na-kutungu dàngu na roka ma-hambila la rudungu. I Ala wikima ba nawàngu kuaha-na na ma-pandàda-nya dàngu na ma-kahiri-ya nggubulu-na na paraingu nuna. 6Napa na-pamaü-nya na paraingu la hambàti mbana lodu la harii, dàngu hi natuya ngia pamaü la ura kawalu dàngu ngia pa-hangindingu la làpuru.
@LAI 1995 Indonesian Bible Society (Lembaga Alkitab Indonesia)