Máfíò 11
11
Kíá ɓě sɔ̀ìn Jɔ̃́ɔ́ nyɔ-níɔ-po-nyɔ̀ɔ̀ gboɛ
(Ɖúù 7:18-35)
1Ti ɓɛ́ Jízɛ̀ ɖǎ ma ɔ ɖeín-nà-nyɔ̀ ɓaɖa-bùè sè sɔ̃́ ɓěɔ̀ náún poɛ hwɔɛɛ, ɔ sɔ̀ ma dyí, ké ɔ mu ma hwɔɖɔ ɓě mú, ké ɔ kpa ma ɖé nyɔǔn ɓě ɖɛ tɛ̀mɛ̀ìn, ké ɔ kpa ma ɖé bɔ̃̌ nɔ̀mɔ̀ dyíinɔ̀ cɛ̃ɛ ɖekè.
2Ti ɓɛ́ Jɔ̃́ɔ́ nì ma kpɔɖɔ ɖeín, ké ɔ wɔ̃́ ma ɖɛ ɓě ɓɛ́ Kɛ́ɖɛ́ì nì ma nyuɛń nyɛ jèɛɛ, ɔ ɖoɓo ma ɔ ɖeín-nà-nyɔ̀ ɓěɔ̀ ɖíɛ́ ɓě, ké ɔ dèìn ma wa wuɖu wĩín. 3Ké wa diè ma Jízɛ̀ dyi, ké wa ɖá, “Mɔ̀ mɔ̀ nyɔ ɓéɖé ɓɛ́ m̀ kéà dyiɛɛ̀, mɔɔ à mɛ dè nyɔ kà kò ɖò dyé jè dyéɖé gboò?”
4Ké Jízɛ̀ zà ma ɖé wuɖu, ké ɔ ɖá, “Ɓě mu, ɓɛ́ ɓě ké ɖɛ ɓě dyéà kɛ kè ɖɛ ɓě wɔ̃́à kɛɛ jè Jɔ̃́ɔ́ gbo cɛ̃. 5Ḿ nyuɛ ké nyɔ ɓě kpè ma dyéɖéín dyiɛɛ dyé dyi. Ké ḿ nyuɛ ké kɔ́ɖɔ́-nyɔ̀ ɓěɔ̀ ɓɛ́ìn nàà. Ké ḿ nyuɛ ké caà-nyɔ̀ ɓěɔ̀ káná dyi. Ké ḿ nyuɛ ké sṹú-nyɔ̀ ɓěɔ̀ wɔ̃́ dyi. Ké ḿ nyuɛ ké nyɔ ɓě ɖǎ mɛ́ɛ ɓéɖé fɛ̀ɛ̀ ɖe, ké gǎ-dyé-nyɔ̀ ɓěɔ̀ ɖǎ bɔ̃̌ nɔ̀mɔ̀ dyíinɔ̀ wɔ̃́. 6Mana nì nyɔ ɓɛ́ ɔ se ní jè hwìɖǐǐ-taɓa-taɓa dyi táà ɓá ní nyuu-ɖɛ̀ ɓě jè dyíɛɛ kɔ̃.”
7Ti ɓɛ́ Jɔ̃́ɔ́ɛ̀ ɖeín-nà-nyɔ̀ ɓěɔ̀ nì ma ɖe muɛń nyɛɛ, Jízɛ̀ ɖú ma nyɔ kúɖúú ɓěɔ̀ gbo wùɖù kpàǐ ɓá Jɔ̃́ɔ́ jè dyí. Ɔ ɖá, “Ti ɓě mu ma kà Jɔ̃́ɔ́ gbo ɖé gbǎùn-fúɖúáɔ̀ kɔ̃ɛɛ, ɖɛ́ kɔ̃̀ dyé jè ɓě dè ma hwòɖǒ kɔ̃ɛ́? Ɔ mɔ̀ ma pìǐ ɓɛ́ pìɔ̌ kíɖíà kɛɛ̀? 8Ɖɛ́ kɔ̃̀ dyé jè ɓě mu ma kà kɛ́? Ɔ mɔ̀ ɓɛ́ ɓě ké ma nyɔ po ɖɔ nɔ̀mɔ̀ kɔ̃in múɛɛ dyé jèè? Gmɔ̀ nɔ̄, nyɔ ɓě ɓɛ́ wa po ɖɔ nɔ̀mɔ̀ kɔ̃in ɓě múɛɛ, wa nì ɖé kã́á-gbò ɓě dya. 9Ɖɛ́ kɔ̃̀ dyé jè ɓě mu ma kà kɛ́? Ɔ mɔ̀ ɓɛ́ ɓě ké ma kpáá-ɖɛ̀-cɛ̃-nyɔ̀ ɖò dyé jèè? Ǹdye, ḿ cɛ̃ɛ ɓě gbo kà ɔ mɔ̀ nyɔ kpa ɖɛ ké ɔ zi kpáá-ɖɛ̀-cɛ̃-nyɔ̀ ɖò dyíɛ. 10Jɔ̃́ɔ́ mɔ̀ nyɔ kɔ̃̀ jè ɓɛ́ Gèɖèpɔ́ɔ̀-cèè-ɖɛ̀ɔ̀ cɛ̃à, ké ɔ dyi níiń, ‘Gmɔ̀ nɔ̄, ḿ ɖoɓo ní kíáɔ̀ ɓó m̀ dyúa, ɓɛ́ ɔ ké nì kpaa-hwìèɔ̀ zà’ kɛ. 11Ḿ cɛ̃ ɓě jǎà gbo kà ɓɛ́ ɖé nyɔǔn séín ɓě ɖǎà wóɖóɛɛ hwìɛ̀ kɛɛ, nyɔ ɖò ɓɛ́ ɔ ɓúá dyí ké ɔ zi Jɔ̃́ɔ́ nyɔ-níɔ-po-nyɔ̀ɔ̀ dyíɛɛ se nìɛ. Kɛɛ wɛ̃́ɛ́ kɛɛ, nyɔ mɔ̀ nyɔ ɓɛ́ ɔ se ɖɛ kpa ɖé nyɔ séín ɓě nìà ɖé Gèɖèpɔ́ɔ̀ kã́á-ɓòɖò nìà ɖé dyɔún wɛ̃ kɔ̃ɛɛ hwìɛ̀ kɛɛ ɓúá dyí ké ɔ zi Jɔ̃́ɔ́ dyí. 12Sɔ̀ìn ɓó ti ɓɛ́ Jɔ̃́ɔ́ po ma zio kɛɛ gbo, ɓɛ́ ɔ ké tiɛ̀ gbo dyiɛɛ, wa ɖǎ Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ gbo vɔ̃ gana-kà, ké gana-nyɔ̀ ɓěɔ̀ vɔ̃, ɓɛ́ wa ké ɔ Gèɖèpɔ́ɔ̀ xwa zà gana-kà. 13Kpáá-ɖɛ̀-cɛ̃-nyɔ̀ séín ɓěɔ̀ kè Mózèɛ̀ gmaɔ̀ cɛ̃ ma Jɔ̃́ɔ́ jè tee, hwɛ̀ ké ɔ dyi ma. 14Ké ɔ jǔ ké ɓě dyi wɔ̃́ ɓɛ́ ɓě ké wuɖu ɓě nìà kɛ dyi kpɔ̃ ní, nìí, ɔ xwíníín mɔ̀ Jɔ̃́ɔ́ mɔ̀ Ìɖáájɔ̀ mɔ̀ nyɔ ɓɛ́ ɔ ɓéɖé ɓɛ́ ɔ ké ma kà dyiɛ. 15Nyɔ ɓɛ́ ɔ ɓéɖé ɖùǔ ɓɛ́ ɔ ké dyi wɔ̃́ɛɛ, ɔ mɛ tò ɖùǔ.
16“Kɛɛ ɖɛ́ ḿ ɓɛ́ìn ɓě mɔ̀ nyɔ ɓě nìà kàǔn wɛ̃ɛ dyí poɛ̀n nyɛ́? Ɓě nì kà dyú mɛ́nɛ́ɛ́ ɓě koìn kà dyi ɖé ɖɛ-pèɖèìn-naín nyɛɛ nìà kɛ. Wa ɖíɛ́ ɓě páná mú ɖé wa mǔè ɓě gbo, ké wa ɖá, 17‘À ɓaɖa ma ɓě bìì hwǒ-kùǐ, kɛɛ ɓě se ma dye. À po kpé, kɛɛ ɓě se wìǐn kpá.’ 18Jɔ̃́ɔ́ dyi ma, ké ɔ hwèɖè wɔ̃ kɔ̃, ké ɔ ní ná ma wã́ìn, ké ɓě ɖá, ‘Zùù gbà nì ɔ mú.’ 19Mɔ̄ Nyɔǔn-dyùɛ̀ Dyú-gààɔ̀ dyi, ké ḿ ɖi ɖɛ, ké ḿ ná wã́ìn, ké ɓě ɖá, ‘Gmɔ̀ ɖéa, ɔ kàmà ɖii-ɖɛ̀ jè, ké ɔ mɔ̀ ná-nyɔ̀. Tácì-kpɔ̃-nyɔ̀ ɓě kè nàmàǔn-nyɔ̀ ɓě mɔ̀ ɔ ɓǎto.’ Kɛɛ à dyéɛ kà ɓɛ́ Gèɖèpɔ́ɔ̀ hwòɖǒ-fɔ̀nɔ̀-fɔ̀nɔ̀ɔ̀ kpá jǎà kɛ, dyììn ɖé ɖɛ ɓě ɓɛ́ ɔ nyuɛɛ mú.”
Hwɔɖɔ ɓě kɔ̃̀ mú ɓɛ́ nyɔ ɓě se jǎà poɛ
(Ɖúù 10:13-15)
20Sɔ̀ìn ɓóɛ gboɛɛ, Jízɛ̀ nì ma nyɔ ɓě nì ma hwɔɖɔ ɓě kɔ̃̀ mú ɔ nyu ma zɛ̃̀ìn-ɖɛ̀ pàɖǎ kɛɛ gbo wùɖùɛ̌n, sepóɛɖé wa se ma waà nàmàǔn-kpèɖèɔ̀ dyi táà jè. Ɔ ɖá, 21“Kɔ̀wáɖázììn-hwɔ̀ɖɔ̀ɔ̀ nyɔ ɓě, gboò-wùɖù nì ɓě kɔ̃. Bɛ̀séɖà-hwɔ̀ɖɔ̀ɔ̀ nyɔ ɓě, gboò-wùɖù nì ɓě kɔ̃. Ɔ jǔ ké nyɔ ɓě nì ma kà ɖé Táà-hwɔ̀ɖɔ̀ɔ̀ kè Zíɖɔ̀ùn-hwɔ̀ɖɔ̀ɔ̀ múɛɛ dyi ma zɛ̃̀ìn-ɖɛ̀ jĩ̀ kà dyí ɓɛ́ ɓě dyéà nɔ̄ ɓěɛ̀ hwɔɖɔ ɓěɔ̀ múɛɛ dyé ní, nìí, wa muɔ́ má waà nàmàǔn-kpèɖè ɓěɔ̀ dyi táàùn. Wa muɔ́ má ɖɔ-zɔ̃̀ mú poùn, ké wa muɔ́ má tĩ́ɔ-pɛ̀ɛ̀ mú dyi kòùn. 22Ḿ cɛ̃ɛ ɓě gbo, Gèɖèpɔ́ɔ̀ mu Táà-hwɔ̀ɖɔ̀ɔ̀ kè Zíɖɔ̀ùn-hwɔ̀ɖɔ̀ɔ̀ nyɔ ɓěɔ̀ wìì kɔ̃ ɓéɖéìn ɓó zaa-wɔ̃-po-wèɔ̀ ɓaɖa, ké ɔ mu ɓě mɔ̀ùn dyí ziìn. 23Ɓě mɔ̀ Kɔ̀pánìà-nyɔ̀ ɓěɛɛ, ɓěɛ̀ hwòɖǒ ɖá ɓě ɓɛ́ìn ɓě mìɔùn dyií ɖúɛ, ɓɛ́ ɓě ké ɖé dyɔún nyini, kɛɛ Gèɖèpɔ́ɔ̀ mu ɓě ɓíɖíi poùn ɖé dɛ̀ ɓɛ́ nyɔ ɓě ɖǎà mɛ́ɛ nìà kɛ. Sepóɛɖé ɔ jǔ ké nyɔ ɓě nì ma ɖé Sáɖɔ̀ùn-hwɔ̀ɖɔ̀ɔ̀ múɛɛ dyi ma zɛ̃̀ìn-ɖɛ̀ jĩ̀ kà dyí ɓɛ́ ɓě dyéà nɔ̄ ɓěɛ̀ hwɔɖɔɔ̀ múɛɛ dyé ní, nìí, hwɔɖɔɔ̀ se zɔ̃̌ɔ̀ wáɖáa mu, ké ɔ muɔ́ nììn ke ɓó zɛ̃̌ɛ̀. 24Ḿ cɛ̃ɛ ɓě gbo, Gèɖèpɔ́ɔ̀ mu Sáɖɔ̀ùn-hwɔ̀ɖɔ̀ɔ̀ wìǐn dyéìn ɓó zaa-wɔ̃-po-wèɔ̀ ɓaɖa, ké ɔ mu ɓě mɔ̀ùn dyí ziìn.”
Jízɛ̀ ɖá nyɔǔn mɛ dyi ɔ gbo ɓɛ́ wa ké fɔ̀
(Ɖúù 10:21-22)
25Ɓó tia ɓaɖaa, Jízɛ̀ cɛ̃ɛ ma, ké ɔ ɖá, “Ḿ Ɓǎ, mɔ̀ mɔ̀ nyɔ kɔ̃̀à dyɔɔ̀ kè ɓóɖó-kpàà wuɖuíɛɛ, ḿ po m̀ zùo. Ḿ po m̀ zùo, sepóɛɖé ɖɛ ɓě ɓɛ́ m̀ vǐè ma nyɔ ɓě ɓɛ́ wa dyuò céè-ɖɛ̀ pàɖǎ kɛ kè hwòɖǒ-fɔ̀nɔ̀-nyɔ̀ ɓěɔ̀ dyíɛɛ, m̀ ɖǎ wa nyɔ ɓě se ɖɛ dyuò wɛɛ dyí tɛ̀mɛ̀ìn. 26Ǹdye, ḿ Ɓǎ, m̀ mìɔùn nììn hwòɖǒ wɔ̃́, ké m̀ nyuɛ ma náa.
27“Ḿ Ɓǎ ɖǎ ḿ ɖɛ séín xwáɖáún zàìn. Nyɔ ɖò se mɔ̄ mɔ̀à Dyúɔ̀ kɛɛ dyí dyuò, ɔ sèìn Ɓǎɔ̀ ɖòùn. Ké nyɔ ɖò se Ɓǎɔ̀ dyí dyuò, ɔ sèìn mɔ̄ mɔ̀à Dyúɔ̀ kɛ kè nyɔ ɓě ɓɛ́ mɔ̄ mɔ̀à Dyúɔ̀ kɛɛ mɔ́ ɓɛ́ ḿ ké ɔ dyí tɛ̀mɛ̀ìn nyɛɛ ɖòùn.
28“Ɓě mɔ̀ nyɔ ɓě ɓɛ́ ɓěɛ̀ kũ̀àɔ̀ ku wɔ̃, ké ɓěɛ̀ gbɛ̌ɔ̀ ku xwaa, ɓě dyi ḿ gbo, ké ní muɛ nyuùn ɓɛ́ ɓě ké fɔ̀. 29Ɓě ɖú ní gɛ̀ɛ̀ɔ̀ dyí, ɓɛ́ ɓě kéɛ ɖɔ po, ɓɛ́ ḿ ké ɓě ɖɛ tɛ̀mɛ̀ìn, sepóɛɖé ḿ ɓéɖé hwòɖǒ ɓɛ̀ɖɛ̀ɛ̀-ɓɛ̀ɖɛ̀ɛ̀, ké ḿ dyà ḿ mìɔùn ɓíɖíi, ké ɓě mu fɔ̀-fɔ̀ ɓéɖéìn. 30Gɛ̀ɛ̀ ɓɛ́ ní muà ɓě nyíìn nyɛɛ se ɓéɖéɛń kàmà, ké gbɛ̌ ɓɛ́ ní muà ɓě dú dèìn nyɛɛ fɛ̃́ìn xwa.”
Trenutno izbrano:
Máfíò 11: ƁB02
Označeno
Deli
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi
Bassa Bible © Bible Society Liberia, 2002.