Máɖékà 4
4
Bounɓoɔ̀ zaa-wɔ̃-po-wèɔ̀ nì dyiɛń
1Bounɓo mɔ̀ nyɔ nìà ɖɛ séín kɔ̃in nyɛɛ cɛ̃ɛ ɖe, ké ɔ ɖá, “Gmɔ̀ nɔ̄, wé ɖò nì dyiɛń, ké ɔ mu nììn kà nyɛ-ɓɔ́ɔ́ nìà kɛ. Ɔ mɔ̀ wé kɔ̃̀ ɓaɖa ɓɛ́ nyɔ ɓě ɓɛ́ wa ɓúáìn wa mìɔùn dyíɛ kè hwòɖǒ-kɔ̃in-nyìnììn-nyɔ̀ ɓěɔ̀ mu sĩìn kà mɔɔ́-fèɖè sĩà kɛ. Wa mu ɓó dyi sĩɛ hwɛ̀ìn ɓó wéa ɓaɖa. 2Kɛɛ ɓá ɓě mɔ̀ nyɔ ɓě dyéà ḿ kpéín nyɛɛ jè dyíɛɛ, ní nyɔ-póìn-kpèɔ̀ mu ɓě kɔ̃ dyiìn kà dyóɖó dyià xwáɖáún wóɖó ní, ɔ nyuà nyɔ kɔ̃ fã̀ìn nyɛ. Ɔ mu dyi-káná-káná dyàùn kà dyóɖóɔ̀ ceɔ̀ nìà kɛ. Ɓě mu buɛ̀ìn, ké ɓě mu dyií dyi wãìn kpaùn kà ɓìɖǐ-dyù ɓě ɓɛ́ wa buɛ̀ dyi sɔ̀ìn ɖé gbǒ kɔ̃̀ mú wa wã̀ìn ma kà wa dyiɛɛ nìà kɛ. 3Wé kɔ̃̀ ɓaɖa ní muà ɖɛ ɓěa nyuùn wɛ̃ɛ, ɓě mu hwòɖǒ-kɔ̃in-nyìnììn-nyɔ̀ ɓěɔ̀ ɓíɖíi dyi poùn, ɓɛ́ ɓě ké wa kɔ̃in nà. Wa mu nììn kà púu-púu nìà kɛ, ɖé ɓě ɓo xwíɖíi. Mɔ̄ Bounɓo mɔ̀ nyɔ nìà ɖɛ séín kɔ̃in nyɛɛ mɔ̀ nyɔ cɛ̃à kɛ̀.
4“Gma ɓě ɓɛ́ ḿ nyí ma kà ní gbo-nì-nyɔ̀ Mózè ɖé Sányà-tòɖòɔ̀ dya, ɓó ɓě mɔ̀ Éézùɖùɛ̀-dyù séín ɓěɔ̀ bììɛɛ mɛ nì ɓě hwìɖǐi.
5“Hwɛ̀ ɓɛ́ mɔ̄ Bounɓoɔ̀ ní wé vɛ̀nɛ̀ ku wɔ̃ɔ̀ ké ɓó nyiniɛɛ, gmɔ̀ nɔ̄, ní mu ní kpáá-ɖɛ̀-cɛ̃-nyɔ̀ mɔ̀à Ìɖáájɔ̀ kɛɛ ɓě gbo ɖoɓoùn. 6Ké ɔ muɛ nyuùn ɓɛ́ ɓǎ ɓěɛ̀ hwòɖǒ ké waà dyú ɓě gbo gmɔ̀ìn ɖe, ɓɛ́ dyú ɓěɛ̀ hwòɖǒ ké waà ɓǎ ɓě gbo gmɔ̀ìn ɖe. Ɔ se ná nìǐn, nìí, ní mu dyiìn, ɓɛ́ ḿ ké ɓěɛ̀ ɓóɖó gànáɔ̀ mu gbɔɔ̀.”
Trenutno izbrano:
Máɖékà 4: ƁB02
Označeno
Deli
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi
Bassa Bible © Bible Society Liberia, 2002.