EKESOTE 23
23
Lao o te mauli
1E mole ke fakamafola anai ni loi. E mole ke kau anai mo te tagata agakovi o fai he fakamooni loi ke haofaki ai ia ia.
2E mole ke muli anai i he kaugamalie, o fai he mea ae e kovi; pea e mole ke fakamooni anai i te fakamaauaga kia natou ae e kaugamalie o agatuu ki te mooni.
3E mole ke fakapalatahi anai ki te tagata masiva ki tona fakamaaui.
4Kapau e ke felavei mo te pipi o tou fili pee ko tana asino ae nee hehe, pea e ke aumai anai ia ia kia ia. 5Kapau e ke sio kua higa te asino o tou fili pea kua tatao ia ia e tana amoga, aua naa ke fakalaka, kae ke ke tokoni kia ia, o toe fakatuu ake tana asino ki oluga.
6E mole ke fakalakahalai anai te tagata masiva i te fakamaauaga i he mea ae e tonu ke ina mau.
7E mole ke tuku anai tou taliga ki ni loi, pea e mole ke fakatua anai ki te mate te tagata ae nee mole hala mo te tagata faitotonu; koteuhi ko au ko te Eteleno, e mole au fakamolemole anai ki te tagata ae e hala. 8E mole ke tali anai he meaofa ae e foaki atu kia koe, koteuhi e fakakivi e te meaofa te u mata o natou ae e alaala, pea e natou ulihi te u palalau a natou ae e faitotonu.
9E mole ke fakagauei fakamalohi anai te matapule; e kotou iloi te mea ae e ina logoi, koteuhi nee kotou matapule i te fenua o Esipito.
Aho lalahi; te sapato
10Lolotoga tau e ono, e ke to anai te kele, e ke tanaki anai ona fua. 11Kae i te fitu tau, e mole ke toe to anai ia; e ke tuku anai ke malolo te kele. E kai anai ona fua e te kau masiva o tau hahai, pea e tuku anai te toe ki te u manu o te vao. E ke toe fai feia anai ki te vite mo te olive.
12E ke fai anai tau gaue lolotoga aho e ono. Kae i te fitu aho, e ke malolo anai, o tupu ke malolo foki tau pipi mo tau asino, pea ke mamanava ai foki te foha o tau tagata faifekau pea mo te matapule. 13E kotou taupau anai te u mea fuli ae kua au fakaha kia koutou, pea e mole kotou puaki anai he higoa o he atua kehe: ke aua naa ha i tou gutu tona higoa.
14E ke fai anai o tua tolu i te tau ni aho lalahi kia au. 15E ke taupau anai te aho o te pane hala fakatupu; ia aho e fitu, i te temi ae kua osi i te fakatuutuu i te mahina o te fulumeto, e ke kai anai ni pane hala fakatupu, o mulimuli ki te mea ae nee au fakatotonu atu kia koe, koteuhi nee ke mavae mai Esipito i te mahina aia; pea ke aua naa hau he tahi kia mua o te Eteleno mo ona nima atea. 16E ke taupau anai te aho o te Penikosite, te u uluaki fua o tau gaue, te mea ae nee ke nunusi i te gaueaga; pea mo te aho e tanaki ai te u fua o te kele, i te fakaosi o te tau, i te temi ae e ke tanaki ai anai te u fua o tau gaue i tau gaueaga. 17E tua tolu i te tau te alu a te tagata fuli kia mua o te Aliki, te Eteleno.
18E mole ke momoli fakatahi anai he pane fakatupu mo te toto o te manu ae kua momoli kia au; pea e mole ke tuku anai te gako o taku failaulau ke kaku ki te pogipogi uhu.
19E ke aumai anai ki te fale o te Eteleno, tou Atua, te u uluaki fua o te kele. E mole ke fakamoho anai ni uhii tao i te hua manu o tana fae.
Fakatuutuu ki te taui o Kanaane
20Koeni, e au fekaui atu he aselo i ou mua, ke ina puipui ia koe i te ala, pea mo ina fakakaku ia koe ki te kogamea ae kua au teuteui. 21Tokaga kia ia, o fakalogo ki tona leo; aua naa ke agatuu kia ia, koteuhi e mole ina fakamolemole anai au agahala, koteuhi e nofo toku huafa mo ia. 22Kae kapau e ke fakalogo ki tona leo, pea kapau e ke fai ki te u mea fuli ae e au fakaha atu kia koe, pea e au liliu anai ko te fili o ou fili, pea e au fakafehagai anai kia natou ae e fakafehagai kia koe. 23E haele anai taku aselo i ou mua, pea e ina taki anai ia koe ki te kau Amole, mo te kau Eti, mo te kau Felesi, mo te kau Kanaane, mo te kau Evi mo te kau Sepusi, pea e au tamatei anai natou.
24E mole ke punou anai i mua o onatou atua, pea e mole ke tauhi anai kia natou; e mole ke fakatatau anai mo te u aga o te hahai aia, kae e ke maumaui anai natou pea e ke fasifasii anai anatou fakatata. 25E kotou tauhi anai ki te Eteleno, tokotou Atua, pea e tapuaki anai ia ia kia koutou, e ina foaki atu anai kia koutou te meakai mo te meainu, pea e au fakamamao anai maia koutou te taimahaki. 26E mole mau anai i tou fenua he fafine ae e ina fakato tona faitama, pee ko he fafine paa. E au fakatologa anai okotou mauli. 27E au fekaui anai i ou mua te mataku mai kia au: e au kapu anai te u hahai fuli ae e kotou taui anai, pea e au fakahola anai ou fili fuli maia koe. 28E au tuku anai ki ou mua ni pi fua lalahi, pea e natou kapu anai ke mamao mai ou mata te kau Evi, mo te kau Kanaane, mo te kau Eti. 29E mole au kapu anai natou maia koe i he tau e tahi, o tupu naa liliu anai te fenua ko he toafa, pea naa tutupu anai o lahi kia koe te u manu o te vao. 30E au kapu mamalie anai natou ke mamao mai ou mua, o kaku ki te aho ae e ke liliu ai anai o kaugamalie pea e feala anai ke ke pulei te fenua. 31E au fakatuu anai ou tuakoi mai te tai Kula o kaku ki te tai o te kau Filisitini, mai te toafa o kaku ki te vaitafe; koteuhi e au tuku anai ki ou nima te u hahai o te fenua, pea e ke kapu anai natou i ou mua. 32E mole ke fai anai he hai mo natou, pee mo onatou atua. 33E mole natou nonofo anai i te fenua, koteuhi ke aua naa natou fakahalai ia koe o ke agahala ai kia au; koteuhi kapau e ke tauhi anai ki onatou atua, pea e liliu anai te mea aia ko he puleaki kaka kia koe.
Trenutno izbrano:
EKESOTE 23: WB2011
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland