EKESOTE 16
16
Te mane mo te manulele ko te kaia
1Nee mavae leva te fakatahiga katoa o te u fanau fuli o Iselaele i Elimi, pea nee natou kaku leva ki te toafa o Sini, ae e tuu i te vaha o Elimi mo Sinai, i te aho hogofulu ma nima o te lua mahina, mai tanatou mavae mai te fenua o Esipito. 2Pea nee mumuna te fakatahiga fuli o te u fanau a Iselaele i te toafa kia Moisese mo Alone. 3Nee ui leva e te u fanau a Iselaele kia naua: Kotea ae nee mole tamatei ai matou e te nima o te Eteleno i te fenua o Esipito, i te temi ae nee matou felalai ai ia tafa o te u kulo inasi, i te temi ae nee matou kai ai he pane o makokona? Kae nee kolua taki mai matou ki te toafa aeni ke matou mamate fuli ai i te pakupaku.
4Nee ui leva e te Eteleno kia Moisese: Koeni, e au fakato anai kia koutou he pane mai te atu lagi. E ulu anai te hahai ki fafo, o tae te pane i te aho taki tahi, o fuafua pe ki te mea ae e aoga ki tana kai. E au sio anai i ai pe e kotou fakalogo ki aku lao pee kailoa. 5I te ono aho, ka natou teuteui anai te mea ae nee natou tae, e natou mau anai o tua lua te mea ae nee natou tae i te u aho takitahi.
6Ko Moisese mo Alone nee na ui leva ki te u fanau a Iselaele: I te afiafi aeni, e kotou mahino ai leva ko te Eteleno ae nee ina fakamavae koutou mai te fenua o Esipito. 7I te uhu, e koutou sisio ai anai ki te kololia o te Eteleno, koteuhi kua logo ia ia ki akotou mumuna ki te Eteleno; pea ko ai maua, ke kotou mumuna ai kia maua? 8Nee ui leva e Moisese: E foaki atu anai e te Eteleno kia koutou i te afiafi aeni he kanoi manu ke kai; pea i te uhu apogipogi, e ina foaki atu anai he pane ke koutou makokona ai, koteuhi kua logo te Eteleno ki te u lauga ae nee koutou fai kia ia; pea ko ai maua? E mole ko maua ae e kotou mumuna ki ai, kae ko te Eteleno totonu ae e kotou mumuna ki ai.
9Nee ui leva e Moisese kia Alone: Palalau ki te fakatahiga fuli o te u fanau a Iselaele: Koutou fakaovi mai kia mua o te Eteleno, koteuhi kua logo ia ia ki akoutou muna. 10Nee kei lolotoga palalau ia Alone ki te fakatahiga katoa o te u fanau a Iselaele, kae nee natou mafuli leva ki te potu o te toafa, pea koeni, nee ha te kololia o te Eteleno i te ao. 11Nee palalau leva te Eteleno kia Moisese, o ui: 12Kua au logo ki te u muna o te u fanau a Iselaele. Palalau kia natou: I te afiafi, e koutou kai anai he kanoi manu, pea i te uhu apogipogi, e koutou makokona anai i he pane; pea e koutou iloi anai ko au ko te Eteleno, tokotou Atua.
13I te afiafi, nee olo ake leva ni kaia (manulele) o uufi katoa te nofoaga; pea i te uhu, nee i ai leva he hahau matotolu i te u tafaaki o te nofoaga.
Fakamatala o te mane
14I te puli o te hahau, nee ha leva i oluga o te toafa he mea maninifi o hage ko ni foi fuai fulumeto, he mea maninifi hina o hage ko he nive i oluga o te kele. 15Nee sisio leva te u fanau a Iselaele ki te mea aia pea nee natou fepalalauaki leva: Pe kotea te mea aeni? Koteuhi nee mole natou iloi pee kotea. Nee ui leva e Moisese kia natou: Ko te pane ae e foaki atu e te Eteleno kia koutou ke kotou kai. 16Koeni te mea ae nee fakatotonu e te Eteleno: Ke tahi tae e te tagata te mea ae e aoga ki tana kai, ko te omele e tahi a te tagata taki toko tahi, o mulimuli ki te kaugamalie o te famili; ke tahi tae e te tagata kia natou ae e nonofo i tona falela.
17Nee fai leva ki ai te kau Iselaele; pea nee natou tae leva, ko ihi nee lahi, pea ko ihi nee veliveli. 18Nee fuafua leva ki te omele; pea ko te tagata ae nee lahi tana tae nee mole ina mau he mea ae nee fakalaka, pea ko te tagata ae nee veliveli tana tae nee mole puli kia ia he mea. Nee tae e te tagata te mea ae nee aoga ki tona mauli. 19Nee ui leva e Moisese kia natou: Ke aua naa tuku e he tagata he mea ke toe ki te uhu. 20Nee mole natou fakalogo kia Moisese, pea nee i ai ni hahai ae nee natou tuku he mea o kaku ki te uhu; kae nee ulu leva ki ai ni ugaga, pea nee pala leva te mea aia. Nee ita leva ia Moisese ki te hahai aia. 21I te uhu fuli, nee tae e te tagata te mea ae e aoga ki tona mauli, pea ka hau te vevela o te laa, pea puli leva ia. 22I te ono aho, nee natou tae leva te meakai o liuga lua, ko omele e lua ki te tagata. Nee olo leva te u pule o te fakatahiga o fakaha te mea aia kia Moisese.
Fakatuu o te sapato
23Nee ui leva e Moisese kia natou: Ko te mea aia, ae nee fakatotonu e te Eteleno. Ko apogipogi ko te aho malolo, ko te sapato taputapu aia ki te Eteleno; koutou fakamoho te mea ae e tonu ke fakamoho, koutou fakapula te mea ae e tonu ke fakapula, pea koutou tuku ki te uhu te mea ae e toe. 24Nee natou tuku leva te meakai o kaku ki te uhu, o mulimuli ki te mea ae nee fakatotonu e Moisese; pea nee mole he mea nee kovi, pea nee mole ulu leva ki ai ni ugaga. 25Nee ui leva e Moisese: Koutou kai te mea aena i te aho nei, koteuhi ko te aho o te sapato; I te aho nei, e mole anai kotou toe mau he mea i te u gaueaga. 26E koutou tae anai ia ia aho e ono; pea ko te fitu aho, ko te aho o te sapato, e mole anai kotou toe mau he mea.
27Kae i te fitu aho, nee olo leva ni ihi o te hahai ke natou tae, kae nee mole natou mau he mea. 28Nee ui leva e te Eteleno kia Moisese: Pe e gata afea takotou logo gataa ki aku fakatotonu mo aku lao? 29Ke koutou iloi nee au tuku atu te sapato ke koutou malolo ai, koia ae nee au tuku atu ai te ono aho, te meakai kia aho e lua. I te fitu aho ke tahi nofo te tagata i tona falela, pea ke aua naa toe mavae he tahi mai te kogamea ae e nofo ai.
30Pea nee malolo leva te hahai i te fitu aho.
31Nee tuku leva e te fale o Iselaele te higoa ko te mane ki te meakai aia. Nee hage ia ko te fua o te akau ko te koliate: nee hina, pea ko tona kakano, nee hage ko he foi keke meli.
32Nee ui leva e Moisese: Koeni te mea ae nee fakatotonu mai e te Eteleno: Koutou too he mane ko te omele e tahi, pea ke koutou taupau ia ia ki okotou hakoga, o tupu ke natou sisio ki te pane ae nee au foaki atu ke koutou kai i te toafa, hili taku fakamavae koutou mai te fenua o Esipito. 33Nee ui leva e Moisese kia Alone: Too he ipu, pea ke fafao ki ai he mane o fuafua ki he omele, pea ke tuku kia mua o te Eteleno, ke taupau ki okotou hakoga. 34Nee tuku leva e Alone te ipu mane ki mua o te fakamooni, o mulimuli ki te fakatotonu ae nee fai e te Eteleno kia Moisese.
35Nee kai leva e te u fanau a Iselaele te mane ia tau e fagofulu o kaku ki tanatou tau ki he fenua ae kua nofoi; nee natou kai leva te mane o kaku ki te tuakoi o te fenua o Kanaane.
36Ko te omele ko te vaega hogofulu aia o te efa.
Trenutno izbrano:
EKESOTE 16: WB2011
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland