Mika 2
2
Mananu Wane Watusu-yaka Asi Wula
1Mananu kayali le wane watukanaka
akambu wa kolo,
Watutshaka kolo lu tangi yawo!
Lamʼatuhutoka unya, vo watukitshaka,
Ne dia to keko lu wulu wʼanya awo.
2Vo watokomiyaka dikambo,
watudiosaka,
Ndu mvudu, ku watuyihotolaka.
Vo watusuyaka untu la khumbu
kandi, untu la ukito andi.
3Diako mbata Latuyalaka ati:
Nyuki, dimi lambusanguya dia ntshela
khumbu kene kolo,
Kahanyeya ndawuya kingu yanyu,
Kuyanga nkendakenda lʼutaku,
Ne dia oso ayuyala etena ka kolo.
4Lushi loso, wayunyukela yukedi,
wayulela delu diʼokei;
Wayuta vati: Shu tambushila ushiki.
Ndi ambukadimula etenyi ka wudja
ami.
Ndi wuhu ambundukinya uma le mi li!
Ndi ambukahanya dikambo diasu le
akanga wʼuhedia.
5Diako mbahanyuyala la untu
layunyedikela okodi.
Lu eukelu kʼuwali lu lusanganya la
Latuyalaka.
6Tusambishaki — Osoku mbatusambishaki.
Untu tasombishaki akambu wa wuhu
one. Sonyi hatundi.
7Nyu khumbu ka Jakoba, ololo vo
mvuta akambu aso?
Nyuma ka Latuyalaka ambushimbama?
Aha etsha andi ene?
Aui ami hawutshela one latokendakendaka
usimbwi ololo?
8Keli nyu nyatunelaka dia ndo la
wudja ami uku utunyi.
Nyu nyatukululaka akanga memakana
ahondo,
Wane watetaka la ki, waha la kanyi
ya ta.
9Nyu nyatutshanyaka amantu wa
wudja ami.
Uma lu khumbu yawo yatuwongenangenaka.
Nyu nyutunyaka anʼawo uma lu
lutumbu lami pundju.
10Nyuneli, nyutshu,
Ne dia one kema dihuli dianyu dia
mumuya.
Mindu kambudilanya, la elanyelu ka
wulu.
11Utunduyala untu omotshi ayeteta,
Ayutataka aui wa lukesu lu aihuli la
dihuli,
Ati: Oimi layunyusambisha dia wanu
la dinono dia wulu,
Tshiki ndi kutuyala usumbisha wa
wudja one!
12Mete, dimi layusanganya utundu aye
tshe, we Jakoba.
Mete, dimi layusanganya atshikadi wa
Isariyele.
Dimi layamotsha kame uku ekoko
weli lʼukutu,
Uku limba la dungalunga lu dihuli
diawo diʼelelu.
Vo wayutsha lundju la wuki lu
dikambu diʼului wʼantu.
13Uhandjudi aketi la ntundu kawo.
Vo wakahandjula lukuki,
Waketi la suku, ku wakatumbi loko.
Khumʼekanga kawo aketi la ntundu
kawo,
Ku Latuyalaka lolombo lawo.
Trenutno izbrano:
Mika 2: TLL
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
La Bible en Otetela © Allianee Biblique de la Republique Democratique du Congo, 1991