Ezekiyele 45
45
1Lamʼayunyukahanya kete ya sangu lu eukelu kʼuwali, kanyukimo etenyi ka kete le Latuyalaka yediko yeli lʼutali wa kubita nunu akumi ahendi la tanu lʼutali, la nunu dikumi lu wekeki; yo tshe yayuyala ekila. 2Kose dihuli dia kubita kama tshanu lʼutali, la kubita kama tshanu lu wekeki, beke diedimi uma lʼetshi kako; ndu kubita akumi atanu ne dia seke dia lʼutshimba tshe. 3Kediki dihuli lu etenyi kako ka kete, yediko ya kubita nunu akumi ahendi la tanu lʼutali, kubita nunu dikumi lu wekeki; dia etemwelo ndjala loko, lu dihuli diuleki ekila. 4To keli etshi kʼekila lu kete; to kayuyala kʼelombedi watutshaka ulimu lʼetemwelo, watusukanaka dia ntshela Latuyalaka ulimu. Leko kayuyala mvudu yawo ndu kayuyala dihuli diʼekila ne dia etemwelo. 5Etshi kekina keli lʼutali wa kubita nunu akumi ahendi la tanu, wekeki kubita nunu dikumi, kayuyala lʼasi Lewi, wane watutshaka ulimu lu etemwelo, uku etenyi kawo ka sangu, dia vo mpika esumta wa mbidjase loko. 6Kanyediki etshi ka kubita nunu tanu lu wekeki, la kubita nunu akumi ahendi la tanu lʼutali, uku kete ya sangu yʼusumba. To kayusimbo la etshi kʼekila too; to kayuyala dikambu dia utundu wa khumbu ka Isariyele.
7Etenyi kʼuwandji, kayuyala lu emamu ehendi wʼetshi kʼekila, la etshi ka kete yʼusumba. To kayusimbo lʼokongo wʼetshi kʼekila ndu lʼokongo wʼetshi ka kete yʼusumba, lu wedi wʼusumba. Utali ato ayuyala uku utali wa etshi kemotshi kakawedia umaka ulelu wa lu leke lʼedjelu edja ndu lʼulelu wa lu leke lʼehutwelu. 8Oso ayuyala kete yandi, etenyi kandi ka sangu lu Isariyele. Okone ewandji ami hawengiya wudja ami ntu, keli vo wayukimwela khumbu ka Isariyele kete uku wedja awo.
9Khumadiondjo Latuyalaka kata ati: Ambukuka! nyu ewandji wa Isariyele, nyunya akambu wa ngala la etshelu ka mpotola diango: nyutshaki akambu wʼusimbwi ndu wʼololo. Nyukimo etshelu ka nkambia antu ulimu la khudu, mbata Khumadiondjo Latuyalaka. 10Nyuyali la tediko ta shikaa ta mbedika diango: kilo ka shikaa efa ya shikaa, la bata ya shikaa.#45:10 Lew. 19:36. 11Efa la bata kawuyali yediko otoi: bata kotoki etenyi otoi ka dikumi ka homera pupu. Yediko yawo kayosami uma lu homera. 12Shekele yanyu kayuyali shikaa, ngera akumi ahendi. Toshekele tutanu, katuyali toshekele tutanu; la toshekele dikumi, katuyali toshekele dikumi. Mina kaye, kayali toshekcle akumi atanu.
13Onʼeli yediko yʼulambu yayunyukimoka: etenyi otoi ka samalu ka efa lu homera otoi kʼepunga wa menge la etenyi otoi ka samalu ka efa lu homera otoi kʼepunga wa yelela. 14Lu dikambu dia iso, etenyi ka dikumi ka bata ka iso lu kora otoi (kora otoi mbotoka bata dikumi uku homera). 15Kawukimoki okoko otoi uma lu ekoko kama hyendi wale adiyu wʼashashi lu Isariyele ne dia ulambu wa shima, ulambu wa lutshumba, la ulambu wa ki, dia vo ndjala ekesanelu, mbata Khumadiondjo Latuyalaka. 16Kawushaki uwandji wa Isariyele ulambu one. 17Uwandji ayuyala la okende wa nkimo ulambu wa lutshumba, elambu wa shima, la elambu wa dinono lu nshi ya waki lu talelu ta ngondo, lu nshi ya mumuya, la lu nshi ya waki tshe yakawashikike lu khumbu ka Isariyele. Ndi kalambulaki elambu wa kolo, elambu wa shima, elambu wa lutshumba, la elambu wa ki, dia ntungela khumbu ka Isariyele ekesanelu. 18Khumadiondjo Latuyalaka kata ati: Lu lushi la ntundu la ngondo ka ntundu, kose osongo a ngombe waha la ekomo dia mbedia etemwelo. 19Olombedi kose dikila diʼulambu wa kolo, kadimonge lu dikoho dia lu suku diʼetemwelo, lu atshuku anei wa ekingo wʼediakelu, ndu lu dikoho dia suku dia seke dia lʼetei. 20Kutshelaki wane watutshaka kolo ya-hawatungi lutunga, kana uma lu dinginya diawo, wuhu ako lu lushi lʼesambeli la ngondo. Osoku mbayunyedia etemwelo. 21Kanyuyalaki la lushi la wuki lʼelekanelu lu lushi la dikumi la anei lu ngondo ka ntundu. Dambu kadiuyalaki nshi esambeli; kawolekaki ma diaha la edya lu nshi yako.#45:21 Etum. 12:1-20; Wal. 28:16-25. 22Lushi lako, uwandji kakimo osongo a ngombe, ulambu wa kolo lu dikambu diandi la dikambu diʼantu tshe wa lu wedja. 23Kalambulaki esongo wa ngombe esambeli, la ekoko a waumi esambeli waha la ekomo la lushi la lushi, lʼatei a nshi esambeli yako ulambu wi lutshumba le Latuyalaka; la mbudi kʼumi la lushi la lushi ne dia ulambu wa kolo. 24Ndi kalambuli ulambu wa shima, yediko ya efa otoi lu osongo lʼosongo a ngombe, efa otoi lu okoko lʼokoko wʼumi, la hina otoi ka iso lu efa la efa. 25Lushi la dikumi lʼatanu la ngondo kʼesambeli, ndi kalambulaki wuhu ako wʼelambu wa kolo, wʼelambu wa lutshumba, ndu wʼelambu wa shima kame la iso yediko ya nshi esambeli.#45:25 Lew. 23:33-36; Wal. 29:12-38.
Trenutno izbrano:
Ezekiyele 45: TLL
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
La Bible en Otetela © Allianee Biblique de la Republique Democratique du Congo, 1991