Danyele 8
8
Danyele Ambena Enelo kʼOkoko wʼUmi la Mbudi kʼUmi
1Lʼeleku ka satu ka diulelu dia khumʼekanga Beleshaza, dimi Danyele lakenyi enelo kekina ladiku dia kene kakamenyi ntundu. 2Lamʼakimi lu mena enelo kako, akafani uku dimi laki la Susa, usumba a wuki wa lu leke la Elama; ndu lu enelo kami, dimi lakatanema lʼumamu wʼokedi wʼUlai. 3Ku dimi lakedia ashu, lakendi, menyi ku okoko wʼumi waki la seki hyendi one wemadi lʼumamu wʼokedi. Seki yako hyendi yaki etali, keli lomotshi lakaleki lukina utali. Lone lakaleki utali, mbakayutumba lʼokongo. 4Dimi lakenyi okoko wʼumi ako wakakhunguso utsha lʼedjelu, utsha la ngelʼa kushi ndu utsha la diku dia kushi, nduku nyama kakeyi nshikikala la ntundu kawo, nduku lakeyi mbohotola engo kakawandi. Vo wakatshaka uku akawalangaka; vo wakayambiyaka.
5Lamʼakamashishimaka, menyi ku mbudi kene kayayi uma lu edjelu, kakakindula ladiku dia kete tshe aha ndjikamela. Mbudi kako kaki la luseki la wuki lʼasa ashu. 6To kakakumi pulu le okoko wʼumi waki la seke hyendi, wakawenyi wemadi lʼumamu wʼokedi. To kakawumamela la ududu ato tshe. 7Dimi lakakienyi kasukana la okoko wʼumi, kawuka kele. To kakakomola okoko wʼumi, kakawokola seki hyendi. Okoko wʼumi kundjala la wulu wa ndo la to. To kakawumbi la kete, kakohotshahotsha. Ku nduku lakiko dia mbushimbela. 8Mbudi kʼumi kako kakayaete wuki efula. Lamʼakatayala la wulu, luseki la wuki lakoko. Ku lu dihuli diako, seki nyei yakatumbi utsha lu beke nei dia pepe ya lʼulungu.
9Uma lʼatei a luseki lomotshi kakatumbi shekiseki. Yo yakatahamaka otekoya utsha la diku dia kushi, utsha lu ehutwelu, ndu utsha lu kete ya lutumbu. 10Yo yakayala wuki otekoya, yakalo la ului wa lʼulungu. Yo yakakosha amotshi wʼuma lʼului wa lʼulungu ndu wa toto uya la kete,#8:10 Eny. 12:4. yakahotshahotsha. 11Yo yakatamanya ndjaete wuki, yakayakalo la uwandji wʼului wa lʼulungu. Yo yakohotola ulambu wa lutshumba wa lushi la lushi, ndu yakalanya dihuli diʼetemwelo kandi. 12Ului wa lʼulungu wakakimwama kame la ulambu wa lutshumba wa la lushi la lushi ne dia kolo. Shekiseki yako yakakasha mete la kete, ku yo yakangonya elimu ayo tshe. 13Dimi lakuki ukilami omotshi ateketa, ku ukilami ukina akambula one lakateketaka ati: Edja ndu kaandi ayushidiyama enelo lu dikambu dia ulambu wa lutshumba wa la lushi la lushi, ndu lu dikambu dia kolo katulanyaka? Edja ndu kaandi ayukimwama etemwelo la ului wa lʼulungu mpotshahotshama? 14Ku ndi akûkaluya diui ati: Edja ndu nshi kinunu lukama la akumi atanu, ku etemwelo mbediama.
15Lamʼakamenyi, dimi Danyele, enelo kako, ndu lamʼakamayangaka dia nimbitela kitshimudi yato, menyi ku efanelu kʼuntu kene kemadi la ntundu kami. 16Ku dimi lakuki diui diʼuntu omotshi uma lʼatei wa Ulai ahangohango ati: Ngabiriyele,#8:16 Luk. 1:19, 26. ulimbitshiya untu uku enelo. 17Okone ndi akayi uya le mi, ku lamʼakandasukana la le mi, dimi lakuki woma, lakako ekhukhumadi. Keli ndi akamvutela ati: Onʼa untu, uhukami, enelo kene keko lu dikambu dia etena kʼekumelu.
18Kamʼakandateketa la mi, dimi lakandama la nindi, elundji kolaa lu kete. Ku ndi akamunanda, akamemadia. 19Ndi akati ati: Enda, dimi lutsha nkulimbitshiya akambu wayuyala lʼekumelu kʼetena ka kele, ne dia enelo kako keko lu dikambu dia etena kakawashikike. 20Okoko wʼumi wakayenyi, waki la seki hyendi. Seki yako yeli khumi ya dikanga yʼasi Mediya ndu yʼasi Peresiya. 21Mbudi kʼumi eli khumʼekanga ka Ngirika. Luseki la wuki leli lʼasa ashu ato, leli khumʼekanga ka ntundu. 22Seki nyei yakatumbi dia nkita luseki luku lakoko, eli waulelu anei wayutumba lu wudja ako, keli vo hawuyala la wulu uku wandi. 23Lʼekumelu ka diulelu diawo, lamʼayufulanela antu wa kolo, khumʼekanga ka ngala keya akambu wushami, ayutumba. 24Wulu andi wayufulanela, keli aha uma lu khudu kandi hita. Ndi ayutsha waenelo wa mamba, ayuluwanya elimu andi, ayulanya antu wa wulu, ndu wudja wʼekilami. 25Uma lu yimba yandi, mbayunduhamia lukesu lu elumbwelu kandi. Ndi ayuyatumbula lʼutema, ayudiaka antu efula wakadjase la lutui tshitshi. Ndi ayunela dia ndo la uwandji wʼewandji, keli ndi ayulanyema, aha la lunya lʼuntu. 26Enelo ka pindju la akolo kakayenyi keko mete. Ulamaki enelo kako, tukitaki. To keko lu akambu wahatayi weki nshi efula la ntundu.
27Ku dimi Danyele lakako balakata, lakayala la kandji nshi motshi. Lʼokongo diku, dimi laketo, lakatshaka elimu wa khumʼekanga. Dimi lakakanana dia enelo kako, keli nduku untu lakakilimbetela.
Trenutno izbrano:
Danyele 8: TLL
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
La Bible en Otetela © Allianee Biblique de la Republique Democratique du Congo, 1991