Danyele 4
4
Nebukadineza Ambudjo Dadi
1Dimi, khumʼekanga Nebukadineza, katela antu tshe, wedja tshe, la eteketa tshe wa la kete nti: Ki efula kayali le nyu! 2Aki ololo dimi nyulimbitshiya tulimbitelu la akambu wa mamba wakamenya Khumʼulungu Unyashungu.
3Ndi tulimbitelu tandi waki li!
Ndi akambu andi mamba li!
Diulelu diandi, dieko diulelu dia
pundju,
Diayuyalaka lu nonga la nonga.
4Dimi, Nebukadineza, lakadjaseka ki lu luudu lami, ndu lakenaka olo lu luudu lami la khumʼekanga. 5Dimi lakenyi do diakambutsha woma. Tukanyi takamakanaka lamʼakimi lu tangi, la waenelo wakamenaka, wakampenyahenya. 6Okone dimi lakadjanga dia vo mbela asi yimba tshe wa lu Babilona la ntundu kami, dia vo nimbitshiyami kitshimudi ya do diako. 7Ku akanga wʼaloho, asaki wʼawulu, asi Kaladiya, la ateketshishi wa djimu wakayi. Dimi lakasakwela do, keli vo kumbeya nimbitshiyami kitshimudi yadio. 8Keli lʼokongo diku, Danyele, letawo vati: Beleteshaza, lukumbu la etemolatemola kami, luludi too la nyuma ka ditemolatemola diʼekila, akayi la ntundu kami. Ku dimi lakusakwela do diami nti: 9Beleteshaza, olombodi wʼakanga wʼaloho, unimbitshiya waenelo wakamenyi lu do la kitshimudi yawo; ne dia dimi mbeyaka nti: Nyuma ka ditemolatemola diʼekila keko le ye, la nduku dikambu diushami diayukuheka. 10Lanʼeli waenelo wakamenyi lamʼakametami lu mbetu kami. Lamʼakimi lu menda, menyi ku utamba wʼutali tshwaa one weli la kete. 11Utamba ako wakayala wuki la wulu, sodi kawo kakakumi pulu ndu lʼulungu, ndu wakawenaka lu kuma tshe ya kete. 12Akatshi awo waki amena, ndu elua awo waki efula. Vo wakatokaka elua wʼantu tshe nde. Nyama ya la kete yaketamaka lu dedi diawo, la fudu ya lʼulungu yakatshaka kefu lu tahi yawo, ndu engo tshe keli la lumu, kakalekaka mbu ya nde uma loko.
13Dimi lakenyi waenelo lamʼakametami lu mbetu. Lakenyi ulami omotshi, untu lʼekila one ayahulo uma lʼulungu. 14Ndi akahangohango wulu ati: Nyuyukuli utamba, nyokote tahi yawo, nyokondjole akatshi awo, nyuhandjuli elua awo. Nyama ya la kete yamo uma la tshina diawo, ndu fudu ya lʼulungu uma lu tahi yawo. 15Nyutshiki ehekeli keli la ediu lu kete, nyukikeleki la molola wa luwulu ndu wʼohotela lʼatei wʼadiyu wʼomongela wa lʼusui. Ndi kaloyamaki la lopopo uma lʼulungu, ndu kalekaki adiyu wa lʼusui uku nyama. 16Utema wʼuntu wayumo uma le ndi, ku utema wa nyama wayuyala le ndi, osoku tena esambeli diayulekana. 17Elumbwelu kene, keli didjangu dia wane watulamaka; esangweyu kene, keli olembe wʼekilami, dia wasena mbeya vati: KhumʼUlungu kuledi lu diulelu diʼantu. Ndi katushaka one lalangandi disha, ndu katumbiyaka one luleki tshitshe dia ndjala umbuledi adio. 18Oso eli do diakamenyi, dimi khumʼekanga Nebukadineza. Okone we Beleteshaza, unimbitshiya kitshimudi yadio, ne dia akanga a yimba tshe wa lu diulelu diami, haweyi nimbitshiyamidio. Keli we mbeyaka, ne dia nyuma ka ditemolatemola diʼekila keko la ye.
19Ku Danyele, letawo vati: Beleteshaza, akamene diui; tukanyi tandi takohenyahenya. Khumʼekanga akawutela ati: Beleteshaza, do ne kana kitshimudi yadio tawukuhenyahenyaki. Beleteshaza akûkaluya diui ati: Khumemi, do ne diayali le wane watukuhetshaka, la kitshimudi yadio le atunyi aye! 20Utamba wakayenyi, wakuli utali ndu wakayala wulu, wakakumi sodi kawo pulu ndu lʼulungu, wakenamaka la kuma tshe ya kete. 21Vo waki la akatshi wʼamena ndu elua efula, la mbu ya nde yakakuki le tshe. Nyama ya la kete yaketamaka la tshina diawo, la fudu ya lʼulungu yakatshaka kefu yawo lu tahi yawo — 22oso eli we, we khumekanga! We kakahami, kakayala wulu. Ku wuki aye wakafulanela, wakambela pulu ndu lʼulungu; la diulelu diaye diakakumi pulu ndu la kuma ya kete. 23Khumʼekanga, we akenyi ulami omotshi, untu lʼekila, ayahulo uma lʼulungu, lakati ati: Nyunyukuli utamba one, nyulanya. Keli nyutshiki ehekeli kawo keli la ediu lu kete! Nyukikeleki la molola wa luwulu ndu wʼohotela lʼatei wʼadiyu womongela wa lʼusui. Ndi kaloyamaki la lopopo lʼuma lʼulungu. Ndi alekaki adiyu wa lʼusui uku nyama, edja ndu tena esambeli diambulekana. 24Khumʼekanga li, oso eli kitshimudi ya do! Do diako dieko didjangu dia KhumʼUlungu, diambundudjanga dikambu diaye, we khumemi khumʼekanga. 25Wayukutshanya uma lʼatei wʼantu, ku we ayudjase kame la nyama ya lʼusui: wayukuleshaka adiyu uku ngombe. We ayoloyama la lopopo lʼuma lʼulungu, ku tena esambeli diayukulekana, edja ndu we ambulimbitela wati: KhumʼUlungu kuledi lu diulelu diʼantu, la ndi atudishaka one lalangandi. 26Lanʼeli kitshimudi ya didjangu, dia ntshika ehekeli kʼutamba keli la ediu kene. Diulelu diaye diayushilikala le ye lamʼayuyulimbitela wati: Ulungu kuledi! 27Uma lu dikambu so, khumʼekanga etawo aui ami ane. Ukimo ntsha kolo, utshaki ololo; ukimo ehedia aye, ukaki amenyi fono ketshi. Undu we ayokolamela mpumoka lukulu lʼolo.
28Akambu aso tshe wakashidiyama le khumʼekanga Nebukadineza. 29Lʼokongo a ngondo dikumi la hyendi, khumʼekanga aketetaka lu luudu landi la khumʼekanga la Babilona. 30Ndi akatundja diui, akati ati: Aha Babilona ka wuki kene, kakamahiki dia dihuli dia khumʼekanga mbidjase, uma lu wulu wa khudu kami, ndu ne dia lutumbu la wuki ami? 31Kamʼakateketaka khumʼekanga, diui diakayi uma lʼulungu ati: We khumʼekanga Nebukadineza, lambukutela nti: Diulelu diambumo uma le ye. 32Wayukutshanya uma lʼatei wʼantu, ku we ayudjase kame la nyama ya lʼusui; wayukuleshaka adiyu uku ngombe, osoku tena esambeli diayukulekana, edja ndu we ambulimbitela wati: KhumʼUlungu kuledi lu diulelu diʼantu, la ndi atudishaka one lalangandi disha. 33Ku etena kako, diui diako diakashidiyama le Nebukadineza. Wakawutshanya uma lʼatei wʼantu. Ndi akalekaka adiyu uku ngombe; dimba diandi diakaloyamaka la lopopo lʼuma lʼulungu, edja ndu divu diandi diakadwanela uku sala ya pungu, la kala yandi uku ya fudu.
34Lamʼaketi etena kako dimi, Nebukadineza, lakedia ashu utsha lʼulungu, ku lakayala la yimba ntu. Dimi lakatumbula KhumʼUlungu, lakandula ndu lakalemia one latulumbaka pundju.
Ne dia diulelu diandi, dieli dia pundju,
Diayuyalaka lu nonga la nonga.
35Antu wa la kete tshe
Weko paka anyanya lu ashu andi.
Ndi atutshaka uku alangandi lʼatei
wʼului wa lʼulungu
Ndu lʼatei wʼantu va la kete.
Ku nduku leya nshimba lunya landi,
Kana mbumbula ati: Katshaye na?
36Lu etena kako, yimba yakakalula, ndu lutumbu la diulelu diami, wuki ami, la nemo diami diakakalula le mi. Andaki ami la dihangamendi diami wakayakaka le mi. Dimi lakashikikala lu diulelu diami ntu, la wuki ami wakatekoyaka mpama. 37Kakiane dimi, Nebukadineza, lambandula, lambutumbula ndu lambolemia khumʼekanga ka lʼulungu, ne dia elimu andi tshe weko ololo, la mbuka yandi yeko esimboki. Ndi mbeyaka nkitshakitsha waku watokendakendaka la utaku.
Trenutno izbrano:
Danyele 4: TLL
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
La Bible en Otetela © Allianee Biblique de la Republique Democratique du Congo, 1991