46
Ge Jekob na Atwa Ubwa Sụmɛ ni Ijipti
1Ge Jekob shɛdɛnjɛ ga tahaŋnụ tu bwa, bee suji iyi elele nɛ baa 'yajɛ, bee ci Biɛ-shiba, bee peni Agwatana bishi bwa ga Azik ụrụpɛ.#Umoz 26:23-25 2Nazhɛ Agwatana jɛmɛ n-ndumwa ne Jekob no ozobu na amɛ ụjita ata, bɛɛ hiɛŋ, E-Jekob, E-Jekob.
Ge Jekob leni, bɛɛ hiɛŋ bu, Oo Gamba na.
3Agwatana hiɛŋ bụ, Gamba N shɛ Agwatana shibi. Ta nda inyɛsɛ Ijipti tizha o, N zhɛ ma nda ajalalo bu udenji ụ'wụtụ 'wụtụ apata. 4N zhɛ ma zhagaga na bụ mo zwo ni Ijipti, Ngɛɛ zhɛ kaa du me gwuricinje ajalụ bụ na cɛnjɛ tu ga sasana. Go Josɛf zhɛ ba nama na bụ na aka na ɛbi zhɛ bo 'wo.
5Nazhɛ ge Jekob ishijɛ, bee beni ni Biɛ-shiba. Ibɛ miaụŋ mu bwa mi shepi bu, ta miaụŋ ma aba mi tidice dice, te eyikwo aba ni ihɛŋtu ɛtɛ ga Faro tumwanɛ maa a shapɛ bụ. 6Bee sugeneni du iyimabiga ya aba, ti i'wɛŋnɛ ya aba elele nɛ aa ga 'yajɛ na cɛnjɛ ti Kenan, ee zhe ni Ijipti. Ge Jekob suji atwa umwamwa ubwa kpaaŋ bee hwuri.#Ugo 7:15 7Medenji miaụụ mu bwa me eyi, na ajalụ ubwa eyi, na miaụŋ mu bwa mo o, ta ajalụ ubwa o o, a na miaụŋ mu bwa me eyi mi meci, bee zhe ni Ijipti.
8Nzeci ma atwa Jekob a na 'wa bụ ni Ijipti na. Ge Jekob na miaụŋ mu bwa me eyi. Gɛ Rubɛn yɛu ibwɛ ihiiŋ.
9Miaụŋ-me-eyi mu Rubɛn na: ga Hanok, na Palu, ne Hezron keeni Kami.
10Miaụŋ-me-eyi mi Simion na: gɛ Jɛmuɛl, na Jamin, no Ohad, na Jakin, no Zoha keeni Shaul na bee meci ni yɛu-yo-o ya atwa Kenan.
11Miaụŋ-me-eyi mi Livai na: gɛ Gɛshon, no Kohat keeni Mɛrari.
12Miaụŋ-me-eyi mu Juda na: Gɛ Shɛla, nɛ Pɛrɛz keeni Zira. Gɛ Ɛɛ keeni Onan 'wi la na cɛnjɛ ti Kenan. Miaụŋ-me-eyi mi Pɛrɛz na: ge Hezron keeni Hamul.
13Miaụŋ-me-eyi mi Isaka na: go Tola, no Pua, na Jashub keeni Shimron.
14Miaụŋ-me-eyi mi Zɛbulon na: ge Sered ne Ilon keeni Jaliɛl.
15Mu na ata muba mɛ shɛ miaụŋ na ge Lia metenji Jekob nu Padan-aram, mu na ga mu namɛ swooŋ ni yɛu ibwɛ yo o ga Daina. Ufwugwo miaụŋ mu bwa me eyi keeni mu na mo o kpaaŋ mu namɛ talacɛ-na-muba-mu-tatụ.
16Miaụŋ-me-eyi mu Gad na: ge Zefion, na Hagi, no Shuni, nɛ Ɛzbon, ne Iri, na Arodi keeni Arɛli.
17Miaụŋ-me-eyi mu Ashɛ na: ge Imna, ne Ishva, nɛ Beria medenji Sera bụngwụfwụ ba aba. Miaụŋ-me-eyi mu Beria na: ge Hebɛ keeni Malkiɛl.
18Ajalalo Jekob abana Zilpa, na ga Laban peni Lia yɛu ibwɛ yɛu yo o ta. Hwɛɛ aba namɛ aba umpwa-na-ba-ecihiŋ.
19Miaụŋ-me-eyi mi Rechɛl biyikwo Jekob na: go Josɛf keeni Bɛnjamin. 20Ga Asɛnat yɛu-yo-o Potifɛra bunongbo bu On kaa metenji Josɛf miaụŋ-me-eyi mi yebi ni Ijipti, ga Manasɛ keeni Ifrem.#Umoz 41:50-52
21Miaụŋ-me-eyi mi Bɛnjamin na: gɛ Bɛla, nɛ Bɛcɛ, na Ashbɛl, ne Gira, ne Neaman, ne Ehi, no Rosh, no Mupim, no Hupim keeni Ad.
22Ajalalo Jekob eyi abana Rechɛl hwɛɛ namɛ aba umpwa-na-ba-eneshi.
23Yɛu-ye-eyi Dan na: go Hushim.
24Miaụŋ-me-eyi mu Naftali na: ga Jaziɛl, no Guni, ne Jezɛ, keeni Shilɛm.
25Ajalalo Jekob eyi abana Bilha, na ga Laban peni Rechɛl yɛu ibwɛ yo o, kpaaŋ aba namɛ ebe cenje.
26Atwa Jekob a na shɛ umwamwa ukɛnyi ibwɛ, a na zhe ni Ijipti, kpaaŋ aba namɛ atwa dupu-ne-eshe-umpwa-na-ba-ecihiŋ (66). A 'imɛ shɛ atashɛ ubwa o. 27Miaụŋ-me-eyi mu na ee metenji Josɛf ni Ijipti mu namɛ mi yebi. Oo togotogwu atwa ihwɛ Jekob a na namɛ ni Ijipti kpaaŋ, a namɛ ya atwa dupu-nu-woshi (70).#Ugo 7:14
28Ge Jekob tumwanɛ Juda maa hwulo umbe nu bwa maa zha no ofwo Josɛf maa sokokono bu uhwaŋna Goshɛn, ee ci cɛnjɛ tu Goshɛn. 29Nazhɛ go Josɛf imanjɛ ụhaŋtụ ubwa na idɛkwɛ yo kokwulo, bee munji maa twa ne bishi bwa ge Isrɛl nu Goshɛn. Aka na ta a twa, go Josɛf keri bishi bwa u'ala ni i'ilu, bee leyiteni bu, baa cwɛ-u'wo ni i'ilu ibwɛ te ilegeji duwa.
30Ge Jekob hiɛŋ Josɛf, Go mo 'wo ya okwo hwuwayɛ go, taa tu Ngaa kwụbɛ eshe bu, N ngee mepi shi maa bu ta namba o.
31Go Josɛf hiɛŋ bishi bwa keeni atwa ihwɛ ibwɛ, N zhɛ me mbishe Faro, mɛ hiɛŋ bụ, Bishi mi keeni atwa ihwɛ mi a na ga namɛ na cɛnjɛ ti Kenan kpaaŋ, o tuwo ya pi mi. 32N zhɛ me mbishe bu du maa atwa ata kaa shɛ a'iywa-agwụdụ, a shɛ abɛjɛ iyimabiga. E suje kaa agwụdụ aba, ti inɛ ya aba keeni iyi elele nɛ aa 'yajɛ. 33Aka na ga Faro ihiɛ suyanɛ, bɛɛ hiɛŋ, Imbe shɛ ugondu hiiŋ? 34Hiɛŋ bụ ma, Miaụŋ-mu-ugondu ga bụ mɛ shɛ abɛjɛ iyimabiga, te kwune taa na cɛnɛnɛ tu tu uuwa i ci taa hwayɛ. Ta atuba te eshi tu, iwɛ maa tuba hiɛ gɛga na cɛnjɛ tu Goshɛn. Iwɛnɛ po bɛbɛjɛ bi iyimabiga be elele shanɛ Ejipti iyi-tupwaŋ.