UMOZHIGO 32
32
Tumama Imanga ti Jekob maa Twa ne Isụ
1Ti ge Jekob shɛdɛnjɛ tahaŋnụ tu bwa, ibɛ atumwa-azuba Agwatana twa nu bwa. 2Aka na tu baa kwụbɛ aŋ, bɛɛ hiɛŋ, Ugba wa Agwatana na! Ibɛ po boo po apata izeci maa Mahanaim.#32:2 Mahanaim: Egini Mahanaim i shɛ, tusotulonu ti yebi kwo kaa orubwo eyebi kwo kaa agba eyebi.
3Ge Jekob tumwanɛ atumwa nu umbe ubwa maa e zhe no ofwo batagwụ bwa ge Isụ, na namɛ na cɛnjɛ ti Sei, na shɛ u'una Idụm. 4Bee sekekeni aŋ, bɛɛ hiɛŋ, Gana ɛhi zhɛ hio mbiso iyɛri ɛtɛ mi ge Isụ na, hiɛŋ bu ma, Bujama ata bụ ge Jekob hiɛŋ, N njɛ ụlashɛ no ofwo Laban, apata Ngee ilegeji tutu i ci aka ga. 5N 'yajɛ kaa inɛ, na agwụdụ, ni iyweywe, na ajama eyi keeni ajama o o, ibɛ po Ngaa tumwanɛ maa e bi mbishi gabụ iyɛri mi, iwɛ maa hieci inyɛmɛnyɛmɛ mi.
6Ibɛ atumwa ata gwure no ofwo Jekob, ɛɛ hiɛŋ bụ, Ti zhe eti ci batagwụ ata bụ ge Isụ, be ci ba kaa maa mɛ bi tɛjɛ uhwaŋna, atwa akpakwụ-eyebi (400) kaa 'wa bụ.
7Ibɛ po ge Jekob kwuni inyɛsɛ tɛnda duwa ohwulu kwuni bu tuhoroko, boo dwotwogonu du atwa na namɛ nu bwa orubwo eyebi, ta agwụdụ, ti inɛ, ti iyweywe, keeni nruhondo. 8Bɛɛ hiɛŋ, Yaa shɛ ge Isụ iricinji hwayɛ urubwo uko, urubwo uyebi tuba zhɛ wa banangana.
9Ge Jekob hiɛŋ, Oo Agwatana ugwunukwoshi mu ga Abraham, na Agwatana bishi mi ga Azik. Oo AGWANGWAMA, gabụ kaa bi n hiɛŋ, Gwulo na cɛnjɛ tụ bụ no ofwo udenji bu, nazhɛ iyi elele zhɛ ma bụ zhɛmana. 10N lanɛ shɛ kaa no tulubo ti biye te elele keeni tɛcara te elele tu na abu n ndanɛ, Gamba yɛu gɛ bu ugondu o. No bukwuto kiri Ngɛɛ kɛshɛ la Jodan ga, ama hwuwayɛ N 'yajɛ ya iyi orubwo eyebi. 11Ma bu tabwa maa n leshiji ni i'ɛlɛ batagwụ mi ge Isụ. Ma nda inyɛsɛ ibwɛ, iwɛ maa baa zhajɛ hwayɛ bu ma tu kwụna hwɛɛ, to ono, ta miaụŋ. 12Ama gabụ kaa bu dumwa, ɛbi hiɛŋ, N zhɛ ma nda maa ge iyi elele ibu zhɛmanɛ, N zhɛ kaa ma nda maa ajalalo bu a shɛ gana ahwayɛ itekwu, a na e eri shi a rɛta ufwugwo wa aba.#Umoz 22:17
13Ge Jekob zokwu apata nụ ụrụmɛ ata, bee suji iyi nɛ baa 'yajɛ apata maa ima batagwụ bwa ge Isụ ugaiŋ. 14Iyweywe namɛ kpakwụ (200), epi namɛ woshi, agwụdụ o o namɛ kpakwụ (200), adagba namɛ woshi. 15Nruhondo mu na mosubo ma aba mu ta 'yajɛ meni mu namɛ talacɛ keeni miaụŋ ma aba, inɛ yo o namɛ buhanda, inɛ ye eyi namɛ umpwa, nzhinyacɛ mo o mu namɛ woshi nu nzhinyacɛ me eyi umpwa. 16Bee suji ijɛ hwɛɛ bee utegeni miaụŋ-mu-ugondu ubwa edingbe edingbe, bɛɛ hiɛŋ miaụŋ-mu-ugondu ubwa, Mizha no mo hwulono ma, ga ahanga nama na ashashɛ udingbe we elele.
17Bee sekekeni atwa na hwuri umbe, bɛɛ hiɛŋ, Aka na batagwụ mi ge Isụ twa ne hiŋ, bee hi heŋteni, bɛɛ hiɛŋ, Atwa aba ahiɛ shɛɛ? Ce ɛhi zhɛɛ? Gaaba 'yajɛ ijɛ ahiɛ 'wananjɛɛ? 18Nazhɛ ɛhi zhɛ hiɛ hiɛŋ bụ, Ge Jekob yɛu bụ ugondu, ubwa 'yajɛ iŋ. Upwaŋ na baa bụ tumwananɛ gabụ iyɛri ibwɛ na. Shɛ inɛ ɛtɛ kiri o, bwaata du be ci ne ekwunyi tu.
19Gobwonu du bee sekekeni bụtụ bi yebi, na bụtụ bu tatụ keeni atwa elele na untanganɛ udingbe ata iyimabiga maa, ga shɛ iwɛ ɛtɛ ike ike ɛhi zhɛ hio mbiso hwayɛ Isụ aka na ahiɛ twa nu bwa. 20I shɛ tilɛɛ maa hi hiɛŋ bụ, Shɛ inɛ gɛ kiri o, yɛu-ugondu ɛtɛ bu ge Jekob, bwaata du be ci ne ekwunyi tu. Iwɛnɛ po bi heŋshi, bɛɛ hiɛŋ, N zhɛ mo lomicingo bu amɛ nu upwaŋ ga Ngee hwuricinji umbe ne mi, na aba ibɛ nazhɛ Ma kwụba eshe ubwa, nekeshi bo hioko inyɛmɛnyɛmɛ mi. 21Ibɛ po ge Jekob hwuricinji upwaŋ ata umbe nu ubwa, ubwa ni ikɛnyi ibwɛ tuba zokwu nu ugba ata nụ ụrụmɛ ata uuwa iyi heri.
Ge Jekob Twa Ifelu na Butumwa-ba-azuba
22Ge Jekob ishijɛ nụ ụrụmɛ ata gbaa, bee suji eyikwo ubwa eyebi, ne eyikwo ubwa magɛgashɛ eyebi keeni miaụŋ mu bwa umpwa-nu-boo-ko bee keshi ofwo na Urefu Jabok iri shi. 23Bee suji aŋ bee keshicinji nu uhwulwo ata keeni iyi elele nɛ baa 'yajɛ du. 24Ge Jekob vwɛ ya bwooko ne ekwunyi, nazhɛ bụtụ bu ko twa ifelu nu bwa uuwa iyi kwuni tusuje. 25Aka na bụtụ ata kwụbɛ maa bi eri shi ba fwuga Jekob o, bee timengeni tuta ti i'unte ibwɛ, ibɛ po u'unswa Jekob shɛshɛgwa gana na tu ba twa ifelu nu bwa. 26Nazhɛ bụtụ ata hiɛŋ Jekob, N ngenji ya mo hwulo, iyi tɛ ye suje.
Ama ge Jekob jishijɛ bụ, bɛɛ hiɛŋ, Yaa shɛ ebi m peni shi uwebiye, N zha shɛ ma bu ganga maa hwuri o.#Hos 12:3,4
27Nazhɛ bụtụ ata heŋteni bu, bɛɛ hiɛŋ, Nana ɛɛ hiɛŋ izeci buu?
Ge Jekob jishijɛ bụ, bɛɛ hiɛŋ, Ɛ mɛ n hiɛŋ ge Jekob.
28Nazhɛ bụtụ ata hiɛŋ bụ, A zha shɛ ɛ hiɛŋ ya izeci bu ti ge Jekob, ama te Isrɛl.#32:28 Isrɛl: Egini te Isrɛl i shɛ, ifelu tutwa na Agwatana. Iwɛnɛ ta abu twa ifelu na Agwatana keeni atwa, abụ fwụjɛ aŋ kaa.
29Nazhɛ ge Jekob heŋteni bu, bɛɛ hiɛŋ, Ma bu tabwa, m mbishi izeci bu.#Ajɛmɛ 13:17,18
Ama bụtụ ata jishijɛ bụ, bɛɛ hiɛŋ, Iwembe po obo hoŋtono iwɛ izeci mii? Bee peni Jekob uwebiye apata.
30Ibɛ po ge Jekob po ofwo ata izeci maa Pɛniɛl.#32:30 Pɛniɛl: Egini Pɛniɛl i shɛ, ụpɛshɛka wa Agwatana. Bi hiɛŋ, Eshe mi twa na a na Agwatana, Ngaa ta ya kaa uraiŋ waa. 31Uwaŋna bonuo ya ti ge Jekob kɛshicɛ pɛniɛl ata. Boo shikoto iwɛ u'unswa ubwa na shɛshɛgwa. 32Iwɛbɛ po E'lsrɛl yɛ shɛ bini bi i'unte usunda taa hwayɛ, iwɛnɛ ti bee timengeni la bini bi i'unte Jekob.
Currently Selected:
UMOZHIGO 32: RBT
Označeno
Share
Copy
Want to have your highlights saved across all your devices? Sign up or sign in
Rubassa Bible © Bible Society of Nigeria, 2008